Gɛlaɠaa 23 - Bible

¹ Pɔ̂ɔ è goyâŋ su-ƃelai kàa kpɔ́ sĩi ǹyɛɛ dîai, “Sinâa da ŋánûa, ŋá ŋáfulu-laai kɛ̀ a kíli maa waa Ɣâla ŋɛ́i é seri sâa ma.”

² Zâla láa soŋ-nuu kɛ́tɛi Ananaya è mò diai dîa kɛ̀ tɔ̂ɔni gɔlɛi a gɛ́ɛ dí ǹókwa ǹá.

³ Pɔ̂ɔ è mò mà, ǹyɛɛi, “Ɣâla a pâi ílokwâi. Íkaa yɛ̂ɛ pɛrɛ-kaŋ nyíi dí zìa wéei kolei! Íkaa seêni íkɛ ŋámɛnii ŋá tee dɔ̂ŋ lá-wooi ma, kɛ́lɛ, íkɛ mò a gɛ́ɛ dí ńokwa, nyíi vé dɔ̂ŋ lá-wooi mai?”

⁴ Diai kɛ̀ tɔ̂ɔni naai, dí mò ma, dîyɛɛi, “Íkaa tɛ-ŋɛi kɛ̂i a Ɣâla ŋɔsâla láa soŋ-nuu kɛ́tɛi!”

⁵ Pɔ̂ɔ ǹyɛɛ dîai, “Ŋánûa, fé gɔ́lɔŋ kɛ̀ a gɛ́ɛ ńyãa ƃa zâla láa soŋ-nuu kɛ́tɛi. Bɔ̃yɛɛ̂i Ŋ̀âla-kɔlɔi su, ‘Ífe lóno nyɔ́mɔɔ kɛ̀ é pîlaŋ ínûai mɛi-nuui ma.’ ”

⁶ Pɔ̂ɔ kɛ́ɛ a gɔ̀lɔŋ a gɛ́ɛ goyâŋ su-ƃelai gbulu tɔnɔ su-ƃela díkɛ̀ a Sâdusii, gbulu tɔnɔ kɛ́ ƃò a Faresii, è làɣi goyâŋ su, ǹyɛɛi, “Sinâa-aa da ŋánûa, ŋ́gaa a Faresii-nuu. Ŋ́gaa-ƃela díkaa a Faresii-ŋa. Kili-kɛ-zui gáa ńyêei mu-siɣe saa-yeei mɛni mai, mɛni ƃé da ŋámɛnii ŋá têei la.”

⁷ Pɔ̂ɔ kɛ́ɛ a nyíŋi ƃói, sóoŋ è tèe Faresii-ŋai loai da Sâdusii-ŋai gbɔŋ su-ƃelai dí díŋaa kɔ́lɛ.

⁸ Sâdusii-ŋai da mò a gɛ́ɛ núu à sâa va ŋɔ́nɔ mu siɣe saa yêei, dîyɛɛ Ɣâla-taa-kela fé ma, kpaa máŋ mɔ̂leŋ. Kɛ́lɛ, Faresii-ŋai lâai a m̀ɛni-ŋai kélee.

⁹ Sóoŋ su kɛ́tɛ è tèe. Gɔlɔ pɔ̃yɛ-ƃelai kɛ̀ Faresii-ŋai díƃelai ma perei, dí siɣe dí tɔ́ɔ, dîyɛɛi, “Kúfe mɛni nyɔ́mɔɔ kélee kâai ǹalôŋ ŋí kponôi, à kɛ̀ mɔ̂leŋ kpaa máŋ Ɣâla-taa-kela è lòno bɔ́!”

¹⁰ Zoôŋ su è kɛ̀ nɔ́ kɛ̂tɛi, ǹɔii maa kpɛ́-ƃelai mɛi-nuu kɛ́tɛi é yào. È kɛ̀ nɔ́ gâai da pâi lɛɛ̂i Pɔ̂ɔ ɣála-ɣalai dí bàa. Nya ƃe e mò ǹɔii maa kpɛ́-ƃelai dîa a gɛ́ɛ dí lí dí zoŋ a wála-wala dí pá la ǹɔii maa kpɛ́-ƃelai dítaai su.

¹¹ Bôlu ma kpinii, Kúnuu-namui è tɔ̀ɔ gɔlɛ, ǹyɛɛ mài, “Ílii kpele kɛ́ íyeêi. Kpɛ́ni fêi, berei í ḿaa sere-faa kɛ̀ la Zerusâlɛŋ, bere nɔ́ ƃé fɛ̂ɛ í gɛ́ la máŋ Luŋ.”

Dí Pɔ̂ɔ ŋɔfúlu-laai su-kara mɛni kpɛ̀tɛ díkili ŋá

¹² Ɣele ƃɔ́ɔi, Zûu-ŋai dí gbɛ̀tɛ díkili ŋá, dí kperɔ mii a gɛ́ɛ dífe mii-sɛŋ mii kpaa máŋ dí díkpele é lɛ́ɛ la zu dí Pɔ̂ɔ paa.

¹³ Diai ŋ̀ôyai ŋí kpɛ̀tɛi díkɛ a dítɛɛ núu buu náaŋ ma.

¹⁴ Nya ƃe dí pà zâla láa soŋ-ƃela kpaya-kpayai da ǹúu pɔlɔ-ŋai pɔ́, dîyɛɛ dîai, “Kwaa kperɔ mii kpɔ́ a gɛ́ɛ kúfe kúlaa mii é lɛ́ɛ la zu ku Pɔ̂ɔ paa.

¹⁵ M̀ɛni ma káa, ka goyâŋ su-ƃelai ka káwoo tɛ́ɛ ǹɔii maa kpɛ́-ƃelai mɛi-nuu kɛ́tɛi pɔ́-naa a gɛ́ɛ é pá la kápɔ nɔ́ yɛ̂ɛ kà kɛ̀ pâi ŋɔmɛnii su kâai a zã́a. Kúkpɛtɛ̂i a gɛ́ɛ kú bàa é lɛ́ɛ pâi serîi kâa.”

¹⁶ Pɔ̂ɔ zaaƃɔlɔ-nɛnii ǹóŋ è mɛ̀ni la a gɛ́ɛ Zûu-ŋai da gbã tée Pɔ̂ɔ perei, è lì ǹɔii maa kpɛ́-ƃelai dítaai su, é m̀ó ma.

¹⁷ Nya ƃe Pɔ̂ɔ è ǹɔii maa kpɛ́-ƃelai mɛi-nuui dɔnɔ tòli, é m̀ó ma, ǹyɛɛi, “Lí a Ǹyaŋkpâi ŋí ǹɔii maa kpɛ́-ƃelai mɛi-nûu kɛ́tɛi pɔ́, kpɛ́ni fêi, mɛni da káa ǹá a ŋ̀wɛ̂lii é mó mà.”

¹⁸ È zìɣe é pá la ǹɔii maa kpɛ́-ƃelai mɛi-nûu kɛ́tɛi pɔ́, ǹyɛɛ mài, “Pɔ̂ɔ, nyíi gáa a pelesinɛi, è ńdòli é ŋ́gbera fé a gɛ́ɛ ŋá pá a Ǹyaŋkpâi ŋí ípɔ, nyíi mɛni da káa ǹá a gɛ́ɛ é mó yâi.”

¹⁹ Gɔkuluƃa-ŋai mɛi-nuu kɛ́tɛi è zòŋ a ǹyée dífeerɛ kwaa ma e m̀arê kɛ́, ǹyɛɛ mài, “Lé mɛni ƃé ya ŋ̀wɛ̂lii í m̀ó ḿâi?”

²⁰ Ǹyɛɛ mai, “Zûu-ŋai da gbɛtɛ a gɛ́ɛ dí ímarê kɛ́ í pá a Pɔ̂ɔ goyâŋ su tínaa. Da pâi ŋɔmɛnii su kâai a zã́a.

²¹ Kɛ́lɛ, ífe íwoli tɔɔ díwoo ma. Núu tɛ̂ɛi buu náaŋ ma da kperɔ mii a gɛ́ɛ dífe mii-sɛŋ mii, kpaa máŋ dí díkpele é lɛ́ɛ la zu dí bàa. Da gbã tée berêi. Díkpɛtɛɛ̂i a gɛ́ɛ í dí gɛ́ tí nyaŋ da ímaa kpɛ̂nii í m̀ɛnii ƃó dîa da pɔri gɛ̂i.”

²² Nya ƃe ǹɔii maa kpɛ́-ƃelai mɛi-nûu kɛ́tɛi è Ǹyaŋkpâi lɛ̀ɛ naa a gɛ́ɛ é lí. È mò ma, ǹyɛɛi, “Ífe mò núu da kélee ma a gɛ́ɛ ya mɛni-ŋai ŋí ƃó ḿâ.”

Dí Pɔ̂ɔ tɛ̀ɛ gɔmɛnɛ-nuui Fele pɔ́

²³ Gɔkuluƃa-ŋai mɛi-nuui è ǹyée mu-ƃelai veerɛ tòli, ǹyɛɛ diai, “Gbínii a seri aƃa saaƃa ma, ǹɔii maa kpɛ́-ƃelai ŋuŋ feerɛ siɣe, soo-sia-ƃela buu lɔ́ɔlu mɛi feerɛ da kpála píli-ƃela ŋuŋ feerɛ ká lí Sɛsɛria.

²⁴ Ka lí a soo-ŋa máŋ a gɛ́ɛ dí Pɔ̂ɔ see dímɛi dí lí la gɔmɛnɛ-nuui Feli pɔ́ a gɔlɔi ponoɔɔ.”

²⁵ È kɔlɔ pɔ̃yɛ bɔ́ naa. Ŋ́oo-ŋai è dípù gɔlɔi sui ká kɛ̀ ŋí:

²⁶ “Ńyãa Kilaudiɛ Lesiɛ ŋa faa yâ, Gâloŋ Feli.

²⁷ Zûu-ŋai dí ǹalôŋ ŋí sòŋ a gɛ́ɛ dí bàa. Tãi ŋá gɔ̀lɔŋ la gáa a Lomaŋ lɔii-loŋ, ŋá pà a lɔii maa kpɛ́-ƃela kú gula-yeei kɛ́.

²⁸ Ŋá kɛ̀ ŋ̀wɛ̂lii a gɛ́ɛ ŋá gɔ́lɔŋ m̀ɛnii dí mò a ǹáai. Mɛni ƃé ŋá pà la a ǹyaa díkoyâŋ su.

²⁹ Ŋá gàa a gɛ́ɛ m̀ɛnii dí mò a ǹáai, è kɛ̀ a bîlaŋɔɔ dítɔ̂ŋ ma. Kɛ́lɛ, vé kɛ́ ní a m̀ɛnii a pɔ̂ri kpini-pɛrɛ siɣêi zu kpaa máŋ é sáa zui.

³⁰ Ŋá mɛ̀ni nɔ́ a gɛ́ɛ Zûu-ŋai da gbã tée berêi, ŋá dɛ̀ɛ ípɔ naa a maa félaa. Diai m̀ɛnii ƃò a ǹáai, ŋá díkɛ̀ a gɛ́ɛ dí m̀ɛnii ƃo íŋɛi gáa díla é pîlaŋ mai.”

³¹ Gɔkuluƃa-ŋai dí Pɔ̂ɔ sìɣe, yɛ̂ɛ berei dí mò la diai, dí lí la a kpini Aŋtipaturi.

³² Bôlu ma ɣele ƃɔ́ɔi, Pɔ̂ɔ da zoo sia-ƃelai dí lì, ǹɔii maa kpɛ́-ƃelai dí pà pôlu dítaai su.

³³ Dí seriɛɛi Sɛsɛriai, dí gɔlɔi tɛɛ gɔmɛnɛ-nuu kɛ́tɛi pɔ́ da Pɔ̂ɔ.

³⁴ È gɔlɔi lòno é mare-kɛ̂ɛ kɛ́ ǹɔii nênɛ su ƃé Pɔ̂ɔ è kùla naai. Gɛ́ɛ a gɔ́lɔŋ a gɛ́ɛ Pɔ̂ɔ è kùla Sɛlisiai,

³⁵ è mò, ǹyɛɛi, “Ŋa pâi íwoo mɛnîi diai m̀ɛnii ƃo a ílaâi da pà.” Nya ƃe è mò a gɛ́ɛ dí Pɔ̂ɔ lɔ́ Ɛɛlɔ ŋɔpɛ́rɛi mu gɛ́ ƃò naa ŋɛi-gao kpɔnɔ ŋá.