Gɛlaɠaa 20 - Bible

Pɔ̂ɔ è lì Masadonia da Gurii lɔii su

¹ Ǹyóo-yooi kpɛɛ́ pôlu ma, Pɔ̂ɔ è Zîsɛ ŋɔpôlu-ƃelai tòli é lii-kpele lia-woo ƃo dîa, é kúla naa é lí Masadonia.

² Gɛ́ɛ a lí ǹɔii ti su gwaa kélee a lii-kpele lia-woo támaa tɛɛ naa Zîsɛ ŋɔpôlu-ƃelai pɔ́i, è pà Gurii lɔii su.

³ È gɛ̀ naa a ɣáloŋ saaƃa. Gɛ́ɛ a gbɛ̀tɛ a gɛ́ɛ é lí pôlu Siriai, è gɔ̀lɔŋ a gɛ́ɛ Zûu-ŋai da ŋ̀wɛ̂lii dí zoŋ. Nya ƃe è gbɛ̀tɛ a gɛ́ɛ é yá ŋá-keleŋ siɣe tɛ́ɛ Masadonia pere.

⁴ Ǹûai da dîa-ni dí lì Eesia, dílaa ká ŋí: Bɛria-nuui Sopatɛ, nyíi kɛ̀ a Parɔ ǹóŋ. Tɛsɛlonaika-ƃelai ƃa Ɛresitakɔ da Sekuŋdɔ. Dɛƃi-nuui Geeyɔ, ǹúui da Temete, Eesia-ƃelai ƃa Tekekɔ da Tulofimɔ.

⁵ Ǹûai ŋí dí lì díkɛ kúmaa kpɛŋ Toroɛ.

⁶ Dɛ́-sɛŋ fé kpoloi maa ɣele kûui pôlu ma, kú kùla Felepâ kú yá ŋá-keleŋ sìɣe. Ɣele kûu lɔ́ɔlu yée mu kú sèri dîa Toroɛ. Kú ɣele kûu lɔ́ɔlu mɛi feerɛ kɛ̀ naa.

Pɔ̂ɔ ŋɔnaa-kaai gbɛɛ ŋái è gɛ̀ Toroɛi

⁷ Ǹɔ́ɔ kûui ŋɔɣele kûui maa ŋuŋ, kú kúŋaa tɛ̀ gîe ma a gɛ́ɛ kú kpólo su ɣále. Pɔ̂ɔ è Ɣâla-woo ƃò kûa. È gbɛ̀tɛ gíli ŋá a gɛ́ɛ é kúla naa a bôlu ma ɣelei. È lɛ̀ɛ Ɣâla-woo ƃôi gbínii sáma é seri.

⁸ Ŋɔŋ-leŋ su kɛ́tɛ è kɛ̀ loŋpoi mɛi pere ŋ̀ɔi su, ƃɛ́i kú kúŋaa tɛ̀ naa gîe mai.

⁹ Ńyaŋkpa tɔnɔ è kɛ̀ seêni naa wênai lá, ǹáa ƃé kɛ̀ a Yutekɔ. Pɔ̂ɔ kɛ́ɛ Ɣâla-woo ƃôi a zu kôyaai, nyíi è tɛ̀ɛ la. Nyii è tɛ̀ɛ kpɔ́ la a ŋ̀ánaa, é kúla bɛ́rɛi ŋ̀elei pere loŋpoi ŋ̀ɔi su é tóo ǹɔii ma é sáa.

¹⁰ Pɔ̂ɔ è pìlaŋ naa é ŋ̀uŋ ma pîlaŋ mɛi é ǹyée pú mu, ǹyɛɛ dîai, “Káfe wɔ̀lɔ. Ǹɛ̃wo káa niî zu.”

¹¹ Pɔ̂ɔ e ŋɔ́nɔ tɛ̀ pôlu bɛ́rɛi ɣelei é kpólo ɣále é ǹáa míi. È lòno dípɔ a guro é lɛ́ɛ la zu ɣele é ƃé, é lí.

¹² Dí pà a ǹyaŋkpai a vúlu. Dílii è làa kpɔ́ a dámaa.

Ǹyá ŋá-siai é kúla Toroɛ é lí Miletɔ

¹³ Kú lì tuɛ ǹyá ŋá-keleŋ ma, ku zìɣe a gɛ́ɛ kú lí Asɔ kú Pɔ̂ɔ síɣe naa, kpɛ́ni fêi, kwa dîa-ni kú gbɛ̀tɛ a gɛ́ɛ é sía gɔ́ɔ ŋá é seri naa.

¹⁴ Kú kúkîe-ni kàa Asɔ, kú ziɣe naa géleŋ su kwa dia ni kú pá Metelene.

¹⁵ Kú kúlaa naai, kú pà Sio lɔii kwára pere a bôlu ma ɣelei. Ɣele ƃɔ́ɔi kú sèri Samo kú tɛ́ɛ naa kú sèri Miletɔ.

¹⁶ Pɔ̂ɔ è gbɛ̀tɛ gíli ŋá a gɛ́ɛ é yá ŋá-keleŋ siɣe é tɛ́ɛ a Ɛfesɛ pere, kpɛ́ni fêi, vé kɛ́ ní ŋ̀wɛ̂lii é tɛ́ɛ a Eesia pere va lâ tûa la naa. È kɛ̀ liî a maa félaa, a gɛ́ɛ é seri Zerusâlɛŋ a Pɛŋtekɔ ɣele.

Pɔ̂ɔ a lônoi Ɛfesɛ-nuu-pɔlɔ-ŋai pɔ

¹⁷ Gɛ́ɛ Miletɔi, è worɛ̂ tɛ̀ɛ Ɛfesɛ a gɛ́ɛ Kôrai-toli-kpɔŋ su-ƃela pɔlɔ-ŋai dí pá a gɛ́ɛ da dia-ni dí koyâŋ.

¹⁸ Dí páai, è mò dîa, ǹyɛɛi, “Káa kpîŋ ka gɔ́lɔŋ berei ŋá kɛ̀ la kásama a ɣele kélee é síɣe ŋ̀elei maa-ŋuŋ ma ŋá pà la Eesia.

¹⁹ Ŋá tíi kɛ̀ Kúnuu-namui mi a lii maa yeŋ pere kélee, ŋ́ɛi-ya é pú, ŋá mɛni-soli támaa káa, nyíi-ŋai kɛ̀ a ńyãa é kúla Zûu-ŋai dímɛni kpɛtɛɛi su é pîlaŋ ḿâi.

²⁰ Ka gɔ́lɔŋ ŋɔ́nɔ berei fé sɛŋ da lɛ̀ɛ ní la pôlu nyíi mɛni lɛ́lɛɛ káa zu kámɛni mai. Ŋá nɛ̀ kâa kpɔŋ su da kápɛrɛ-ŋai mu.

²¹ Ŋá núu lii-peneɛɛ Ɣâla pɔ́-pere maa sêre-faa kɛ̀ Zûu-ŋai dîa, Gurii-ŋai máŋ da laa-la Kúnuu-namui Zîsɛ Kôrai mɛni ma.

²² Ǹyaŋ ŋ́gaa nâa liî Zerusâlɛŋ M̀ɔlêŋ kponôi. Fé mɛni-ŋai kɔ́lɔŋ liî kɛ̂i naa a ńyãai,

²³ fɛ̂ɛ M̀ɔlêŋ Maa Waai a mò mâ kpɔ́ a zu ponoɔɔ a gɛ́ɛ daai kélee ŋa lì zui, kpini-pɛrɛ da mɛni kpɔ̂lu díkaa ḿaa kpɛnîi naa.

²⁴ Kɛ́lɛ, mɛni-ŋai ŋí dɔnɔ kpîŋ fa ńii sɛ̀lɛŋ, kpaa máŋ ŋá ŋáfulu-laai siɣe a gbanaŋɔɔ ŋ́gbîŋ mɛni ma. Fɛ̂ɛ nɔ́ ŋa Ɣâla ŋɔtíi kpɛ́ɛ nyíi ŋa zɔlɔ ƃo Kúnuu-namui Zîsɛ yêei, a gɛ́ɛ ŋa Ɣâla ŋɔƃɛlɛ-seei maa tuŋ lɛ́lɛɛi maa sêre-faa kɛ́.

²⁵ Ǹyaŋ, ka gáa, ŋa gɔ́lɔŋ a gɛ́ɛ káai kélee ŋa Ɣâla ŋɔkâloŋ-laai maa mɛni ƃo kásamâi, káfe pâi ŋɔ́nɔ ŋ́gaâi.

²⁶ M̀ɛni ma ŋa m̀ôi káa sâa a gɛ́ɛ ḿaa waâi kákelee káŋãai mɛni ma.

²⁷ Fé niî kpera ní Ɣâla ŋɔnîa-mɛnii kélee lɛ̂i kâa.

²⁸ M̀ɛni ma, ka kámɛi káa da Kôrai-ƃela kpului kélee, nyíi-ŋai M̀ɔlêŋ Maa Waai a kákɛ a dímɛi-ƃela a gɛ́ɛ ka Kúnuu-namui ŋɔtóli-kpɔŋ su-ƃelai ŋá kɔ́ŋ, nyíi è díyà a gbɔɔi ŋãai.

²⁹ Ŋa gɔ́lɔŋ a gɛ́ɛ ŋà kùla kásama, kɔ́li kpeɣeɛ-ŋa da pâi pilîi kásama, dífe pâi kámaa nɛ̃ɛ̂i;

³⁰ káa kpîŋ kásama máŋ nûa da pâi kulâi naa díkɛ lɛ́ɛ mɛni-ŋa ƃo a gɛ́ɛ dí dípôlu-ƃela kɛ́ ma.

³¹ Mɛni ma ka kámɛi káa. É lɛ́ɛ kákili ŋá a gɛ́ɛ kóraŋ saaƃa yée mu ŋá kɛ̀ nɔ́ kálôa-woo ƃôi a ɣele kélee a ŋɛ́i-ya máŋ.

³² Ǹyaŋ ŋa kátɛɛ Ɣâla pɔ́ da ŋɔƃɛlɛ-see wooi. Pɔri káa mì a gɛ́ɛ é káƃɔlɔ kámɔ̂leŋ su, é ŋɔ́nɔ kákɛ a pɔɔ-sɛŋ mɛi-ƃela diai kélee sáma dímaa waâi.

³³ Fé niî núu da ŋɔkáne maa-lii tée ní da gôo kpaa seɣe.

³⁴ Káa kpîŋ ka gɔ́lɔŋ a gɛ́ɛ ŋá tíi kɛ̀ a ǹyée-ŋai ŋí ŋ́gbîŋ maa mɛni ma da diai kɛ̀ ŋ́gɔlɛi.

³⁵ Ŋa ǹɛ́ kâa mɛni kélee su a gɛ́ɛ fɛ̂ɛ núu é kpɔŋ maa tɛɛ vii-kpɛɛ-ƃelai pɔ́ tíi kɛ́ɛ su Kúnuu-namui Zîsɛ ŋɔwóoi é lɛ́ɛ gíli ŋá, berei è mò la, ǹyɛɛ, ‘Gáa a lûwa támaa a gɛ́ɛ núu é ƃɛlɛ-see kɛ́ é tɛ́ɛ ƃɛlɛ-see sɔlɔ ƃóɔɔ ma.’ ”

³⁶ Gbɛ̀ɛ lónoɔɔ mai, è pɛ̀lɛ ŋume ŋá da dîa-ni dí Ɣâla fɛli.

³⁷ Ǹûai kélee dí wɔ̀lɔ kpɔ́ a ŋ̀ánaa dí díyee píli Pɔ̂ɔ kɔŋ ma dí díla-gbɔ see ma.

³⁸ Malôŋ e tòo dîa a dámaa, kpɛ́ni fêi, è mò dîa a gɛ́ɛ dífe pâi ŋɔ́nɔ gâai. Nya ƃe da dîa-ni dí lì ǹyá ŋá-keleŋ ma.