Izikiɛ 15 - Bible

Zaŋ bilaŋɔɔi gbɔmɔi mai

¹ Yâwɛɛ è lono ḿbɔ ǹyɛɛi,

² “Núu-kpune ǹóŋ, yâ pɔri kpɔmɔ kɔɔ̂ŋ ni léŋ wolâai wuru woŋo ma?

³ Núu da a pɔri sɛŋ da kpɛtɛ̂i a kpɔmɔ yɛ̂ɛ wuru? Vé tí a dɔnɔ kpîŋ. Yâ pɔri kpɔmɔ kpɛtɛ̂i a sɛŋ da íseɣe sɛlɛŋ ma yɛ̂ɛ wuru? Vé tí a dɔnɔ kpîŋ.

⁴ Da bili ŋɔ ŋɔŋ-ŋa a kɔi. À kɛ̀ tí zũa-kâna pere feerɛ a kéreŋ, gɛ ni zamai a kpala. À kɛ̀ tí, lé ƃé da nâa pɔri gɛi la? Dífa nâa pɔri sɛŋ da kɛ̂i la.

⁵ Tãi è kɛ̀ la a ǹɛ́lɛɛi, tíi kɛ̂i fé kɛ́ ní ma. Gɛ ni, tãi da nâa gereŋ lai, lé ƃé nâa da pɔri gɛi lai. Dífa nâa pɔri sɛŋ da kɛ̂i la.”

⁶ M̀ɛnii Ŋ̀wála-wâla kélee Yâwɛɛi è mòi ká ŋí: “Yɛɛ berei nɔ ŋa gbɔmɔi kɛ́ la a kɔi ǹɔɔ-wuru-ŋai samai nyii ŋá gereŋ, bere ƃé ŋa paî Zerusâlɛŋ ƃelai kɛ̂i la.

⁷ Ŋa pâi díkula maa kɛ̂i. Berei máŋ díkula la ŋɔŋ sui, ŋɔŋ a pâi dí kereni. Ǹyaŋ tãi ŋa pâi díkula maa kɛ̂i lai, ka pâi gɔlɔni a gɛɛ ńyãa ƃa Yâwɛɛ.

⁸ Ŋa pâi dílɔii lɛɛ̂i a bûŋ, kpɛ́ni fêi dífe téniŋ ƃó tua kɛ́ ni a ńyãa.” Ńyãai a Ŋ̀wála-wâla kélee Yâwɛɛi ńyãa ƃé mò ti.