Gɛlaɠaa 1 - Bible

¹ Ŋákɔlɔi m̀aa-ŋuŋ su, Tiofelɛ, ŋá m̀ɛnii kélee pɔ̃̀yɛ Zîsɛ è pɛ̀lɛ gɛ̂i, gɛ́ nɛ̀i,

² é lɛ́ɛ la zu dí dɛ́ ɣelêi. É lɛ́ɛ pâi tɛ̂i ŋ̀elei su, è bàma ŋɔsia-ƃelai dîa M̀ɔlêŋ Maa Waai sârai, nyíi-ŋai a wɔ́lɔ dísiɣei.

³ È gbîŋ lɛ̀ dîa a tɔ̃yâ pere sii támaa su ŋɔmɛni soli-káai pôlu ma nyíi ǹɛ dîa a gɛ́ɛ gáa a vúlui. Zaa ɣele kûu buu náaŋ pôlu ma, è kùla díŋɛi a ɣele kûu támaa, é lóno dípɔ é pîlaŋ Ɣâla ŋɔkâloŋ-laai ma.

⁴ Da dîa-ni díkɛɛ kɛ̀ díkîe mai, è mò dîa ǹyɛɛi, “Káfè kùla Zerusâlɛŋ. Ka lɛɛ naa ká Ǹaŋ-nuui ŋɔkono-têe-wooi maa kpɛ́ŋ, nyíi è mò, ǹyɛɛ, ‘Ká mɛ̀ni ńa.’

⁵ Zɔ̂ŋ è batâi kɛ̀ a yá. Kɛ́lɛ, nàa fé pâi tûai, da pâi kábatâi kɛ̂i a M̀ɔlêŋ Maa Waai.”

Zîsɛ è tɛ̀ Ɣâla-taa

⁶ Zîsɛ da ŋɔpôlu-ƃelai kɛ́ɛ da dia ni da díŋaa tɛ́ gîe mai, dí m̀arê kɛ̀, dîyɛɛ m̀ai, “Kúnuu-namui, ya pâi Eezuɛ-ŋai díkâloŋ laai tɛɛ̂i dípɔ pôlu tãi ŋí su?”

⁷ È mò dîa, ǹyɛɛi, “Ǹaŋ-nuui m̀ɛnii ŋí maa wála-wala káa ǹyêei.

⁸ Kɛ́lɛ, ka pâi wála-wala sɔlɔ ƃôi a tãi M̀ɔlêŋ Maa Waai a pâ la kápɔi. Ka pâi kɛ̂i a ŋásere-ŋa Zerusâlɛŋ, Zuda gwaa kélee, da Sameria, é too máŋ ǹɔii koyâŋ ma.”

⁹ Gɛ́ɛ a nyíŋi ƃói, dí lɛ̀ɛ gâai e tɛ ŋ̀elei su ŋ̀ele-kɔlɔŋ kolei è gula díŋɛi.

¹⁰ Díkɛɛ Zîsɛ kâai kɛ̀ tɛ̂i ŋ̀elei sui, núu feerɛ díkɛ̀ tɔ̂ɔni díkɔlɛ seɣe kole kɛ́ ƃo dîa,

¹¹ dîyɛɛ dîai, “Galalii-ƃela, lé ƃé ka tɔ̂ɔni kákɛ ŋ̀elei su kàai? Zisɛi ŋí tɛ̀ ŋ̀elei sui, a pâi pâi nɔ́ bere sîi tɔnɔi ŋí su ká gàa la gɛ́ tɛ̀ ŋ̀elei sui.”

Dí núu da pù Zudasi pɔ́ɔ ŋá

¹² Nya ƃe dí lène pôlu Zerusâlɛŋ dí kula ǹyéei ma da dòli a Ŋulɔ-wuru Yeei nyíi gáa Zerusâlɛŋ kɔlɛ mai. Nàa è kɛ̀ nɔ́ a fii-tɔɔ ɣele sia kɛ̂i.

¹³ Dítɛɛ daai sui, bɛ́rɛi dí lɔ̀ mui, dí tɛ̀ ŋ̀elei-pere loŋpoi su. Nàa ƃe dí kɛ̀ naa. Diai kɛ̀ naai dia ƃa, Pitɛ, Zɔ̂ŋ, Zĩi, Aŋdulu, Fele, Tama, Batâlomio, Maafîu, Afîa ǹóŋ Zĩi, Zɛɛla-nuui Samaŋ da Zĩi ǹóŋ Zudasi.

¹⁴ Ǹûai ŋí kélee díkɛ̀ zu tɔnɔɔ dí díkpîŋ pu Ɣâla fɛliɛ su, da nɛyâai, Zîsɛ ǹee Mere da ǹêɣe-sinaâi.

¹⁵ M̀aa ɣele kûu kpɛ́-kpɛ̂ɛ tɛ̂ɛi pôlu ma, ǹaa-la-ƃelai ŋí dí kòyaŋ. Diai kɛ̀ goyâŋ ŋí sui dí kɛ̀ núu ŋuŋ tɔnɔ pôlu buu feerɛ. Nya ƃe Pitɛ m̀u-sìɣe é tɔ́ɔ a gɛ́ɛ lóno dípɔ.

¹⁶ È m̀o dîa ǹyɛɛi, “Ŋánûa, fɛ̂ɛ nɔ́ Ɣâla ŋɔwóoi ŋ̀aa-see é kɛ́, nyíi M̀ɔlêŋ Maa Waai è bù Deeƃé lá a gɛ́ɛ é m̀ó naa túɛ é pîlaŋ Zudasi ma nyíi tɔ̀ɔ Zîsɛ soŋ-ƃelai tuɛi.

¹⁷ È kɛ̀ a kútà nyíi díi ŋí da sɔlɔ ƃôi.” (

¹⁸ Ǹalôŋ ŋí è lɔii kpua yà a zɛŋ è zɔlɔ ƃò ŋɔwana-lɔ̂ɔ tuai sui. È tòo kpɔ́ gɔŋ mɛi, é ƃela zâmai, búru kélee é kúla.

¹⁹ Nya ƃe Zerusâlɛŋ-ƃelai kélee dí gɔ̀lɔŋ, dí m̀aa lɔii kpuai ŋí tóli dísîi-wooi su a Akedama. Ŋ̀óoi ŋí su-kulâi ƃa Ŋãa Lɔii.)

²⁰ “Bɔ̃yɛɛ̂i Ŋ̀ule-woo Kɔlɔi su, ‘Tɔɔ gɛ̂i é kara, núu da fé kɛ́ naa.’ Bɔ̃yɛɛ̂i máŋ, ‘Tɔɔ núu da kpɛ́ni é bɔ́ɔ ŋá síɣe.’

²¹ “M̀ɛni ma, diai kwa dia ni kú kɛ̀ Kúnuu-namui Zîsɛ kpono ma gɛ́ lɔ̀ gɛ́ kula,

²² é sìɣe tãi Zɔ̂ŋ è kɛ̀ ɣâla-woo ƃôi la é pîlaŋ batâi ma ma é tóo tãi ma Zîsɛ è kùla la kúsama é tɛ́ ŋ̀elei sui fɛ̂ɛ nɔ́ ǹûai ŋí dɔnɔ é kɛ́ a m̀u-siɣe saa-yeei maa sêre-ŋai da.”

²³ Nya ƃe dí núu feerɛ lɛ̀, Zosɛ, nyíi da dòli a Basabasi, nyíi ǹáa kpéli è kɛ̀ a Zɔsitɔ da Matâya.

²⁴ Dí Ɣâla fɛ̀li, dîyɛɛi, “Kúnuu-namui, ƃiai í núu kélee líi su kɔ́lɔŋ, ǹúu feerɛi ŋí nyíi lɛ́ kûa ya ziɣe zui,

²⁵ a gɛ́ɛ é zia tii ŋí kɛ́ nyíi Zudasi e ǹɛɛ é lí gbɔɔi kwaa mai.”

²⁶ Nya ƃe dí kpɛɛŋ tòo ǹúu feerɛi ŋí loai, gbɛɛ̂ŋ é ǹɛ̃ɛ a Matâya láa. Dí nâa bɛ̀lɛ zia-ƃela puu kao tɔnɔi dîa.