Izikiɛ 14 - Bible

Ɣâla è bôlu tɔɔ ɣâla da kpɛ́ni fɛli mɛ̂ni ma

¹ Eezuɛ láa tuɛ ƃelai da-ni dípa ḿbɔ naa dísee ŋ̀ɛi-tuɛ díkɛ m̀arê kɛ é pîlaŋ Yâwɛɛ tua pere ma.

² Nya ƃe Yâwɛɛ è lono ḿbɔ ǹyɛɛi,

³ “Núu-kpune ǹóŋ, ǹûai ŋí da dí ɣâla-pɔɔkɔŋ-ŋai siɣe dílii su a gɛɛ díkɛ sɔnyɔ̂ŋ kɛ. Ǹyaŋ díɣâla-pɔkɔɔŋ-ŋai da díperei kpaâŋ dí ŋ̀ɛi fa ŋɔ́nɔ kwaa kaa. Da gaai yɛɛ sɛŋ ƃé ŋa pâi díkili-ŋa ponoi?

⁴ “M̀ɛni ma mò dîa nyii-ŋai ńyãa Yâwɛɛ ŋá mòi diai. Eezuɛ ǹúu nyii kélee a ŋɔŋâla-pɔɔkɔŋ siɣe ǹíi-sui nyii a berei kpaaŋ ŋɔsɔnyɔ̂ŋ sui, é pá ɣála ŋɔlono-kɛ-nuui pɔ naai ńyãa Yâwɛɛ, ńyãa kpîŋ ƃe pâi ŋ̀óo su tooi ŋɔɣâla pɔɔkɔŋ támaa-ŋai mɛ̂ni ma.

⁵ Ŋa pâi gɛi tí a gɛɛ ŋá Eezuɛ-ŋai nyii-ŋai ŋ̀âla-pɔɔkɔŋ ŋai da dílii penei kɛ́ dítinaŋ ḿbɔ naa pere.

⁶ “Mɛni ma, m̀ó Eezuɛ-ŋai dîa, Ŋ̀wála-wâla kélee Yâwɛɛi ǹyɛɛi, ‘Ka kálii pene ka kápôlu tɔɔ káɣâla-pɔɔkɔŋ ŋai dîa. Ka tinaŋ ka káŋɛi siɣe ká mɛni nyɔmɔɔ-ŋai dîa.’

⁷ “Eezuɛ ǹúui nyii pâi bôlu tɔ̂ɔi mâ, kpaa máŋ ŋ̀ɔyãai nyii zéɛɛ káa Eezuɛ-lɔii sui nyii a bôlu tɔɔ mâ gɛ ɣâla-pɔkɔɔŋ fɛlii nyii a bere kpaaŋ ŋɔsɔnyɔ̂ŋ sui, à pà ɣâla-ŋɔlono-kɛ-nuui pɔ́ é m̀arê kɛ́ ḿaa mɛni ma, ńyãa Yâwɛɛ ńyãa kpîŋ ƃé pâi ŋ̀óo su tôoi.

⁸ Ŋa pâi ŋɛ́i seêi màa nuui tí ma. Ŋa pâi gɛi a sɛŋ kɔɔ̂ŋ ma sɛŋ ká mɛni ma. Ŋa pâi gulai ŋánûai sama, gɛ̀ ni, ka pâi gɔlɔni a gɛɛ ńyãa ƃa Yâwɛɛ.

⁹ “A kɛ̀ ɣâla ŋɔlono-kɛ-ǹuu da a núu da pɛlɛ, gɛ ni, ńyãa Yâwɛɛ ƃé ɣâla ŋɔlono-kɛ-nuui tí pɛlɛ. A kɛ tí, ŋa pâi m̀aa ǹúui tí kulâi ŋánûai Eezuɛ-ŋai sama.

¹⁰ A kɛ tí, da pâi díkpɔɔi sɔnyɔ̂ŋ maa fela-fêi kɛ̂i. Ɣâla ŋɔlono-kɛ-nuui da ǹúui nyii pâi pâi bɔ naai dífeerɛ ŋɔ dísɔnyɔ̂ŋ a pâi kɛ̂i a bɔriɛɛ.

¹¹ Ŋa pâi nyíŋi kɛ̂i a gɛɛ Eezuɛ-ŋai dífa ŋɔ́nɔ dípôlu tɔɔ la mâ dí dímaa-tĩa kara a dísɔnyɔ̂ŋ ŋai. Ŋa pâi gɛ̂i tí a gɛɛ díkɛ a ŋánûa ńyaŋ ŋ́gɛ ƃò a Díɣâla.” Ŋ̀wála-wâla kélee Yâwɛɛ ƃé mò tí.

Núu da fé pâi pûi m̀ɛni-ŋa teɛɛi ŋí yêei

¹² Yâwɛɛ è lòno ḿbɔ ǹyɛɛi,

¹³ “Núu-kpune ǹóŋ, a kɛ̀ lɔii-ŋuŋ da a sɔnyɔ̂ŋ kɛ̀ a ńyãa ve tûa ní a téniŋ ƃo pere, ŋa pâi ǹyée sãai ŋa ŋɔmii-sãai kulâi kara. Ŋa pâi puru tôo dîa ŋá ǹûai da vɛnɛ-sãai kélee paa.

¹⁴ A kɛ̀ ǹúu saaƃai ŋí, Nôa, Dãya da Zôo díkɛ m̀aa lɔii tí su, díteniŋ ƃó laai nɔ́ ƃé kɛ̀ pâi dí ƃaloi. Ŋ̀wála-wâla kélee Yâwɛɛi ǹya kpîŋ ƃé mò tí.

¹⁵ “Kpaa máŋ, ŋâa pà fɛnɛ-sãa tɛɛ̂i ǹɔii kpîŋ su dí naa sãa kélee kpɔ́ su kara é lɛ̀ɛ a bûŋ. À kɛ̀ tí, núu da kpîŋ fa pɔri tɛɛi naa, kpɛ́ni fêi vɛnɛ-sãai da pâi kɛ̀i naa.

¹⁶ A ǹɛɛ ma kpîŋ Nôa, Dãya da Zôo díkɛ nâa, dífe pâi pɔrii dínîa-pɛlɛɛi kula yêei kɛ̂i, tãi nɔ ńyãai a Ŋ̀wála-wâla kélee Yâwɛɛi nyii gáa a gɛ ɣele m̀a Ɣâlai ŋ́gaa ɣele mai. Dîi pɔri nɔ́ díkpîŋ ŋuŋ mâ ƃoi. Kɛ́lɛ ǹɔii a pâi lɛ̂ɛi a bûŋ.

¹⁷ “Kpaa máŋ ŋa kɔ́ tôoi ǹɔii tí su ŋa pa a kɔ́-kɔ-sãa kpaya-kpaya ŋá ǹaa ƃele da vɛnɛ-sãai kélee páa.

¹⁸ Ŋ̀wála-wâla kélee Yâwɛɛi è mò, a kɛ̀ Noa, Dãya da Zôo da kɛ m̀aa lɔii tí su, dífe pâi pɔrii dínîa-pɛlɛɛi kula yêei kɛ̂i. Kɛ́lɛ dîa kpîŋ nɔ́ ƃé pâi ŋuŋ ma ƃó sɔlɔ ƃoi.

¹⁹ “À kɛ̀ ŋa ǹíi ŋwàna ŋá kɔlɔ-fêla nyɔ́mɔ tɛ́ɛ m̀aa lɔii tí su, é ǹûai da vɛnɛ-sãai páa,

²⁰ a kɛ Nôa, Dãya da Zôo díkaa naa, tãi nɔ ŋ́gaa la ŋ̀ele mai, dífe pâi pɔrii dínîa-pɛlɛɛi kula yêei kɛ̂i. Dîa kpîŋ ŋɔ ƃe pâi ŋuŋ mâ ƃó sɔlɔ ƃoi díteniŋ ƃó laai sarâi.”

²¹ M̀ɛnii Ŋwâla-wala kélee Yâwɛɛi è mòi ǹya ƃa, “Ŋa pâi ŋá mɛni kula maa kɛ́ pere ǹáaŋ tɛɛi Zerusâlɛŋ. Dîa ƃa, kɔ́, puru, lɔɔ-fɛnɛ-sãa, da kɔlɔ-fela a gɛɛ dínûai da vɛnɛ-sãai su-kara.

²² À kɛ̀ díta a ƃàlo da dínîa-pɛlɛɛ-ŋai dí kúla naa dípa ípɔ naa, ye díkaa. Yá pâi gâai berei díkaa la a ŋwana-lɔ̂ɔ-ƃelai. Gɛ̀ ní, yà pâi gɔ́lɔnîi a gɛɛ ḿve Zerusâlɛŋ kula maa kɛ̂i a fili-pere.

²³ Yà pâi kɛ̂i a ílii láa a berei ŋa díkula maa kɛ́ la dísɔnyɔ̂ŋ-ŋai mɛni mai. À kɛ̀ tí, ya pâi gɔ́lɔnîi a gɛɛ ḿve díkula maa kɛ́ ní nɔ́ kpɛ́ni-kpɛni. Ŋ̀wála-wâla kélee Yawɛɛi ƃé mò tí.”