Hanwon 22 - Bible

¹ Nûa da íkɔ̀lɔŋ a núu lɛ́lɛɛ, dí ƃaa-kɛ-maa tɛ́ɛ ípɔ, ǹɛ̂lɛi é tɛ́ɛ tɔɔ-laa ma, ƃaa-kɛ-maa lɛ́lɛɛ é tɛ́ɛ káne ma da gôo.

² Tɔɔ-nuu da kôlo-nuu díkpɛtɛ-pere pɔ̂riɛ̂i, kpɛ́ni fêi, Ɣâla Yâwɛɛ ƃé díkpɛ̀tɛ.

³ Táre-nuu a mɛni kpɔ̂lu maa lâa, kɛ́lɛ ǹúui táre fé ŋ̀uŋ sui, a pîli nɔ́ zu gɛ́ mɛni-soli kàa.

⁴ Ǹúui ǹíi ma yeŋɔɔ̂i gɛ́ ŋɔ́nɔ yào Ɣâla Yâwɛɛ mai, a tɔɔ-laa sɔlɔ ƃô, ƃaa-kɛ-maa da fúlu-laa.

⁵ Ŋalêŋ da ƃáre díkaa wôya-nuu sia-pere su. Ǹúui à ŋ̀wɛ̀li é ŋɔfúlu-laai maa kɔ̃ɔi, tɔɔ é zu kula naa ma.

⁶ Sɛŋ lɛ́ lôloŋ ma berei a pɔ̂ri siâi la a zãai. À kɛ̀tɛ, gɛ̀ ní vé pâi kulâi bere sã́ai ma.

⁷ Wála-wala-laa káa tɔɔ-nuu yêei kôlo-nuu mɛi. Kpa-soŋ-nuu káa a kpa-pili-nûu ŋɔluɛ.

⁸ Ƃà wôya-mɛni maa kɔ̂ri, ƃa mɛni kpɔ̂lu kàa. Í ŋwana-lɔɔi kóyaŋ káa ma.

⁹ Ǹúui nyii ǹyée foaŋɔɔ̂i ma sɛŋ kɔlɛ mɛni mai, a pâi lûwa sɔlɔ ƃôi kpɛ́ni fêi a mii-sɛŋ tɛ̀ɛ kôlo-nuu pɔ́.

¹⁰ Ǹúui a ɣɛ́lɛ-maa kûla-nuu kponôi ƃa gbɛ̀, gɛ̀ ní laa-saa, sîa da ŋumɛ a kpɛɛ.

¹¹ Ǹúui ǹíi lɛ̂lɛɛi, ǹóno-woo lɛ́lɛɛ ǹái, gáa a gâloŋ nîa-nuu.

¹² Ɣâla Yâwɛɛ a tɔ̃yâ-nuu maa kɔ̃ɔ, gɛ́ wôya-nuu wóo su kàra.

¹³ Nyɛ̃ŋ-nyɛŋ-nuu a mò ǹyɛɛ, “Yala-sulu káa ŋ̀enei ŋá! Ŋà kùla bɛ́rɛi mu, a pâi ńzonîi!”

¹⁴ Wulu-wulu kɛ́-nɛni lóno-woo káa yɛ̂ɛ ƃáre, ǹúui Ɣâla Yâwɛɛ líi a ŋwâna mai, a pîli ŋá.

¹⁵ Ƃoo-mɛni káa lôloŋ líi su, kɛ́lɛ ƃa gula-maa kɛ̂ a ǹɛ́lɛɛ, a pâi teêi ŋɔƃoo-tuai ma.

¹⁶ Ƃà sɛŋ tɛ̂ɛ tɔɔ-nuu pɔ́ kpaa máŋ ƃà kôlo-nuu lòaŋ a gɛɛ í tɔ́ɔ, ífa mɛni lɛ́lɛɛ sɔlɔ ƃô zu a gbɛɛ ŋá.

Dáre mɛni buu saaƃai

¹⁷ Íwoli tɔ́ɔ. Ŋa pâi m̀ɛnii lɛ̂i yâ dáre-ƃelai dí m̀oi. Dísɛŋ-lɛɛi maa kɔ́ri.

¹⁸ A pâi kɛ̂i a mɛni lɛ́lɛɛ ímɛni ma í ǹâai kɛ́ ílii su. Gélee é lɛ́ɛ íkili ŋá.

¹⁹ Ŋa ŋ̀wɛ̂lii í íkili kɛ́ Ɣâla Yâwɛɛ ma. M̀ɛni ma, ŋa pâi ǹɛ̂i yâ sâa.

²⁰ Ŋá táre mɛni buu saaƃa pɔ̃yɛ ímɛni ma, táre-woo-ŋa da lia-woo lɛ́lɛɛ-ŋa.

²¹ Ǹyaŋ da pâi dɔ̃yâi kpîŋ-kpiŋ lɛ̂i yâ. Ya lì a gɛɛ í maa kpɛ́ɛ, ya pâi gâai a tɔ̃yâ kpîŋ.

M̀ɛnii -1-

²² Ífe kôlo-nuu fìli ŋɔkôlo-laai mɛni ma, kpaa máŋ í núu doo-mu lóaŋ mɛni-saa ƃó-kere mu.

²³ Ɣâla Yâwɛɛ káa a dímɛi-woo-ƃo-nuu. Diai da dímɔ̃lɛi, a pâi dí kula maa kɛ̂i.

M̀ɛnii -2-

²⁴ Ífe kɛ̀ a lii-ŋwana-nuu m̀arâŋ kpaa máŋ ka lii-fãa-goi-nuu ká kɛ́ kákîe pôlu.

²⁵ Ƃà gɛ̀ tí, ƃa pâi ŋɔtûa-perei maa kɔ̂rii, í íkpîŋ pili saa ŋɔƃárei ŋá.

M̀ɛnii -3-

²⁶ Ífe íkpîŋ sèe a sɛ́ɣɛ, ífe tɔ̀ɔ kpa-soŋ-ƃela mɛni ma.

²⁷ Ƃà gɛ̀ tí, a wàla gbai kpɛ́ɛ, da pâi ígbìŋ siɣêi.

M̀ɛnii -4-

²⁸ Ífe ǹɔii kóyaŋ ma kɔni-ŋai kûla dítɔ̂ɔi nyii ínuu-pɔlɔ-ŋai dí bìlaŋ naai.

M̀ɛnii -5-

²⁹ Ƃa yɛrɛ-tii kɛ́-nuu kâai, a tíi kɛ̀ nɔ́ kâloŋ-ŋa dîɛ. Va tíi kɛ̀ nûa dîɛ nyii-ŋai dítɔɔ̂i fé kɛ́tɛ-nii.