Hanwon 12 - Bible

¹ Ǹúui nyii ŋ̀wɛ̂lii é kɛ́ a dáreɛɛi, ƃa ŋɔpɔara mɛni maai lɛ̀ ma, ǹíi a nɛ̃ɛ, kɛ́lɛ ƃoo-nuu fa ŋ̀wɛli dí ŋɔpɔara mɛni maai lɛ́ ma.

² Ɣâla Yâwɛɛ líi lâai tɔ̃yâ-nuu mɛni ma, kɛ́lɛ a ŋwana-lɔ̂ɔ-nuu kula maa kɛ̂.

³ Ŋwana-lɔ̂ɔ-nuu tɔɔ̂i fé kpanaŋ ní, kɛ́lɛ tɔ̃yâ-nuu tɔɔ̂i kpanaŋɔ̂i.

⁴ Nɛnî sɔŋ lɛ́lɛɛ a pâ a ƃaa-kɛ-maa ŋɔsurɔ̂ŋ pɔ́, kɛ́lɛ nɛnî nyii a ŋɔsurɔ̂ŋ ŋûmɛi, gáa yɛ̂ɛ núu-kao-su kɔlɔ-fela.

⁵ Tɔ̃yâ-nuu ŋɔkili-ŋa sîai sãâi, kɛ́lɛ ŋwana-lɔ̂ɔ-nuu ŋɔlia-wooi káa nɔ́ a wôya-pere.

⁶ Ŋwana-lɔ̂ɔ-nuui ŋɔlia-wooi káa yɛ̂ɛ nuu a gbã́ tèe núu perei, kɛ́lɛ tɔ̃yâ-nuu wóo a núu kùla mɛnîi.

⁷ Da ŋwana-lɔ̂ɔ-nuu yée mɛi ɣâle, zuu fa ŋɔ́nɔ kɛ̀ ma, kɛ́lɛ tɔ̃yâ-nuu suu káa nɔ́ naa.

⁸ Da ƃaa-kɛ-maa tɛ̂ɛ táre-nuu pɔ, kɛ́lɛ da dí ŋɛ́i naɣiŋ ƃoo-nuu mɛi.

⁹ Ǹúui a tíi kɛ̀ gbîŋ mɛni mai, m̀ɛni lɛ̂lɛi é tɛ́ɛ ǹúui ma a gbîŋ kɛ̀tɛ, ǹyaŋ gɔ́nɔŋ fé mai.

¹⁰ Tɔ̃yâ-nuu a ŋɔtaa-tulɛi sòŋ a ǹɛ́lɛɛ, kɛ́lɛ ŋwana-lɔ̂ɔ-nuu a ŋ̀ɔɔ-ŋai sôŋ a nyɔ́mɔɔ.

¹¹ Tíi-kpanaŋ kɛ́-nuu a mii-sɛŋ támaa sɔlɔ ƃô, kɛ́lɛ ƃoo-nuu a ǹyée pìli tíi kpɛ́ni-kpɛni kɛ́ɛ su.

¹² Ŋwana-lɔ̂ɔ-nuu ŋɔkili-ŋa-siai káa nɔ́ ŋɔŋwana-lɔ̂ɔi ma, kɛ́lɛ tɔ̃yâ-nuu tɔɔ̂i kpanaŋɔɔ̂i.

¹³ Ŋwana-lɔ̂ɔ-nuu wóo a bìli mɛnîi, kɛ́lɛ tɔ̃yâ-nuu wóo a gùla mɛnîi.

¹⁴ Ǹúui da-ni da dífela-fei sɔlɔ ƃô yɛ̂ɛ berei dílono-woo káa lai, ǹúui da-ni díkɛ díwɔ̂i sɔlɔ ƃò dítii kɛ́-perei su.

¹⁵ Ƃoo-nuu a gíli ŋá sìa a gɛɛ ŋɔmɛnii lɛ̂lɛi, kɛ́lɛ táre-nuu a lia-woo mɛni.

¹⁶ Ƃoo-nuu a ŋɔlii ŋwânai lɛ̀ a maa félaa. Kɛ́lɛ ƃa wóo nyɔ́mɔɔ ƃò táre-nuu ma, a mɛi sâa.

¹⁷ Tɔ̃yâ-nuu a tɔ̃yâ sere-faa kɛ̀, kɛ́lɛ wôya-nuu a lɛ́ɛ sere-faa kɛ̀.

¹⁸ Ƃoo-woo a sôli yɛ̂ɛ ƃóa-sɔ̂kpɔ, kɛ́lɛ táre-woo a núu ƃàlo.

¹⁹ Tɔ̃yâ-woo káa nɔ́ naa wɔ́lɔ-wɔlɔ da wɔ́lɔ-wɔlɔ, kɛ́lɛ lɛ́ɛ-woo fa tûa.

²⁰ Wôya-mɛni kɛ́ɛ káa ŋwana-lɔ̂ɔ-nuu kponôi, kɛ́lɛ diai da lii-see kɔrii, da pâi lii-nɛ̃ɛ sɔlɔ ƃôi.

²¹ Mɛni kpɔ̂lu fa kûla tɔ̃yâ-nuu ma, kɛ́lɛ wôya-nuu káa mɛni kpɔ̂lu su a tãi kélee.

²² Lɛ́ɛ-nuu ƃɛlɛ fé Ɣâla Yâwɛɛ koi, kɛ́lɛ diai da tûa sãa kɛ̀i, ǹíi lâai dí mɛni ma.

²³ Táre-nuu fa gbîŋ lɛ̀ a gɛɛ dáreɛi, kɛ́lɛ ƃoo-nuu a yoŋka tèe a ŋɔƃoo-woo-ŋai.

²⁴ Da tíi kpanaŋ kɛ́-nuu kɛ̀ a núu-mɛi-nuu, kɛ́lɛ nyɛ̃ŋ-nyɛŋ a núu kɛ̀ a luɛ.

²⁵ Lii-sɛlɛŋ a núu ŋɔlii-nɛ̃ɛi su kàra, kɛ́lɛ wóo lɛ́lɛɛ a núu líi nɛ̃ɛ.

²⁶ Tɔ̃yâ-nuu ŋɔlia-wooi a gɔlɛ-maa-nuui téniŋ-tɔɔ, kɛ́lɛ ŋwana-lɔ̂ɔ-nuui ŋɔlia-wooi a gɔlɛ maa-nuui kùla bere lɛ́lɛɛi ma.

²⁷ Nyɛ̃ŋ-nyɛŋ-nuu fa sɛŋ sɔlɔ ƃô nyii a ŋ̀wɛ̂lii, kɛ́lɛ tíi-kpanaŋ kɛ́-nuu a tɔ̂ɔ.

²⁸ Tɔ̃yâ-laa a pâ a fúlu-laa, ŋwana-lɔ̂ɔ kɛ́ pà a saa.