Lɛɛ gbɔwɔ ɓa 31 - Bible

Yâwɛɛ ŋɔsua-kɔlɔ seɣe pɛ́rɛ maa waai tɔɔ-ƃelai

¹ Yâwɛɛ è mò Mose mà ǹyɛɛi,

² “Ŋa Bɛzale lɛ́ nyii gáa a Ɔ̂ɔ ǹóŋ Uli ŋɔlóŋ, nyii kùla Zuda ŋɔsuui sui.

³ Ŋa ǹáa fɛ́ɛ a ŋámɔ̂leŋ, táre mɛni-ŋa-káa da yɛrɛ sii kélee,

⁴ a gɛɛ é yɛrɛ tîi-ŋa kɛ́ mɛni kpɛtɛ, a gɛɛ gɛ́ tii-ŋa kɛ́ a gôo, káne, da ƃara,

⁵ kɔni sɔ̃ɔ kpanaŋɔɔ-ŋa kpɛ̀tɛ zee mɛni mâ gîe mɛi, wúru saa-mɛni da yɛrɛ tii da kpɛ́ni-ŋa.

⁶ Ŋa Aisama ǹóŋ Oôlia lɛ́ nyii kùla Daŋ ŋɔsuui sui, a gɛɛ da ǹyaa dí tíi kɛ́. Ŋa táre tɛ́ɛ ǹyɛrɛ tii kɛ́-ƃelai kpéli-ŋai kélee pɔ́ a gɛɛ dí mɛni-ŋai kɛ́ ŋá m̀ó yâ a gɛɛ í gɛ̂i.

⁷ Ŋásua-kɔlɔ seɣe pɛrɛ maa waai, Gbana-woo kɛ́ɛ maa gãlai da mɛi-pɛlɛ-sɛŋ é pɛ́lɛ bɛ́rɛi mu-sãai kélee dîa,

⁸ teƃelei da maa sãa kélee, laŋpo see-wurii nyii gáa a gôoi da maa sãa kélee, zâla-sɛŋ kúŋ nɛ̃ɛ kéreŋ ɣâla-teƃelei,

⁹ géreŋ sala kula ɣâla-teƃelei da maa sãa kélee, nya sɛŋ-foloi da zee-sɛŋ,

¹⁰ díi-kɛ seɣe maa waa-ŋai nyii-ŋai díkaa Eelɔŋ da ǹônii mɛni mai,

¹¹ ŋulɔ maa waai da géreŋ-sɛŋ kúŋ nɛ̃ɛi nyii gáa Gwaa maa waai mɛni mai. Fɛ̂ɛ dí mɛni-ŋai ŋí kélee kɛ́ yɛ̂ɛ berei ŋá mò la yâi.”

Vii-tɔɔ-ɣelei

¹² Yâwɛɛ è mò Mose mà ǹyɛɛi,

¹³ “Mó Eezuɛ-ŋai dîa a gɛɛ dí ŋáfii-tɔɔ ɣelei mɛi káa. Kpɛ́ni fêi, gáa a ŋɛi-kɛ-maa kwa kâa-ni kúloai da kásuui a gɛɛ ká gɔ́lɔŋ ńyãai a Yâwɛɛi ńyãa ƃe kámaa wâa.

¹⁴ Mɛni ma ka Vii-tɔɔ ɣelei mɛi káa, kpɛ́ni fêi, maa waâi kámɛni ma. Ǹúui vé pâi ziɣêi a maa waâi, fɛ̂ɛ dí maa nuui páa. Ǹúui nyii pâi tíi kɛ̂i a Vii-tɔɔ ɣelei, fɛ̂ɛ maa nuui ŋɔnûa dí gula dísama.

¹⁵ Ka tíi kɛ́ a fólo lɔ́ɔlu mɛi da, mɛi feerɛ ɣelei káa a fii-tɔɔ ɣele maa waa mɛni ma. Ǹúui pâi tíi kɛ̂i a ŋ̀elei tíi, fɛ̂ɛ dí maa nuui tí páa.

¹⁶ Fɛ̂ɛ Eezuɛ-ŋai kélee dí Vii-tɔɔ ɣelei mɛi káa. Fɛ̂ɛ dísuui kélee é mɛi káa a wɔlɔ-wɔlɔ kono-tee.

¹⁷ Fɛ̂ɛ é kɛ́ a wɔlɔ-wɔlɔ ŋɛi-kɛ-maa kwa Eezuɛ-ŋai kúloai. Kpɛ́ni fêi, Ńyãa ƃa Yâwɛɛ nyii ŋ̀elei kpɛ́tɛ da ǹɔii a fólo lɔ́ɔlu mɛi da, ŋá ḿvii tɔ́ɔ a mɛi feerɛ ɣelei.”

¹⁸ Yâwɛɛ kpɛɛ a lónoɔɔ Mose pɔ́ Sana Yeei mai, è gili-too-ŋa kɔni-ƃela feerɛi tɛ̀ɛ bɔ́, nyii-ŋai ǹyaa Ɣâla è mɛi-ŋai pɔ̃yɛ dîa a ǹyée-gbuai.