Ɛstɛrə 8 - Bible

Ɛtɛ è Zuda-ŋai ŋuŋ ma ƃò

¹ Zuda-ŋai díkpɔara-nuui Emaŋ pâa pôlu mai, Gâloŋ Atasɛra è Emaŋ kɔ̃liŋ kélee tɛ̀ɛ Ɛtɛ pɔ́. Ɛtɛ è m̀o gâloŋ ma a gɛɛ Mɔdikai káa a ŋɔkáayɔɔ. M̀ɛni ma gâloŋ è ŋuŋ ma ƃô tɛ̀ɛ Mɔdikai pɔ a gɛɛ a pɔ̂ri ǹyaa gâloŋ naa kâai a tãi kélee a ŋ̀wɛ̂lii é gáa lai.

² Gâloŋ Atasɛra è wɔ́lɔ ŋɔkâloŋ gbònoi tɔnɔ tɛ̀ɛ Emaŋ pɔ́ a ŋɔwála-wala laai. Emaŋ kɛ́ɛ da zɛ̂lɛŋ pôlu ma, gâloŋ è gbònoi sîɣe è dɛ́ɛ Mɔdikai pɔ́. Ɛtɛ è Mɔdikai pù Emaŋ kɔ̃liŋ kélee mɛi nyii gâloŋ è dɛ̀ɛ bɔi.

³ Ɛtɛ è ŋɔ́nɔ pɛ̀lɛ a gâloŋ kɔ́ɔ gɛ́ wɔ̀lɔ. È gbera fé a gɛɛ Zuda-ŋai dísuui su-kara mɛnii Emaŋ nyii kɛ̀ a Agagi ŋɔsuui su-nuui è gbɛ̀tɛ gâloŋ é faa mai, vé ǹɛɛ naa é kɛ́ tí.

⁴ Nya ƃe gâloŋ è ŋɔgôo kaloŋ wuruii lɛ̀ Ɛtɛ ma, Ɛtɛ é mù siɣe é tɔ́ɔ.

⁵ Ɛtɛ è mò gâloŋ ma ǹyɛɛi, “À kɛ̀ a ílii láa mɛni, ǹyaŋ a kɛ̀ ḿaa mɛ̂ni lâai ílii ma, kɔlɔ láaŋ gɔlɔi mâ Emaŋ è dɛ̀ɛ ílɔii kpîniŋ-ŋai su Zuda-ŋai paa mɛ̂ni ma a gɛɛ núu da fé sìa a gɔlɔi kpîŋ wóo.

⁶ Ŋà sèe ŋ́gɛ nûa kàa díkɛ ŋásuui da ŋá káayɔɔ-ŋai su-kara, lé lii see ƃé pâi kɛ̂i ńyêei?”

⁷ Gâloŋ Atasɛra è mò Ɛtɛ ma da Zuda-nuui Mɔdikai ǹyɛɛi, “M̀ɛni nyɔ́mɔɔi Emaŋ è gbɛ̀tɛ Zuda-ŋai láa mai, ŋá gùla maa kɛ̂ la. Ŋá zɛ̀lɛŋ gbɔ́ɔi yeŋkeŋ ma è gbɛ̀tɛi, ŋá gɔ̃liŋ tɛɛ Ɛtɛ pɔ́.

⁸ Ka kɔlɔ pɔ̃yɛ ǹɔii láa túɛ-ƃelai kélee pɔ́ naa ǹɔii kpîniŋ-ŋai su ńaai su Zuda-ŋai mɛni ma. Gâloŋ gbonoi Mɔdikai yêei, kà bɔ́ɔ kɛ́ gɔlɔi kpîŋ su. Gɔlɔi nyii kélee gâloŋ gbonoi ŋí pɔ́ɔ káa zui, núu da fa ǹyée kùla mù.”

⁹ Nya ƃe Mɔdikai è gɔlɔ-pɔ̃yɛ-ƃelai tòli kpɔ́ ŋ̀á ma a góraŋ ŋɔɣáloŋ zaaƃai nyii da kɛ̂ ma Sivaŋ Ibulu-wooi sui ŋɔfólo buu feerɛ káo saaƃa ɣele. M̀ɛnii kélee Mɔdikai è mò dîa é pîlaŋ Zuda-ŋai dîai, dí bɔ̃yɛ. Dí da tɛ̀ɛ Zuda-ŋai pɔ́ naa, ǹɔii-ƃelai, da ǹɔii láa túɛ-ƃelai nyíi ŋai kɛ̀ ǹɔii kpîniŋ ŋuŋ tɔnɔ pôlu buu feerɛ káo lɔ́ɔlu mɛi feerɛi (127) mɛi, é siɣe Iŋdia lɔii ma é lí Itiopia lɔii ma. Dí gɔlɔi ŋí pɔ̃yɛ ǹûai dísîi-woo-ŋai su tɛi-tɛi.

¹⁰ Mɔdikai è gɔlɔi ŋí pɔ̃yɛ Gâloŋ Atasɛra láai su, é gâloŋ ŋɔgbonoi pɔ́ɔ kɛ́ zu. Dí gɔlɔ-ŋai ŋí tɛ̀ɛ gâloŋ ŋɔsoo sia-ƃelai pɔ́ dí lí a dia ǹɔii kpîniŋ-ŋai kélee su a maa félaa.

¹¹ Gɔlɔi ŋí wóo ƃé kɛ̀ a gɛɛ Zuda-ŋai da pɔ̂ri kpɔnîi díkîe ma dí díkpîŋ maa kɔ̃ɔ díkpɔara-ƃelai yêei. Gɔlɔi ŋí è wála-wala tɛ̀ɛ dípɔ a gɛɛ núu da a kɛ̀ pâi a gɛɛ é dísu-kara, da dílônii, dínɛyâai é pɛ́lɛ díkɔ̃liŋ ma, dí tɔ́ɔ a gbanaŋɔɔ dífe yào maa-ƃelai dîa. Da pɔ̂ri díkpɔara-ƃelai kpîŋ paâi dí díkɔ̃liŋ siɣe.

¹² Ŋ̀ele kûui dí gbɛ̀tɛ a gɛɛ dí Zuda-ŋai su kara lai, nya ƃe kɛ̀ a góraŋ ŋɔɣáloŋ puu káo feerɛi nyii da dòli a Adai ŋɔfólo puu káo saaƃa ɣele. Dí gbɛ̀tɛ a gɛɛ dí m̀ɛnii ŋí kɛ́ Gâloŋ Atasɛra ŋɔlɔii kpîniŋ kélee su.

¹³ Gɔlɔi ŋí Ɛtɛ da Mɔdikai dí dɛ̀ɛi ŋ̀óo ƃé kɛ̀ a gɛɛ dí mó Zuda-ŋai dîa dí díkpîŋ kpɛtɛ dí kɔ́ diai kélee pɔ́ pâi pɛlɛ̂i dîa a ŋ̀elei tí a gɛɛ dí dípaai.

¹⁴ Gɔlɔ láa lɛ́-ƃelai kɛ̀ gâloŋ ŋɔsoo-ŋai mɛi dí lì a ŋ̀orɛ̂-wooi yɛ̂ɛ berei gâloŋ è mò la dîai. Dí ŋ̀orɛ̂-wooi ŋí ŋáa lɛ̀ máŋ Susa taa-leei su-ƃelai dîa.

¹⁵ Mɔdikai è kɛ̀ a maa ɣiriɛɛ a kâloŋ seɣe. Zeɣei ŋí pɔ̃yɛ è kɛ̀ a doɔɔ a ƃûluŋ da gole. Gôo kaloŋ bɔrɔ kɛ́tɛ tɔnɔ è kɛ̀ a zeɛɛ ŋ̀ûa. Ŋɔseɣei mɛi-pere ŋɔi è kɛ́ a seɣe kpɔ̂lu mu tɛi-yɛɛ nɛnɛ fɛfɛ. Susa taa-leei su-ƃelai kélee dí maa koi-nɛ̃ɛ kùla.

¹⁶ M̀ɛnii ŋí è kɛ̀ a lii-nɛ̃ɛ kɛ́tɛ, ƃaa kɛ́ maa da ŋuŋ ma ƃô Zuda-ŋai mɛni ma.

¹⁷ Daa-lee-ŋai kélee dí lì zu ǹɔii kpîniŋ-ŋai su dí gɔlɔi ŋí lóno naa dí ŋ̀áa lɛ́ ǹûai dîai, Zuda-ŋai kɛ̀ naai, dí lii-nɛ̃ɛ ŋánaa kùla. Dí kúu kɛ̀ dí lii-nɛ̃ɛ kula. Zîi da kpɛ́ni-ŋai kɛ̀ naai da-ŋa dí díkpîŋ kɛ̀ a Zuda-ŋai da kpɛ́ni fêi, dí kɛ̀ yaôi Zuda-ŋai dîa.