Gɛlaɠaa 11 - Bible

Pitɛ è góraŋ ƃò Kôrai-toli-kpɔŋ mi Zerusâlɛŋ

¹ Zia-ƃelai da díƃarâai kɛ̀ Zudai, dí mɛ̀ni a gɛ́ɛ Zɛ̃tai-ŋai máŋ da Ɣâla ŋɔwóoi mɛ́ni.

² Pitɛ páa kɛ̀ Zerusâlɛŋ, Zûu-ŋai, nyíi-ŋai mò a gɛ́ɛ fɛ̂ɛ dí núu kpɛtɛ e lɛ́ɛ pâi kɛ̂i a Kôrai-nuui, dí kɛ̀ lônoi a ǹyɔ́mɔɔ é pîlaŋ ma,

³ dîyɛɛi, “Í lì diai pɔ́-naa dífe kpɛtɛ ní ka dîa-ni ka kálaa míi gîe ma lé mɛni ma?”

⁴ Kɛ́lɛ, Pitɛ è m̀ɛnii ŋí su kùla dîa é síɣe gɔ́ɔ pîlanii é seri gbɛɛ ŋá, ǹyɛɛ dîai:

⁵ “Ŋá kɛ̀ Zapa taa kɛ́tɛi su ŋ́gɛ Ɣâla fɛli. Zĩ̂a è tɛ̀ɛ a ńyãa, ŋá sɛŋ da káa gɛ́ yèŋ yɛ̂ɛ seɣe su kɛ́tɛ. Gɛ́ɛ kulâi ŋ̀elei su gɛ́ yɛ̀ŋ ǹɔii ma ḿbɔ naai ŋ̀óli è kɛ̀ ma náaŋ dítɛɛ ŋ̀elei su-pere, zu kɛ́ ƃo ma yɛ̂ɛ kpɔ̂lɔ.

⁶ Zɛŋ ŋí su káa mîi, ŋá sua-ŋa kàa zu, ɣala-sãa, tɔara-sãa da ŋɔni-ŋa.

⁷ Wóo è kùla zu ǹyɛɛ ḿâi, ‘Pitɛ, ímu siɣe í da paa í mii.’

⁸ Kɛ́lɛ, ŋá mò, ǹyɛɛ, ‘Vé tí, Kúnuu-namui, kpɛ́ni fêi, mii-sɛŋ da kélee fé tá mii-sɛŋ da lɔ́ ní ńa nyíi maa fé waa níi.’

⁹ Kɛ́lɛ, è ŋɔ́nɔ ŋ̀óoi mɛ̀ni é kúla ŋ̀elei su, ǹyɛɛ mài, ‘Sɛŋ nyíi kélee Ɣâla a maa waai, ífe ziɣe a m̀aa liƃiɛɛ.’

¹⁰ M̀ɛnii ŋí è kɛ̀ gîei saaƃa. Nya ƃe zãâi ŋí kélee dí tɛ̀ pôlu ŋɔ́nɔ ŋ̀elei su.

¹¹ Núu saaƃa dí pà bɛ́rɛi lá kúkɛ̀ mui kpɔ́ nɔ́ ŋ̀á ma, nyíi-ŋai dí díkùla Sɛsɛria dí dítɛɛ ḿbɔ-naai.

¹² M̀ɔlêŋ è mò ḿâ a gɛ́ɛ kwa dîa-ni kú lí, fé maa tínaŋ ní. Kwa ḿarâa lɔ́ɔlu mɛi dai ŋí kú pà kú lɔ́ ǹalôŋ ŋɔpɛ́rɛi mu.

¹³ È nɛ̀ kûa berei è Ŋ̀âla-taa kelai kàa la ŋɔpɛ́rɛi mui gɛ́ ƃò tɔ̂ɔni ŋ̀ɛi tuɛ, ǹyɛɛ mài, ‘Núu tɛ́ɛ Zapa dí Samaŋ tóli, nyíi ǹáa kpéli ƃa Pitɛi.

¹⁴ A pâi worɛ̂-woo-ŋa ƃôi yâ, nyíi pâi íƃalôi da ka ípɛrɛi mu-ƃelai kéleei.’

¹⁵ Ŋ́gɛɛ lônoi, M̀ɔlêŋ Maa Waai è pà dípɔ yɛ̂ɛ berei è pà la kúpɔ a m̀aa-ŋuŋ.

¹⁶ Gɛ́ɛ tí, Kúnuu-namui wóo è tòo ŋ́gili ŋá berei è mò la, ǹyɛɛ, ‘Zɔ̂ŋ è batâi kɛ̀ a yá, kɛ́lɛ, da pâi kábatâi kɛ̂i a M̀ɔlêŋ Maa Waai.’

¹⁷ Zu-ponoɔɔ̂i a gɛ́ɛ zama-sɛŋ tɔnɔi nɔ́ Ɣâla è dɛ̀ɛ Zɛ̃tai-ŋai pɔ́ maa sama-sɛŋ tɔnɔi tí nɔ́ è dɛ̀ɛ kúpɔ a tãi kú làa la a Kúnuu-namui Zîsɛ Kôrai. Gɛ̀ ní gbɛ̂ɛ ƃa ńyãa a gɛ́ɛ ŋá Ɣâla ŋɔtíi kpera?”

¹⁸ Ŋ̀óo-ŋai ŋí mɛniɛɛ dîɛi, dí dímɛi sàa dí Ɣâla láa maa tɛ́, dîyɛɛi, “Gɛ̀ ní, Ɣâla a ŋuŋ ma ƃo tɛ̀ɛ Zɛ̃tai-ŋai pɔ́ máŋ a gɛ́ɛ dí dílii pene dílɛɛ ɣele ma.”

Ɛŋtiɔ Korai-tóli-kpɔŋ

¹⁹ Mɛni-soli káa è gɛ̀ Kôrai pôlu-ƃelai dámaa ɣele dí taa-taai. M̀ɛni tɔnɔi ŋí ƃé dí Tiƃiŋ pàa zu. Dí lì kpɔ́ kwaa kôya-ŋa ma yɛ̂ɛ Fonisia, Sapɔrɔ, da Ɛŋtiɔ. Kɛ́lɛ dífe Ɣâla ŋɔwóoi ƃó ní nûa da kpɛni ma gwaa-ŋai ŋí ma, fɛ̂ɛ nɔ́ Zûu-ŋai tee-tee.

²⁰ Kɛ́lɛ, ǹaa-la-ƃelai da-ŋa dí kɛ̀ a Sapɔrɔ da Sailini-ƃela nyíi-ŋai Duŋ Lɛ́lɛɛi ƃò Gurii-ŋai dîa máŋ é pîlaŋ Kúnuu-namui Zîsɛ ma, díseriɛɛ Ɛŋtiɔi.

²¹ Kúnuu-namui ŋɔwála-walai è kɛ̀ díkɔlɛ. Núu támaa dí làa la dí pá Kúnuu-namui pɔ́-naa pere.

²² M̀ɛni-ŋai ŋí duŋ è tòo Kôrai-toli-kpɔŋ su-ƃelai wôlii kɛ̀ Zerusâlɛŋ. Dí Banaba tɛ̀ɛ a gɛ́ɛ é lí é seri Ɛŋtiɔ.

²³ Báa kɛ̀ naai, m̀ɛni lɛ́lɛɛ-ŋai Ɣâla è gɛ̀ naa ǹûai dîɛi naa kàa, ǹíi é nɛ̃ɛ. È dília-woo ƃò a gɛ́ɛ dí fɔlɔ-fɔlɔ dílaa-lai su Kúnuu-namui mɛni ma.

²⁴ È kɛ̀ a núu lɛ́lɛɛ, ǹáa fɛ́ɛ a M̀ɔlêŋ Maa Waai da laa-la kɛ́ ƃò ǹyêei. Núu támaa dí pà Kúnuu-namui ŋɔƃélai ma-pere.

²⁵ Banaba è kùla naa é lí Taasɔ a gɛ́ɛ è Sɔ̂ɔ kɔ́ri.

²⁶ Sɔ̂ɔ káa m̀ii, è pà la Ɛŋtiɔ. È kɛ̀ tí dí gɛ̀ naa a kóraŋ tɔnɔ Kôrai-toli-kpɔŋ su-ƃelai sáma, dí sɛŋ lɛ́ dámaa ɣele dîa. Ɛŋtiɔ ƃé dí Zîsɛ ŋɔpôlu-ƃelai tòli naa a Kôrai-ƃela a maa-ŋuŋ.

²⁷ M̀aa tãi tí Ɣâla ŋɔlóno kɛ́-ƃela da-ŋa dí kùla Zerusâlɛŋ dí pá Ɛŋtiɔ.

²⁸ Dítɔnɔ da é kɛ̀ naa ǹáa ƃé kɛ̀ a Agabɔ. M̀ɔlêŋ è kɛ̀ ǹalôŋ ŋí kponoi. È m̀ó nàa tuɛ M̀ɔlêŋ sârai a gɛ́ɛ puru ŋánaa a pâi toôi ǹɔii gwaa kélee. M̀ɛnii è kɛ̀ Gâloŋ Kilaudiɛ ŋɔkâloŋ-laa koraŋ su.

²⁹ Zîsɛ ŋɔpôlu-ƃelai dí gbɛtɛ a gɛ́ɛ dí kpɔŋ mâa tɛɛ díƃarâai pɔ́, nyíi-ŋai kɛ̀ Zudai. Ǹúui kélee dí nyíŋi kɛ̀ yɛ̂ɛ berei a pɔ̂ri gɛ̂i lai.

³⁰ Dí gbɔŋ mâa sãai ŋí ŋáa tɛ̀ ma dí dɛɛ Banaba pɔ́ da Sɔ̂ɔ dí li la ǹúu pɔlɔ-ŋai pɔ́.