Gɛlaɠaa 24 - Bible

Pɔ̂ɔ láa ma mɛni-saai

¹ Ɣele kûu lɔ́ɔlu tɛ̂ɛi pôlu ma zâla láa soŋ-nuu kɛ́tɛi Ananaya da ǹúu pɔlɔ-ŋai da-ni dí lí dílono kɛ́-nuui Tɛtulɔ pɔ́. Dí dímɛnii làa gɔmɛnɛ-nuu kɛ́tɛi Feli ŋɛ́i dí m̀ɛnii ƃó ma mò a Pɔ̂ɔ láai.

² Tãi dí Pɔ̂ɔ tòli lai, Tɛtulɔ e nâa pɛ̀lɛ mɛni ƃôi a ǹáa, ǹyɛɛi: “Feli, yái íkaa a gɔmɛnɛ-nuu kɛ́tɛi, berei lii-sêe káa la kúyêei ísârai, da berei mɛni nyɔ́mɔ-ŋa da kula la ǹɔii-ŋuŋ ŋí su ítûa-pere-lɛ̂lɛi sui,

³ kwa kúyee see nyíŋi-ŋai mu pere-sii kélee su da kwaa kélee ma a sɛɣɛi-fei.

⁴ Kɛ́lɛ, a gɛ́ɛ fe ítãi dámaa siɣe, ŋa íkpera fêi a gɛ́ɛ íwɛli-kɛ-maai su í íwoli tɔ́ɔ kûa a gbua.

⁵ Kpɛ́ni fêi, kwa nalôŋ ŋí káa a mɛni-kɔri-nuu da núu líi su-kara-nuu Zûu-ŋai kélee sama ǹɔii su gwaa kélee. Gáa ŋɔ́nɔ a Nâzarɛ lɛɛ-mɛni lɛ-nuu-kpului tuɛ-nuu.

⁶ E kɔ̀ máŋ a gɛ́ɛ e Ŋ̀âla-pɛrɛ kɛ́tɛi kara, kɛ́lɛ, ku zòŋ. [Kûi pɔ̂ri ŋɔmɛnii ŋá teêi kútɔ̂ŋ lá-wooi ma,

⁷ kɛ́lɛ, gɔkuluƃa-ŋai mɛi nuu kɛ́tɛi, nyíi da dòli a Lesiɛ, è pà a lii-ŋwana e gula kúyêei,

⁸ e m̀ó diai dîa dí mɛnii ƃò a ǹáai a gɛ́ɛ dí pá íŋɛi tuɛ.] Yà m̀arê kɛ̀ yá kpîŋ, ya pâi pɔrîi mɛni-ŋai kélee kɔ́lɔnîi ǹá, nyíi-ŋai kwa môi a ǹáai.”

⁹ Zûu-ŋai máŋ yée è kɛ̀ mɛnii ŋí su. Dí mò a gɛ́ɛ mɛni-ŋai ŋí kélee è kɛ̀ ti.

Pɔ̂ɔ e gbîŋ maa kɔ̃ɔ Felɛ ŋɛi tuɛ

¹⁰ Gɔmɛnɛ-nuu kɛ́tɛi kɛ́ɛ a Pɔ̂ɔ toli a ŋuŋ a gɛ́ɛ é lónoi, e ŋ̀óo su tòo, ǹyɛɛi: “Berei ŋa gɔ́lɔŋ la a gɛ́ɛ ya kɛ́ a mɛni-ŋa-tee-nuu ǹɔii-ŋuŋ ŋí su a kóraŋ támaai, ŋa ŋ́gbîŋ maa kɔ̃ɔ̂i kpɔ́ a lii-nɛ̃ɛ-pere.

¹¹ Ya pɔ̂ri gɔ́lɔnîi a tɔ̃yâ a gɛ́ɛ ve niî tɛɛ ni ɣele kûu puu kao feerɛ ma, tãi ŋá lì la Zerusâlɛŋ Ɣâla fɛlîi;

¹² dífe ŋ́gaa ni kwa nuu da kélee kúkɛ laa-saa kɛ̀, kpaa máŋ ŋa gbɔŋ líi mu siɣe Ŋ̀âla-pɛrɛ kɛ́tɛi mu, kpaa máŋ Ŋ̀âla-fɛli-kêre-ŋai, kpaa máŋ daa-leei su.

¹³ Dífa tela pɔ̂ri ǹɛ̂i yâ a gɛ́ɛ mɛni-ŋai ŋí da môi a ńaâi, gáa a tɔ̃yâ.

¹⁴ Kɛ́lɛ, ŋa fáa nyíŋi ma íŋɛi a gɛ́ɛ ŋa kúnâŋ-ni Díɣâlai fɛli, ǹáa a mɛnii kélee bɔ̃yɛɛ̂i dɔ̂ŋ su da Ɣâla ŋɔlóno kɛ́-ƃelai díkɔlɔ-ŋai, yɛ̂ɛ berei è mò la, nyíi díkaa dôlii a lɛ́ɛ-mɛni lɛ-nuu-kpului.

¹⁵ Kili-kɛ-zu káa ńyêei Ɣâla mɛni ma, nyíi dia kpîŋ da díyee see mu a gɛ́ɛ mu-siɣe saa-yeei a pâi kɛ̂i naa tɔ̃yâ-ƃela mɛni ma da diai dífe a tɔ̃yâ-ƃelai.

¹⁶ Ŋa kɔ̂i kpɔ́ a gbanaŋɔɔ a tãi kélee a gɛ́ɛ kili-ŋa-sia maa waa é kɛ́ ńyêei Ɣâla ŋɛi da núu-kpune.

¹⁷ Kóraŋ kpɛ́-kpɛ̂ɛ tɛ̂ɛi pôlu ma ŋá pà a gɛ́ɛ ŋá sama-sɛŋ tɛɛ ŋálɔii-ŋuŋ pɔ́, ŋa sâla kula.

¹⁸ Kɛ́lɛ, Zûu-ŋai da-ni dí kùla Eesia dí ŋ́gaa Ŋ̀âla-pɛrɛ kɛ́tɛi mu ḿaa waa. Dífe kpɔŋ da kélee káa ní ŋ́gɔlɛ, kpaa máŋ dí sóoŋ-woo mɛni.

¹⁹ Dîi pɔ̀ri kɛ̂i ƃɛ́ íŋɛi-tuɛ à kɛ̀ mɛni da káa díla dí m̀ó a ńaa, dí m̀ó yâ

²⁰ kpaa máŋ, tɔɔ diai ŋí ƃɛ́i, dí mɛni nyɔ́mɔɔi ƃo yâ dí gàa ŋ́gbonôi tãi ŋá kɛ̀ la goyâŋ su-ƃelai ŋɛ́i tuɛi,

²¹ é kúla mɛni tɔnɔi ŋí pôlu ŋá làɣi la, ǹyɛɛi, ‘M̀u-siɣe saa-yeei mɛni ƃé díkaa ŋámɛnii ŋá têei la sâa.’ ”

Pɔ̂ɔ káa ŋɛi-gao kpɔnɔ ŋá

²² Feli kɛ́ɛ gɛ́ ƃò a Berei maa mɛni-ŋai da kɔ́lɔŋɔɔ a ǹɛ́lɛɛi, è m̀ɛnii maa sòŋ, ǹyɛɛi, “Gɔkuluƃa-ŋai mɛi-nuu kɛ́tɛi Lesiɛ à pà, ŋa pâi kámɛnii ŋá têei.”

²³ Nya ƃé è mò ǹɔii maa kpɛ́-ƃelai mɛi-nuui ma a gɛ́ɛ é Pɔ̂ɔ siɣe é kɛ́ ńyêei ŋɛi-gao kpɔnɔ ŋá, e ǹɛɛ naa é kɛ́ gbɔɔ̂i-yee ma. Ve ŋɔnûai kpera ǹîa-mɛni kɛ́ɛ ma.

²⁴ Ɣele kûu da-ni tɛ̂ɛi pôlu ma Feli da ŋɔnɛnîi Dulɔsêla, nyíi kɛ̀ a Zûu-nuui, dí pà; e Pɔ̂ɔ worɛ tɛ́ɛ e ŋ̀óo mɛni e pîlaŋ la naa-lai ma fɛ̂ɛ e kɛ́ kúyêei Kôrai Zîsɛ kponôi.

²⁵ Pɔ̂ɔ kɛ́ɛ a lóno a pîlaŋ tɔ̃yâ laa-la ma, da nuu-kpiŋ mɛi-kaa ma, e pɛlɛ mɛni-ŋa-teɛɛi ma nyíi pâi pâi, Feli e yào, ǹyɛɛi, “Lí nâa; ŋà tãi kàa ŋa pâi ítolîi.”

²⁶ Maa-tãi tɔnɔi ti, ŋɔkili-ŋa-siai è mò mà a gɛ́ɛ Pɔ̂ɔ a pɔ̂ri sɛŋ-kao tɛɛ̂i bɔ. Nya ƃe e dòli a tãi támaa e lóno bɔ.

²⁷ Kóraŋ feerɛ tɛ̂ɛi pôlu ma, Pɔ̂siɛ Fɛtɔ e Feli pɔ́ɔ-ŋa siɣe; kɛ́lɛ, Feli è kɛ̀ ŋ̀wɛ̂lii a gɛ́ɛ e mɛni lɛ́lɛɛ kɛ́ Zûu-ŋai dîɛ, nya ƃe, e Pɔ̂ɔ lɛ̀ɛ gbini-pɛrɛi mu.