Hanwon 30 - Bible

Agɔ ŋɔtáre-woo-ŋai ká ŋí

¹ Zakɛ ǹóŋ Agɔ nyii kùla Masai, ŋɔwóo-ŋai ká ŋí: Nalôŋ tɔnɔ da è mò Itiɛ da Uka dîa ǹyɛɛi,

² Ŋáƃooi a ŋ́gɛ fé ƃóloŋ ní núu-kpune ma. Fa mɛni ŋá kàa yɛ̂ɛ núu-kpune.

³ Fé táre maa kɔ́ri ní, fé Ɣâla maa mɛni kɔ́lɔŋ.

⁴ Gbɛ̂ɛ ƃé tɛ̀ Ɣâla-taa é pá pôlui? Gbɛ̂ɛ ƃa vãai sôŋ a ǹyée? Gbɛ̂ɛ ƃa Yúo maa kpîniŋ a seɣe? Gbɛ̂ɛ ƃa ǹɔii kóyaŋ lɛ́? Ǹáa ƃa gbɛ̂ɛ? Ǹóŋ láa ƃa gbɛ̂ɛ? Tɔ̃yâ ma í gɔ́lɔŋ.

⁵ “Ɣâla ŋɔwóoi kélee káa a tɔ̃yâ. Gáa yɛ̂ɛ kɔ́-kɔ-nuu maa-kɔ̃ɔ kɔli-kalaŋ diai mɛni ma da pâ bɔ́i.

⁶ Ífe wóo da kpɛ́ni pɛ̀lɛ ŋ̀óo ma. Ƃà gɛ̀ tí, Ɣâla a pâi íkula-maa kɛ̂i.”

Tárɛ-woo da kpɛ́ni-ŋa

⁷ Óo Ɣâla, ŋa sɛŋ feerɛ wɛli kɛ̂i íyêei a gɛɛ í gɛ́ mî ŋá lɛ́ɛ pâi saâi.

⁸ Wôya-mɛni kúla ŋ́gbonôi da lɛ́ɛ-mɛni. Ífe kôlo-laa tɛ̀ɛ ḿbɔ kpaa máŋ tɔɔ-laa. M̀ii-sɛŋ tɛ́ɛ ḿbɔ nyii í gɔ́lɔŋ ǹɛ̂lɛɛi ḿɛni mai.

⁹ À wàla kɛ́ tí, ŋà sɛŋ támaa sɔlɔ ƃô à tɛ̀ɛ gɛ̂i ma, gɛ̀ ní ŋa pâi ímaa sîa toôi ńyɛ̂ɛi, “Gbɛ̂ɛ ƃa Ɣâla Yâwɛɛ?” Kpaa máŋ ŋà wàla sɛŋ támaa sɔlɔ ƃó, ŋà kòlo, ŋa ŋúma kɛ́, gɛ̀ ní ŋa ƃâa kula Ŋáɣâlai ma.

¹⁰ Ífe wóo nyɔ́mɔɔ ƃò a núu da kpɛ́ni ŋɔtíi-kɛ-nuu láa ŋɔmɛi-nuui ma. Ƃà gɛ̀ tí, à ífòo, mɛni a lɛɛ yâ.

¹¹ Núu da-ni káa naa da dínâŋ náɣaŋ-laa, dífa máŋ ƃaa-kɛ-maa tɛ̀ɛ dílee pɔ́.

¹² Núu sîi da-ni-ŋa da díkpîŋ sìɣe a núu maa waa-ŋa, kɛ́lɛ dímaa fé waa ní dílii su.

¹³ Núu sîi da-ni káa naa da díŋɛi pìli ɣelêi a díƃarâa, díkɛ díŋɛi nìiŋ a dia.

¹⁴ Ǹúu sîi da-ni káa naa dínyiŋ káa yɛ̂ɛ ƃóa-sɔ̂kpɔ, díla kɛ́ ƃò yɛ̂ɛ ƃóa-ŋa. Da gôlo-ƃelai su tèe-tee da diai sɛŋ da fé díyêei, dí díkula ǹɔii ma.

¹⁵ Loŋ-nɛni feerɛ káa tolɛ̂ yêei. Dífeerɛ dílaa ƃa “Ŋ́gɔ” Sɛŋ náaŋ káa naa dílii fa wɔ́lɔ làa:

¹⁶ zaa-ƃelai táa, kpóma nɛ̂ni, lɔii kpálaa nyii yá wɛ̂lii, da ŋɔŋ nyii núu fa pɔ̂ri ǹíinii.

¹⁷ Ǹúu a ɣɛ́lɛ-maa kùla ǹâŋ kponôi gɛ́ ǹee wóo pilii, kuɛ-ŋa da pâi ŋ̀ɛ́i-gao kulâi, gɔ̃ɔ-ŋa dí ǹuu kpéle.

¹⁸ Laa-kpala maa mɛni náaŋ káa naa nyii fa târe zui:

¹⁹ Berei kuɛ a kôoŋ la ɣelêi, berei kali a sîa la kɔni mɛi, berei yá-ŋa-keleŋ a sîa la yúo ŋá, da berei surɔ̂ŋ da nɛnîi dí wɛli kɛ́-maai kɔ́ɔ a pîlaŋ lai.

²⁰ Wulu-wulu kɛ́-nɛni tûa-pere ká ŋí: a ǹáa mìi é ǹágbɔ maa kɔ̀ɔ gɛ́ mò ǹyɛɛi, “Fé mɛni nyɔ́mɔɔ da kɛ́ ní.”

²¹ Mɛni náaŋ káa naa a wîyɛ ŋ̀éniɛi ma, va pɔ̂ri mu, dia ƃa:

²² À kɛ̀ luɛ à kɛ̀ a kâloŋ, à kɛ̀ ǹúui va mɛni ŋá kàa a ǹɛ́lɛɛi a tɔɔ-laa sɔlɔ ƃô,

²³ à kɛ̀ nɛnîi nyii ǹûai dífe ŋ̀wɛli ní a surɔ̂ŋ kùla, kpaa máŋ à kɛ̀ yée-mu-nɛnî a bɛ́rɛ-leei pɔ́ɔ ŋá siɣe.

²⁴ Sɛŋ pɛlɛ-pɛlɛ sii náaŋ káa ŋ̀éniɛi ŋí su, dítareɛ̂i a ŋánaa:

²⁵ Pumu-ŋa dífe kpanaŋ ní, kɛ́lɛ da dímii-sãai kélee ŋá tɛ̀ ma a fólo-la-ƃo-tãi.

²⁶ Téli-ŋa dífe wála-wala ní, kɛ́lɛ da díkɛ̂i kpɛ̀tɛ kɔni-wolo su.

²⁷ Gotó-ŋa kâloŋ fé díyêei, kɛ́lɛ díkelee-da sîa díɣɛli ma.

²⁸ Fɛlɛŋ-ŋa, núu a dísòŋ a ǹyée, kɛ́lɛ kwa díkàa kâloŋ-pɛrɛ-ŋa mu.

²⁹ Sɛŋ náaŋ káa naa, dísia pere lɛ̂lɛɛi:

³⁰ yala-sulu, ŋ̀wála-walâai é tɛ́ɛ sua kélee ma, va yâo sɛŋ da kélee ma.

³¹ Tɛ́ɛ-sirɛ à kɛ̀ goŋɛlɛ̃ɛ, ƃoli-sirɛ, bɛlɛ́ɛ kâloŋ ma nyii-ŋai da kɛ̂ dínûai ŋɛ́i-tuɛ díkɛ sìai.

³² À kɛ̀ ƃà íkpîŋ kɛ̀tɛ a ƃoo-pere kpaa máŋ íkɛ mɛni nyɔ́mɔɔ kpɛ̀tɛ ílii su, ǹɛ̂lɛi a gɛɛ íkpera tí ma.

³³ Kpɛ́ni fêi, à kɛ̀ ƃà niŋa ŋini-ya su pène, a kɛ̂ kìŋ-kpɛŋ. À kɛ̀ ƃà núu lòkwa zũa ma, ŋ̀ãa a pû. À kɛ̀ ƃà lii-ŋwana-nuu líi sóli mɛni kɛ̀, laa-saa a pâ.