Hebreu 9 - Bible

Ŋ̀éniɛi su da Ɣâla-taa Ɣâla fɛ̀liɛɛ

¹ Tɔ̂ŋ-ŋa máŋ dí kɛ̀ gbanaŋ-woo-kɛɛi maa-ŋuŋ su Ɣâla-fɛli mɛni ma, kwaa maa waa kɛ́ ƃo mɛni ma ŋ̀éniɛi su.

² Ɣâla ŋɔsua-kɔlɔ-seɣe pɛrɛi è kɛ̀ a gbɛ́tɛɛ a berei-sii ŋí. Loŋpoi maa-ŋuŋ nyíi laŋpo-see-wurii è kɛ̀ zui da teƃelei, é pɛ́lɛ Nɛ-kpoloi mai, da kâa dòli a Gwaa Maa Waai.

³ Loŋpoi-la-seɣei veerɛi pôlu loŋpoi su-pere ŋɔi káa naa da dòli a Gwaa Maa Waai Ŋɔkwaa Maa Waai.

⁴ Loŋpoi ŋí su Ŋ̀âla-teƃelei káa naa nyíi gbɛtɛɛ̂i a gôo sâla-sɛŋ kúŋ nɛ̃ɛ kéreŋ mɛni ma, da gbanaŋ-woo-kɛɛi maa-gãlai, nyíi mɛi pɛlɛɛ̂i kpɔ́ gwaa kélee a gôoi. Gãlai ŋí su gôo-sane è kɛ̀ naa nyíi manaa da Eelɔŋ ŋɔsia-wurii nyíi pɔmuŋ, é pɛ́lɛ gɔni-ƃelai ma nyíi gbanaŋ-woo-kɛɛi è kɛ̀ a bɔ̃yɛɛ mai.

⁵ Gãlai mɛi-pere goôŋ-sãa dí kɛ̀ naa, nyii-ŋai kɛ̂ a Ɣâla ŋɔŋɛ́i-kɛ-maa, díkɛ fólo. Díkoôŋ è gãlai mɛi-pere mɛi pele. Ǹyaŋ kúfa pɔ̂ri mɛni támaa ƃoi é pîlaŋ nâa mɛni-ŋai ŋí dîa.

⁶ Mɛni-ŋai ŋí kélee da kpɛtɛ, zâla láa soŋ-ƃelai da lî loŋpoi maa-ŋuŋ su a tãi kélee, díkɛ dísâla-kula-tii-ŋai kɛ̀ naa.

⁷ Kɛ́lɛ, loŋpoi zu-pere ŋɔi su, zâla láa soŋ-nuu kɛ́tɛi nɔ́ ƃa lî naa. A lî nɔ́ naa tɔnɔɔ kóraŋ tɔnɔ su. Va lî naa kpɛ́ni-kpɛni, fɛ̂ɛ é lí a ŋãa, nyíi a gula a sâla gbîŋ mɛni ma da ǹûai dísɔnyɔ̂ŋ.

⁸ M̀ɔlêŋ Maa Waai a ǹɛ bere-sii ŋí su a gɛɛ gwaa maa waai maa-perei lá fé niî ƃo nɔ́ tãi nɔ́ loŋpoi maa-ŋuŋ káa niî tɔɔ ni lai

⁹ nyíi gáa a tãi ŋí maa-pɔɔkɔ̂ŋ. Mɛni-kpɛtɛ-perei ŋí su da sama-sãa tɛ̀ɛ dí sâla-ŋa kula nyíi-ŋai dífa pɔ̂ri Ŋ̀âla-fɛli-nuui ŋɔkili-ŋa-siai kɛ̂i a maa waai.

¹⁰ Kɛ́lɛ, díkaa nɔ́ mii-sɛŋ mɛni ma, kpele-sɛŋ, da núu-waa-pere-sii da kpɛni-ŋa, é pɛ́lɛ núu kpono ŋɔtɔ̂ŋ-ŋai dîa nyíi-ŋai da bù ǹûai dîa é lɛ́ɛ la zu mɛni maa-faleŋ tãi é seri.

¹¹ Kɛ́lɛ, Kôrai è pà yɛ̂ɛ sâla láa soŋ-nuu kɛ́tɛ mɛni lɛ́lɛɛ-ŋai pâi mɛni ma. Ǹúui nyíi gɛ́tɛ̂i a ŋánaa maa waai nyíi dífe gbɛtɛ ní a díyêei, zu-kulai ƃa vé a ŋ̀éniɛi ŋí su sɛŋ.

¹² Zarâi ƃe é lɔ̀ naa Gwaa Maa Waai su nɔ́ a tãi tɔnɔ. Vé lɔ́ ní naa a ƃoli-ŋãa, kpaa máŋ niŋa-loŋ ŋãa. Kɛ́lɛ, è lɔ̀ naa a gbɔɔi-ŋãa a gɛɛ é kúŋuŋ-ma ƃo wɔlɔ-wɔlɔ da wɔlɔ-wɔlɔ.

¹³ À kɛ̀ ƃoli-ŋãa da niŋa-sirɛ-ŋãa da niŋa-loŋ kɛ́ɛ dí géreŋ dí ǹúu kpɛ́mɛŋ diai dîa dímaa fé waa nii, da pɔ̂ri díkponôi maa waai,

¹⁴ Kôrai, nyíi maa waai è gbîŋ tɛ̀ɛ Ɣâla pɔ Ŋwɔlɔ-wɔlɔ-Mɔleŋ sârai, ŋɔŋãai a pâi kálii maa waai a ǹɛ́lɛɛ é tée nyíti ma é kákula kátûa-pere-nyɔŋ pɔlɔ-ŋai sú a gɛɛ ka tíi kɛ́ Gɛ-ɣele-ma-Ɣâlai mi.

¹⁵ Mɛni ma, gáa a gbanaŋ-woo-kɛɛ ninai tɛɛ-nuu, a gɛɛ diai a dítôlii, dí ŋwɔlɔ-wɔlɔ pɔɔ-sɛŋ sɔlɔ ƃó nyíi Ɣâla è góno tèe la díyêei. Kpɛ́ni fêi, saa-mɛni a pá nyíi a díkula dísɔnyɔ̂ŋ-ŋai su nyíi kɛ̀ gbanaŋ-woo-kɛɛi maa-ŋuŋ mui.

¹⁶ Bɛ́i nuu-kɔ̃liŋ lɛɛ-yeei kɛ́-kɔlɔ-mɛni káa naai, fɛ̂ɛ dí maa-nuui saa-mɛni maa kpɛ́ɛ a ǹɛ́lɛɛ.

¹⁷ Kpɛ́ni fêi, ǹúui a gɔ̃liŋ-lɛɛ-yeei kɛ-kɔlɔ kpɛtɛi, zaa pôlu ma nɔ ƃe da tíi kɛ̀ la a maa-kɔlɔi ti, kɛ́lɛ, tãi gáa niî la ɣele mai, dífa tíi kɛ̀ la.

¹⁸ Mɛni ma Ɣâla fé gbanaŋ-woo-kɛɛ maa-ŋuŋ kɛ́ ní máŋ ŋãa ŋɛ́i pôlu.

¹⁹ Kpɛ́ni fêi, tãi Mose è kɛ̀ dɔ̂ŋ kélee lɛ̂ la ǹûai kélee dîai, è niŋa loŋ ŋãa siɣe da ƃoli-ŋãa é yá pu zu é sua-leɣa kpɔ̂lu siɣe da kpalo é ǹiŋa-loŋ-ŋãai da moli-ŋãai kpɛ́mɛŋ gɔlɔi kpîŋ ma da ǹûai kélee,

²⁰ nyɛɛi, “Gbanaŋ-woo-kɛɛi maa-ŋãai ká ŋí nyíi Ɣâla è dɛ̀ɛ kápɔ̂i.”

²¹ Bere-sii tɔnɔi tí sú nɔ́ ƃe è ǹiŋa loŋ-ŋãai da moli-ŋãai kpɛ́mɛŋ la Ɣâla ŋɔpɛ́rɛi lá da ŋ̀âla-fɛli sɛŋ-folo-ŋai kélee dí kɛ̀ mui.

²² Tɔ̃yâ ma, dɔ̂ŋ yée mu sɛŋ kélee maa waai a ŋãa, ǹyaŋ sɔnyɔ̂ŋ su-mɛni-lɛɛ fé naa ŋãa puɔɔ ŋ́ɛi pôlu.

Kôrai ŋɔsâlai è sɔnyɔ̂ŋ kpera

²³ Maa nɛɛ̂i kɛ̀, fɛ̂ɛ ŋ̀âla-taa mɛni-ŋai dípɔɔkɔ̂ŋ-ŋai dí kɛ́ a dímaa waa a zâla-kula tii-ŋai ŋí, kɛ́lɛ, ŋ̀âla-taa mɛni-ŋai dia kpîŋ, fɛ̂ɛ dí kɛ́ a dímaa waa a sâla lɛ́lɛɛ-ŋa é tɛ́ɛ nyíi-ŋai día.

²⁴ Kpɛ́ni fêi, Kôrai fé lì ní gwaa maa waai ma nyíi dí gbɛtɛ a díyêei, nyíi gáa a dɔ̃yâ-kwaa maa waai ŋɔpɔɔkɔ̂ŋ, kɛ́lɛ, è lì Ɣâla-taa kpîŋ a gɛɛ é nâa kùla é tɔ́ɔ Ɣâla ŋ́ɛi kúmɛni ma.

²⁵ Vé lì ní Ɣâla-taa a gɛɛ é gbîŋ tɛ̀ɛ a tãi támaa, yɛ̂ɛ berei zâla láa soŋ-nuu kɛ́tɛi è lɔ̀ la Gwaa Maa Waai ma a kóraŋ kélee a ŋãa nyíi vé kɛ́ ní a gbîŋ ŋãai.

²⁶ Eêi kɛ̀ tí, gɛ̀ ní Kôrai eêi pɔ̂ri mɛni-soli kâai a tãi támaa é síɣe ŋ̀éniɛi kɔ́ɔ pîlaŋ-tãi ma. Kɛ́lɛ, berei gáa lai, è pà nɔ́ zu tɔnɔ a gbanaŋ-woo-kɛɛ pɔlɔi maa-ɣeniɛi kpɛɛ ŋá a gɛɛ é sɔnyɔ̂ŋ kpera a gbîŋ kúlaa a sâla.

²⁷ Ǹyaŋ berei nɔ́ ǹɛ́lɛɛi la a gɛɛ fɛ̂ɛ núu-kpune é sáa zu tɔnɔ, nâa pôlu ma mɛni ŋa-teɛɛ é pâi,

²⁸ bere nɔ ƃe Kôrai nyíi gbîŋ tɛ́ɛ nɔ́ zu tɔnɔ a gɛɛ é núu támaa dísɔnyɔ̂ŋ siɣei, a pâi pâi la a tãi veerɛi. Vé pâi sɔnyɔ̂ŋ mɛni ma, kɛ́lɛ, a pâi diai ƃálôi díkaa m̀aa kpɛnii kpɔ́ a gbanaŋɔɔi.