Gɛlaɠaa 10 - Bible

Pitɛ da Kɔniliɔ

¹ Nalôŋ tɔnɔ è kɛ̀ Sɛsɛria. Ǹáa ƃé kɛ̀ a Kɔniliɔ. È kɛ̀ a lɔii maa kpɛ́-ƃela mɛi-nuu. È kɛ̀ Etele lɔii maa kpɛ́ nuu kpului tɔnɔ láa túɛ.

² Ǹalôŋ ŋí è kɛ̀ kpɔ́ a Ɣâla mɛni kɛ́-nuu. Da ŋɔpɛ́rɛi mu-ƃelai kélee dí yào Ɣâla ma. È kpɔŋ-maa támaa tɛ̀ɛ nûa pɔ́. A kâa Ɣâla fɛ̀li a ɣele kélee.

³ Zĩa è tɛ̀ɛ la a folo-maa-laa tɔnɔ da. Ɣâla-taa-kela tɔnɔ è pà bɔ́ zĩai su é dóli, ǹyɛɛ mài, “Kɔniliɔ.”

⁴ Kɔniliɔ kɛ́ɛ a ŋ̀ɛ́i kpamo mài, è yào, ǹyɛɛi, “Lé ƃe, Kúnuu-namui?” Ŋ̀âla-taa kelai ǹyɛɛ mài, “Íɣâlai a ífɛli-wooi mɛni da íkpɔŋ-maai kɛ́ pere maa mɛni. A gbɛtɛ a gɛ́ɛ é íwoo su too.

⁵ Nûa tɛɛ lônii ma Zapa a gɛ́ɛ dí Samaŋ tóli nyíi ǹáa kpeli ƃa Pitɛi.

⁶ Gáa Samaŋ ŋɔpɛ́rɛi lá yúo kɔlɛ ma, nyíi gáa a zua-kɔlɔ paa-nuui.”

⁷ Ŋ̀âla-taa kelai liɛɛ, nyíi lòno Kɔniliɔ pɔi, Kɔniliɔ e ǹyee-mu-ƃelai veerɛ tòli da Ɣâla-mɛni kɛ́-kɔkuluƃa tɔnɔ nyíi è gùla ǹyee-mu-ƃelai sámai.

⁸ M̀ɛni-ŋai ŋí kélee su kúlaa mi dîɛi, è dítɛ̀ɛ Zapa.

⁹ Díkɛɛ liî a bôlu ma ɣelei dí lɛ̀ɣɛ Zopai, Pitɛ è tɛ̀ bɛ́rɛi tôŋ su a volo tɛ́ɛ ŋuŋ-mai a gɛ́ɛ e Ɣâla fɛli.

¹⁰ Puru è gɛ̀ kpɔ́ a ŋ̀ánaa gɛ́ ŋ̀wɛli é sɛŋ da mii. Díkɛɛ ŋɔmii-sɛŋ kpɛtɛ̂i, zĩa è tɛ̀ɛ la,

¹¹ é ŋ̀ele-kɔlɔŋ kàa ǹá ƃóɔɔ, sɛŋ da é kúla naa gɛ́ yèŋ ǹɔii ma yɛ̂ɛ seɣe su kɛ́tɛ. Zɛŋ ŋí kɛ́ɛ yenîi, ŋ̀óli è kɛ̀ ma náaŋ gélee tɛ́ɛ ŋ̀elei su-pere, zu kɛ́ ƃo ma yɛ̂ɛ kpɔ̂lɔ.

¹² Sua sîi kélee è kɛ̀ zɛŋ ŋí su, ɣâla-sãa, tɔara-sãa, da ŋɔni-ŋa.

¹³ Nya ƃe wóo è pà bɔ́, ǹyɛɛ mài, “Pitɛ, ímu siɣe í da paa í mii.”

¹⁴ Kɛ́lɛ, è mò mà, ǹyɛɛi, “Vé ti, Kúnuu-namui, kpɛ́ni fêi, fé niî mii-sɛŋ da kélee mii ní nyíi ƃâa fé ma, maa fé waa níi.”

¹⁵ Nya ƃe ŋ̀óoi è ŋɔ́nɔ pà bɔ́ a veerɛ ɣelei, ǹyɛɛ mài, “Sɛŋ nyíi kélee Ɣâla a maa waai, ífe ziɣe a sɛŋ ƃâa fé mai.”

¹⁶ Nyíŋi è kɛ̀ a tãi saaƃa. Nya ƃe zɛŋ zua sîi-ŋai dí kɛ̀ zui, è tɛ̀ kpɔ́ pôlu a maa félaa ŋ̀ele-kɔlɔŋ su.

¹⁷ Pitɛ kɛ́ɛ kɛ̀ gíli ŋá siâi zĩai ŋí su-kúlai mai, ǹûai Kɔniliɔ dítɛ̀ɛi dí pà dí tɔ́ɔ gónaŋ lá. Dí Samaŋ ŋɔpɛ́rɛi mare-kɛɛ kɛ̀, dí lí naa.

¹⁸ Dí mare-kɛ̂ɛ kɛ́ à kɛ̀ Samaŋ, nyíi da dòli a Pitɛi, è kɛ̀ naa.

¹⁹ Pitɛ kɛ́ɛ gíli ŋá siâi zĩai ŋí su-kulâi mai, M̀ɔlêŋ è mò mà, ǹyɛɛ, “Tɔɔ, núu saaƃa káa íkɔ̂rii.

²⁰ Ímu siɣe í pîlaŋ, ka dîa-ni ka lí í kpera íkili ŋá siâi kpɛni-kpɛni, kpɛ́ni fêi, ńyãa ƃé dítɛ̀ɛ.”

²¹ Nya ƃe Pitɛ è pìlaŋ é lí ǹûai ŋí pɔ́-naa Kɔniliɔ è dítɛɛi, ǹyɛɛ dîai, ǹyɛɛi, “Ńyãa ƃa ǹúui ka gɔ̂rii. Ká pà lé mɛni ma?”

²² Dîyɛɛ mài, “Kɔniliɔ, nyíi gáa a ǹɔii ma kpɛ́-ƃelai mɛi-nuui, ƃé kútɛ̀ɛ. Gáa a núu lɛ́lɛɛ, gɛ́ yao Ɣâla ma. Ƃaa kɛ́-maa káa Zûu-ŋai yêei m̀ɛni ma. Ǹyaa ƃé Ɣâla-taa-kela maa waa è mò mà a gɛ́ɛ é ítoli ŋɔpɛ́rɛi lá é íwoo mɛni.”

²³ Nya ƃe è lì a dia bɛ́rɛi mu é dílaâi kula. Bôlu ma ɣelei è mù-siɣe da dîa-ni dí lí. M̀arâai da-ni dí kùla Zapai da dîa-ni dí li máŋ.

²⁴ Ɣele ƃɔ́ɔi dí sèri Sɛsɛria. Kɔniliɔ è kɛ̀ dímaa kpɛnîi. E ŋɔnûai ŋá tɛ̀ gîe ma da ŋɔwɛli kɛ́-maa-ƃela kpîŋ-ŋai.

²⁵ Pitɛ lɔ́ɔ bɛ́rɛi mui, Kɔniliɔ è gàa é pɛ́lɛ gɔ́ɔ mu é vɛli.

²⁶ Kɛ́lɛ, Pitɛ è mù-siɣe è dɔ̀ɔ, ǹyɛɛ mài, “Ímu siɣe í tɔ́ɔ. Ńyãa máŋ ŋ́gaa a núu-kpune.”

²⁷ È lɛ̀ɛ lônoi bɔ́, dí lɔ́ bɛ́rɛi mu. È núu támaa kàa díŋa tɛ́ɛ ma.

²⁸ Pitɛ è mò dîa, ǹyɛɛi, “Káa kpîŋ ka gɔ́lɔŋ berei vé la dɔ̂ŋ lá-wooi ma a gɛ́ɛ Zûu-nuu da lɔii da kpɛni su-ƃela dí nɛ̃ɛ, kpaa máŋ é dínaa káai. Kɛ́lɛ, Ɣâla a ǹɛ ḿâ a gɛ́ɛ fé núu kélee sìɣe a ǹúui ƃâa fé mai, kpaa máŋ a ǹúui maa fé waa níi.

²⁹ M̀ɛni ƃé dí ŋ́orɛ̂ dîɛi, fé sîa too ní, ŋá pà. M̀ɛni ma, ká ńdòli lé mɛni ma?”

³⁰ Kɔniliɔ ǹyɛɛ mài, “Fólo saaƃa tɛ̂ɛi pôlu ma, ŋá kɛ̀ Ɣâla fɛlîi ŋápɛrɛi mu a vólo maa láai a tãi kɛ́ɛ ŋí nɔ́. Nalôŋ tɔnɔ è kɛ̀ tɔ̂ɔni ŋ́ɛi tuɛ ŋɔseɣei kɛ́ folo.

³¹ Ǹalôŋ ŋí è mo ḿâ, ǹyɛɛ, ‘Kɔniliɔ, Íɣâlai a ífɛli-wooi mɛni da gbɔŋ mâai yâ gɛ̂i maa tuŋ. A pá ífɛli-wooi su-toôi.

³² M̀ɛni ma, worɛ̂ tɛɛ Zapa Samaŋ pɔ́-naa ǹáa kpéli ƃa Pitɛi. Gáa zua-kɔlɔ paa-nuui Samaŋ ŋɔpɛ́rɛi lá yúo kɔlɛ ma.’

³³ Nya ƃe ŋá íworɛ̂ tɛ̀ɛ kpɔ́ a maa félaa, ǹyaŋ í gɛ̀ kpɔ́ a ǹɛ́lɛɛ í pa. M̀aa mɛni ma kúkelee kúkaa ƃɛ́ Ɣâla ŋɛ́i-tuɛ a gɛ́ɛ kú m̀ɛni-ŋai mɛni Ɣâla a m̀ó yâi.”

Pitɛ è lòno Kɔniliɔ ŋɔpɛ́rɛi mu

³⁴ Pitɛ è pɛ̀lɛ lônoi, ǹyɛɛi, “Tɔ̃yâ ma, ŋá gɔ́lɔŋ a gɛ́ɛ Ɣâla fa núu su ɣɛɛ.

³⁵ Kɛ́lɛ, ǹúui kélee à yâo Ɣâla ma lɔii kélee sui, gɛ́ tûa-pere lɛ́lɛɛ kɛi, Ɣâla a ǹyée sèe maa nuui mu.

³⁶ Ŋ̀orɛ̂-wooi è dɛ̀ɛ Eezuɛ-ŋai pɔ́ naai, ǹyaa ƃa lii-sêe maa mɛni ƃóɔɔ Zîsɛ Kôrai sârai, nyíi gáa a Duŋ Lɛ́lɛɛi. Ǹyaa ƃé gáa a núu kélee ǹâmu.

³⁷ Ká ŋ̀orɛ̂-wooi kɔ́lɔŋ nûa mò Zuda gwaa kéleei. Gɔ́ɔ è pìlaŋ Galalii Zɔ̂ŋ ŋɔɣâla-woo ƃóɔɔi é pîlaŋ batâi mɛni ma pôlu ma.

³⁸ Ɣâla è lɛ̀ a M̀ɔlêŋ Maa waai pù Nâzarɛ Zisɛi kponôi é wála-wala tɛ̀ɛ bɔ́. È kɛ̀ liî a mɛni lɛ́lɛɛ kɛ́ɛ, gɛ́ diai ƃàlo Dɛ̂ƃele è kɛ̀ díkponôi, kpɛ́ni fêi, Ɣâla è kɛ̀ bôlu.

³⁹ Kúkaa a sêre-ŋa mɛni-ŋai ŋí kélee mɛni ma è gɛ̀ Zûu-ŋai dílɔii su da Zerusâlɛŋ. Dí bàa a zɛlɛŋɔɔ wúru ma.

⁴⁰ Kɛ́lɛ, Ɣâla è Zisɛi ŋí mu sìɣe saa yêei a ŋ̀ele kûui zaaƃa ɣelei é ǹɛ́ ǹûai dîa.

⁴¹ Vé ǹɛ́ ní núu kélee ma, kɛ́lɛ, è ǹɛ kûa, kúai è kúlɛ̀ a sêre-ŋai. Kwa dîa-ni kú kúlaa mìi gîe ma ŋɔmu-siɣeɛɛ saa yêei pôlu ma.

⁴² È kúkɛ̀ a gɛ́ɛ kú Ɣâla woo ƃó ǹûai dîa kú ŋɔ́nɔ Zîsɛ maa sere-faa kɛ́ a gɛ́ɛ ǹyaa ƃé Ɣâla è zèe a gɛ́ɛ é kɛ́ a m̀ɛni ŋá-tee-nuui vúlu-ƃelai da zaa-ƃelai mɛni ma.

⁴³ Ɣâla ŋɔlóno kɛ́-ƃelai kélee da m̀aa sêre-faa kɛ̀ a gɛ́ɛ ǹúui à làa lai zu mɛni a pâi lɛɛ̂i ŋɔsɔnyɔ̂ŋ mɛni ma ǹyaa Zîsɛ láai sârai.”

Zɛ̃tai-ŋai dí M̀ɔlêŋ Maa Waai sɔlɔ ƃô

⁴⁴ Pitɛ kɛ́ɛ niî mɛni-ŋai ŋí ƃôi, diai m̀ɛnii, M̀ɔlêŋ Maa Waai è pà dípɔ.

⁴⁵ Zûu-ŋai laa-la è kɛ̀ díyêei, nyíi-ŋai da Pitɛ-ni dí pâi, díla è kpàla dîa, kpɛ́ni fêi, M̀ɔlêŋ Maa Waai è pà Zɛ̃tai-ŋai pɔ́ máŋ a sama-sɛŋ.

⁴⁶ Dí díkàa lônoi a sîi-woo da kpɛni-ŋa díkɛ díwoo mɛni, díkɛ Ɣâla ŋɔkɛ́tɛ-laai maa mɛni ƃo. Nya ƃe Pitɛ è mò, ǹyɛɛi,

⁴⁷ “Ǹûai ŋí dia máŋ daâ M̀ɔlêŋ Maa Waai sɔlɔ ƃó nɔ́ yɛ̂ɛ berei kú zɔlɔ ƃò lai. Núu da a pɔ̂ri kúkperâi a gɛ́ɛ kúfe díbatâi kɛ a yá?”

⁴⁸ Nya ƃe è díbatâi kɛ̀ Kúnuu-namui láai su. Dí m̀are kɛ́ a gɛ́ɛ è lɛ́ɛ naa a ɣele kûu kpɛ́-kpɛɛ.