Galatə 5 - Bible

Ka tɔɔ ŋuŋ-ma-ƃo su a gbanaŋɔɔ

¹ Ŋuŋ-ma-ƃo-mɛni ma, Kôrai e kúŋuŋ ma ƃò; mɛni ma ka tɔɔ a gbanaŋɔɔ, káfè kɛ̀ ŋɔ́nɔ luɛ-laa ŋɔkpîri wiɛɛi mu.

² Mɛni ma, ńyãa Pɔ̂ɔ, ŋa m̀ôi kâa a gɛ́ɛ à kɛ̀ ka káyee sèe núu-kpɛtɛ-mɛni mu, gɛ̀ ní Kôrai fe pâi mɛni da kélee kɛ̂i kámɛni ma.

³ Ŋá m̀ó ŋɔ́nɔ diai kélee dîa dí díyee sèe núu-kpɛtɛ-mɛni mui a gɛ́ɛ fɛ̀ɛ dí dɔ̂ŋ kélee mɛi káa.

⁴ Káai ŋ̀wɛ̂lii a gɛ́ɛ dɔ̂ŋ e kákɛ a tɔ̃yâ-ƃelai, ka kula Kôrai mu; ka kula ƃɛlɛ-sêe mu.

⁵ Kpɛ́ni fêi, kwa tɔ̃yâ laa-la maa-kili kɛ-zui maa kpɛ̂ŋ a laa-la M̀ɔlêŋ sârai.

⁶ Kpɛ́ni fêi, diai díkpɛtɛɛ̂i da diai dífe kpɛtɛ níi, dímaa-mɛni fe a mɛni kpanaŋ Kôrai kponôi, kɛ́lɛ, fɛ̀ɛ laa-la nyíi a tíi kɛ̀ wɛli-kɛ-maa sârai.

⁷ Ká kɛ́ tíi kɛ̂i a ǹɛ́lɛɛ. Gbɛ̂ɛ ƃe kákpèra dɔ̃yâi kɛ́ɛ ma?

⁸ Nia-woo-sii ŋí fé kúla ní ǹúui yêei kátolii.

⁹ Kpólo-tɛ-sɛŋ kuro-te a gbólo-kane kélee tɛ̀.

¹⁰ Náâi a Kúnuu-namui a gɛ́ɛ káfe pâi kili-ŋa-sia da kpɛni siɣêi é tɛ́ɛ ŋ́ɔ̂i ma; ǹúui a káwoôi tàa-taai, maa-nuui a pâi tɔŋ-kpɛ́-maa sɔlɔ ƃôi, a ǹɛɛ ma kpîŋ é kɛ́ a le-nuu.

¹¹ Kɛ́lɛ, ŋánûa, à kɛ̀ ŋà nuu-kpɛtɛ-mɛni ƃò, ka ŋ́gbɔara lé mɛni ma? A kɛ̀ a bere-sii ti, gɛ̀ ní zaa-wurii fe ŋɔ́nɔ pâi kɛ̂i a núu perêi-kpáaŋ sɛŋ.

¹² Diai káwoo ŋá táa-taai dí díkpîŋ ƃéla!

¹³ Kpɛ́ni fêi, ŋánûa, dí kátòli ŋuŋ-ma-ƃo ma; káfe tíi kɛ̀ nɔ́ a káŋuŋ-ma-ƃoi kákpîŋ-tua-perei ma, kɛ́lɛ, ka tíi kɛ́ la wɛli-kɛ-maa sârai, ká kɛ́ a kákîe-ni yée-mu-ƃela.

¹⁴ Kpɛ́ni fêi, dɔ̂ŋ kélee ŋ̀aa-see kɛ́ɛ̂i wóo tɔnɔ su, “Íkɔlɛ-ma-nuui wɛ́li yɛ̂ɛ yá kpîŋ.”

¹⁵ Kɛ́lɛ, kà kákîe-ni nyìŋ, kakɛ kákîe-ni mii, ka kámɛi káa a gɛ́ɛ káfe kákîe-ni su kara.

M̀ɔlêŋ ŋɔƃá da tua-pere-nyɔŋ ŋɔtíi

¹⁶ Kɛ́lɛ, ŋá m̀ó kâa, ka sia M̀ɔlêŋ su, gɛ̀ ní káfe pâi ǹúu ŋɔkɛ-pere-nyɔŋ wɛliɛ maa-tua kɛ̂i.

¹⁷ Kpɛ́ni fêi, núu ŋɔkɛ-pere-nyɔŋ tɔɔ̂i M̀ɔlêŋ ma, M̀ɔlêŋ ǹyaŋ tɔɔ núu ŋɔkɛ-pere-nyɔŋ ma; kpɛ́ni fêi, nyíi-ŋai tɔɔ̂i díkîe-ni dîa, a gɛ́ɛ káfe mɛnii kɛ̂ ka ŋ̀wɛ̂lii ká gɛ́i.

¹⁸ Kɛ́lɛ, à kɛ̀ M̀ɔlêŋ à tɔ̀ɔ kátuɛ, gɛ̀ ní káfe dɔ̂ŋ mu.

¹⁹ Ǹyaŋ núu ŋɔkɛ-pere-nyɔŋ ŋɔtíi-ŋai su ponoɔ̂i. Dia ƃa, wulu-wulu-kɛɛ, núu kɛ́ɛ maa fe waa ni, wolii-kpɔlɔ,

²⁰ ɣâla-pɔɔkɔŋ fɛliɛ, wúlu-mɛni, kpɔara, laa-saa, tólo, lii-ŋwâna, woo-taa-taa, ŋa-kɔlɛ, núu-kpulu-ŋa,

²¹ sɛŋ maa-lii téɛɛ, (núu paá,) lɔɔ kpeleɛ, lɔɔ-kpele-kuu, da gbeli-ŋai díkaa yɛ̂ɛ nyíi-ŋai. Ŋa kalia-woo ƃôi yɛ̂ɛ berei ŋá kalia-woo ƃò la a maa-ŋuŋ, a gɛ́ɛ ǹúui a mɛni-ŋai ŋí kɛ̀i, ve pâi Ɣâla ŋɔkâloŋ-laai maa sɔlɔ ƃôi.

²² Kɛ́lɛ, M̀ɔlêŋ ŋɔƃá-ŋai ƃa, wɛli-kɛ-maa, lii-nɛ̃ɛ, lii-sêe, lii-kpele, sɔŋ-lɛlɛ, mɛni lɛ́lɛɛ kɛ́ɛ, kili-kɛ-maa,

²³ maa-yeŋ, da núu kpîŋ mɛi káa; ǹyaŋ tɔ̂ŋ fe nyíi-ŋai ŋí dîa.

²⁴ Ǹyaŋ diai díkaa Zîsɛ Kôrai kponôi da núu ŋɔtùa-pere-nyɔŋ paa da ŋɔtûa-pere-nyɔŋ maa-sɛŋ-wɛliɛ.

²⁵ A kɛ̀ kúɣeniɛi káa M̀ɔlêŋ su, ǹɛ́lɛɛ̂i ku sía M̀ɔlêŋ su.

²⁶ Kúfe kɛ́ a yoŋka-ƃela, kúfe kúkîe-ni líi ŋwana-mɛni kɛ̀, kpaa máŋ ku tólo kúla kúkîe-ni dîa.