Hanwon 6 - Bible

Ífe íkono tèe núu da kpɛ́ni ŋɔkpa kpɛɛ mɛ̂ni ma

¹ Ńoŋ, ya tá íkono tée a gɛɛ í tɔ́ɔ núu da ŋɔkpa mɛni láa túɛ?

² Íwooi tí è tòo yâ?

³ À kɛ̀ è kɛ̀ tí, gɛ̀ ní ya kɛ́ gba-namui tí ŋɔwála-wala-laai mu. Gɛ̀ ní m̀ɛnii nɔ́ ya pɔ̂ri gɛ̂i nya ƃa, í kîrɛ siɣe kpɔ́ a ŋánaa í lí í tóo gɔ́ɔ mu a malôŋ-pere í gbera fé.

⁴ Gɛ́ tí a maa félaa ílɛɛ pâi liî lâai, kpaa máŋ íŋɛi-gɔlɔŋ é wuyɛ.

⁵ Íkpîŋ kula m̀ɛnii ŋí su yɛ̂ɛ pîlaŋ sua a kùla ǹɔɔ kɛ̂lɛ-nuui ŋɔƃárei ŋá, kpaa máŋ yɛ̂ɛ ŋɔni a kùla zoŋ-nuu yêei.

⁶ Óo nyɛ̃ŋ-nyɛŋ-nuu, lí í tíi kɛ́-pere maa kɔ́ri yɛ̂ɛ berei pumu-ŋa da tíi kɛ̀ lai a gɛɛ í táre.

⁷ Berei máŋ kâloŋ kpaa dí láa túɛ-nuu fé la ma nyii a gɛ̀ dí tíi kɛ́i,

⁸ kɛ́lɛ da dí mii-sãai kélee ŋáa tɛ̀ ma a fólo-laa-ƃo-tãi díkɛ sama-ya maa kpɛ̂ŋ.

⁹ Óo nyɛ̃ŋ-nyɛŋ-nuu, ƃa pâi wɔ́lɔ kɛ̂i nɔ́ lâani íkɛ nyii? Lé tãi ƃé ya pâi íŋɛi lá ƃôi la í ímu siɣei?

¹⁰ Ǹyɛ̃ŋ-nyɛŋ-nuui a mò ǹyɛɛi, “Ŋa pâi nyîi a guro, ŋá ḿvii tɔ́ɔ a guro ŋá ńyee kpulɔ̂ŋ ḿâ ŋá láa.”

¹¹ Gɔ́lɔŋ a gɛɛ tãi íkaa nyîi lai, kôlo-laa a pâi pâi ípɔ yɛ̂ɛ ŋúma-nuu, zãâi ǹɛ̂lɛɛi íkɛ-ɣeniɛi kɛ́ mɛni mai a pâi kulâi íyêei yɛ̂ɛ sɛŋ kula yêei kɛ́-nuu a gùla íyêei.

¹² Gáa a núu kpɛ́ni-kpɛni da ŋwana-lɔ̂ɔ-nuu nyii gáa a wôya la-nɛ̃ɛ-maa lôno-kɛ-nuui.

¹³ Ŋɔwôya mɛni kɛ́ɛ su, a ŋ̀ɛ́i-gbana tòo, gɛ́ worɛ̂-woo tɛ̀ɛ a gɔɔ-pîlaŋ-tiŋ, gɛ́ ŋɛi-kɛ-maa kɛ̀ a ǹyée gbua.

¹⁴ Gáa a koi nyɔ̂ŋ-nuu. A wôya-mɛni kpɛ̀tɛ gíli ŋá, gɛ́ laa-saa tèe a tài kélee.

¹⁵ M̀ɛni ma, mɛni kpɔ̂lu a pâi kulâi ma a maa félaa, zu é kara, kɛ̂i fa kɛ̂ ma.

M̀ɛni lɔ́ɔlu mɛi-feerɛi nyii Ɣâla Yâwɛɛ fé ŋ̀wɛ̂li-nii

¹⁶ Mɛni lɔ́ɔlu mɛi feerɛ káa naa Ɣâla Yâwɛɛ a díkpɔara, vé wɛli ní a dia:

¹⁷ Su mɛni kɛ̂tɛ, lɛ́ɛ kɛ́ɛ, núui zɔŋ fé mai paá,

¹⁸ kíri-mɛni kpɛtɛɛ, núu kɔ́ɔ maa félaa a gɛɛ é mɛni nyɔ́mɔɔ kɛ́,

¹⁹ wôya-sere-faa kɛ́ɛ a núu láa, da káa-laa ŋɔŋ sɔ̂ɔ gîe-ma mɛni.

Ǹia-wooi bîlaŋɔɔi wulu-wulu-kɛɛ mai

²⁰ Ńoŋ, ínâŋ ŋɔtɔ̂ŋ-ŋai mɛi káa, ífe nìa ílee ŋɔsɛŋ-lɛɛi ma.

²¹ Dípɔ̃yɛ íkili ŋá, í doo íkɔŋ ma.

²² Da pâi íteniŋ tɔɔ̂i ƃɛ́i kélee ƃa lî naai. Ƃà kɛ̀ láa-ni da pâi ímɛi kâai. Ƃà ímu sìɣe da pâi kɛ̂i ília-woo ƃôi.

²³ Kpɛ́ni fêi, dɔ̂ŋ ŋí káa yɛ̂ɛ lâŋpo, ŋɔsɛŋ-lɛɛi gɛ́ ƃò a kwaa ponoɔɔ, ǹyaŋ dí tɔŋ kpɛ́-maai da díteniŋ tɔ̂ɔi a vúlu-laa perei lɛ̀ yâ.

²⁴ Íkaa-ƃelai dí lia-wooi a pâi ímaa kɔ̃ɔ̂i wulu-wulu kɛ́-nɛni yêei, da núu da kpɛ́ni ŋɔnɛnî ŋɔyee-laa maa-wooi.

²⁵ Ífe nɛ̀ɛ naa ǹɛ́lɛ-pere é ípili yee-laa-maa su, kpaa máŋ ŋɔŋɛ́i-gbana too-pere é ísoŋ.

²⁶ Kpɛ́ni fêi wulu-wulu kɛ́-nɛni ŋɔfela-fei káa nɔ́ a kpólo kpua sɔ̃ɔ. Kɛ́lɛ ya lɔ̀ pɔ̂rɔŋ a núu da kpɛ́ni ŋɔnɛnî, gáa a íkpîŋ ŋuŋ lá-piliɛɛ.

²⁷ Núu à ŋɔŋ siɣe geŋe lá, vé pâi ŋɔseɣei kêrenii?

²⁸ Kpaa máŋ núu a pɔ̂ri siâi ŋɔŋ tîŋa mɛi, vá gèreŋ gɔ́ɔ ŋá?

²⁹ Bere nɔ́ ƃé gáa la a ǹúui a pêle kɛ̀ a ŋɔkɔlɛ-ma-nuui ŋɔnɛnîi. Ǹúui kélee a lɛ̂ɣɛ mai, a pâi tɔŋ-kpɛ-maa sɔlɔ ƃôi.

³⁰ Ífe ƃâa kùla ŋúma-nuu ma, à kɛ̀ puru a gɛ̀ é ŋúma kɛ́.

³¹ Kɛ́lɛ à kɛ̀ da zòŋ ŋúma kɛ̂i, a pâi vela-fei kɛ̂i lɔ́ɔlu mɛi feerɛ. À kɛ̀ kpîŋ gáa a sɛŋ dí ŋɔpɛ́rɛi mu-sãai kélee kɔ́lɛ a gɛɛ zɛŋ è ŋumai dí vela fêi kɛ́, da pâi gɛ̂i tí.

³² Núui a wulu-wulu kɛ̀ a núu da kpɛ́ni ŋɔnɛnîi, gáa a ƃoo nûu. Ǹúui a gɛ̀ tíi, a gbîŋ ŋuŋ-la pìli.

³³ À pâi lókwa sɔlɔ ƃôi da ƃaa-kula-maa. Ǹyaŋ maa ŋumɛi fé pâi wɔ́lɔ kpɛɛ̂i ma.

³⁴ Tólo a pâ a lii-ŋwana surɔ̂ŋ pɔ́. Tãi a kɛ̂ gba kulâi lai, malôŋ kâa fa ŋɔ́nɔ kɛ̀ ǹyêei.

³⁵ Vé pâi kpera-fei-sɛŋ kélee da sonîi. Ǹíi fé pâi lâai à nɛ̃ɛ ma kpîŋ dí pɛ́lɛ a gɔ́ɔ a sɛŋ sɔ̃ɔ kpanaŋɔɔ.