Gɛlaɠaa 16 - Bible

Temete, Pɔ̂ɔ da Salɛ ni dí lì

¹ Pɔ̂ɔ è tɛ̀ɛ a Dɛƃi da Lesitɔra pere. Kôrai-nuu tɔnɔ è kɛ̀ naa, ǹáa ƃé kɛ̀ a Temete. È kɛ̀ a Zûu nɛni tɔnɔ ǹóŋ. Laa-la è kɛ̀ ǹyêei kɛ́lɛ, ǹâŋ è kɛ̀ a Gurii-nuu.

² Temete ŋí, m̀arâai nyíi-ŋai kɛ̀ Lesitɔra da Akonia, dí lòno a ǹɛ́lɛɛ é pîlaŋ ma.

³ Pɔ̂ɔ è kɛ̀ ŋ̀wɛ̂lii é Temete siɣe da ǹyaa dí li. È ziɣe é gbɛtɛ, kpɛ́ni fêi, Zûu-ŋai kɛ̀ ǹɔii tí su, ǹyaŋ dí kɛ̀ a gɔ́lɔŋɔɔ a gɛ́ɛ Temete ǹâŋ è kɛ̀ a Gurii-nuu.

⁴ Pɔ̂ɔ-ni kɛ́ɛ kɛ̀ tɛɛ̂i daa-ŋai sui, dí gɔlɔi lɛ̀ díƃarâai dîa, nyíi zia-ƃelai da ǹúu pɔlɔ-ŋai kɛ̀ Zerusâlɛŋ dí bɔ̃yɛɛ̂i. Dí dɛɛ dípɔ a gɛ́ɛ mɛnii kɛ̀ zui, dí maa tûa kɛ́.

⁵ Nya ƃe Kôrai-toli-kpɔŋ-ŋai su è kpanaŋ laa-la su. Zu-ƃelai dí kɛ̀ tâmai a ɣele kélee.

Pɔ̂ɔ è Masadonia-naloŋ kâa ŋɔzĩ̂ai su

⁶ Dí tɛ̀ɛ Fagia da Galesia kpiniŋ su-pere. M̀ɔlêŋ Maa Waai è díkɛ a gɛ́ɛ dífe Ɣâla ŋɔwóoi ƃo Eesia.

⁷ Dí seriɛɛ Maisiai, dí kɛ̀ ŋ̀wɛ̂lii dí lí Bɛtinia, kɛ́lɛ, Zîsɛ Ŋɔmɔ̂leŋ fé fáa ní mà.

⁸ Dí tɛ̀ɛ Maisia kɔlɛ ma dí pá Toroɛ.

⁹ Naa ƃé zĩ̂a è tɛ̀ɛ naa a Pɔ̂ɔ a gbínii: Masadonia naloŋ tɔnɔ è kɛ̀ tɔ̂ɔni ŋ̀ɛ́i gɛ́ vɛ̀li, ǹyɛɛ mai, “Pá Masadonia í kpɔ́ŋ kûa.”

¹⁰ Pɔ̂ɔ ŋɔzĩ̂ai pôlu ma, kú kúmu sìɣe kpɔ́ a maa félaa a gɛ́ɛ kú lí Masadonia. Kú gàa a gɛ́ɛ Ɣâla a kútoli a gɛ́ɛ kú Duŋ Lɛ́lɛɛi ƃo naa ǹûai dîa.

Ledia líi maa e fàleŋ

¹¹ M̀ɛni ma kú yá ŋá-keleŋ siɣe Toroɛ kú berei siɣe nɔ́ a zu sã́a kú lí Samotulesi. Bôlu ma ɣele ƃóɔɔi kú lì Neapoli.

¹² Ku kúlaa naai, ku lì Felepâ, nyíi gáa a Masadonia taa-leei gɛ́tɛi, nyíi kɛ̀ Lomaŋ-ŋai yée mui. Ku kɛ̀ naa a ɣele kûu da-ŋa;

¹³ tãi è kɛ̀ la a Vii-tɔɔ-ɣelei, ku kùla daai su ku li ya-lee da kɔlɛ, ƃɛi ku kɛ̀ gâai a gɛ́ɛ nàa è kɛ̀ a Ɣâla fɛlîi; ku see naa ku lóno nɛni-ŋai pɔ, nyíi-ŋai díŋa tɛ gîe mai.

¹⁴ Nɛnî tɔnɔ è kùla Tayatira-taai su, ǹáa ƃé kɛ̀ a Ledia. È kɛ̀ a gãla-seɣe kɔlɛ-nuu, gɛ ƃo a Ɣâla fɛli-nuu. Nya ƃe Kúnuu-namui e ǹíi láa ƃò a gɛ́ɛ é ǹyée see mɛni-ŋai mu Pɔ̂ɔ e mòi.

¹⁵ Gɛ́ɛ a batâi sɔlɔ ƃo da ŋɔpɛ́rɛi mu-ƃelai, e kúkpera fe, ǹyɛɛi, “À kɛ̀ ká gɔ́lɔŋ a gɛ́ɛ laa-la káa ńyêei Kúnuu-namui mɛni ma, gɛ̀ ní ka pa ŋápɛrɛi lá ká kɛ́ naa.” È kɛ̀ kpɔ́ ŋ̀wɛ̂lii a gɛ́ɛ ku li ŋɔpɛ́rɛi lá.

Dí Pɔ̂ɔ da Salɛ pìli kpini-pɛrɛ mu Felepâ

¹⁶ Kúkɛɛ liî Ŋ̀âla-fɛli-kwaai mai, ku luɛ-nɛni-lo tɔnɔ kàa, nyíi nyinaŋ nyɔ́mɔɔ è kɛ̀ bôlui. E pà a sɛŋ-kao támaa mɛi-ƃelai pɔ. Kpɛ́ni fêi, è kɛ̀ a tuɛ-mɛni ƃo-nuu.

¹⁷ Nɛnî-lo tɔnɔi ti è pìlaŋ kúpôlu kwa Pɔ̂ɔ-ni, gɛ laɣi, ǹyɛɛi, “Ǹûai ŋí díkaa a Ŋ̀âla Gɛ́tɛi yée-mu-ƃela. Ǹûai ŋí da m̀álo-laa-perei lɛ̂ kâa.”

¹⁸ Nɛni-loi e mɛnii ŋí kɛ̀ a ɣele kûu támaa. Kɛ́lɛ, Pɔ̂ɔ líi e ŋwàna é tínaŋ bɔ naa-pere é m̀ó nyînaŋ nyɔ́mɔɔi ma, ǹyɛɛi, “Ŋa íkɛ Zîsɛ Kôrai láai su a gɛ́ɛ í kúla bôlu.” Nya ƃe è kùla kpɔ nɔ́ bôlu a maa-aƃai ti.

¹⁹ Kɛ́lɛ, tãi mɛi-ƃelai dí gàa la a gɛ́ɛ dísɛŋ sɔlɔ ƃo-perei su a karai, dí Pɔ̂ɔ soŋ da Salɛ dí li a dia ǹɔ́ɔ-kpalaŋ ŋá dí dítɛɛ nuu-tuɛ-ƃelai pɔ;

²⁰ nya ƃe díaŋ dí lì a dia dímɛi-pere-ƃelai pɔ, dîyɛɛ diai, “Ǹûai ŋí díkaa a Zûu-ŋa. Díkaa laa-saa kɛ̂i kútaa-leei su.

²¹ Díkaa tua-pere-ŋa lɛ̂i, nyíi-ŋai ve a sɛŋ a gɛ́ɛ kúai a Lomaŋ-ŋai ku kúyee sée dímu, kpaa máŋ ku dímaa kɔri.”

²² Nya ƃe gbɔŋ kélee e sìɣe e tɔ́ɔ a dia. Nuu-tuɛ-ƃelai mɛi-ƃelai dí díseɣe-ŋai fàla dí m̀o a gɛ́ɛ dí dílokwa a wúru gbua.

²³ Díkɛɛ da dílokwa a ŋánaai, dí dípili kpini-pɛrɛ mu. Dí mò gbini-pɛrɛ lá-nuui ma a gɛ́ɛ e dímɛi káa a ǹɛ́lɛɛ.

²⁴ Mɛnii ŋí ƃoɔ gbini-pɛrɛ lá-nuui mai, e Pɔ̂ɔ-ni tòo kpɔnɔ ŋá e dílɔ gbini-pɛrɛi mu-pere-loŋpoi su.

²⁵ Kɛ́lɛ, gbínii seriɛ zamai, Pɔ̂ɔ da Salɛ dí kɛ̀ Ɣâla fɛlîi díkɛ wule too ma. Pelesinɛ kpeli-ŋai dí díwoli tɔ́ɔ dîa.

²⁶ È kɛ̀ nɔ́ ti ǹɔii gwaa kélee e kpɛ̃liŋ. Gbini-pɛrɛi gwaa kélee e kpɛ̃liŋ; ǹá é ƃó gwaa kélee a maa félaa, pelesinɛ-ŋai kélee dí fùloŋ.

²⁷ Nya ƃe gbini-pɛrɛi lá-nuui e ŋ̀ɛ́i lá ƃò e bɛ́rɛi káa ǹá ƃoɔ gwaa kélee. E ŋɔƃóa-sɔkpɔ̂i sìɣe a gɛ́ɛ e gbîŋ paa, kpɛ́ni fêi, è kɛ̀ gâai pelesinɛ-ŋai da pú.

²⁸ Kɛ́lɛ, Pɔ̂ɔ e làɣi kpɔ́ a ŋ̀óo su kɛ́tɛ, ǹyɛɛi, “Ífe mɛni pɛlɛ íkpîŋ ma. Kpɛ́ni fêi, kúkelee kúkaa ƃɛ.”

²⁹ Nya ƃe e ŋɔŋ-toli ƃò e pá bɛ́rɛi mu, gɛ kpɛ̃liŋ é tóo Pɔ̂ɔ kɔ́ɔ mu da Salɛ.

³⁰ E kùla a dia loŋpoi su, ǹyɛɛ diai, “Ŋánûa, le ƃe ŋa pɔ̂ri gɛ̂i ŋá ƃálo?”

³¹ Nya ƃe dí mò mai, “Láa a Kúnuu-namui Zîsɛ, gɛ̀ ní, ya pâi ƃálôi ka ípɛrɛi-mu-ƃelai.”

³² Nya ƃe dí Kúnuu-namui ŋɔwóoi ƃò ma da ŋɔpɛ́rɛi mu-ƃelai kélee.

³³ E dísìɣe a maa-aƃa tɔnɔi ti gbínii su e dípala-ŋai ŋá wáa. Nya ƃe dí ŋɔbatâi kɛ̀ naa ŋ̀á ma da ŋɔpɛ́rɛi mu-ƃelai kélee.

³⁴ Nya ƃe è lì a dia ŋɔpɛ́rɛi mu e mii-sɛŋ tɛɛ dípɔ; ǹyaŋ da ŋɔpɛ́rɛi mu-ƃelai kélee dí lii-nɛ̃ɛ kùla a gɛ́ɛ a nâa láa a Ɣâla.

³⁵ Kɛ́lɛ, tãi ɣele e ƃɔ̀ lai, nuu-tuɛ-ƃelai mɛi-ƃelai dí kɔkuluƃa-ŋai tɛ̀ɛ a gɛ́ɛ dí m̀ó gbini-pɛrɛi lá-nuui ma, dîyɛɛi, “Ǹûai lɛ́ɛ naa dí lí.”

³⁶ Nya ƃe gbini-pɛrɛi lá-nuui e ŋorɛ-wooi ŋí ƃò Pɔ̂ɔ ma, ǹyɛɛi, “Nuu-tuɛ-ƃelai mɛi-ƃelai dîyɛɛ ŋá m̀ó kâa ká li; maa mɛni ma ka kula ká li lii-sêe su.”

³⁷ Kɛ́lɛ, Pɔ̂ɔ e mò dîa, ǹyɛɛi, “Da ku-lókwa nûa ŋɛi nyíi dífe kúsɔŋ káa ni zui, ǹyaŋ ku ƃo a Lomaŋ-ŋa, da kúpili kpini-pɛrɛ mu; à kɛ̀ ti da pɔ̂ri kúkulâi a gɛ́ɛ ku li loo-pere su? Ve ti! Tɔɔ dîa kpîŋ dí pá dí kúkula.”

³⁸ Nya ƃe ǹɔii maa kpɛ́-ƃelai dí mɛnii ŋí ƃò nuu-tuɛ-ƃelai mɛi-ƃelai dîa. Nuu-tuɛ-ƃelai mɛi-ƃelai dí yào tãi dí mɛni la a gɛ́ɛ Pɔ̂ɔ-ni dí kɛ̀ a Lomaŋ-ŋai;

³⁹ nya ƃe dí pà dí díkpera fe. Dí díkùla dí m̀o dîa a gɛ́ɛ dí kúla daai su dí li.

⁴⁰ Dí kùla gbini-pɛrɛi mu dí lɔ Ledia ŋɔpɛ́rɛi mu; dí díƃarâai kâa naa dí díŋa nɛnɛ dí li.