Hanwon 28 - Bible

¹ Ŋwana-lɔ̂ɔ-nuu a pû à nɛ̃ɛ mà núu fé kɛ̀ gbɛ̂i, kɛ́lɛ tɔ̃yâ-nuu lii-kpeleɛ̂i yɛ̂ɛ yala-sulu.

² Ǹɔii-ƃelai da sɔnyɔ̂ŋ kɛ̀, kâloŋ támaa a kɛ̂ dímɛi, kɛ́lɛ à kɛ̀ tɔ̃yâ kâloŋ sã́a lɛ́lɛɛ à kɛ̀ lɔii mɛi, maa lɔii a kɛ̂ a ŋ̀wála-walaa gɛ́ ƃûu ƃò.

³ Ŋwana-lɔɔ kâloŋ nyii a gôlo-ƃelai lûaŋ, gáa yɛ̂ɛ tuna nyii a sí-sãa su kàrai.

⁴ Diai dífa dɔ̂ŋ mɛi kâai, gáa yɛ̂ɛ da kɛ̀ ŋwana-lɔɔ-ƃelai láa maa tɛ̂i, kɛ́lɛ dɔ̂ŋ-mɛi-kaa-ƃelai da tɔ̂ɔ ŋ̀wana-lɔ̂ɔ-ƃelai dîa.

⁵ Ŋwana-lɔ̂ɔ-nuu fé tɔ̃yâ kɔ́lɔŋ, kɛ́lɛ diai da Ɣâla Yâwɛɛ kɔ̀rii, dí dɔ̃yâi kélee kɔ́lɔŋ.

⁶ Kôlo-nuu sã́a lɛ̂lɛɛi é tɛ́ɛ tɔɔ-nuu ma nyii dûa-pere fé sã́a nii.

⁷ Lôloŋ nyii a dɔ̂ŋ mɛi kâai, gáa a táre-loloŋ, kɛ́lɛ ǹúui gáa m̀ii-sɛŋ-wɛlii-ƃelai pôlui, a ǹâŋ ŋùmɛ.

⁸ Ǹúui a ŋɔtɔɔ-sãai da pù ma a gêeni láa ŋɔkpa-sɛŋ-kaoi mai, a ŋɔtɔɔ-sãai ŋá tɛ̀ ma ǹúui mɛni ma a kôlo-ƃela malôŋ kaai.

⁹ Ǹúui va ŋ̀óli tɔ̀ɔ dɔ̂ŋ mai, ŋɔɣâla fɛli-wooi ƃɛlɛ kpɛɛ̂i Ɣâla koi.

¹⁰ Ǹúui a tɔ̃yâ-nuu kɛ̀ é sɔnyɔ̂ŋ kɛ́i, a pîli gbɔ́ɔi ƃare ŋá. Tɔ̃yâ-nuu a fela-fei lɛ́lɛɛ sɔlɔ ƃô.

¹¹ Tɔɔ-nuu târeɛi gbîŋ ŋɛ́i, kɛ́lɛ kôlo-nuu nyii a mɛni ŋá kâai, é gɔ́lɔŋ a gɛɛ dɔɔ-nuui kpîŋ fé fáre-ni.

¹² Tɔ̃yâ-nuu à kâloŋ-laa sɔlɔ ƃô, núu kélee líi a nɛ̃ɛ. Kɛ́lɛ wôya-nuu a wála-wala sɔlɔ ƃô, ǹûai da kɛ̂ dí loôi.

¹³ Ǹúui a ŋɔsɔnyɔ̂ŋ mɛi pɛ̂lɛi, va mɛni lɛ́lɛɛ sɔlɔ ƃô, kɛ́lɛ ǹúui a ŋɔsɔŋyɔ̂ŋ ƃò, gɛ́ bôlu tɔ̀ɔ mài, Ɣâla a m̀alôŋ kàa.

¹⁴ Lûwa káa ǹûui ma a yâo Ɣâla Yâwɛɛ ma a ɣele kéleei, kɛ́lɛ ǹúui ŋuŋ su kpanaŋɔɔ̂i, a pîli mɛni kpɔ̂lu su.

¹⁵ Ŋwana-lɔɔ kaloŋ nyii gáa gôlo-ƃelai mɛi, gáa yɛ̂ɛ yala-sulu kpeɣeɛɛ kpaa máŋ ditala nyii puru káa mai.

¹⁶ Kâloŋ nyii táre fé ŋuŋ sui, gáa a núu-mɔ̃lɛ-nuu, kɛ́lɛ ǹúui vé wôya-mɛni wɛlii nii, a tûa ɣele ma.

¹⁷ Núui a núu pàai, tɔɔ é pú é lɛ́ɛ naa é sáa. Núu da fé kpɔ̀ŋ mà.

¹⁸ Ǹúui a tûa a zã́ai a pâi ƃâloi, kɛ́lɛ ŋ̀wana-lɔ̂ɔ-nuui a pâi toôi lôai.

¹⁹ Tíi-kpanaŋ kɛ́-nuu a mii-sɛŋ támaa sɔlɔ ƃô, kɛ́lɛ ǹúui a pîlaŋ mɛni kpɛ́ni-kpɛni pôlui, a pâi kôloi.

²⁰ Tɔ̃yâ-nuu a pâi lûwa támaa sɔlɔ ƃôi, kɛ́lɛ ǹúui tɔɔ-laa lii-sɛlɛŋ káa mai, a pâi tɔŋ-kpɛ-maa sɔlɔ ƃôi.

²¹ M̀aa fé nɛ̃ɛ ní núu é ŋaa-kɔlɛ mɛni kɛ́. Kɛ́lɛ nûa da mɛni nyɔ́mɔɔ kɛ̀ a gɛɛ dí mii-sɛŋ kpua sɔlɔ ƃó.

²² Ŋɛi-kpala-nuu a tɔɔ-laa kɔ̀ri a maa-felaa, vé gɔ́lɔŋ a gɛɛ kôlo-laa a pâi pâi bɔ́.

²³ Ƃa íƃarâŋ-nuu ŋɔpɔara-maai lɛ̀ mà, a pâi ísɛɣɛi fêi é tɛ́ɛ la laa-maa-tɛ kpɛ́ni-kpɛni ma.

²⁴ Ǹúui a ǹâŋ kpaa máŋ ǹee kɔ̂liŋ ŋùmai, é m̀ó ǹyɛɛ, “Mɛni nyɔ́mɔɔ fêi,” maa núui tí káa a ŋúma-nuu.

²⁵ Sɛŋ maa-lii tée-nuu a laa-saa tèe, kɛ́lɛ ǹúui a làa a Ɣâla Yâwɛɛi, a kpɔŋ-maa sɔlɔ ƃô.

²⁶ Ǹúui a làa nɔ́ a gbîŋ tarei, gáa a núui táre lɛ́lɛɛ fé ŋuŋ su, kɛ́lɛ ǹúui a sîa a táre-perei a pâi ƃâloi.

²⁷ Ǹúui a kpɔŋ-maa tɛ̀ɛ kôlo-nuu pɔ́i, sɛŋ da kôlo fé pâi toôi ma, kɛ́lɛ ǹúui a kôlo-nuu ŋɛ́i kpàlai, náɣaŋ a pâi kɛ̂i ma.

²⁸ Tãi ŋwana-lɔɔ-ƃela da kɛ̂ la lɔii mɛi, kôlo-ƃela da dílôo. Kɛ́lɛ tãi da díwala-wala-laai kùla la díyêei, tɔ̃yâ-ƃela da kɛ̀ a dítamaa.