Ɛstɛrə 2 - Bible

Dí Ɛtɛ kɛ̀ a gâloŋ ŋɔnɛnî kɛ́tɛi

¹ Tãi gâloŋ líi ŋá a yèŋ lai, è gíli ŋá sìa é pîlaŋ m̀ɛnii ma Vasiti è gɛ̀ lai da m̀ɛni kula maai è gbɛ̀tɛ m̀ɛni mai.

² Nya ƃe gbono ma-ƃelai da-ŋa dí mò ma dîyɛɛi, “M̀ó a gɛɛ dí nɛnî-kpela lɛ́lɛɛ-ŋa kɔ́ri yɛ̂.

³ Íyee kpamo ǹɔii láa túɛ-ƃelai da-ŋa dîa ǹɔii kpiniŋ-ŋai su a tɛɛ-ŋa a gɛɛ dí kɛ́ m̀ɛnii ŋí láa túɛ dí ǹɛnî-kpela-ŋai ŋí kɔ́ri dí pá a dia Susa taa-leei su. Da pà a dia, dítɛɛ Egaai pɔ́ nyii gáa ínɛyâai mɛi káa mɛnii láa-tuɛi. A pâi kɛ̂i dímɛi kâai gɛ́ mii-sãa lɛ́lɛɛ-ŋa tɛ̀ɛ dípɔ da sãâ nyii a gɛ̀ nɛnî è lɛ́lɛi.

⁴ À kɛ̀ tí, da pâi pâi a dia íŋɛi-tuɛ. Nyíi maa mɛ̂ni a pâi ílii sonîi, í gùla a nɛnî Vasiti pɔ́ɔ ŋá.” Gâloŋ è fàa ma é gɛ́ yɛ̂ɛ berei gbono ma-ƃelai dí mò la mai.

⁵ Ǹyaŋ Susa taa-leei tí su, Zuda-nuu tɔnɔ è kɛ̀ naa. Ǹáa ƃé kɛ̀ a Mɔdikai. È kùla Bɛŋsima ŋɔsîi su. Ǹâŋ láa ƃé kɛ̀ a Zaa. È kula Kesi da Simɛɛ ni dísuui su.

⁶ Babelɔŋ kaloŋ Nɛbukinaza è Zuda kaloŋ Zɛoasiŋ sòŋ da ŋɔnûai Zerusâlɛŋ, é lí a dia Babelɔŋ. Mɔdikai è kɛ̀ dísama.

⁷ Mɔdikai m̀âleŋ nɛni tɔnɔ è kɛ̀ ǹyêei ŋaa kɔɔ̂ŋ pere su, kpɛ́ni fêi è kɛ̀ a tee-loŋ. E kɛ̀ a nɛnî kpela lɛ́lɛɛ. Ǹáa ƃé kɛ̀ a Ɛtɛ nyii da kâa dòli a Adasa Íbulu-wooi su. Mɔdikai è zìɣe da ǹyaa dí lí. Núu kélee a kâa gàa ŋ̀wɛ́li a zòŋ. Mɔdikai è zìɣe yɛ̂ɛ gbɔ́ɔi loŋ.

⁸ Tãi Gâloŋ è mò la a gɛɛ dí nɛnî-kpela-ŋa kɔ́ri dí pá a diai, dí pà a nɛnî-kpela támaa Susa taa-leei su gâloŋ ŋɔpɛ́rɛi la, dí dítɛɛ Eegaai pɔ́. Ɛtɛ è kɛ̀ ǹɛnî-kpela-ŋai ŋí sáma.

⁹ Ɛtɛ maa mɛ̂ni è Egaai líi sòŋ a ŋ̀ánaa. È sia mâa-sãa kúŋ lɛ́lɛɛ-ŋa tɛ̀ɛ bɔ́ da ŋɔmii sãai a maa félaa. È bù gâloŋ-pɛrɛi mu kwaai ǹɛ́lɛɛ dɔnɔ ma. È nɛnî kpela lɔ́ɔlu mɛi feerɛ tɛ̀ɛ naa dí kɛ́ tíi kɛ̀ mì díkɛ mɛi kâa.

¹⁰ Mɔdikai è Ɛtɛ lia-woo ƃò a gɛɛ vé wɔ́lɔ ŋɔsîi lɛ̀ núu da ma. Ǹyaŋ Ɛtɛ è gêra wóo sìɣe.

¹¹ Mɔdikai a kâa lì gɛ́ sìa-sia gâloŋ-pɛrɛi ŋɛ́i-tuɛ a ɣele kélee a gɛɛ é gɔ́lɔŋ lé ƃé kɛ̂i a Ɛtɛi.

¹² Da kâa núu kpono maa nɛ̃ɛ sãa tɛ̀ɛ ǹɛnî-kpela-ŋai ŋí pɔ́ a tɛɛ-ŋa. Dí wúlɔ kúŋ nɛ̃ɛ-ŋa tɛ̀ɛ dípɔ a gɛɛ díkɛ zìa dîa ɣáloŋ lɔ́ɔlu mɛi da yée mu. Naa pôlu ma, dí wée kúŋ nɛ̃ɛ-ŋa tɛ́ɛ dípɔ a gɛɛ díkɛ zia dîa ɣáloŋ lɔ́ɔlu mɛi da yée mu. Ŋ̀áloŋ puu káo feerɛi ŋí a tɛ̀ɛ, maa nɛnîi a nâa lì gâloŋ pɔ́naa.

¹³ Ǹúui dɔnɔ ŋɔtãi a kâa sèri a gɛɛ é lí gâloŋ ŋɛ́i-tuɛ, m̀aa mâa ɣîri-sãai da zia-mâ-sãai kélee a ŋ̀wɛli é ziɣe é lí lai, m̀ɛi káa-ƃelai da dɛ̀ɛ bɔ́.

¹⁴ A lî a ɣele-wulii é pá pôlu a bôlu ma ɣele-ƃɔɔi. A pà pôlu, a lî Saasiga pɔ́ naa-pere nyii kɛ̀ naa gâloŋ ŋɔnɛyâai bɛlɛ-pɛlɛi mɛi káa mɛni láa túɛi. Ǹɛnîi nyii nɔ́ maa mɛ̂ni a gâloŋ líi làai, ǹyaa ƃé a dòli pôlu.

¹⁵ Ɛtɛ nyíi kɛ̀ a Abiai ǹóŋ, Mɔdikai m̀áleŋ ŋɔtãi è sèri a gɛɛ é lí gâloŋ ŋɛ́i-tuɛ. Vé sɛŋ da mare kɛ̂ɛ kɛ́ ní fɛ́ɛ nɔ́ maa ɣîri-sãai da zia mâa-sãai m̀ɛi káa-nuui Egaai è dɛ̀ɛ bɔ́i. Ǹíɛɛi, maa mɛ̂ni è gâloŋ líi sòŋ.

¹⁶ Atasɛra kɛ́ɛ a kâloŋ ŋɔkóraŋ lɔ́ɔlu mɛi feerɛi ŋɔɣáloŋ puui nyii da dòli a Tibɛi zu ƃé dí lì la a Ɛtɛ gâloŋ ŋɔpɛ́rɛi mu.

¹⁷ Ɛtɛ maa mɛ̂ni è gâloŋ líi sòŋ kpɔ́ a ŋ̀ánaa é tɛ́ɛ ǹɛnî-kpelai kpéli-ŋai dîa. Ǹya ƃé Atasɛra è galoŋ-nɛnî ƃɔrɔi sèe ŋ̀ûa é gɛ́ a ŋɔpɛ́rɛ-leei Vasiti pɔ́ɔ ŋá.

¹⁸ È kúu kɛ́tɛ kɛ̀ Ɛtɛ mɛni ma. Dí gúui ŋí láa sèe a “Ɛtɛ ŋɔkúui.” È ǹɔii kpîniŋ mɛi-ƃelai da ǹɔii-ƃela kpaya-kpayai kélee tòli gúui ŋí su. È gbɛ̀tɛ a tɔ̂ŋ a gɛɛ diai kélee ŋɔlɔii kpîniŋ-ŋai sui, dí ŋ̀elei ŋí síɣe a ɣele kɛ́tɛ dí kɛ́ mɛi kâa a ǹɛ́lɛɛ. È sãâ támaa ŋáa kɔ̀lɛ ǹûai kélee dîa gúui ŋí su.

Mɔdikai è gâloŋ ŋɔfúlu-laai maa kɔ̃ɔ

¹⁹ Tãi ǹɛnî-kpela-ŋai dí díŋaa tɛ̀ la ma a tãi veerɛ ɣelei, Mɔdikai è kɛ̀ seêni gâloŋ ŋɔpɛ́rɛi ŋɛ́i-tuɛ.

²⁰ Kɛ́lɛ Ɛtɛ fé wɔ́lɔ ŋɔsîi m̀aa mɛ̂ni su kula ní núu da kélee ma. Ɛtɛ è Mɔdikai wóo mɛ̀ni nɔ́ yɛ̂ɛ berei a kâa ŋ̀óo mɛ̀ni la a tãi è kɛ̀ la a lôloŋ.

²¹ Mɔdikai kɛ́ɛ seêni gâloŋ ŋɔpɛ́rɛi lái, è gâloŋ ŋɔnúu kpaya-kpayai veerɛ kàa. Ǹûai ŋí ƃé kɛ̀ a Bitanaŋ da Tɛrɛ nyii-ŋai kɛ̀ gâloŋ ŋɔkpôŋ-lá mɛi káa mɛni mɛi. Dí dílii ŋwàna dí gbɛtɛ a gɛɛ dí gâloŋ páa.

²² Mɔdikai kɛ́ɛ a m̀ɛnii ŋí mɛ́nii, è lì é mó Ɛtɛ ma. Ɛtɛ è lì é m̀ó gâloŋ ma a gɛɛ Mɔdikai ƃé m̀ɛnii mɛ̀ni é mó mà.

²³ M̀ɛnii ŋí su káa gâloŋ mii, è kɛ̀ a tɔ̃yâ. È mò a gɛɛ dí ǹúu feerɛi ŋí sɛ̂lɛŋ wúru ma. Dí m̀ɛnii ŋí pɔ̃yɛ Gâloŋ-ŋai dímɛni-pɔlɔ kɔlɔi su.