Lɛɛ gbɔwɔ ɓa 35 - Bible

Vii-tɔɔ-ɣelei maa tɔ̂ŋ-ŋai

¹ Mose è Eezuɛ-ŋai kélee ŋá tɛ̀ ma ǹyɛɛ diai, “Mɛni-ŋai ká ŋí Yâwɛɛ è mò a gɛɛ ká gɛ́i.

² Ka kátii-ŋai kɛ́ a fólo lɔ́ɔlu mɛi da. Kɛ́lɛ mɛi feerɛ ɣelei káa a fii-tɔɔ ɣele maa waa Yâwɛɛ mɛni ma. Ǹúui kélee pâi tíi kɛ̂i a ŋ̀ele-kûui tíi, maa nûui a pâi sâai.

³ Káfe ŋɔŋ tôo kápɛrɛ-ŋai mu a Vii-tɔɔ-ɣelei.”

Yâwɛɛ ŋɔsua-kɔlɔ seɣe-pɛrɛ maa waai maa sama-sɛŋ

⁴ Mose è mò Eezuɛ-ŋai kélee dîa ǹyɛɛi, “Mɛni-ŋai ká ŋí Yâwɛɛ è mòi.

⁵ Ka sama-sɛŋ tɛɛ Yâwɛɛ mɛni ma. Diai kélee ŋ̀wɛ̂lii dí dísama-sɛŋ tɛ́ɛ a lii-nɛ̃ɛi, dí pá la. Dí pá a gôo, kane da ƃara,

⁶ yee buluŋ kɛ́ɛ, yee-kpɔ̂lu m̀u tɛiɣɛɛ, ƃála-leɣa kpɔ̂lu, seɣe kole nɛnɛ-fɛfɛɛ lɛ́lɛɛ, ƃoli-lêɣa seɣe,

⁷ ƃála-kɔlɔ pâa nyii dí bɔ̃yɛ tôo a kpɔ̂lu, da sua kɔlɔ lɛ́lɛɛ, kpitili,

⁸ wulɔ laŋpoi mɛni ma, kúŋ-sɛŋ nyii da bù, bù-ŋua wulɔi da kéreŋ-sɛŋ kúŋ nɛ̃ɛ sui mɛni ma.

⁹ Dí pá a kɔni sɔ̃ɔ kpanaŋɔɔ-ŋa da maa ɣîri-sãa sɔ̃ɔ kpanaŋɔɔ-ŋa nyii-ŋai díkaa zâla láa soŋ-nuu kɛ́tɛi geŋe-la seɣe kpuai da ɛfɔi dímɛni mai.”

Yâwɛɛ ŋɔpɛ́rɛi tɔɔ-sãai

¹⁰ “Tɔɔ ǹyɛrɛ kɛ́-ƃelai kélee kásamai dí pá dí mɛni-ŋai kɛ́ Yâwɛɛ è mòi.

¹¹ Dí Ɣâla ŋɔpɛ́rɛi tɔ́ɔ da mɛi pɛlɛ-sãa, gólo-ŋa da bîlaŋ wuru-ŋa, ǹaa-ŋ̀a-wúru koya-ŋa, seɣe sɛ̂lɛŋ-wuru kôya-ŋa da bîleki.

¹² Gãlai da ziɣe-wuru-ŋai, gãlai mɛi-pɛlɛ-sɛŋ da bɛ́rɛi láƃelei seɣei,

¹³ teƃelei da ziɣe-wuru-ŋa é pɛ́lɛ ŋ̀á sɛŋ-folo-ŋai kélee dîa da gbólo maa waai.

¹⁴ Dí laŋpo see-wuru kpɛ̀tɛ da maa tii kɛ́-sãai kélee é pɛ́lɛ laŋpo-ŋai dîa da laŋpo wulɔi,

¹⁵ zâla-sɛŋ kéreŋ teƃelei da ziɣe wuru-ŋai, ŋ̀úlɔi da bù núu-ŋûai, kéreŋ-sɛŋ kúŋ nɛ̃ɛ da bɛrɛi láƃelei seɣei,

¹⁶ géreŋ sala kula teƃelei da ƃara-ƃela palaai, ziɣe-wuru-ŋai da maa tii kɛ́-sãai kélee, ƃara sɛŋ-folo da zee-sɛŋ,

¹⁷ zeɣe dí dinaŋ a koraŋ da zeɣe soŋ-wûru-ŋai é pɛ́lɛ bîleki-ŋai dîa nyii-ŋai ŋ̀úru-ŋai da pâi pîlanii zui, da góraŋ láƃelei seɣei.

¹⁸ Bɛ́rɛi da góraŋ dítɔɔ-sãai da maa ɣɛli-ŋai,

¹⁹ zâla láa soŋ-ƃelai maa ɣîri seɣe lɛ́lɛɛ-ŋai gáa dítii kɛ́-mɛni ma Gwaa Maa Waai mai. Eelɔŋ nyii gáa a zâla láa soŋ-nuui kɛ́tɛi ŋɔseɣe maa waa-ŋai é pɛ́lɛ ǹônii díseɣe maa-waa-ŋai díkaa díɣâla-tii kɛ́-mɛni mai dîa.”

Ǹûai dí pà a dísama-sãai

²⁰ Nya ƃe Eezuɛ-ŋai kélee dí Mose lɛ̀ɛ naa dí lí.

²¹ Diai kélee kɛ̀ ŋ̀wɛ̂lii kpaa máŋ nyii-ŋai kélee dílii è kùlai, dí pà a sama-sãa Yâwɛɛ pɔ́ tɛi-tɛi a gɛɛ dí tíi kɛ́ la Bɛ́rɛ maa waai mɛni ma. Dí ŋɔnɔ pà a sama-sɛŋ Bɛrɛi mu-tii kélee kɛ́ mɛni ma é pɛ́lɛ zeɣe ma waa-ŋai dîa.

²² Sinâa da nɛyâa dí pà. Diai kélee gùla dílii sui dí pà a maa-ɣili-sãa nyii da gana seɣe mai da-ni, wôlii-sãa da gbono-ŋa, kɔŋ mâ yɔlɛ-ŋa da gôo maa ɣiri-sãa sii támaa. Diai kélee gôo maa ɣiri-sãai lâai kɛ̀ Yâwɛɛ mɛni mai, dí pà la bɔ́.

²³ Diai kélee yee bûluŋ kɛ́ɛ è kɛ̀ díyêei da yee-kpɔ̂lu m̀u tɛiɣɛɛ, yee kpɔlu, seɣe kole nɛnɛ-fɛfɛɛ lɛ́lɛɛ, ƃoli leɣa-seɣe, ƃála kɔlɔ kpɔlu é pɛ́lɛ ƃoli kɔlɔ mai, dí pà a dia bɔ.

²⁴ Diai kélee da pɔ̂ri kɛ̀ pâi a káne kpaa máŋ ƃarai, dí pà dia a Yâwɛɛ ŋɔsama-sɛŋ. Diai kélee kpitili wuru è kɛ̀ díyêei da pɔ̂ri kɛ̀ díi-ŋai kélee da kɛ̂i lai, dí pà la.

²⁵ Nyɛrɛ nɛyâai kélee dí yee pɔ̃lɔ a bûluŋ kɛ́ɛ, gbɔlu mu tɛiɣɛɛ da ƃála-ɣela kpɔ̂lu dí pá a dia.

²⁶ Nyɛrɛ nɛyâai kélee dí ƃoli leɣa pɔ̃lɔ.

²⁷ Ǹúu túɛ-ƃelai dí pà a kɔni sɔ̃ɔ kpanaŋɔɔ-ŋa nyii-ŋai díkaa zâla láa soŋ-nuu kɛ́tɛi ŋɔɛfɔi mɛni ma da geŋe lá seɣe kpuai,

²⁸ wúru-ya kúŋ nɛ̃ɛ da wúlɔ, laŋpo-ŋai, bu-ŋua wulɔi da géreŋ-sɛŋ kúŋ nɛ̃ɛi mɛni ma.

²⁹ Eezuɛ nɛyâai da zinaâi nyii-ŋai ŋwɛ̀li a gɛɛ dí sama-sɛŋ tɛɛ díi-ŋai kélee mɛni mai, Yâwɛɛ è mò Mose ma a gɛɛ dí gɛ́i, dí pà a sama-sãa Yâwɛɛ pɔ́ é kúla dílii su.

Dí Bɛzale tòli da Oôlia

³⁰ Nya ƃe Mose è mò Eezuɛ-ŋai dîa ǹyɛɛi, “Ka gáa Yâwɛɛ a Bɛzale lɛ́ nyii gáa a Ɔ̂ɔ ǹóŋ Uli ŋɔlóŋ nyii kùla Zuda ŋɔsuui sui.

³¹ A ǹáa fɛ́ɛ a Ɣâla ŋɔmɔ̂leŋ, táre, mɛni-ŋa káa da yɛrɛ tii sii kélee kɛ́ mɛni ma,

³² a gɛɛ é yɛrɛ tii-ŋa kɛ́ a gôo, káne da ƃara.

³³ A táre tɛ́ɛ ƃɔ kɔni sɔ̃ɔ kpanaŋɔɔ tee-mɛni da zèe mɛni ma, wúru saa-mɛni da yɛrɛ tii da kpɛ́ni-ŋa.

³⁴ Yâwɛɛ a sɛŋ lɛ́ tare tɛɛ Bɛzale pɔ́ da Aisama ǹóŋ Oôlia nyii kùla Daŋ ŋɔsuui sui pɔ́ a gɛɛ dí yɛrɛ-kɛ-tii lɛ́ ǹûai dîa.

³⁵ È táre tɛ̀ɛ dípɔ a gɛɛ dí yɛrɛ-kɛ tii sii kélee kɛ́ yɛ̂ɛ gôo ɣale tîi, seɣe pɔ̃yɛ-tôo tii, seɣe palaa a yee bûluŋ kɛ́ɛ, yee-kpɔ̂lu m̀u tɛiɣɛɛ, yee kpɔlu da seɣe kole nɛnɛ-fɛfɛɛ lɛ́lɛɛ. Da pɔ̂ri yɛrɛ tii sii kélee kɛ̂i.”