Ikilisiati 2 - Bible

Nia kɛ̂ mɛni káa nɔ́ kpɛ́ni-kpɛni

¹ Ŋá gbɛ̀tɛ ńii su a tãi da a gɛɛ ŋ́gɛ tɛ̀ɛ-tɛɛ nɔ́ ŋ́gɛ ńîa kɛ̀. Kɛ́lɛ ŋá gàa a gɛɛ nyíŋi máŋ káa nɔ́ kpɛ́ni-kpɛni.

² Ŋá ɣɛ̀lɛ ŋ́gbîŋ mà ńyɛ̂ɛi, “Ƃoo ká ŋí. Lé ƃé núu a pɔ̂ri gulâi nia kɛ̂ sui?”

³ Ŋátarei è nɛ̀ ḿâ a gɛɛ lɔɔ kpele mɛ̂ni lɛ̂lɛɛi. Ŋá pɛ̀lɛ lɔɔ kpelêi ŋ́gɛ ńîa kɛ̀. Ŋá kɛ̀ nɔ́ gâai lɔɔ kpele mɛ̂ni káa a mɛni lɛ́lɛɛ nyii núu a pɔ̂ri kɛ̂i gɛ̂i ŋɔkɛ-ɣeniɛ kpuai su.

⁴ Ŋá ńyee pù tíi kpaya-kpaya támaa kɛ́ mɛ̂ni su. Ŋá pɛ́rɛ-ŋa tɔ̀ɔ, ŋá ƃá-kpɔmɔ kpalaŋ kɛ́tɛ kɛ́ naa.

⁵ Ŋá kónaŋ tɔ̀ɔ, ŋá ƃá sí-sãa sii támaa sí zu.

⁶ Ŋá yá seêi kɛ̂i kpɛ̀tɛ zí-sãai kpîŋ mɛni ma.

⁷ Ŋá luɛ támaa yà, sinâa da nɛyâa díkɛ ƃò ŋápɛrɛi mu da nyii-ŋai dí dímaa sɔlɔ ƃô naai. Taa-tulɛ támaa dí kɛ̀ ńyêei Zerusâlɛŋ é tɛ́ɛ diai kélee dîa kɛ̀ naai.

⁸ Gánei da gôoi ŋá gùla ǹɔii-ŋuŋ da kpɛ́ni su-ƃelai yêei, ŋá gélee ŋáa tɛ̀ gîe mà. Nɛyâa da sinâa dí kɛ̀ ńyêei dí kɛ́ wule lɛ́lɛ-lɛlɛɛ-ŋa tòo ḿâ. Ŋá nɛnî támaa kùla a gɛɛ ŋ́gɛ ńîa kɛ̀.

⁹ Ŋá kɛ̀ kpɔ́ a ńdɔɔ é tɛ́ɛ Zerusâlɛŋ taai su-ƃelai kélee dîa kɛ̀ ńduɛi, táre támaa kɛ́ ƃò ńyêei.

¹⁰ Sɛ́ŋ kélee ŋ́ɛi a kâa gàai, ŋ̀wɛ́li à ńzôŋ, ŋa zìɣe. Fa kâa lii-nɛɛ mɛ̀ni da naa lɛ̀ɛ. Lii-nɛ̃ɛ mɛni kélee wɛ́li è kɛ̀ ḿâ. Zɛŋ kélee ŋa kâa zɔlɔ ƃô ŋ́gɛ mɛni sui, m̀ɛni a ńii làa, kpɛ́ni fêi, ŋátii vela-fêi káa kɛ̀ tí.

¹¹ Ŋámɔ̃lɛ-laai kélee maa kpɛɛ mîi, da zãai ŋá zɔlɔ ƃô zui, ŋá gàa a gɛɛ gélee káa nɔ́ kpɛ́ni-kpɛni. Gáa nɔ́ yɛ̂ɛ núu à kɛ̀ vãai kpɛ̂i. Fé sɛŋ da sɔlɔ ƃó ní zu.

¹² Ŋá ḿarâŋ kaloŋ pɔlɔ-ŋai kɛ́-mɛni ŋai maa kpɛ̂ɛ. Ŋá gàa a gɛɛ kâloŋ nina a ŋɔtíi kɔ́ɔ pìlaŋ díi-ŋai dîa gâloŋ pɔlɔi è kɛ̀ gɛ̂i. M̀ɛni ma ŋá pɛ̀lɛ ŋ́gili ŋá-sîai é pîlaŋ núu kɛ́ɛ ŋɔkɛ̀-ɣéniɛi kɛ̂i a táre pere kpaa máŋ ŋaa-ƃalaŋ ma kpaa máŋ ƃoo pere.

¹³ Ŋá gɔ̀lɔŋ a gɛɛ táre lɛ̂lɛɛi é tɛ́ɛ ƃoo ma yɛ̂ɛ berei kwaa ponoɔ́ɔ lɛ̂lɛi la é tɛ́ɛ kpíni mai.

¹⁴ Táre nuu kíli ŋá ponoɔ̂ɔi, kɛ́lɛ ƃoo nûu káa kpînii. É máŋ kɛ́ tí mɛni kpanaŋ a kùla nɔ́ dífeerɛ dîa kpaa máŋ dí sáa.

¹⁵ Nya ƃe ŋá ŋ́gili ŋá sìa ńii su-pere ńyɛ̂ɛi, “Berei nɔ́ mɛni kpânaŋ a kûla la ǹúu feerɛi ŋí dîa kpaa máŋ dí sáai, a pɔ̂ri kɛ̂i tí a ńyãa. Gɛ̀ ní, lé ƃé ŋa zɔlɔ ƃô táre támaa kɔ́lɔŋɔɔ sui? Nyíŋi-ŋai kélee káa nɔ́ kpɛ́ni-kpɛni.”

¹⁶ Táre-nuu kíli fé pâi wɔ́lɔ lɛɛ̂i núu-kpune kíli ŋá é tɛ́ɛ ƃoo-nuu ma. Ƃoo-nuu a pâi saâi nɔ́ yɛ̂ɛ berei táre-nuu a sâa lai.

Tíi kpanaŋ kɛ́ɛ káa nɔ́ kpɛ́ni-kpɛni

¹⁷ Ŋá ɣéniɛ kpɔ̀ara, kpɛ́ni fêi, núu-kpune ŋɔmɔ̃lɛ-laai káa a maloŋ-too-maa tee-tee ŋ́ɛi. Gélee káa nɔ́ kpɛ́ni-kpɛni. Gáa nɔ́ yɛ̂ɛ núu a kɛ̀ vãai kpɛ̂i.

¹⁸ Ŋ́gɛ mɛni-ŋai kélee ƃɛlɛ a kpɛ̀ɛ ŋ́goi, kpɛ́ni fêi, ŋa pâi gélee lɛɛ̂i núu da kpɛ́ni-ŋa yêei.

¹⁹ Gbɛ̂ɛ ƃé gɔ́lɔŋ à kɛ̀ maa-nuui a pâi kɛ̂i a dáreɛɛ kpaa máŋ m̀óɔɔ? Nyíŋi kélee su, é máŋ kɛ́ a dáreɛɛ kpáa máŋ m̀óɔɔ, ŋ́gɔ̃liŋ kélee nyii ŋá mɔ̃lɛ ma a ŋá zɔlɔ ƃó ŋá tárei sui, gélee a pâi lɛɛ̂i ǹyêei. Nyíŋi kélee káa nɔ́ kpɛ́ni-kpɛni.

²⁰ Ŋa ŋ́gili ŋá sìa é pîlaŋ ŋámɔ̃lɛ-laai ma ǹɔii ma ƃɛ́ ńii a tôo pôlu.

²¹ Núu a ŋɔtíi-ŋai kélee kɛ̀ ǹɔii ma ƃɛ́ a ŋɔtárei kili-ŋa pôno pere su da yɛrɛ. Gbɛɛ ŋái, a pâi gɔ̃liŋ kélee lɛɛ̂i bôlu núu da kpɛ́ni yêei nyii vé mɔ̃lɛ-ni m̀ɛni mai. Nyíŋi kélee káa nɔ́ kpɛ́ni-kpɛni. Mɛni lɛ́lɛɛ da fé zu.

²² Lé ƃé núu a zɔlɔ ƃô ŋɔmɔ̃lɛ-laai su da lii sɛ̂lɛŋ ŋ̀éniɛi ŋí sui?

²³ Ŋ̀éniɛi káa nɔ́ a mɛni-soli da lii-too pôlu. Kpíni a pɛ̀lɛ, núu fa nyîi. Nyíŋi máŋ káa nɔ́ kpɛ́ni-kpɛni.

²⁴ Ŋá ŋ̀á kàa a gɛɛ m̀ɛni lɛ́lɛɛi nɔ́ núu a pɔ̂ri zɔlɔ ƃôi ŋɔmɔ̃lɛ-laai sui ǹyaa ƃa é ǹáa míi é ŋwã̂ai kpele é lii-nɛ̃ɛ kula. Nyíŋi máŋ yɛ̂ɛ berei ŋa gâai lai, a kûla Ɣâla yêei.

²⁵ Kpɛ́ni fêi, a wàla kɛ́ a ǹyaa, gbɛ̂ɛ ƃa pɔ̂ri ǹáa miî é ŋ̀aa-nɛ̃ɛ kulai?

²⁶ Ǹúui a Ɣâla líi làai, Ɣâla a táre tɛ̀ɛ maa nûui pɔ́, kili-ŋa pôno da lii-nɛ̃ɛ. Kɛ́lɛ ǹúui va ǹîa mɛni kɛ̂i, a maa nûui ŋɔtíi kùla ǹyêei da gɔ̃liŋ kélee é dɛɛ ǹúui pɔ́ a ǹîa mɛni kɛi. Nyíŋi máŋ káa nɔ́ kpɛ́ni-kpɛni. Gɛ́ɛ nɔ́ yɛ̂ɛ núu a kɛ̀ vãai kpɛ̂i.