Gɛlaɠaa 22 - Bible

¹ “Sinâa, ŋánûa, da ńâŋ-ni, ka ŋámaa kɔ̃ɔ-wooi mɛni ŋ́gaa m̀ôi kâai.”

² Gɛ́ɛ kɛ̀ lônoi Ibulu-wooi sui, dí dímɛi sãa kpɔ́ tɔ̀ŋ-tɔŋ. È mò, ǹyɛɛi:

³ “Ńyãa kpîŋ ŋ́gaa a Zûu-nuu. Dí ḿaa sɔlɔ ƃò Taasɔ taa-leei su, Sɛlisia lɔii su. Kɛ́lɛ, dí ŋákɔ̀ŋ ƃɛ́ daa kɛ́tɛi ŋí su. Ŋa sɛŋ maa kɔ̀ri Gɛmelia yée mu, yɛ̂ɛ berei kúnâŋ pɔlɔ-ŋai dítɔ̂ŋ maa mɛni káa lai, nyíi-ŋai Ɣâla mɛni è kɛ̀ dílii su, yɛ̂ɛ berei gáa la kákelee kálii su sâai.

⁴ Ŋá Berei ŋí kpɔ̀ara ŋá zu-ƃelai da-ni paa máŋ. Ŋá sinâa da nɛyâa ɣìri ŋá dípili kpini-pɛrɛ mu.

⁵ Zâla láa soŋ-nuu kɛ́tɛi da ǹúu pɔlɔ-ŋai kélee da pɔ̂ri m̀aa sêre-faa kɛ̂i. Ŋá kɔlɔ kùla díyêei máŋ ḿarâai mɛni ma ŋá lí Dimɛika a gɛ́ɛ ŋá díɣiri ŋá pá a dîa Zerusâlɛŋ a gɛ́ɛ dí tɔ̂ŋ kpɛ́ dîa.

Pɔ̂ɔ è ǹíi maa faleŋ mɛnii ƃò

⁶ “Ŋ́gɛɛ liî, ŋá sèri Dimɛika kɔlɛ ma. Vóloi kɛ́ɛ yɛ̂ɛ nya ƃé a tɛ́ ŋuŋ mai, ḿaa è pòno kpɔ́ a maa félaa a kwaa ponoɔɔ nyíi kùla ŋ̀elei sui.

⁷ Ŋá tòo ǹɔii ma ŋá wóo da mɛni, ǹyɛɛ ḿâi, ‘Sɔ̂ɔ, Sɔ̂ɔ, ya ŋ́gbɔarâi lé mɛni ma?’

⁸ Ŋá ŋ̀óo su tòo, ǹyɛɛi, ‘Gbɛ̂ɛ ƃa yá, Ŋánuu-namui?’ E mò ḿâ, ǹyɛɛi, ‘Ńyãa ƃa Nâzarɛ Zisɛi nyíi íkaa gbɔarâi.’

⁹ Diai kwa dîa-ni kú kɛ̀ naai, dí gwaa ponoɔi kàa, kɛ́lɛ, dífe ŋ̀óoi mɛni ní kɛ̀ lônoi ḿbɔi.

¹⁰ Ŋá mò, ǹyɛɛ, ‘Lé ƃé ŋa pɔ̂ri gɛ̂i, Ŋánuu-namui?’ Kúnuu-namui ǹyɛɛ ḿâi, ‘Ímu siɣe í lí Dimɛika. Da pâi m̀ɛnii kélee ƃôi naa yâ, nyíi-ŋai ŋa ŋ̀wɛ̂lii í gɛ̂i.’

¹¹ Ŋ́gɛɛ kɛ̀ fa pɔ̂ri kwaa kâai, kpɛ́ni fêi, gwaa ponoɔi ŋɔfóloi è kɛ̀ a gbanaŋɔɔi, diai kɛ̀ ŋ́gɔlɛi, dí ńzòŋ a ńyee dí lí a ńyãa Dimɛika.

¹² “Nalôŋ tɔnɔ è kɛ̀ naa, ǹáa ƃé kɛ̀ a Ananaya, nyíi kɛ̀ a Ɣâla mɛni kɛ-nuu yɛ̂ɛ berei dítɔ̂ŋ è kɛ̀ lai. Zûu-ŋai kélee kɛ̀ naai, dí lòno a ǹɛ́lɛɛ é pîlaŋ ma.

¹³ È pà ḿbɔ é tɔ́ɔ ŋ́gɔlɛ, ǹyɛɛi, ‘Ḿarâŋ Sɔ̂ɔ, kwaa káa.’ Ŋ́ɛi è fùloŋ ŋ̀á ma ŋá kwaa káa.

¹⁴ È mò, ǹyɛɛi, ‘Kúnâŋ-ni Díɣâlai a ílɛ a gɛ́ɛ í ŋɔnîa-mɛnii kɔ́lɔŋ í Dɔ̃yâ Ɣalai káa í ǹá woo mɛni.

¹⁵ Ya pâi kɛ̂i a ŋɔsêre núu kélee ŋɛ́i m̀ɛni-ŋai ya gáai mɛni ma, da nyíi-ŋai ya mɛnîi.

¹⁶ Lé ƃé ya maa kpɛnîi? Ímu siɣe dí íbatâi kɛ́ ísɔnyɔ̂ŋ é wáa yâ, í Kúnuu-namui láa tóli.’

Dí Pɔ̂ɔ tòli a gɛ́ɛ é lí Zɛ̃tai-ŋai pɔ́

¹⁷ “Ŋá pà pôlu Zerusâlɛŋ. Ŋ́gɛɛ Ɣâla fɛlîi Ŋ̀âla-pɛrɛ kɛ́tɛi mui, zĩa è tɛ̀ɛ a ńyãa.

¹⁸ Ŋá Ǹúu-namui kàa gɛ́ m̀o ḿâ, ǹyɛɛi, ‘Gɛ́ lono í kúla Zerusâlɛŋ a m̀aa félaa, kpɛ́ni fêi, dífe pâi díyee seêi ísêre-wooi mu ḿaa mɛni ma.’

¹⁹ Ŋá mò, ǹyɛɛi, ‘Kúnuu-namui, dia kpîŋ dí gɔ́lɔŋ kpɔ́ a ǹɛ́lɛɛ a gɛ́ɛ ŋá lì Ŋ̀âla-fɛli kêre-ŋai kélee mu, diai làa a yái ŋá dípù kpini-pɛrɛ mu ŋá dílokwa.

²⁰ Tãi ísêre-faa-kɛ-nuui Tiƃiŋ ŋãai è kɛ̀ pûi lai, ŋá kɛ̀ máŋ tɔ̂ɔni nàa kɔlɛ ḿvaa mà. Ŋa díseɣe-ŋai mɛi kâa diai baai.’

²¹ Nya ƃe, e mò mâ, ǹyɛɛi, ‘Kula naa. Kpɛ́ni fêi, ŋa pâi ítɛɛ̂i kwaa kôya ma Zɛ̃tai-ŋai pɔ naa.’ ”

Pɔ̂ɔ káa ǹɔii maa kpɛ́-ƃelai mɛi-nuu kɛ́tɛi yêei ŋɛi-gao-kpɔnɔ ŋá

²² Dí díwoli tɔ̀ɔ ma é lɛ́ɛ zu é ŋ̀óo-ŋai ŋí ƃó. Dí díwoo tɛ̀ ɣelêi, dîyɛɛi, “Ka ǹúu sîi ŋí kúla ǹɔii ma! Vé a sɛŋ a gɛ́ɛ é kɛ́ ɣele ma.”

²³ Dí kɛ̀ lâɣii díkɛ díseɣe-ŋai kpúmuŋ díkɛ muluŋ píli.

²⁴ Ǹɔii maa kpɛ́-ƃela mɛi-nuu kɛ́tɛi è mò a gɛ́ɛ dí pá la ǹɔii maa kpɛ́-ƃelai dítaai su a gɛ́ɛ dí m̀arê kɛ́ a ǹókwaa a gɛ́ɛ é m̀ɛnii kɔ́lɔŋ dí kɛ̀ lâɣii tí la mài.

²⁵ Dí Pɔ̂ɔ ɣìri a gɛ́ɛ dí ǹókwa. È mò ǹɔii maa kpɛ́-ƃelai mɛi-nuui ma nyíi kɛ̀ tɔ̂ɔni gɔlɛi, ǹyɛɛ mài, “Gáa a tɔ̂ŋ a gɛ́ɛ í Lomaŋ lɔii-loŋ lókwa, nyíi mɛni fé lɛɛ ní mai?”

²⁶ Ǹúu kɛ́tɛi kɛ́ɛ a mɛ̀nii, è lì ǹɔii maa kpɛ́-ƃelai mɛi-nuu kɛ́tɛi pɔ́-naa, ǹyɛɛ mài, “Lé ƃé yɛ̂ɛ í gɛ́i? Ǹalôŋ ŋí káa a Lomaŋ lɔii-loŋ.”

²⁷ Nya ƃe ǹɔii maa kpɛ́-ƃelai mɛi-nuu kɛ́tɛi è pà, ǹyɛɛ mài, “M̀ó ḿâ, íkaa a Lomaŋ lɔii-loŋ?” Ǹyɛɛ m̀ai, “Ooei.”

²⁸ Gɔkuluƃa-ŋai mɛi-nuu kɛ́tɛi è zu tòo, ǹyɛɛi, “Ŋá ŋálɔii-loŋ-laai yà a sɛŋ-kao kɛ́tɛ.” Pɔ̂ɔ è zu tòo, ǹyɛɛi, “Kɛ́lɛ, dí ḿaa sɔlɔ ƃò a lɔii-loŋ.”

²⁹ M̀ɛni ma diai kɛ̀ pâi m̀arê kɛ̂i, dí dímaa kùla ma a maa félaa. Gɔkuluƃa-ŋai mɛi-nuu kɛ́tɛi máŋ è kɛ̀ yaôi, gɛ́ɛ a gɔ́lɔŋ a gɛ́ɛ Pɔ̂ɔ è kɛ̀ a Lomaŋ lɔii-loŋ, kpɛ́ni fêi, è dòo yɔlɔ ŋá.

Pɔ̂ɔ káa goyâŋ su-ƃelai ŋɛi tuɛ

³⁰ Bôlu ma ɣele ƃɔ́ɔi, ǹɔii maa kpɛ́-ƃelai mɛi-nuu kɛ́tɛi kɛ́ɛ kɛ̀ ŋ̀wɛ̂lii a gɛ́ɛ é m̀ɛnii kɔ́lɔŋ Zûu-ŋai dí mò a Pɔ̂ɔ láai, è Pɔ̂ɔ fùloŋ é m̀ó zâla láa soŋ-ƃela kpaya-kpayai dîa da goyâŋ su-ƃelai kélee a gɛ́ɛ dí díŋa tɛ́ díkîe ma. È pà a Pɔ̂ɔ é zee díŋɛi tuɛ.