Gɛlaɠaa 19 - Bible

Pɔ̂ɔ káa Ɛfesɛ

¹ Apolo kɛ́ɛ Kɔleŋ, Pɔ̂ɔ è tɛ̀ɛ a ǹɔii ŋuŋ tuɛ-pere é pá Ɛfesɛ. È Zîsɛ ŋɔpôlu-ƃelai da-ni kàa naa.

² È mò dîa, ǹyɛɛi, “Ka làa lai, ká M̀ɔlêŋ Maa Waai sɔlɔ ƃo?” Dîyɛɛ mài, “Kpao, kúfe niî máŋ mɛni ní a gɛ́ɛ M̀ɔlêŋ Maa Waai káa naa.”

³ È dímarê kɛ̀, ǹyɛɛi, “Lé ŋaŋ ƃé dí kábatâi kɛ̀ zui?” Díyɛɛ mai, “Zɔ̂ŋ ŋɔbatâi su ƃe.”

⁴ Pɔ̂ɔ è mò dîa ǹyɛɛi, “Zɔ̂ŋ è batâi kɛ̀ lii-pene mɛni ma, gɛ́ m̀o ǹûai dîa a gɛ́ɛ dí láa a ǹúui nyíi kɛ̀ pâi pâi bôlu mai. M̀aa-nuui ƃa Zîsɛ.”

⁵ Nyiŋi mɛniɛɛ dîɛi, dí díbatâi kɛ̀ Kúnuu-namui Zîsɛ Kôrai láai su.

⁶ Pɔ̂ɔ kɛ́ɛ a ǹyée pɛ̀lɛ diai, M̀ɔlêŋ Maa Waai è pà dípɔ. Dí kɛ̀ lônoi a sîi-woo da kpɛ́ni-ŋa díkɛ mɛni-ŋa ƃo naa túɛ nyíi pâi kɛ̂i.

⁷ Ǹûai kélee dí kɛ̀ yɛ̂ɛ núu puu kao feerɛ.

⁸ Pɔ̂ɔ lɔ̀ Ŋ̀âla-fɛli-kerei mu é lóno naa kpɔ́ a lii-kpele pere ɣáloŋ saaƃa yée mu. È kɛ̀ sîa toôi gɛ́ Ɣâla ŋɔkâloŋ-laai maa lono kɛ̀.

⁹ Kɛ́lɛ, dílii su è kɛ̀ a gbanaŋɔɔ dífe láa ní la. Dí kɛ̀ mɛni nyɔ́mɔɔ ƃôi gbɔŋ ŋɛ́i-tuɛ gɛ́ pìlaŋ Berei ma. Pɔ̂ɔ è kùla dísama é Zîsɛ ŋɔpôlu-ƃelai síɣe da dia-ni díkɛ Zîsɛ maa mɛni ƃo Taranu kɔlɔ-pɛrɛi mu (é síɣe vólo-nɛnɛŋ ma é tóo ŋ̀ele-wulii foloi ma).

¹⁰ Nyiŋi è kɛ̀ kóraŋ feerɛ yée mu. Zûu-ŋai da Gurii-ŋai kélee kɛ̀ Eesia dí Kúnuu-namui ŋɔwóoi mɛ̀ni.

Siiva ǹônii-sinaâi

¹¹ Ɣâla è ŋɛi-kɛ-maa kpaya-kpaya kɛ̀ a Pɔ̂ɔ yée é tɛ́ɛ ŋɔŋɛi-kɛ-maa kpéli-ŋai dîa.

¹² Ǹûai dí kpasa da seɣe-kpua kùla Pɔ̂ɔ kpono ma dí li a dia gɔlɔ-fela-ƃelai pɔ́. Nya ƃe dí ƃàlo díkɔlɔ-fela-ŋai yêei, ǹyînaŋ nyɔ́mɔɔ-ŋai dí kúla díkponôi.

¹³ Zûu-ŋai da-ni dí kɛ̀ naa, nyíi-ŋai kɛ̀ nɔ́ kɛ̀ sia-siâi díkɛ nyînaŋ nyɔ́mɔɔ-ŋa kpɛ̀ nûa pôlui. Dí kɛ̀ kɔ̂i a gɛ́ɛ dí nyinaŋ kpɛ́ ǹûai pôlu Kúnuu-namui Zîsɛ láai su. Dí kɛ̀ môi ǹyînaŋ nyɔ́mɔɔ-ŋai, dîyɛɛ, “Ŋa íkpɛ Zîsɛ láai su, nyíi Pɔ̂ɔ a maa mɛni ƃoi.”

¹⁴ Zûu-naloŋ tɔnɔ nyíi kɛ̀ a sâla láa soŋ-nuui da kâa dòli a Siiva, ǹóŋ-sinaa lɔ́ɔlu mɛi feerɛi ƃé kɛ̀ m̀ɛnii ŋí kɛ̂i.

¹⁵ Kɛ́lɛ, nyînaŋ nyɔ́mɔɔi è m̀o dîa, ǹyɛɛi, “Ŋá Zîsɛ kɔ́lɔŋ, ŋá ƃò a Pɔ̂ɔ kɔ́lɔŋɔɔ. Kɛ́lɛ, gbɛ̂ɛ ƃa káa?”

¹⁶ Ǹalôŋ nyînaŋ nyɔ́mɔɔi è kɛ̀ bôlui, è pɛ̀lɛ dîa é díyee mɛi ɣále kpɔ́ a ŋɔwála-walai é díkɛ dí kúla bɛ́rɛi tí mu dí pú a díkaŋ. È díŋwana-ŋwana.

¹⁷ Zûu-ŋai da Gurii-ŋai kélee kɛ̀ Ɛfesɛi, dí m̀ɛnii ŋí kɔ̀lɔŋ, yao è pù díkelee díkɔlɔ̂i. Dí Kúnuu-namui Zîsɛ Kôrai láa maa tɛ̀.

¹⁸ Ǹúui dámaa ɣele, nyíi-ŋai làa lai, dí pà dí dísɔnyɔ̂ŋ-ŋai ƃó, dí díkɛ-mɛni-ŋai lɛ́.

¹⁹ Ǹúui dámaa ɣele máŋ, diai kɛ̀ a póniŋ kɛ́-ƃelai, dí díponiŋ kɔlɔ-ŋai ŋá tɛ̀ gîe ma dí díkereŋ ǹûai kélee ŋɛ́i. Gɔlɔ-ŋai ŋí sɔ̃ɔ è kɛ̀ yɛ̂ɛ sêleŋ kpua-kpua wála buu lɔ́ɔlu.

²⁰ È kɛ̀ tí, Kúnuu-namui ŋɔwóoi è ƃɔ̀lɔ kpɔ́ a zu kɛ́tɛ wála-wala támaa kɛ́ ƃo zu.

Yóo-yoo e tòo Ɛfesɛ

²¹ M̀ɛni-ŋai ŋí kélee kpɛɛ́ pôlu ma, Pɔ̂ɔ è gbɛ̀tɛ gíli ŋá M̀ɔlêŋ su a gɛ́ɛ é tɛ́ɛ a Masadonia pere da Ɛkeya é lí Zerusâlɛŋ. È mò, ǹyɛɛ, “Ŋà kɛ̀ naa, ŋa pâi Luŋ kâai máŋ.”

²² Nya ƃe è ŋɔkpɔŋ mâa-ƃelai veerɛ tɛ̀ɛ Masadonia. Dia ƃé kɛ̀ a Temete da Erasitɔ. Kɛ́lɛ, ǹyaa kpîŋ è lɛ̀ɛ Eesia é gɛ́ naa a ɣele kpɛ́-kpɛɛ.

²³ Maa tãi tɔnɔi tí mɛni kpɔ̂lu mɛni támaa làa Ɛfesɛ-ƃelai dîa é pîlaŋ Berei ma.

²⁴ Ǹalôŋ tɔnɔ da kâa dòli a Demetiɔ. È kɛ̀ a káne ɣale-nuu káne pɛrɛ-ŋa tɔɔ Atemi mɛni ma. Ǹalôŋ ŋí è pà ǹyɛrɛ kɛ́-ƃelai pɔ́ a sɛŋ-kao támaa ŋɔkáne ɣale tii su.

²⁵ È ǹyɛrɛ kɛ́-ƃelai ŋí ŋá tɛ̀ díkîe ma da díi kɛ́-ƃelai, nyíi-ŋai dítii ƃóloŋɔɔ̂i díwɔ̂i mai. È mò dîa, ǹyɛɛi, “Sinâa, ká gɔ́lɔŋ a gɛ́ɛ díi ŋí ƃé kwa tɔɔ-laa kùla zu.

²⁶ Ka gâai kákɛ mɛni a gɛ́ɛ Ɛfesɛ tɔnɔ nɔ́ fêi, kɛ́lɛ, Eesia lɔii su gwaa támaa ma, Pɔ̂ɔ ŋí a nûa támaa kɛ́ naa da dílii maa fáleŋ. È mò dîa, ǹyɛɛ, ɣâla nyíi núu-kpune a gbɛtɛ a ǹyéei, vé a ɣâla.

²⁷ M̀ɛni ma kúyɛrɛ tii ŋí tɔnɔ nɔ́ fé gáa mɛni kpɔ̂lu su a gɛ́ɛ zu é kara. Kɛ́lɛ máŋ, ǹɛnî-ɣala kɛ́tɛi da kɛ̂ ma Atemi ŋɔpɛ́rɛi mɛni a pâi kɛ̂i kpɛ́ni-kpɛni. Ŋɔkɛ́tɛ-laai a pâi kpɛɛ̂i, nyíi Eesia da ŋ̀éniɛi su-ƃelai kélee da vɛlii.”

²⁸ M̀ɛni-ŋai ŋí mɛniɛɛ dîɛi, dílii è ŋwàna, dí láɣi, dîyɛɛi, “Atemi kâa a Ɛfesɛ-ƃelai díɣâla kɛ́tɛ!”

²⁹ Nya ƃe daai láa e fɛ̀ɛ a yóo-yoo. Díkelee dí kpɔ̀ŋ díkîe-ni dîa goyaŋ kɛ́-pɛrɛi mu. Dí Pɔ̂ɔ m̀arâa sia-ƃelai, Geeyɔ da Ɛresitakɔ, nyíi-ŋai kɛ̀ a Masadonia-ƃelai ɣàla dí lí a dia bɛ́rɛi ŋí mu.

³⁰ Pɔ̂ɔ è kɛ̀ ŋ̀wɛ̂lii é lí goyâŋ su. Kɛ́lɛ, Zîsɛ ŋɔpôlu-ƃelai dífe ǹɛɛ ni naa é lí.

³¹ Eesia nûa kpaya-kpayai da-ni, nyíi-ŋai kɛ̀ a Pɔ̂ɔ ŋɔwɛli kɛ́-maa-ƃelai, dí worɛ̂ tɛ̀ɛ Pɔ̂ɔ pɔ́ naa dí gbera fé a gɛ́ɛ vé lì goyaŋ pɛrɛi mu.

³² Ǹúui da-ni dí kɛ̀ lâɣii díkɛ mɛni da kpɛ́ni ƃò, gbéli-ŋai dí kɛ̀ láɣii a mɛni da kpɛ́ni-ŋa, kpɛ́ni fêi, gbɔŋ su è kɛ̀ nɔ́ a yóo-yoo. Ǹûai dámaa ɣele dífe kɛ́ ní a m̀ɛnii kɔ́lɔŋɔɔ dí lì la maa koyaŋ sui.

³³ Zûu-ŋai dí Alezaŋda lɛ̀, dí gùla dí dɔɔ gbɔŋ ŋɛ́i-tuɛ. Alezaŋda è ǹyée sãa gbɔŋ mɛi. È kɛ̀ ŋ̀wɛ̂lii é gbîŋ ŋuŋ ma ƃó gbɔŋ ŋɛ́i.

³⁴ Kɛ́lɛ, gɛ́ɛ da gàa a gɛ́ɛ è kɛ̀ a Zûu-nuui, ǹúui kélee dí làɣi kpɔ́ a wóo tɔnɔ aƃa feerɛ yée mu, dîyɛɛi, “Atemi káa a Ɛfesɛ-ƃelai díɣâla kɛ́tɛ!”

³⁵ Gbɛɛ ŋái daa kaloŋ è gbɔŋ ŋáa yèŋ, ǹyɛɛ dîai, “Ɛfesɛ sinaa, gbɛ̂ɛ ƃé gɔ́lɔŋ a gɛ́ɛ Ɛfesɛ taai káa a Atemi kɛ́tɛi ŋɔpɛ́rɛi kɛ̂i da bɔɔkɔ̂ŋ nyíi kùla ŋ̀elei su é tooi?

³⁶ Kâa gàa a gɛ́ɛ mɛni-ŋai ŋí sîa fa too. M̀ɛni ma fɛ̂ɛ nɔ́ ká kámɛi sáa. Káfe mɛni da kélee kɛ̀.

³⁷ Ka pá ƃɛ́ a ǹûai ŋí, berei máŋ dífa ŋúma kɛ̀ la ŋ̀âla-pɛrɛ-ŋai mui da berei dífe niî tɛ-ŋɛi kɛ́ ní la a kúnɛnî ɣalai.

³⁸ M̀ɛni ma à kɛ̀ mɛni da káa Demetiɔ da ŋɔyɛrɛ kɛ́-ƃelai lá é pîlaŋ la díkîe-ni dîa, mɛni-sâa ƃó-kêre-ŋai lá ƃóɔɔ̂i, gâloŋ-ŋai dí ƃo naa. Tɔɔ dí díkîe-ni kɔlɔ síɣe.

³⁹ Kɛ́lɛ, à kɛ̀ mɛni da kpɛ́ni káa kála a pâi ƃôi mɛni-sâa ƃó-kêre kɛ́tɛi mu.

⁴⁰ Kúkaa lii-sɛlɛŋ su a gɛ́ɛ dífe kúsoŋ ǹyóo-yooi ŋí mɛni ma gulâai sâai. Káfalo da kélee fé pâi kɛ̂i kúyêei kúkpîŋ maa kɔ̃ɔ mɛni ma ǹyóo-yooi ŋí mɛni su.”

⁴¹ Dí kpɛɛ́ a nyíŋi ƃóɔɔi, è gbɔŋ tàa.