Hanwon 4 - Bible

M̀ɛni lɛ́lɛɛi a kûla táre sui

¹ Óo, ńônii, ka kánâŋ ŋɔsɛŋ-lɛ-wooi mɛ́ni, ka káwoli tɔ́ɔ mà a gɛɛ ká táre sɔlɔ ƃó.

² Zɛŋ ŋa ǹɛ̂i kâai, gáa a sɛŋ-lɛɛ lɛ́lɛɛ. Káfe káyee kùla mù.

³ Tãi ŋá kɛ̀ nɔ́ la a surɔ̂ŋ-loo tɔnɔ ńâŋ da ńee yêei,

⁴ ńâŋ è sɛŋ lɛ̀ ḿâ ǹyɛɛi, “Ŋ̀óo-ŋai ŋí lâai kɛ́ a gbanaŋɔɔ ílii su. Ŋátɔ̂ŋ-ŋai dí lɛ́ɛ íkili ŋá a gɛɛ í lɛ́ɛ a ífulu.

⁵ Táre kɔ́ri da mɛni ŋá-kaa. Ífe nìa dîa da ŋásɛŋ-lɛɛi.

⁶ Ífe kùla táre pôlu. A pâi ímɛi kâai. Ŋ̀wɛ́li, a pâi ímaa kɔ̃ɔ̂i.

⁷ Táre káa a sɛŋ maa mɛ̂ni kpanaŋɔɔ ŋánaa. M̀ɛni ma, mɛni tɔ̂nɔi maa-nɛ̃ɛi í gɛ́i, ǹyaa ƃa mɛni ŋá káa é kɛ́ íyêei.

⁸ Ƃa táre ƃâa sìɣe, a pâi ílaa maa tɛ̂i. Ƃà kpùlɔŋ mà, gɛ̀ ní a pâi ƃaa-kɛ-maa tɛɛ̂i ípɔ.

⁹ A pâi íŋuŋ maa ɣirîi a káraŋ lɛ́lɛɛ, é kâloŋ-ƃɔrɔ lɛ́lɛɛ see íŋûa.”

¹⁰ Ńoŋ, íwoli tɔ́ɔ ḿâ, í ŋ́oo-ŋai ŋí síɣe. Ƃa gɛ̀ tí, gɛ̀ ní ífulu-laai su a pâi kôyai.

¹¹ Ŋa táre maa-pere lɛ́ yâ. Ŋa íteniŋ tɔ́ɔ bere sãai ma.

¹² Ƃa mɛni kpɛtɛɛ da kélee kɛ̀, ŋ̀aa sèe a pâi kɛ̂i a ǹɛ́lɛɛ. Ƃa kɛ̀ siâi, íperêi a pâi kɛ̂i a bonoɔɔ.

¹³ Ŋásɛŋ-lɛɛi sóŋ a gbanaŋɔɔ. Ífe tèe ma. Ǹâai kɛ́, kpɛ́ni fêi, gáa a ífulu-laai.

¹⁴ Ífé sìa ŋ̀wana-lɔ̂ɔ-ƃelai dí-perei ma. Ífe pìlaŋ zɔnyɔ̂ŋ-ƃelai tûa-perei pôlu.

¹⁵ Siɣe nàa-pere, ífe lì naa. Ǹaa maa láa í lí,

¹⁶ kpɛ́ni fêi, ŋ̀wana-lɔ̂ɔ-ƃelai dífa nyîi, fɛ̂ɛ dí mɛni nyɔ́mɔɔ kɛ́. Nyii fa pâ díŋɛi fɛ̂ɛ dí ŋwana-lɔ̂ɔ kɛ́ a núu.

¹⁷ Gbóloi da mìi, da zɔlɔ ƃô ŋwana-lɔɔ kɛ́ɛ su. Ŋwãai da gbèlei, da zɔlɔ ƃó wôya-pere su.

¹⁸ Kɛ́lɛ dɔ̃yâ-ƃelai díperei káa yɛ̂ɛ fólo-nɛnɛŋ. A lɛ̂ɛ fôloi é lɛ́ɛ la zu vólo su é kɛ́tɛ.

¹⁹ Ŋ̀wana-lɔ̂ɔ-ƃelai díperei káa yɛ̂ɛ kpíni kɛ́tɛ. Dífa zɛŋ kâa da kâreŋ lai.

²⁰ Ńoŋ, íwoli tɔ́ɔ ŋ́oo ma, í ŋ̀á káa a ǹɛ́lɛɛ.

²¹ Dífe kula íwôlii. Dílâai kɛ́ ílii su,

²² kpɛ́ni fêi, gáa a fúlu-laa ǹúui mɛni ma a ŋ̀á kaai, gɛ́ gɔlɔ̂i pòno.

²³ Íkili-ŋa sîai mɛi káa a ǹɛ́lɛɛ mɛni sîi kélee su, kpɛ́ni fêi, nàa ƃé ífulu-laai a kûla naa.

²⁴ Ímaa kúla wôya lono ma, ífe nɛ̀ɛ naa kíri-lono é kúla íla.

²⁵ Íŋɛi é kɛ́ ítuɛ-pere a gɛɛ í ƃɛ́i káa ya ƃɔ́rɔnii naai. Ífe ípɛrɛ ma kàa.

²⁶ Íkɔɔ pîlanii káa a ǹɛ́lɛɛ a gɛɛ ísia-pere é kɛ́ a zã́a.

²⁷ Ífe tìnaŋ ílaa-mii yee mɛi-pere kpaa íkɔɔ-yee mɛi pere. Íyee kúla mɛni nyɔ́mɔɔ kɛ́ɛ su.