Galatə 3 - Bible

Dɔ̂ŋ da Laa-laa

¹ Óo káƃoɔɔ̂i káai a Galesia-ŋai! Gbɛ̂ɛ ƃe wúlu kɛ̀ kâa, káai dí Zîsɛ-kpamo-mɛnii ƃò káŋɛi pono ŋái?

² Tɔɔ ŋa kámarê kɛ́ nɔ́ a nyíŋi. Ka M̀ɔlêŋ Maa Waai sɔlɔ ƃô dɔ̂ŋ ŋɔtíi kɛ́ɛ sârai, kpaa ka zɔlɔ ƃô maa-mɛni-mɛniɛɛ da laa-la sârai?

³ Káƃoɔɔ̂i bere-sii ti su? Ka káfulu-laa ninai kɔ́ɔ pîlaŋ a M̀ɔlêŋ, ǹyaŋ ka pâi nâa gbɛɛ-ŋai kɛ̂i a kákpono?

⁴ Ka tɛɛ nɔ́ mɛni támaa su kpɛni-kpɛni? À kɛ̀ nɔ́ dí kɛ̀ kpɛni-kpɛni a tɔ̃yâ.

⁵ Ǹúui a M̀ɔlêŋ tɛ̂ɛ kápɔ, gɛ ŋɛi-kɛ-maa-ŋa kɛ̀ kásamâi, a gɛ̀ ti dɔ̂ŋ ŋɔtíi kɛ́ɛ sârai, kpaa a gɛ̀ ti maa-mɛni-mɛniɛɛ da laa-la sârai?

Ɣâla ŋɔkono-teei è gɛ̀ Eberaɣɛ̃ɛ yêei

⁶ Bere nɔ́ ƃe Eberaɣɛ̃ɛ e “làa la a Ɣâla, ǹyaŋ Ɣâla e ŋɔlaa-lai siɣe a tɔ̃yâ laa-la.”

⁷ Mɛni ma ka gàa a gɛ́ɛ diai laa-la káa díyêei dia ƃa Eberaɣɛ̃ɛ ǹônii.

⁸ Ŋ̀âla-kɔlɔi e gàa nàa tuɛ a gɛ́ɛ Ɣâla a pɔ̂ri Zɛ̃tai-ŋai kɛ̂i a tɔ̃yâ-ƃela laa-la sârai, ǹyaŋ Ŋ̀âla-kɔlɔi e Duŋ Lɛ́lɛɛi ƃò Eberaɣɛ̃ɛ ma nàa tuɛ, ǹyɛɛi, “Lûwa a pâi kɛ̂i ǹɔii-ŋûŋ-ŋai kélee dîa ísârai.”

⁹ Mɛni ma diai kélee laa-la káa díyêei, lûwa káa dîa da Eberaɣɛ̃ɛ-ni, nyíi laa-la è kɛ̀ ǹyêei.

¹⁰ Ǹyaŋ diai kélee díkili káa dɔ̂ŋ ŋɔtíi mai, díkaa naɣâŋ-laa yée mu; kpɛ́ni fêi, bɔ̃yɛɛ̂i, “Náɣâŋ káa diai kélee dîa dífa mɛni-ŋai kélee lâai kɛ̀ dí maa-tua kɛ́ nyíi-ŋai bɔ̃yɛɛ̂i dɔ̂ŋ ŋɔkɔlɔi sui.”

¹¹ Ǹyaŋ zu ponoɔ̂i nâa a ǹɛ́lɛɛ a gɛ́ɛ núu da kélee fa kɛ̂ a tɔ̃yâ-nuu Ɣâla ŋɛi dɔ̂ŋ sârai; kpɛ́ni fêi, “Ǹúui nyíi gáa a tɔ̃yâ-nuu laa-la sârai, fulu-laa a pâi kɛ̂i ǹyêei”;

¹² kɛ́lɛ, dɔ̂ŋ kɔ́ɔ fa tɔɔ laa-la ma, kpɛ́ni fêi, “Ǹúui nyíi a díkɛ̂i a pâi ŋɔfúlu-laai kɛ̂i dísârai.”

¹³ Kôrai e kúŋuŋ ma ƃò dɔ̂ŋ ŋɔnáɣaŋ-laai yêei, kpɛ́ni fêi, ǹyaa kpîŋ è kɛ̀ a naɣâŋ-laa kúmɛni ma-kpɛ́ni fêi, bɔ̃yɛɛ̂i, “Naɣâŋ-laa káa núu kélee ma a sɛ̂lɛŋ wúru mai,”

¹⁴ a gɛ́ɛ ǹûai è kɛ̀ Eberaɣɛ̃ɛ ma é kɛ́ Zɛ̃tai-ŋai dîa Zîsɛ Kôrai sârai a gɛ́ɛ ku M̀ɔlêŋ ŋɔkono-teei sɔlɔ ƃó laa-la sârai.

Dɔ̂ŋ da maa kono-teei

¹⁵ Ŋánûa, ŋa pâi mɛni-kɔɔŋ-maa kulâi fúlu-laa su, à nɛ̃ɛ ma máŋ é kɛ́ a núu-kpune ƃó-woo, tãi è mò la a gbanaŋɔɔ̂i, núu da fa da kùla ma, kpaa máŋ é da pɛlɛ ma.

¹⁶ Ǹyaŋ Ɣâla e gono-tee-ŋai kɛ̀ Eberaɣɛ̃ɛ yêei da ǹóŋ. Ve m̀ó ni, ǹyɛɛi, “Da ǹônii,” nyíi-ŋai dítamaâi, kɛ́lɛ, e mò, ǹyɛɛi, “Da íloŋ,” nyíi gáa tɔnɔɔi. Maa-nuui ƃa Kôrai.

¹⁷ Zu-kulai ƃa dɔ̂ŋ nyíi pà kóraŋ ŋuŋ náaŋ pôlu buu saaƃa yée mui, va pɔ̂ri ŋ̀óoi kperâi Ɣâla e mò nàa tuɛi, a gɛ́ɛ ŋɔkono-teei é kɛ́ kpɛni-kpɛni.

¹⁸ Kpɛ́ni fêi, à kɛ̀ bɔɔ-sɛŋ a kûla dɔ̂ŋ su, gɛ̀ ní va kûla gono-teei su ŋɔ́nɔ; kɛ́lɛ, Ɣâla e dɛ̀ɛ Eberaɣɛ̃ɛ pɔ kono-tee su.

¹⁹ Dɔ̂ŋ ŋɔsapoi ƃa ŋaŋ a le? Ɣâla e dɛɛ sɔnyɔ̂ŋ mɛni ma, é lɛ́ɛ la zu ǹóŋ é pá nyíi dí gono-teei kɛ̀ ǹyêei; dí dɛ̀ɛ a Ɣâla-taa-kela-ŋa ǹúu-loai-nuui sârai.

²⁰ Núu-loai-nuu fe tɔnɔɔ; kɛ́lɛ, Ɣâla káa tɔnɔɔ.

Dɔ̂ŋ ŋɔsapoi

²¹ À kɛ̀ tí, gɛ̀ ní, dɔ̂ŋ tɔɔ̂i Ɣâla ŋɔkono-tee-ŋai dîa? Ve ti a dɔnɔ kpîŋ; kpɛ́ni fêi, à kɛ̀ da pɔ̂ri tɔ̂ŋ tɛɛ̂i nyíi a pá a fulu-laai, gɛ̀ ní tɔ̃yâ laa-la a kûla dɔ̂ŋ su a tɔ̃yâ.

²² Kɛ́lɛ, Ŋ̀âla-kɔlɔi a nyíŋi kélee pu sɔnyɔ̂ŋ mu, a gɛ́ɛ gono-teei nyíi gáa laa-la su Zîsɛ Kôrai kponôi é tɛ́ɛ diai pɔ laa-la káa díyêei.

²³ Kɛ́lɛ, laa-la e lɛ́ɛ pâi, ku kɛ̀ a pelesinɛ dɔ̂ŋ mu, kúpiliɛ pɔ̂rɔŋ kúkɛ naa-lai maa kpɛ̂ŋ nyíi kɛ̀ pâi pâi.

²⁴ Mɛni ma dɔ̂ŋ ƃé kɛ̀ a kúmɛi-kaa-sɛŋ é lɛ́ɛ la zu Kôrai é pá, a gɛ́ɛ laa-la e kúkɛ a tɔ̃yâ-ƃela.

²⁵ Kɛ́lɛ, laa-la kɛ́ɛ a pâi, kúfe ŋɔ́nɔ mɛi-kaa-sɛŋ yée mu;

²⁶ kpɛ́ni fêi, kákelee kákaa a Ɣâla ŋɔnîa-pɛlɛɛ Zîsɛ Kôrai kponôi laa-la sârai.

²⁷ Kpɛ́ni fêi, káai kélee ka-batâi kɛ́ɛ̂i Kôrai kponôi, ka Kôrai sɔlɔ ƃó.

²⁸ Zûu-nuu fe ŋɔ́nɔ ma kpaa máŋ Gurii, luɛ kpaa wɔ̂lɔ, surɔ̂ŋ kpaa nɛnî; kpɛ́ni fêi, kákelee kákaa tɔnɔɔ Zîsɛ Kôrai kponôi.

²⁹ Ǹyaŋ à kɛ̀ kákaa a Kôrai pɔ́ɔ, gɛ̀ ní kákaa a Eberaɣɛ̃ɛ ŋɔsuui da ŋɔpɔɔ-sɛŋ mɛi-ƃela gono-teei lá-woo ma.