Gɛlaɠaa 25 - Bible

Pɔ̂ɔ è lì a ŋɔmɛnii Gâloŋ Siizɛ pɔ́

¹ Fɛtɔ páa ŋɔlɔii-kpiniŋ sui, ɣele kûu saaƃa pôlu mai, è kùla Sɛsɛria é lí Zerusâlɛŋ.

² Zâla láa soŋ-ƃela kpaya-kpayai da Zûu-ŋai túɛ-ƃelai dí gíli ŋá pòno a Pɔ̂ɔ maa mɛni. Dí gbera fé,

³ Dí m̀arê kɛ̀ a gɛ́ɛ é mɛni lɛ́lɛɛ kɛ́ dîɛ, nya ƃa é Pɔ̂ɔ worɛ̂ tɛɛ é pa Zerusâlɛŋ. Dí gbɛ̀tɛ a gɛ́ɛ dí gbã tee berei dí bàa berei su.

⁴ Kɛ́lɛ, Fɛtɔ è díwoo su too ǹyɛɛ dîa, “Pɔ̂ɔ káa Sɛsɛria. Ńyãa kpîŋ ŋa pâi liî naa a maa félaa.

⁵ Tɔɔ kwa kálaa túɛ-ƃelai da-ŋa kú lí Sɛsɛria, à kɛ̀ mɛni nyɔ́mɔɔ da kélee káa gbonôi dí m̀ó.”

⁶ Gɛ́ɛ da dîa-ni da ɣele kûu lɔ́ɔlu mɛi saaƃa kpaa máŋ puu kɛ́ nɔ́ naai, è lì Sɛsɛria. Bôlu ma ɣelei è sèe mɛni-sâa ƃó see-sɛŋ ŋá é m̀o a gɛ́ɛ dí pá a Pɔ̂ɔ.

⁷ Pɔ̂ɔ è páai, Zûu-ŋai, nyíi-ŋai kùla Zerusâlɛŋ dí tìnaŋ ma, dí mɛni kpaya-kpaya támaa ƃó a ǹáa, nyíi-ŋai vé kɛ́ ní a tɔ̃yâi.

⁸ Pɔ̂ɔ è gbîŋ maa kɔ̃ɔ a ŋ̀óo-ŋai ŋí, ǹyɛɛi, “Fé niî Zûu-ŋai dítɔ̂ŋ da kara ní, kpaa máŋ Ŋ̀âla-pɛrɛ kɛ́tɛi, kpaa máŋ ŋá tɔ́ɔ Gâloŋ Siizɛ ma pere sîi da kélee su.”

⁹ Kɛ́lɛ, Fɛtɔ è kɛ̀ ŋ̀wɛ̂lii è Zûu-ŋai líi láa. È mò Pɔ̂ɔ ma ǹyɛɛi, “Ya ŋ̀wɛ̂lii a gɛ́ɛ í lí Zerusâlɛŋ a gɛ́ɛ ŋá kámɛnii su káa naa?”

¹⁰ Pɔ̂ɔ ǹyɛɛ mài, “Ŋ́gaa tɔ̂ɔni Gâloŋ Siizɛ ŋɔmɛni ƃó-kerei mu, ƃɛ́i maa nɛ̃ɛ̂i dí ŋámɛnii ŋá tee naai. Í gɔ́lɔŋ kpɔ́ a ǹɛ́lɛɛ a gɛ́ɛ fé niî mɛni nyɔ́mɔɔ da kɛ́ ní a Zûu-ŋai da.

¹¹ À kɛ̀ ŋ́gaa a mɛni nyɔ́mɔɔ kɛ́-nuu, ŋa mɛni nyɔ́mɔɔ kɛ́, nyíi fɛ̂ɛ ŋá sáa mɛni mai, fa kɔ̂ a gɛ́ɛ ŋá kúla saa yêei. Kɛ́lɛ, à kɛ̀ mɛni-ŋai ŋí da m̀ó a ńaai ńzɔŋ fé dɔnɔ kpîŋ da su, núu da kélee fé ńdɛ̀ɛ dípɔ. Ŋa liî a ŋámɛnii Gâloŋ Siizɛ pɔ́.”

¹² Fɛtɔ kɛ́ɛ a m̀ɛnii ŋí seri ŋɔlia-woo ƃo-ƃelai diai, è Pɔ̂ɔ wóo su tòo, ǹyɛɛi, “Ya liî a ímɛnii Gâloŋ Siizɛ pɔ. Ǹya ƃé Gâloŋ Siizɛ ƃé ya pâi liî bɔ́.”

Da pá a Pɔ̂ɔ Agulepa ŋɛ́i túɛ da Bɛnîi

¹³ Ɣele kûu da-ni tɛ̂ɛi pôlu ma, gâloŋ Agulepa da ŋɔsaaƃɔlɔi Bɛnîi dí pà Sɛsɛria a gɛ́ɛ dí díla ti Fɛtɔ ma.

¹⁴ Tãi dí ɣele kûu támaa kɛ̀ la naai, Fɛtɔ e Pɔ̂ɔ maa-mɛni làa gâloŋ ŋɛi, ǹyɛɛ mài, “Nalôŋ tɔnɔ káa ƃɛ Feli e nɛ̀ɛ kpini-pɛrɛ mu.

¹⁵ Tãi ŋa kɛ̀ la Zerusâlɛŋ, Zûu-ŋai dísâla láa soŋ-ƃela kpaya-kpayai da dínuu-pɔlɔ-ŋai dí ŋ́gili-ŋa pòno a maa-mɛni. Dí mò a gɛ́ɛ ŋá m̀ɛnii lɛ́ɛ mà.

¹⁶ Nya ƃe ŋá zu tòo a gɛ́ɛ ve a Lomaŋ-ŋai tûa-pere a gɛ́ɛ da mɛni da ƃo a núu láa dí kúla maa-nuui pôlu a gɛ́ɛ e sáa fɛ̂ɛ diai mɛnii ƃo a ǹáai da dîa-ni da díkîe kàa.

¹⁷ Mɛni ma tãi dí pà la ƃɛ gîe mai, fe tãi siɣe ni. Kɛ́lɛ, bôlu ma ɣele ƃɔ́ɔi ŋá sèe mɛni-ƃo see-sɛŋ ŋá, ŋá m̀ó a gɛ́ɛ dí pá a ǹalôŋ.

¹⁸ Diai mɛnii ƃo a ǹáai, dí siɣe dí tɔ́ɔ, kɛ́lɛ, dífe mɛni nyɔ́mɔɔ ƃo ni a ǹáa, yɛ̂ɛ berei ŋa kɛ̀ gâai da pâi môi lai;

¹⁹ kɛ́lɛ naa-saai, nɔ́ kɛ̀ díloai, nya ƃé kɛ̀ a díkpɔɔ̂i-Ɣâla-mɛni da Zîsɛ laa-nuu tɔnɔ, nyíi wɔ́lɔ saai. Kɛ́lɛ, Pɔ̂ɔ e mò a gɛ́ɛ gáa a vulu.

²⁰ Fe kɛ́ ni a mɛni-sii kɛ́ɛ ti su-kaa-pere kɔlɔŋɔɔ. Mɛni ma ŋá Pɔ̂ɔ marê kɛ̀, à kɛ̀ a ŋ̀wɛ̂lii e li Zerusâlɛŋ dí mɛnii su káa naa.

²¹ Kɛ́lɛ, Pɔ̂ɔ kɛ́ɛ a mɛnii tɛ́ɛ Gâloŋ Siizɛ pɔ a gɛ́ɛ ǹyaa Pɔ̂ɔ e lɛ́ɛ ŋɛi-gao-kpɔnɔ ŋá é lɛ́ɛ la zu dí mɛnii ƃói, ŋá mò a gɛ́ɛ dí zoŋ e lɛ́ɛ la zu ŋá dɛɛ Gâloŋ Siizɛ pɔ naa.”

²² Nya ƃe Agulepa e mò Fɛtɔ ma, ǹyɛɛi, “Ŋa ŋ̀wɛ̂lii máŋ ńyãa kpîŋ ŋá ǹalôŋ kpîŋ wóo mɛni.” Fɛtɔ ǹyɛɛ mài, “Ya pâi ŋ̀óo mɛnîi tínaa.”

²³ Ɣele ƃɔ́ɔi Agulepa da Bɛnîi dí pà yɛ̂ɛ kâloŋ kɛ́tɛ pá-pere. Dí lɔ̀ mɛni-ƃo-kerei mu, da ǹɔii maa kpɛ́-ƃelai mɛi-ƃela kpaya-kpayai, e pɛ́lɛ daa-ƃela kpaya-kpayai dîa. Nya ƃe Fɛtɔ e mò a gɛ́ɛ dí pá a Pɔ̂ɔ, ǹyaŋ dí pà la.

²⁴ Fɛtɔ e mò, ǹyɛɛi, “Gâloŋ Agulepa da káai kákaa ƃɛi, ka nalôŋ ŋí káa, nyíi Zûu-ŋai kélee díkaa ḿbôlu m̀ɛni ma Zerusâlɛŋ da ƃɛ máŋ. Díkaa lâɣii a gɛ́ɛ ve a sɛŋ nalôŋ ŋí e ŋɔ́nɔ kɛ́ ɣele ma.

²⁵ Kɛ́lɛ, gɛɛ ŋa gáa a gɛ́ɛ ve mɛni nyɔ́mɔɔ da kɛ́ ni nyíi a pɔ̂ri saâi mɛni mai; a gɛ́ɛ ŋɔ́nɔ ǹyaa kpîŋ a ŋɔmɛnii tɛ́ɛ Gâloŋ Siizɛ pɔi, ŋá gbɛ̀tɛ ŋ́gili ŋá a gɛ́ɛ ŋa dɛɛ.

²⁶ Fe niî mɛni da kaa ni a gɛ́ɛ ŋá bɔ̃̀yɛ ŋánuu-namui pɔ naa e pîlaŋ ma. Mɛni ma ŋa pá la káŋɛi tuɛ, yá kpîŋ tela íŋɛi tuɛ gâloŋ Agulepa, a gɛ́ɛ kwà dímɛnii su kaa, ŋa pɔ̂ri mɛni da kâai a gɛ́ɛ ŋá bɔ̃̀yɛ.

²⁷ Kpɛ́ni fêi, gáa mâ nɔ́ a ƃoo-mɛni a gɛ́ɛ núu e pelesinɛ tɛɛ, m̀ɛnii e dɛ̀ɛ lai ve ǹɛ́ ni.”