Dutɛrɔnome 6 - Bible

Dɔ̂ŋ gɛ́tɛ ɣelei

¹ “Ŋ̀óo-ŋai da dɔ̂ŋ-ŋai ká ŋí Káɣâlai Yâwɛɛ è dɛ̀ɛ ḿbɔ a gɛɛ ŋá ǹɛ́ kâa ka m̀ɛi káa ǹɔii su ka liî naa Zɔdiŋ Ya-leei pôlui,

² a gɛɛ káa, kálônii da díwɔ̂ lonii ká ƃaa-kɛ maa tɛ́ɛ Yâwɛɛ pɔ́ ká ŋɔtɔ̂ŋ-ŋai mɛi káa a gɛɛ káfulu-laai su é kôya ká ŋ̀ãa-nɛ̃ɛ kula ǹɔii su ka liî naai.

³ Óo Eezuɛ-ƃela, ka káwoli tɔ́ɔ, ka kámɛi káa, ka woo mɛni kɛ́, a gɛɛ mɛni-ŋai kélee ka pâi kɛ̂i gɛ̂i ǹɔii su ka liî naai zu é kɛ́tɛ a ǹɛ́lɛɛ kámɛni ma. Ǹɔii lɛ̂lɛɛi sí-sãa kpɛtɛ mɛni ma yɛ̂ɛ berei kánâŋ-ni Díɣâlai Yâwɛɛ è góno tèe la díyêei.

⁴ “Óo Eezuɛ-ƃela, Ka káwoli tɔ́ɔ. Kúɣâlai Yâwɛɛ káa nɔ́ tɔnɔɔ.

⁵ Ka ŋ̀wɛ́li a kálii kélee, kámɔlêŋ kélee da káwala-walai kélee.

⁶ Fɛ̂ɛ ka dɔ̂ŋ-ŋai ŋí pɔ̃yɛ kálii gbɛ̃ ma ŋa sâa dɛɛ̂i kápɔi.

⁷ Ka ǹɛ́ kálônii dîa. Ka doo díkili ŋá tãi ka kɛ̀ seeni la kápɛrɛ-ŋai lai, ka kɛ̀ siai bere-ŋai su, tãi ka kɛ̀ laa-ni lai, da tãi ka kámu siɣe lai.

⁸ Ka dípɔ̃yɛ seɣe-kpua-ŋa dîa ka díɣiri káyee ma a ŋɛi-kɛ-maa-ŋa ka dípɔ̃yɛ kátôŋ lá a tɛɛ-ŋa.

⁹ Ka dípɔ̃yɛ kákpôŋ falaŋ-ŋai dîa da siɣãŋ lá-ƃerei wuru-ŋai dîa.

Woo pîli kɛ́ɛ maa lia-woo

¹⁰ “Káɣâlai Yâwɛɛ ƃé pà a káa ǹɔii su é góno tée la kánîŋ-ni Eberaɣɛ̃ɛ, Aise da Zeeka yêei. Taa-lee kpaya-kpaya ƃûu ƃoɔɔ-ŋa,

¹¹ pɛ́rɛ kpaya-kpaya láa fɛ́ɛ a sãa lɛ́lɛɛ-ŋa káa ǹɔii ŋí ma nyii káfe dɔ̀ɔ ní káa kpîŋ. Ya-loa-ŋa nyii káa kpîŋ káfe dée níi, da sí-sãa sii támaa nyii káfe zí níi díkaa naa. Ka dímiî díkɛ kálii làa, ká kɛ́ gbéli-ŋai ŋãa nɛ̃ɛ kula.

¹² Mɛni ma, káfe ǹia Káɣâlai Yâwɛɛ ma. Ǹyaa ƃé kákùla ǹuɛ-laa su Ize lɔii su.

¹³ Ka ƃaa-kɛ-maa tɛ́ɛ bɔ́, ká tíi kɛ́ mì. Ǹyaa nɔ́ ƃé ka káfoo a ǹáa.

¹⁴ Káfe kànaŋ ɣâla da kpɛ́ni-ŋa dîa, dia ƃa diai ka dîa-ni ká káa kwaa tɔnɔ mai díkpɛtɛ ɣâla-ŋai,

¹⁵ kpɛ́ni fêi, Káɣâlai Yâwɛɛ káa a tólo Ɣâla. Ǹíi a pâi ŋwânai kâa é kásu kara ǹɔii su.

¹⁶ “Káfe Káɣâlai Yâwɛɛ su-kɔɔŋ yɛ̂ɛ berei ká gɛ̀ la a ǹyaa Massai.

¹⁷ Ka ŋɔtɔ̂ŋ-ŋai maa kɔ́ri ká dímɛi káa yɛ̂ɛ berei a ŋá lɛ́ la kâai.

¹⁸ Ka Káɣâlai Yâwɛɛ nîa mɛni kɛ́ a gɛɛ mɛni-ŋai ka pâi kɛ̂i gɛ̂i ǹɔii su Yâwɛɛ è góno tèe la kánâŋ-ni yêei ŋãa-see é kɛ́.

¹⁹ Ka kákpɔara-ƃelai tuâŋ ka díkula káŋɛi-tuɛ yɛ̂ɛ berei Yâwɛɛ è mò lai.

²⁰ “À kɛ̀ kálônii da tínaa kámarê kɛ̀ dîyɛɛ kâai, ‘Dɔ̂ŋ-ŋai ŋí su-kulai ƃa lé da berei kwa pɔ̂ri siâi a diai?’

²¹ Ka mó dîa kâai, ‘Kú wɔ́lɔ kɛ̀ luɛ-laa su Ize kaloŋ yée mu. Kɛ́lɛ Yâwɛɛ è kúkùla naa a ŋɔwála-walai.

²² È ŋ̀ɛi-kɛ-maa da zu-gbɛlɛ-gbɛlɛ mɛni-ŋa kɛ̀ Ize a gâloŋ ŋɔpɛ́rɛi mu-ƃelai da ǹúui gbéli-ŋai.

²³ Kɛ́lɛ è kúkùla naa é pá a kúa ǹɔii su è góno tèe la kúnûa pɔlɔ-ŋai yêei.

²⁴ È mò kûa a gɛɛ kú ŋɔtɔ̂ŋ-ŋai mɛi káa a gɛɛ kúfulu-laai su é kôya ǹɔii ma kú ŋãa nɛ̃ɛ kula yɛ̂ɛ berei gáa la sâai.

²⁵ A pâi kɛ̂i a tɔ̃yâ mɛni kúmɛni à kɛ̀ kwa dɔ̂ŋ-ŋai mɛi kàa yɛ̂ɛ berei Kúɣâlai Yâwɛɛ è mò la kûai.’