Galatə 6 - Bible

Ka kpɔŋ-maa tɛɛ kákîe-ni pɔ́

¹ Ŋánûa, à kɛ̀ máŋ kà núu da kàa gɛ mɛni nyɔ́mɔɔ kɛ̀, káai M̀ɔlêŋ káa kákponôi ka pá a maa-nuui ti pôlu a pere lɛ́lɛɛ. Ka gɔ́lɔŋ a gɛ́ɛ ɣele da ka pâi pilîi yee-laa-maa su káa máŋ.

² Ka kákîe-ni díkpîri wiɛɛ-ŋai síɣe, a gɛ́ɛ ká Kôrai ŋɔtɔ̂ŋ ŋ̀aa-see kɛ́.

³ Kpɛ́ni fêi, à kɛ̀ núu da a gíli ŋá sìa a gɛ́ɛ gáa a núu kɛ́tɛ, ǹyaŋ núu kɛ́tɛ fei, gáa gbîŋ pɛlɛ̂i.

⁴ Kɛ́lɛ, tɔɔ núu kélee é gbîŋ-tii su káa. Ǹyaŋ ŋɔyoŋkai maa-sapoi a pâi gulâi naai, gáa gbîŋ mɛni ma; ve ŋɔkɔlɛ-ma-nuui mɛni ma.

⁵ Kpɛ́ni fêi, fɛ̀ɛ núu kélee e gbîŋ tìã siɣe.

⁶ Kɛ́lɛ, tɔɔ ǹúui da ŋ̀óoi lɛ̀ mai, é mɛni lɛ́lɛɛ-ŋai kélee ƃó zɛŋ-lɛ-nuui ma.

⁷ Káfe kákpîŋ pɛ̀lɛ; núu fa ɣɛ́lɛ-maa kùla Ɣâla kponôi, kpɛ́ni fêi, zɛŋ núu a zìi, ǹyaa ƃe a gùla.

⁸ Kpɛ́ni fêi, núu a sɛŋ sí ŋɔkɛ-pere-nyɔŋ mɛni mai, a su-kara kùla ŋɔkɛ-pere-nyɔŋ su; kɛ́lɛ, núu a sɛŋ sí M̀ɔlêŋ mɛni mai, a wɔlɔ-wɔlɔ fulu-laa kùla M̀ɔlêŋ su.

⁹ Kúfii fe kpɛ̀ɛ a mɛni lɛ́lɛɛ kɛ́ɛ, kpɛ́ni fêi, tãi a pâi, kwa pâi sɛŋ da kulâi zu, à kɛ̀ kúfe kpera ni.

¹⁰ Mɛni ma, tãi pɔ̂ri-maa káa la kúyêei, kwaa ku mɛni lɛ́lɛɛ kɛ́ núu kélee mi, é tela kɛ́ a diai díkaa a naa-lai su-ƃela-kpului.

Pɔ̂ɔ a zaa-wurii maa-yoŋka teêi

¹¹ Ka ŋ̀óo-kɛ-sɛŋ kpaya-kpayai káa ŋ́gaa kɔlɔ pɔ̃yɛ̂i la kápɔ a ŋ́gbîŋ yeei.

¹² Diai ŋ̀wɛ̂lii a gɛ́ɛ dí mɛni lɛ́lɛɛ lɛ́ díkpîŋ-tua-perei sui, dia ƃa ká kɛ̀ a wála-wala a gɛ́ɛ dí kákpɛtɛ, ǹyaŋ da gɛ̀ nɔ́ ti a gɛ́ɛ núu fe díkpɔ̀ara Kôrai ŋɔsaa-wurii mɛni ma.

¹³ Kpɛ́ni fêi, diai máŋ da díyee sèe núu-kpɛtɛ-mɛni mui, dia kpîŋ dífa dɔ̂ŋ mɛi kâa, kɛ́lɛ, da ŋ̀wɛli dí kákpɛtɛ a gɛ́ɛ dí yoŋka tée kákpîŋ tua-perei su.

¹⁴ Kɛ́lɛ, e folôŋ mâ kpɔ́ a zu kôya a gɛ́ɛ ŋá yoŋka tée, fɛ̀ɛ nɔ́ ŋá Kúnuu-namui Zîsɛ Kôrai ŋɔsaa-wurii maa-yoŋka tée, zaa-wurii a gɛ́ ŋ̀éniɛi a saa ŋ́ɛi, ǹyaŋ ŋa saa ŋ̀éniɛi ŋɛi.

¹⁵ Kpɛ́ni fêi, diai dí-kpɛtɛɛ̂i da diai dífe kpɛtɛ níi, dífe a sɛŋ da, kɛ́lɛ, fɛ̂ɛ núu maa sɔlɔ ƃóɔ a nina.

¹⁶ Lii-see da maloŋ-kaa é kɛ́ diai kélee dîa da sîa dɔ̂ŋ ŋí lá-woo mai, da Eezuɛ-ŋai díkaa a Ɣâla pɔ́ɔi.

¹⁷ É síɣe tãi ŋí ma núu da fé ŋɔ́nɔ ḿvũa-fũa; kpɛ́ni fêi, Zîsɛ pɔ́ɔ káa ŋ́gbono ma.

Ǹûai

¹⁸ Ŋánûa, Kúnuu-namui Zîsɛ Kôrai ŋɔƃɛlɛ-sêei é kɛ́ kámɔ̂leŋ kɔlɛ. É kɛ́ ti.