Hanwon 19 - Bible

¹ Ǹɛ̂lɛɛi núu é kɛ́ a gôloɔ deniŋ ƃôɔɔ é tɛ́ɛ la núu kɛ́ɛ m̀oɔɔ ŋ̀ôyaa ma.

² Ǹúu a mɛni kɛ̀ va gíli-ŋa siai vé lɛ́lɛ ní, ǹyaŋ ǹúui gɔ́ɔ-maa felâai, a pɔ̂ara pere ma.

³ Núu-kpune ŋɔƃoo-tua ƃa ŋɔmɛni kâra, ǹyaŋ a ŋ̀wɛ̂lii é mɛnii lɛ́ɛ Ɣâla Yâwɛɛ ma.

⁴ Tɔɔ-nûu ŋɔwɛli-kɛ-maa-ƃela tâmaai, kɛ́lɛ kôlo-nuu ŋɔwɛli-kɛ-maa-nuu a kûla bôlu.

⁵ Wôya-sere-faa kɛ́-nuu a ŋɔtɔŋ-kpɛ-maa sɔlɔ ƃô. Lɛ́ɛ-nuu fa kûla dɔ̂ŋ yêei.

⁶ Núu támaa da ŋ̀wɛ̂lii dí pîlaŋ ǹúui pôlu ǹyée fuâŋɔɔi. Mɛni lɛ́lɛɛ-kɛ-nuu ŋɔwɛli-kɛ-maa-ƃela tâmaai.

⁷ Kôlo-nuu ŋɔkáayɔɔ-ŋa dífe ŋ̀wɛlini. M̀arâai da dípôlu fè mì. Dífa díwoli tɔ̀ɔ ŋɔfɛli-kɛ-wooi ma.

⁸ Ǹúui a táre kɔ̀rii, è gbîŋ wɛ́lini. Mɛni-ŋa-kaa-nuu a mɛni lɛ́lɛɛ sɔlɔ ƃô.

⁹ Wôya-sere-faa kɛ́-nuu a ŋɔtɔŋ-kpɛ-maa sɔlɔ ƃô. Lɛ́ɛ-nuu ŋ̀uŋ-la a pâi pilîi.

¹⁰ Maa fé nɛ̃ɛ ní ƃoo-nuu é kɛ́ a tɔɔ-nuu, ǹyaŋ maa fé nɛ̃ɛ ní a gɛɛ luɛ é kɛ́ kâloŋ-lonii mɛi.

¹¹ Táre-nuu líi kpeleɛ̂i. À núu ŋɔsɔnyɔ̂ŋ su-mɛni lɛ̀ɛ, a ƃaa-kɛ-maa sɔlɔ ƃô.

¹² Kâloŋ ŋɔlii-ŋwana káa yɛ̂ɛ yala-sulu kpéɣe-woo, kɛ́lɛ à kɛ̀ ǹíi lâai íyêei, gáa yɛ̂ɛ lúu a pù sí-sɛŋ ma.

¹³ Ƃoo lôloŋ a ǹâŋ su kàra. Laa-saa-nɛni káa yɛ̂ɛ pɛ́rɛ nyii a ƃɔ̂ a tãi kéleei.

¹⁴ Pɛ́rɛ da tɔɔ-sãa ƃa ínâŋ ŋɔpɔɔ-sãai nyii a ǹɛɛ ǹônii mɛni ma, kɛ́lɛ táre-nɛni ƃa Ɣâla Yâwɛɛ ŋɔƃɛlɛ-seei.

¹⁵ Nyɛ̃-nyɛŋ a núu pìli nyii su kôya su. Puru a nyɛ̃ŋ-nyɛŋ-nuu pàa.

¹⁶ Ǹúui a Ɣâla ŋɔtɔ̂ŋ mɛi kâai, ŋɔfúlu-laai su a kôya. Ǹúui a ŋ̀ɛ́i nàɣiŋ Ɣâla wóo mɛi, a sâa.

¹⁷ Ƃà kôlo-nuu malôŋ kàa, ƃa kpa pili Ɣâla Yâwɛɛ ma, ǹyaŋ Ɣâla Yâwɛɛ a pâi íkpai kulâi.

¹⁸ Ílôloŋ kula-maa kɛ́ tãi kili kɛ-zu káa la íyêei a gɛɛ m̀aa a pâi fálenii. Kɛ́lɛ ƃa wàla gɛ́ tí, íkaa kpɔnîi ma a gɛɛ zu é kara.

¹⁹ Fɛɛ lii-ŋwâna-nuu é ŋɔlii ŋwânai vela-fei sɔlɔ ƃó, kpɛ́ni fêi, ƃà gùla mɛnîi, da pâi ŋɔ́nɔ ítôlii a gɛɛ í ŋuŋ ma ƃó.

²⁰ Íwoli tɔ́ɔ lia-woo ma, í sɛŋ-lɛɛ síɣe a gɛɛ gbɛɛ ŋái í kɛ́ a ítareɛɛ.

²¹ Núu-kpune líi-su-mɛni tâmai, kɛ́lɛ Ɣâla Yâwɛɛ ŋɔnîa-mɛni a pâi kɛ̂i.

²² Sɛŋ wɛ̂li ŋánaa a pâ a ƃaa kûla-maa núu pɔ́. Kôlo-nuu lɛ̂lɛɛi é tɛ́ɛ lɛ́ɛ-nuu ma.

²³ Ɣâla Yâwɛɛ ŋɔyao-maai a pâ a fúlu-laa su kôyaa. Ǹúui a gíli pù mai, a líi-laa sɔlɔ ƃô. Mɛni nyɔ́mɔɔ fé pâi pâi bɔ́.

²⁴ Nyɛ̃ŋ-nyɛŋ-nuu a ǹyée lɔ̀ pâne su, kɛ́lɛ va pɔ̂ri ǹyée tɛ̂i ǹá.

²⁵ Ƃà tɔ̂ŋ pù ǹúui ma a ɣɛ́lɛ-maa kûla núu kponôi, diai táre fé díŋuŋ sui, da pâi târei. Ƃà táre-nuu ŋɔpɔra-maai lɛ̀ ma, a pâi mɛni ŋá kâai.

²⁶ Lóŋ-surɔŋ nyii a ǹâŋ lòkwa é ǹee kpɛ́i, a ƃâa kùla gbîŋ ma.

²⁷ Ńoŋ, ƃà kpèra sɛŋ-maa kɔ́riɛɛ ma, ƃa pâi niâi m̀ɛnii ma í maa kɔ̂rii.

²⁸ Wôya-sere-faa-kɛ-nuu a ɣɛ́lɛ maa kùla nûa kponôi dítɔ̃yâi mɛni ma. Ŋwana-lɔ̂ɔ-nuu è sɔnyɔ̂ŋ wɛ́lini.

²⁹ Ɣɛ́lɛ-ma-kula-nuu a ŋɔtɔŋ-kpɛ-maa sɔlɔ ƃô. Ƃoo-nuu ŋɔtɔŋ-kpɛ-maa ƃa lókwa.