Ikilisiati 5 - Bible

Káfe kono-tee kɛ̀ a maa félaa

¹ Kà lì Ɣâla ŋɔpɛ́rɛi mu, ka kámɛi káa. Kà lì ka káwoli tɔ́ɔ a ǹɛ́lɛɛ. Káfe kákili tɔ̀ɔ kásâla kula sãai dîa, yɛ̂ɛ berei m̀oo-ƃelai da gɛ̀ lai. Dífe gɔ́lɔŋ a gɛɛ da mɛni nyɔ́mɔɔ kɛ̂i.

² Káfe lòno a maa félaa. Káfe kono-tee kpala kɛ̀ Ɣâla ŋɔpɛ́rɛi mu. Ɣâla káa ŋ̀elei su, ká kɛ́ ƃò ǹɔii ma. Mɛni ma, kà kɛ̀ lônoi Ɣâla ŋɔpɛ́rɛi mu, ka mó a gbua.

³ Berei nɔ́ núu a gíli ŋá sìa la é see-woo támaa ƃói, bere nɔ ƃé núu a lòno la a dámaa a mɛni-ŋa ƃò nyii núu fa târe gélee sui.

⁴ Ka kono-tee kɛ̀, ka ŋ̀aa-see kɛ́ a maa félaa. Ɣâla fé wɛ́li ní a ǹúui a kono-tee kpala kɛi. Ka kákono tèe, ka ŋ̀aa-see kɛ́.

⁵ À kɛ̀ kono-tee ŋ̀aa-see kɛ́-sɛŋ fé káyêei, káfe kono-tee kɛ̀. Kɛ́lɛ ka kákono tèe, ka ŋ̀aa see kɛ́.

⁶ Káfe ǹɛɛ naa kánɛŋ é ká píli sɔnyɔ̂ŋ su. À kɛ̀ tí, ka mó zâla láa-soŋ-nuui ma kâai, “Kúfe gíri ní.” Káfe ǹɛɛ naa Ɣâla é ǹíi ŋwána kâa é ká kɛ́-mɛni su kara.

⁷ See-woo da lóno támaa káa nɔ́ kpɛ́ni-kpɛni. Ka ƃaa kɛ́-maa tɛ́ɛ Ɣâla pɔ́.

Fúlu-laa káa nɔ́ kpɛ́ni-kpɛni

⁸ Ya gàa ǹúu mɛi-ƃelai díkɛ gôlo-ƃelai lùaŋ núu da fé naa é lóno dímɛni ma, vé kɛ̀ a guláa a yá. Kpɛ́ni fêi, kâloŋ-ŋa kélee díkaa díkîe-ni wóo pôlu, ǹyaŋ ǹúui ŋɔwála-walai tɛɛ̂i díwɔ̂i mai gɛ́ ƃò dípôlu.

⁹ Zɛŋ nyii ǹɛ̂lɛɛi ǹɔii-ŋuŋ mɛni mai ǹyaa ƃa ǹaa kaloŋ nyii a ŋɔlɔii maa kpɛ̀tɛ a ǹɛ́lɛɛ sí-sãa sí mɛni mai.

¹⁰ Ǹúui kélee seŋ-kao wɛ́lini a ŋánaai, zɛŋ-kaoi nyii ǹyêei ǹíi fa wɔ́lɔ làa m̀ɛni ma. Ǹúui tɔɔ-laa wɛ́linii, zɔlɔ ƃó sɛŋ-kao fa ǹíi làa. Nyíŋi máŋ káa nɔ́ kpɛ́ni-kpɛni.

¹¹ Núu kɔ́ri-sɛŋ a tâma nɔ́, m̀ii-ƃelai dí táma. À kɛ̀ tí, lé ƃé zɛŋ kpîŋ ǹâmu a zɔlɔ ƃô zui, fɛ̂ɛ gɛ́ dí kâa?

¹² Kôlo kpanaŋ kɛ́-nuu a nyîi a ǹɛ́lɛɛ a nɛ̃ɛ ma é kɛ́ a beláa kpaa puru kɛ́ ƃò ma. Kɛ́lɛ tɔɔ-nuu ŋɔtɔɔ-sãai maa lii-sɛlɛŋ a gɛ̀ va nyîi a ǹɛ́lɛɛ.

¹³ Ŋá lii-too pôlu mɛni tɔnɔ kàa ŋ̀éniɛi ŋí su. Nya ƃa, dɔɔ-ƃela da dísɛŋ kâoi lâai kɛ̀, kɛ́lɛ va mɛni lɛ́lɛɛ kɛ̀ dîɛ.

¹⁴ Gula-dia mɛni kpanaŋ nyɔ́mɔɔ a gɛ̀ dí m̀aa sɛŋ kɔ́lɛ zu. Sɛŋ da fa lɛ̂ɛ naa dínîa-pɛlɛɛi mɛni ma.

¹⁵ Berei nɔ́ núu-kpune a pà la a ǹyée fôlo ŋ̀éniɛi ŋí sui, berei nɔ́ ƃé a lì la pôlu. Zɛŋ kélee a zɔlɔ ƃô ŋɔfúlu-laai sui, va lî a da.

¹⁶ M̀ɛnii ŋí káa a lii-too pôlu ŋánaa. Berei nɔ́ da núu-kpune maa sɔlɔ ƃô lai, bere ƃé a lî la pôlu. Ŋɔmɔ̃lɛ-laai kélee káa nɔ́ fãa.

¹⁷ Gáa nɔ́ kpînii ŋɔɣéniɛi su, lii-too pôlu kɛ́tɛ da lii-ŋwana, ŋɔkili-ŋa-siai fa lî mɛni lɛ́lɛɛ ma.

¹⁸ Nya ƃe ŋá gàa a gɛɛ m̀ɛni lɛ́lɛɛi nɔ́ núu-kpune a pɔ̂ri gɛ̂i ŋ̀éniɛi ŋí sui ǹyaa ƃa é mii-sãa mii, é kpele-sãa kpele, é ǹîa kɛ́ a zãai nyii a zɔlɔ ƃô ŋɔmɔ̃lɛ-laai su tãi kpuai ŋí su Ɣâla a dɛ̀ɛ bɔ́i. Ǹyaŋ núu-kpune ŋɔkɛ-ɣeniɛi kɛ́-pere ká ŋí.

¹⁹ È kúla nyíŋi pôlu, à kɛ̀ Ɣâla à lûwa làa núu da ma à tɔ̀ɔ ŋɔɣéniɛi su gɛ́ gɔ̃liŋ ŋ̀aa nɛ̃ɛ kùla, é láa maa-tɛ tɛɛ bɔ́. É lii-nɛ̃ɛ kula, kpɛ́ni fêi, Ɣâla ŋɔƃɛlɛ-seei ká tí.

²⁰ A gíli ŋá-sia é pîlaŋ zama-sɛŋ ma Ɣâla a dɛ̀ɛ bɔ́i, lii-nɛ̃ɛ támaa a pâi kɛ̂i mà. Vé pâi gɔ̂lɔnii a gɛɛ ŋɔɣéniɛi su kpuâi.