Izikiɛ 10 - Bible

Yâwɛɛ ŋɔfólo-laai è kùla Ŋ̀âla-pɛrɛ Kɛ́tɛi mu

¹ Ǹaa kɛ́ɛ tíi, ŋá ŋ̀ele-kɔ̂lɔŋ su kàa nyii kɛ̀ ŋ̀âla-taa kôoŋ-sãai ŋuŋ mɛi. Sɛŋ da è kɛ̀ naa nyii kɛ̀ yɛ̂ɛ kâloŋ-see-sɛŋ nyii dí gbɛ̀tɛ a kɔni bûluŋ-kɛɛ sɔ̃ɔ kpanaŋɔɔi.

² Nya ƃe Ɣâla è mò ǹúui kɛ̀ a m̀aa ɣiriɛɛ a zeɣe nɛnɛ-fɛfɛi ma ǹyɛɛi, “Lí ílɔ gáraŋ-ŋai loai nyii-ŋai díkaa ŋâla-taa kôoŋ-sãai mu perei. Íyee láa fɛ́ɛ a ŋɔŋ-téŋa nyii gáa ŋ̀âla-taa kôoŋ-sãai loai, í dáa-tâa daa-lêei mɛi.” Nya ƃe ŋá lɛ̀ɛ gâai é lɔ́ naa.

³ Ŋ̀âla-taa kôoŋ-sãai díkɛ̀ tɔɔ̂ni Ŋ̀âla-pɛrɛ Kɛ́tɛi kaŋ kɔlɛ yá-kwara pere. Tãi ǹalôŋ è lɔ́ la naai, ŋ̀ele-kɔ̂lɔŋ-kolei è ziɣãŋ su pere siɣãŋ láa fɛ̀ɛ.

⁴ Yâwɛɛ ŋɔfólo-laai è nâa kùla ŋ̀âla-taa kôoŋ-sãai mɛi é lí bɛ́rɛi lá-ƃerei. Ŋ̀ele-kɔ̂lɔŋ kolei è bɛ́rɛi láa fɛ̀ɛ. Yâwɛɛ ŋɔfólo-laai é Ŋ̀âla-pɛrɛ Kɛ́tɛi ŋɔsiɣãŋ láa fɛ̀ɛ.

⁵ M̀ɛnii ŋí kɛ́ɛ a kɛ́i, ŋ̀âla-taa kôoŋ-sãai koôŋ tíŋ è tɛ̀ kpɔ́ núu kɛ́ mɛ̀ni ziɣãŋ duɛ-tuɛi su pere. Díkoôŋ tiŋ è kɛ̀ nɔ́ yɛ̂ɛ Ŋ̀wála-wâla kélee Ɣalai wóo.

⁶ Yâwɛɛ è mò ǹúui kɛ̀ a m̀aa ɣiriɛɛ a zeɣe nɛnɛ-fɛfɛ̂i mâ ǹyɛɛi, “Ŋɔŋ-têŋai síɣe nyii gáa gáraŋ-ŋai da gôoŋ-sãai loai.” Ǹalôŋ è lì é tɔ́ɔ gáraŋ-ŋai kɔlɛ.

⁷ Ŋ̀âla-taa kôoŋ-sãai dɔnɔ è ńyee sã̀a m̀arâai sáma é ŋɔŋ-têŋai sîɣe é dɛ́ɛ ǹúui kɛ̀ a maa ɣiriɛɛ a zeɣe nɛnɛ-fɛfɛi pɔ́. È ŋɔŋ-têŋai sîɣe é lî la banaŋ mâ.

⁸ Ŋá sɛŋ da kàa ŋ̀âla-taa kôoŋ sãai koôŋ mu móloŋɔɔ núu yée mà.

⁹ Ŋá ŋɔ́nɔ nàa kàa ŋá káraŋ náaŋ káa gɛ́ ƃò ŋ̀âla-taa kôoŋ-sãai kɔlɛ tɛi-tɛ́i. Gáraŋ-ŋai ŋí díkɛ̀ kpɔ́ fôloi yɛ̂ɛ kɔni sɔ̃ɔ kpanaŋɔɔ.

¹⁰ Gáraŋ-ŋai ŋí kélee kpɔ́ kpɛtɛ pêre è kɛ̀ nɔ́ a zîi tɔnɔ dí pilíɛɛ díkîei. Ya kâa díkaa nɔ́ yɛ̂ɛ káraŋ tɔnɔ.

¹¹ Díkelee da kâa kìliŋ nɔ́ ƃéla kélee ma dífa tînaŋ. Kɛ́lɛ, da kɛ̀ kilínîi, ƃɛ́i kélee duɛ pere ŋɔi a ŋ̀ɛi tìnaŋ naa perei, nàa pere nɔ́ ƃe díkelee da lî naa pere dífa tînaŋ.

¹² Gáraŋ-ŋai ŋí kélee ŋɛ́i-gao è kɛ̀ kpɔ́ a dínaŋɔɔ ŋ̀wóli-la ǹyée pîlaŋɔɔ gîei. Ŋɛ́i-gao è kɛ̀ ŋɔ́nɔ zoŋ-kɔ̂li-ŋai kélee dîa.

¹³ Ŋa m̀ɛni díkɛ gáraŋ-ŋai tôli a tínaŋ-karaŋ.

¹⁴ Ŋ̀âla-taa kôoŋ-sãai ŋí kélee ŋɛ́i è kɛ̀ ŋuŋ mâ gîei náaŋ. Ŋ̀ɛ́i duɛ-tuɛi è kɛ̀ yɛ̂ɛ ɣâla-taa kôoŋ-sãa. Veerɛi kɛ̀ ƃò yɛ̂ɛ núu-kpune. Zaaƃai kɛ́ ƃò yɛ̂ɛ yala-sûlu. Ǹáaŋ kɛ́ ƃò yɛ̂ɛ kuɛ.

¹⁵ Goôŋ-sãai ŋí nɔ́ ƃé ŋá díkàa Siƃa-ya-leei kɔlɛ. Tãi goôŋ-sãai ŋí dítɛ la ŋ̀elei sui, da gáraŋ-ŋai ƃé tɛ̀.

¹⁶ Tãi dí díkoôŋ fùlomo la díkɛ kòoŋ ŋ̀elei sui, gáraŋ-ŋai díkɛ̀ nɔ́ díkɔlɛ ma.

¹⁷ À kɛ̀ goôŋ-sãai da kpèra da tɔ̀ɔ, gáraŋ-ŋai dia máŋ da kpêra dítɔɔ. À kɛ̀ da tɛ̀ ŋ̀elei su, gáraŋ ŋai dia máŋ da tɛ̂ ŋ̀elei su. Kpɛ́ni fêi ŋ̀âla-taa kôoŋ-sãai dímɔ̂leŋ è kɛ̀ gáraŋ-ŋai mɛi.

¹⁸ Nya ƃe Yâwɛɛ ŋɔfólo-laai è nâa kùla Ŋ̀âla-pɛrɛ Kɛ́tɛi lá-ƃerei é tɛ́ goôŋ-sãai mɛi pêre.

¹⁹ Ŋ́gɛɛ ǹaa kâai, ŋ̀âla-taa kôoŋ-sãai dí nâa díkoôŋ fùloŋ díkoôŋ dítɛ ŋ̀elei su da gáraŋ-ŋai díli vóloi kulâi pere siɣãŋ lá Yâwɛɛ ŋɔpɛ́rɛi ma. Ǹyaŋ Eezuɛ-ŋai Díɣâlai ŋɔfólo-laai è nâa kɛ̀ dí mɛi.

²⁰ Goôŋ-sãai ŋí ƃé ŋá díkàa Eezuɛ-ŋai Díɣâlai mu Siƃa-ya-leei kɔlɛ. Ǹyaŋ ŋɛ́i pɔ̀ɔ è lɛ̀ɛ dîa a gɛɛ díkɛ̀ a ɣâla-taa-kôoŋ sãa.

²¹ Díkelee díŋɛi è kɛ̀ náaŋ-nàaŋ, díkoôŋ kɛ̀ ƃò náaŋ-nàaŋ. Sãâ díkɛ̀ díkoôŋ mu gɛ́ ƃò yɛ̂ɛ núu yée.

²² Ǹyaŋ díŋɛi è kɛ̀ nɔ́ yɛ̂ɛ nyii-ŋai ŋá gàa Siƃa-ya-leei kɔlɛi. Díkelee kpɔ́ díkɛ̀ nɔ́ liî díteniŋ ma dítuɛ-pere.