Hanwon 5 - Bible

Ǹia-wooi bîlaŋɔɔi wulu-wulu-kɛɛ mai

¹ Ńoŋ, ŋátare wooi mɛ́ni, í íwoli tɔ́ɔ ŋásɛŋ-lɛɛi ma,

² a gɛɛ íkíli ŋá sîai é kɛ́ a zãa, ílono-wooi é ítarei lɛ́.

³ Núu da kpɛ́ni ŋɔnɛnî lá-gbɔ nɛ̃ɛ̂i yɛ̂ɛ kɔ̃́iŋ-wulɔ, ǹóno-woo kɔlɔ saa ma yɛ̂ɛ núu ƃé wúlɔ kpelêi.

⁴ Kɛ́lɛ gbɛɛ-ŋai a kɛ̂ a ŋ̀wánaa yɛ̂ɛ ŋ̀ale-maa, ŋ̀á liɛɛ yɛ̂ɛ ƃóa-sɔ̂kpɔ nyii ŋ̀á káa gwaa veerɛ mai.

⁵ Gɔ́ɔ a lî a yâ saa wôlo la, ŋɔsia-perei é lí a yá saa táa.

⁶ Va kânaŋ fúlu-laa ŋɔpere ma, a lâŋ, ǹyaŋ va kɛ̂ a m̀ɛnii kɔ́lɔŋɔɔ a kɛ̂i.

⁷ Óo ńoŋ, íwoli tɔ́ɔ ḿâ, ífe nìa ŋ́oo-ŋai dîa.

⁸ Ímaa kula nɛnîi tí ma a zu kôya, ífe lɛ̀ɣɛ ŋɔpɛ́rɛi gbôŋ ma.

⁹ Ƃà wàla gɛ̀ tí, gɛ̀ ní ƃaa-kɛ-maa fé pâi ŋɔ́nɔ kɛ̂i yâ, ǹyaŋ gɛ̀ ní ƃa ífulu-laai tɛ́ɛ diai pɔ́ malôŋ-kaa fé díyêei.

¹⁰ Ŋɔ̃ya-ŋa da pâi dínîa kɛ̂i a íkɔ̂liŋ, ǹyaŋ zɛŋ kélee ƃa tíi kɛ́ mɛni mai a pâi kɛ̂i a núu da kpɛ́ni-ŋa pɔ́ɔ.

¹¹ Gbɛɛ-ŋai, tãi íkpono da ífulu-laai da pâi kɛ̂i karâi lai, ya pâi kɛ̂i nyîɣɛi.

¹² Ƃa pâi kɛ̂i môi yɛ̂ɛi, “Ŋ́gula maa kɛ́ɛ mɛni nyɔ́mɔɔ kɛ́ɛ mɛni ma ƃɛlɛ fé ŋ́goi. Lé mɛni ƃé fé núu da kpɛ́ni ŋɔteniŋ tɔɔ-wooi siɣe ní lai?

¹³ Fé ŋ́oli tɔɔ ní ŋasɛŋ-lɛ-ƃelai wóo ma. Fé dília-woo-ŋai siɣe ní.

¹⁴ Ŋâa nâa ŋáfulu-laai su kara. Ŋâa nâa kɛ́ a ƃaa kula maa-nuu núu kélee ŋɛ́i.”

¹⁵ Íkpɔɔi nɛnîi maa mɛ̂ni é ílii láa. Íwɛli kɛ́-maai é kɛ́ nɔ́ ǹyaa tɔ̂nɔ mɛni ma.

¹⁶ Ífe kɛ̀ yɛ̂ɛ ya lêe nyii nɛnî sii kélee a pɔ̂ri da kpelei.

¹⁷ Maa nɛ̃ɛ̂i é kɛ́ naa ínɛnîi yaa tɔ̂nɔ m̀ɛni, ífe kɛ̀ naa ŋ̀ɔ̃ya-ŋai mɛni ma.

¹⁸ Tɔɔ ínɛnîi é kɛ́ a lûwa ímɛni ma. Lii-nɛ̃ɛ kula ínɛnîi mɛni ma nyii í gùla a ínaɣa tãi.

¹⁹ Ínɛnîi lɛ̂lɛɛi yɛ̂ɛ pîlaŋ sua, zia-pere lɛ́lɛɛ yɛ̂ɛ lóma a kɛ̀ siâi. Ǹɛɛ naa ŋɔwɛli-kɛ-maai é ílii láa a tãi kélee, é íkɛ í kánaŋ nɔ́ ŋɔwɛlii-kɛ-maai ma.

²⁰ Ńoŋ, lé-mɛni ƃé núu da kpɛ́ni ŋɔnɛnî maa mɛ̂ni a íll sóŋ lai, íkɛ ílii-laa mɛni kɔ̀ri la ǹyêei?

²¹ Ɣâla Yâwɛɛ a ítûa-pere kélee maa kpɛɛ̂i, gɛ́ ísia-pere kélee maa kpɛ̂ɛ.

²² Ŋwana-lɔ̂ɔ-nuu ŋɔsɔnyɔ̂ŋ káa yɛ̂ɛ ƃáre. A kɔ̂ a gbîŋ ƃare.

²³ A pâi saâi, kpɛ́ni fêi, va gbîŋ mɛi kâa. Ŋɔƃoo tûa-perei ƃé pâi ŋuŋ la pilîi.