Gɛlaɠaa 26 - Bible

Pɔ̂ɔ è gbîŋ maa kɔ̃ɔ Agulepa ŋɛ́i túɛ

¹ Nya ƃe Agulepa e mò Pɔ̂ɔ ma, ǹyɛɛi, “Ya pɔ̂ri nâa lônoi íkpîŋ mɛni ma.” Nya ƃe Pɔ̂ɔ e ǹyée sâa gɛ nâa gbîŋ maa kɔ̃ɔ, ǹyɛɛi:

² “Ńyãa kpîŋ ńii lâai, Gâloŋ Agulepa, a gɛ́ɛ sâa ŋa pâi ŋ́gbîŋ maa kɔ̃ɔ̂i íŋɛi tuɛ ŋa lono mɛni-ŋai kélee ma Zûu-ŋai dí mò a ńaâi.

³ Kpɛ́ni fêi ŋɔ́nɔ tela, í Zûu-ŋai tûa-pere kélee kɔlɔŋ a ǹɛ́lɛɛ da mɛni-ŋai kélee da zîa tòoi; mɛni ma ŋa íkpera fé a gɛ́ɛ í íwoli tɔɔ mâ a lii-kpele.

⁴ “Zûu-ŋai kélee dí ŋáfulu-laai kɛ́-pere kɔ́lɔŋ ŋá gɛ̀ ŋ́gbɔɔi-nuai sáma Zerusâlɛŋ í síɣe tãi ma ŋá kɛ̀ la a nyáŋkpai.

⁵ Da gɔ́lɔŋ kpɔ́ a tãi su kôya, à kɛ̀ da ŋ̀wɛ̂lii dí m̀aa sêre-faa kɛ́, a gɛ́ɛ ŋá kɛ̀ a Faresii-nuu yɛ̂ɛ berei Kúɣala-nuu-kpulu sãai e mò lai.

⁶ Ŋ́gaa nâa tɔ̂ɔni ƃɛ mɛni-ŋa-teɛɛ su, kpɛ́ni fêi, kili-kɛ-zu káa ńyêei gono-teei mɛni ma Ɣâla e gɛ̀ kúnâŋ-ni pɔlɔ-ŋai yêei.

⁷ Gáa a gono-teei, nyíi Kúnuu-sii puu kao feerɛi káa Ɣâla fɛlîi mɛni ma kpɔ́ a fólo da kpini a gɛ́ɛ ŋ̀aa-see e kɛ́ dîɛi. Gili-kɛ-zui ŋí mɛni ƃe Zûu-ŋa da lônoi la a ǹáa, gâloŋ!

⁸ Le ƃe ŋaŋ káfa lâa la kákili-ŋa-siai su a gɛ́ɛ Ɣâla a saa-ƃela mu siɣei?

⁹ “Ńyãa kpîŋ ŋá gɔ̀lɔŋ a gɛ́ɛ fɛ̂ɛ kɛ̀ ŋa mɛni nyɔ́mɔɔ támaa kɛ́ Nâzarɛ Zisɛi láai kara-mɛni ma.

¹⁰ Ŋa mɛni nyɔ́mɔɔ-ŋai ŋí kɛ̀ máŋ Zerusâlɛŋ. Ŋá wála-wala-laa kùla zâla láa soŋ-ƃela kpaya-kpayai yêei ŋa Ŋ̀âla-ƃelai dámaa pu kpini-pɛrɛ mu. Tãi dí kɛ̀ dípaâi lai, ŋá fàa ma.

¹¹ Ŋá tɔ̂ŋ kpɛ̀ dîa Ŋ̀âla-fɛli kêre-ŋai kélee mu a tãi támaa, ŋa díkɛ dí tɛ-ŋɛi kɛ́; berei ńii ŋwánai kɛ̀ la dîa kpɔ́ a dámaai, ŋá díkpɔ̀ara máŋ taa da kpɛni-ŋa su.

Pɔ̂ɔ è ǹíi-maa-fáleŋ-mɛni ƃò

¹² “Nya ƃe zâla láa soŋ-ƃela kpaya-kpayai dí wála-wala tɛ̀ɛ ḿbɔ dí ńdɛɛ Dimɛika.

¹³ Voloi tɛ́ɛ ŋuŋ mai, gâloŋ, ŋá kwaa-ponoɔ kàa berei ma è kùla ŋ̀elei su. È kɛ̀ kpɔ́ fólôi e tɛ́ɛ volo-kaoi ma. E maa pono kwa dîa kɛ̀ liî.

¹⁴ Tãi kúkelee ku tòo la ǹɔii mai, ŋá wóo mɛ̀ni gɛ lono ḿbɔ Ibulu-wooi su, ǹyɛɛi, ‘Sɔ̂ɔ, Sɔ̂ɔ, lé mɛni ƃe ya ŋ́gbɔara lai? Yà wúru-ŋa-seniɛ tùa a íkɔɔ, a íwàna.’

¹⁵ Nya ƃe ŋá mò, ǹyɛɛi, ‘Gbɛ̂ɛ ƃa ya, ŋánuu-namui?’ E mò mâ, ǹyɛɛi, ‘Ńyãa ƃa Zîsɛ nyíi íkaa gbɔarâi.

¹⁶ Kɛ́lɛ, ímu siɣe í tɔ́ɔ íkɔɔ ŋá; kpɛ́ni fêi, ŋa kula íŋɛi nyíŋi mɛni ma a gɛ́ɛ ŋa íkɛ í tíi kɛ́, í mɛni-ŋai maa-seri-faa kɛ́ ya gáai da nyíi-ŋai ya pâi gâai.

¹⁷ Ŋa pâi íƃalôi ínûai yêei, ŋá íƃalo Zɛ̃tai-ŋai yêei-nyíi-ŋai ŋa ítɛɛ̂i dípɔ naai,

¹⁸ a gɛ́ɛ í díŋɛi lá ƃo í díkula kpinîi í pa a dia kwaa-ponoɔ su í díkula Sêtɔŋ ŋɔwála-walai su í pa a dia Ɣâla pɔ, a gɛ́ɛ dí sɔnyɔ̂ŋ su-mɛni-lɛɛ maa sɔlɔ ƃo. A gɛɛ ŋɔ́nɔ dí kwaa ma sɔlɔ ƃo diai sama, nyíi-ŋai dímaa waâi a naa-laai gáa díyêei ḿɛni mai.’

Pɔ̂ɔ è sêre-faa kɛ̀ Zûu-ŋai dîa da Zɛ̃tai-ŋai

¹⁹ “Mɛni ma, Gâloŋ Agulepa, fe zĩ̂ai ti su-wooi píli ni.

²⁰ Kɛ́lɛ, maa-ŋuŋ, ŋá mò Dimɛika-ƃelai dîa da Zerusâlɛŋ-ƃelai da Zuda-ƃelai kélee e pɛlɛ Zɛ̃tai-ŋai dîa a gɛ́ɛ dí dílii pene dí pa Ɣâla pɔ, dí tíi kɛ́ a ǹɛ́lɛɛ yɛ̂ɛ lii-pene-ƃela.

²¹ Sapoi ŋí ƃé Zûu-ŋai dí ńzòŋ la Ŋ̀âla-pɛrɛ kɛ́tɛi mu. Dí kɛ̀ ŋ̀wɛ̂lii dí ḿbaa.

²² E siɣe tãi ti ma e seri sâa ma Ɣâla a kpɔŋ mâ. Mɛni ma ŋ́gaa tɔ̂ɔni ƃɛ núu kpaya-kpaya ŋɛi da nia-pɛlɛɛ ŋ́gɛ mɛni-ŋai m̀aa sêre-faa kɛ́, nyíi-ŋai Ɣâla ŋɔlóno kɛ́-ƃelai da Mose-ni dí wɔ́lɔ mò a gɛ́ɛ da pâi kɛ̂i. Fe mɛni da kpɛni ƃo ni é kúla díwoo-ŋai ŋí pôlu.

²³ Nya ƃa berei fɛ̂ɛ Kôrai é mɔ̃lɛ lai da berei fɛ̂ɛ é kɛ́ la a ǹúui maa-ŋuŋ e m̀u siɣe saa yêei e kwaa-ponoɔ lɛ́ ǹûai dîa da Zɛ̃tai-ŋai.”

Pɔ̂ɔ è Agulepa lia-wôo ƃò a gɛ́ɛ laa-laa é kɛ́ ǹyêei

²⁴ Tãi Pɔ̂ɔ è kpɛ̀ɛ la a gbîŋ maa kɔ̃ɔ̂i, Fɛtɔ è mò mà a ŋ̀óo su kɛ́tɛ, ǹyɛɛi, “Pɔ̂ɔ, íŋuŋ su káa nyɔ̃ɔ. Kɔlɔ támaa kɔ́lɔŋɔɔ káa a íŋuŋ su kɛ̂i nyɔ̃ɔ.”

²⁵ Kɛ́lɛ, è mò ma, ǹyɛɛi, “Ŋuŋ su fe nyɔ̃ɔ, Fɛtɔ, yái íkaa a gâloŋ lɛ́lɛɛi. Kɛ́lɛ, ŋa dɔ̃yâi ƃôi kpɔ́ a zu ponoɔ.

²⁶ Kpɛ́ni fêi, gâloŋ Agulepa e mɛni-ŋai ŋí kélee kɔ́lɔŋ, nyíi máŋ ŋa lônoi ŋ̀ɛi tuɛ ŋ́gbɔɔi-yee mai; kpɛ́ni fêi, ŋa gɔ́lɔŋ kpɔ́ a ǹɛ́lɛɛ a gɛ́ɛ mɛni-ŋai ŋí dɔnɔ kpîŋ fe loo ni mà, kpɛ́ni fêi, mɛnii ŋí fe kɛ́ ni loo-pere su.

²⁷ Gâloŋ Agulepa, ílaâi a Ɣâla ŋɔlóno kɛ́-ƃelai? Ŋá gɔ́lɔŋ ílaâi a dia.”

²⁸ Nya ƃe Agulepa e mò Pɔ̂ɔ ma, ǹyɛɛi, “Ya ŋ̀wɛ̂lii í ŋ́gɛ ŋá kɛ́ a Kôrai-nuu tãi kpua yée mu!”

²⁹ Nya ƃe Pɔ̂ɔ è mò mà, ǹyɛɛi, “À nɛ̀ɛ ma máŋ é kɛ́ a tãi kpua kpaa máŋ tãi kôya, ŋa Ɣâla fɛlîi a gɛ́ɛ ya tɔnɔ nɔ́ fei, kɛ́lɛ, diai kélee ŋ́oo mɛnîi sâai, dí kɛ́ yɛ̂ɛ ńyãa é kúla nɔ́ ǹyɔlɔi-ŋai ŋí pôlu gáa ḿâi.”

³⁰ E nâa kɛ̀ ti, gâloŋ e mu siɣe, da gɔmɛnɛ-nuu kɛ́tɛi da Bɛnîi, e pɛlɛ diai ma kɛ̀ díkɔlɛi;

³¹ díkɛɛ da lí ŋuŋ-pîlaŋ sui, dí mò díkîe-ni loai, dîyɛɛi, “Ǹalôŋ ŋí fe mɛni da kélee kɛ̂i, nyíi a pɔ̂ri zu-saa ƃôi, kpaa máŋ e kpini-pɛrɛ siɣe.”

³² Nya ƃe Agulepa e mò Fɛtɔ ma, ǹyɛɛi, “Ǹalôŋ ŋí eêi wàla máŋ lí a ŋɔmɛnii Gâloŋ Siizɛ pɔ, dîi pɔ̀ri teêi ma.”