Gɛlaɠaa 5 - Bible

Ananaya da Sofaya

¹ Nalôŋ tɔnɔ da è kɛ̀ naa máŋ ǹáa ƃé kɛ̀ a Ananaya. Ŋɔnɛnîi láa ƃé kɛ̀ ƃò a Sofaya. Da ǹyaa dí díkɔ̃liŋ da kɔ̀lɛ.

² Kɛ́lɛ zɛŋ-kaoi dí zɔlɔ ƃò zui da nɔ́ ƃé zurɔ̂ŋ ɣelei è pà la zia-ƃelai pɔ́.

³ Nya ƃe Pitɛ è mò ma ǹyɛɛi, “Ananaya, lé mɛni ƃé í ǹɛɛ la naa Sêtɔŋ ŋɔwála-walai é tɛ́ɛ yâ í lɛ́ɛ kɛ́ M̀ɔlêŋ Maa Waai mai. Í ǹɔii sɔ̃ɔi da lɛ̀ɛ pôlui lé mɛni ma?

⁴ Ílɛɛ pâi íkɔ̃liŋ kɔlɛɛ̂i, vé kɛ́ ní naa a ípɔɔ? Gɔlɛ́ɛ yɛ̂ pôlu mai, zɔ̃ɔ fé kɛ́ ní íwala-walai mu? Lé mɛni ƃé í m̀ɛnii ŋí kpɛ̀tɛ la íkili ŋái? Ífe lɛ́ɛ kɛ́ ni nuu-kpune ma, kɛ́lɛ, í gɛ̀ Ɣâla ma.”

⁵ Ŋ̀óo-ŋai ŋí mɛniɛɛ Ananaya mii, è tòo é sáa. Yao kɛ́tɛ è pà kpɔ́ ǹúui kélee kponôi m̀ɛnii ŋí mɛnii.

⁶ Ǹyaŋkpa-ŋai dí pà dí m̀aa ɣíri dí lí la dí nòo.

⁷ Aƃa saaƃa tɛ̂ɛi pôlu ma ŋɔnɛnîi nyíi vé kɛ́ ní a m̀ɛnii ŋí kɔ́lɔŋɔɔ kɛ̀i, è lɔ̀.

⁸ Pitɛ è mò ma, ǹyɛɛi, “À kɛ̀ ká ǹɔii kɔ̀lɛ a zɔ̃ɔ kɛ́ɛ ŋí, m̀ó mâ.” Ǹɛnîi ǹyɛɛ ma, “Ooei, zɔ̃ɔ ká ti.”

⁹ Kɛ́lɛ, Pitɛ è mò ma, ǹyɛɛ, “Lé mɛni ƃé káfeerɛ ka fàa la ma ká Kúnuu-namui Ŋɔmɔ̂leŋ su kɔɔŋ? Gáa, ǹyaŋkpa-ŋai dí ísurɔ̂ŋ lòoi, da tɔ̂ɔni bɛ́rɛi lá. Da pâi kulâi a yá ŋ̀énei ŋá lonîi ma.”

¹⁰ È kɛ̀ kpɔ́ tí ǹɛnîi é tóo gɔ́ɔ mu a naa m̀aa félaa é sáa. Nya ƃe ǹyaŋkpa-ŋai dí lɔ̀ dí bomai káa dí ziɣe dí lí la dí nòo ŋɔsurɔ̂ŋ kɔlɛ.

¹¹ Kôrai-toli-kpɔŋ su-ƃelai da diai kélee m̀ɛnii ŋí mɛ̀nii dí yào a ŋ̀ánaa.

Pitɛ è ŋɛi-kɛ-maa támaa da mɛni kpaya-kpaya kɛ̀

¹² Zia-ƃelai dí ŋɛi-kɛ-maa támaa da mɛni kpaya-kpaya-ŋa kɛ̀ ǹûai ŋɛ́i. Díkelee dí kɛ̀ zu tɔnɔɔ Saloma ŋɔkâlai ŋá.

¹³ Diai dífe kɛ́ ní ǹúu-kpului ŋí sui da fé fáa ní ma é pá dípɔ, berei máŋ nûa dí ƃaa kɛ́-maa támaa tɛ̀ɛ la zu-ƃelai dípɔi.

¹⁴ Kɛ́lɛ ǹaa-la-ƃelai pà Kúnuu-namui ŋɔƃélai ma-pere a ɣele kéleei, dí kɛ̀ a dítamaa--sinaa da nɛyaa.

¹⁵ Nyíŋi kɛ́ɛi, dí lì a gɔlɔ fela-ƃelai bere-ŋai ma dí dílaa gbìŋ-ŋai ŋá da gára-ŋai ma, a gɛ́ɛ Pitɛ à pà, ǹinîŋ nɔ́ é pú da-ŋa dîa.

¹⁶ Nya ƃe kpɔŋ támaa dí kúla Zerusâlɛŋ kɔlɛ ma taa-ŋai su dí díŋaa tɛ̀ ma dí pá a kɔlɔ-fela-ƃela nyíi-ŋai nyînaŋ nyɔ́mɔɔ è kɛ́ dípôlui. Dí díkelee ƃàlo.

Dí zia-ƃelai kpɔ̀ara

¹⁷ Kɛ́lɛ, zâla láa soŋ-nuu kɛ́tɛi da ǹûai kélee da dîa-ni dí kɛ̀ naai dílii e ŋwána (nyíi-ŋai kɛ̀ a Sâdusii-ŋai). Dí láa è kɛ̀ kpɔ́ a vɛ́ɛ a tólo.

¹⁸ Dí zia-ƃelai sòŋ dí dípu kpini-pɛrɛ mu.

¹⁹ Kɛ́lɛ, Ɣâla-taa kela tɔnɔ è gbini-pɛrɛi láa ƃò a kpini é díkula naa, ǹyɛɛ dîai,

²⁰ “Ka lí ká tɔ́ɔ Ŋ̀âla-pɛrɛ Kɛ́tɛi mu ká ŋ̀éniɛi ninai ŋí su-mɛni kélee ƃó ǹûai dîa.”

²¹ Nyíŋi mɛniɛɛ dîɛi, dí lì Ŋ̀âla-pɛrɛ Kɛ́tɛi mu a ŋ̀ele-walai dí sɛŋ lɛ́. Zâla láa soŋ-nuui è pà da bôlu-ƃelai dí goyâŋ su-ƃelai ŋáa tɛ́ gîe ma da Eezuɛ nuu-pɔlɔ-ŋai dí núu tɛ́ɛ gbini-pɛrɛi lá a gɛ́ɛ dí pá a zia-ƃelai.

²² Kɛ́lɛ, diai dí dítɛɛi, dífe díkaa ni gbini-pɛrɛi mu. Dí lì pôlu dí mó dîa, dîyɛɛi,

²³ “Kú gbini-pɛrɛi kàa ǹá tɛ́ɛ gwaa kélee, gbini-pɛrɛ mɛi-kaa-ƃelai díkɛ ƃò tɔ̂ɔni gbôŋ lá. Kɛ́lɛ, bɛ́rɛi lá ƃóɔɔ kûɛi, kúfe núu kélee káa ní mu.”

²⁴ Zâla láa soŋ-ƃela kpaya-kpayai da Ŋ̀âla-pɛrɛ kɛ́tɛi mɛi-káa-ƃelai kɛ́ɛ dí nyíŋi mɛni lai, díkili ŋá è tɛ̀i kpɔ a dámaa e pîlaŋ la dîa da m̀ɛnii pâi kulâi nyíŋi sui.

²⁵ È kɛ̀ nɔ́ ti, núu tɔnɔ kɛ́ pà é m̀ó dîa, ǹyɛɛi, “Ka gáa, ǹûai ka dípu gbini-pɛrɛi mui, díkaa tɔ̂ɔni Ŋ̀âla-pɛrɛ kɛ́tɛi mu díkɛ sɛŋ lɛ̀ ǹûai dîa.”

²⁶ Nya ƃe ǹɔii maa kpɛ́-ƃelai mɛi-nuui da ǹyée mu-ƃelai dí lì dí pá a dîa. Kɛ́lɛ, dífe dísoŋ ní a ƃaa kula maa pere, kpɛ́ni fêi, gɛ́ɛ ǹûai dífa la dísɔɔ la a kɔni.

²⁷ Dí pàa a diai, dí dítɔ̀ɔ gbɔŋ tuɛ. Nya ƃe zâla láa soŋ-nuu kɛ́tɛi e dímarê kɛ̀,

²⁸ ǹyɛɛ dîai, “Kú mò kâa a gbanaŋɔɔ a gɛ́ɛ káfe sɛŋ lɛ̀ ǹáai ŋí su. Ka gáa, ka Zerusâlɛŋ láa fɛ́ɛ a kásɛŋ-lɛɛi, kákɛ ŋ̀wɛli a gɛ́ɛ ká ǹalôŋ ŋí saa mɛni lɛɛ kûa.”

²⁹ Kɛ́lɛ, Pitɛ da zia-ƃelai dí zu too, dîyɛɛ dîai, “Fɛ̂ɛ kú Ɣâla ŋɔwóoi mɛni é tɛ́ɛ nuu-kpune ma.

³⁰ Kúnâŋ-ni Díɣâlai ƃé Zîsɛ mu siɣe saa yêei, nyíi ká gbàmo wúru-su-tíyeŋɔɔ mai.

³¹ Ɣâla è m̀aa tɛ̀ a ǹáa mii-yee a nuu túɛ-nuu da nuu-ƃalo-nuu, a gɛ́ɛ é gɛ́ Eezuɛ-ƃelai dí dílii pene Ɣâla é dísɔnyɔ̂ŋ-ŋai su mɛni lɛɛ.

³² Kúkaa a mɛni-ŋai ŋí maa sêre-ŋa kwa M̀ɔlêŋ Maa Waai ni, nyíi Ɣâla è dɛ̀ɛ diai pɔ́ da ŋ̀óo mɛnii, ǹyaa máŋ gáa la.”

³³ Kɛ́lɛ, ǹûai kɛ́ɛ da nyíŋi mɛnii, dílii è tèe díkoi a ŋ̀ánaa, díkɛ ŋ̀wɛli dí dípaa.

³⁴ Kɛ́lɛ, Faresii-nuu tɔnɔ è kɛ̀ gbɔŋ tí su ǹáa ƃé kɛ̀ a Gameliɛ. È kɛ̀ a dɔ̂ŋ lɛ́-ƃelai dɔnɔ. Ǹûai kélee dí ƃâa kɛ̀ ma, e sìɣe e tɔɔ e mo a gɛ́ɛ zia-ƃelai dí kula gbɔŋ su a guro.

³⁵ È mò dîa, ǹyɛɛi, “Eezuɛ-ƃela, ka kámɛi káa a ǹûai ŋí.

³⁶ Ŋ̀ele-ŋai ŋí dí lɛ́ɛ pâi serîi, Teuda è sìɣe é tɔ́ɔ é gbîŋ kɛ́ a núu kɛ́tɛ. Kpakolo kɛ́ɛ yɛ̂ɛ ŋ̀uŋ náaŋ dí pîlaŋ bôlu. Kɛ́lɛ, dí bàa, diai kélee ŋ̀óo mɛnii dí táa-tàa dí lɛ́ɛ kpɛ́ni-kpɛni.

³⁷ Nyíŋi pôlu ma, Galalii-nuui Zudasi è mu sìɣe a Ǹûa láa siɣe tãi é núu támaa sìɣe a gɛ́ɛ dí kɛ́ bôlu. Ǹyaa máŋ è sàa, diai kélee dí ŋ̀óo mɛni dí táa-taa.

³⁸ M̀ɛni ma ŋa môi kâa a gɛ́ɛ ká tée ǹûai ŋí dîa ka dílɛɛ naa dí li, kpɛ́ni fêi, à kɛ̀ mɛni kpɛtɛɛi ŋí kpaa díi ŋí káa a nuu-kpune kɛ́-tii, a pâi fɛɣɛ̂i.

³⁹ Kɛ́lɛ, à kɛ̀ Ɣâla kpɛtɛ mɛni ƃe káyee fé pâi pɔrîi dîa. Ɣele da ka pâi gâai a gɛ́ɛ kákaa kɔ̂i Ɣâla pɔ́!”

⁴⁰ Nya ƃe dí ŋɔlia-wooi mɛ̀ni. Dí zia-ƃelai ŋí tòli dí dílokwa dí m̀ó dîa a gɛ́ɛ dífe ŋɔ́nɔ lono Zîsɛ láai su, dí tee dîa dí lí.

⁴¹ Zia-ƃelai kúlaa gbɔŋ sui, dí li a lii-nɛ̃ɛ, kpɛ́ni fêi, Ɣâla a fáa ma a gɛ́ɛ dímaa nɛ̃ɛi kɛ̀ dí mɛni-soli káa a ŋumɛ pere Zîsɛ láai mɛni ma.

⁴² Dí kɛ̀ nɔ́ Zîsɛ maa mɛni lɛ̂i ɣele kélee Ŋ̀âla-pɛrɛ kɛ́tɛi mu da pɛ́rɛ kélee lá a gɛ́ɛ gáa a Kôrai.