Dutɛrɔnome 31 - Bible

Zasua a Mose pɔ́ɔ-ŋa síɣe

¹ Mose è mò Eezuɛ-ŋai dîa ǹyɛɛi,

² “Ŋa nâa kɛ́ a kóraŋ ŋuŋ tɔnɔ pôlu buu feerɛ (120). Fé ŋɔ́nɔ pɔ̂rii kɛ̂i kálaa túɛ. Yâwɛɛ a m̀ó ḿâ ǹyɛɛ fé pâi Zɔdiŋ Ya-leei tíyenîi.

³ Nyaa kpîŋ a pâi liî kátuɛ ǹyái pôlu. A pâi ǹɔii-ŋûŋ-ŋai su-ƃelai kpɛ̂i káperei é ǹɔii tɛ́ɛ kápɔ. Zasua ǹyaa máŋ a pâi liî kátuɛ yɛ̂ɛ berei Yâwɛɛ è mò lai.

⁴ Yâwɛɛ a pâi ǹɔii-ŋûŋ-ŋai su karâi yɛ̂ɛ berei è gɛ̀ la a Amora-ŋai díkâloŋ-ŋai Siɔŋ da Oŋ gɛ́ dípaai.

⁵ A pâi dítɛɛ̂i kápɔ. A gɛ̀ tí ka dísoŋ yɛ̂ɛ berei ŋa m̀ôi la kâai.

⁶ Ka kálii kpéle ká kɛ́ yɛ̂ɛ kpakolo-ŋa. Káfe yào ká kɛ́ kpɛ̃liŋ. Káɣâlai Yâwɛɛ a pâi kɛ̂i kátuɛ. Vé pâi teêi kâa kpaa máŋ é kámaa sîa too.”

⁷ Nya ƃe Mose è Zasua tòli Eezuɛ-ŋai kélee ŋɛ́i-tuɛ ǹyɛɛ mai, “Ílii kpéle íkɛ yɛ̂ɛ kpakolo, kpɛ́ni fêi, yá ƃé pâi liî a ǹûai ŋí gono tee lɔii ma, í ŋ̀áa kɔlɛ dîa.

⁸ Yáawɛ ǹyaa kpîŋ a pâi kɛ̂i kátuɛ. Vé pâi wɔ́lɔ teêi kâa kpaa é nia kâa. Káfe yào, kálii fé tòo pôlu.”

Ka Dɔ̂ŋ lóno ǹûai kélee dîɛ a góraŋ ǹɔ́ɔlu mɛi feerɛ ɣelei kélee

⁹ Mose è dɔ̂ŋ pɔ̃yɛ é dɛ̀ɛ zâla láa-soŋ-ƃelai da ǹúu-pɔlɔ-ŋai pɔ́. Zâla láa-soŋ-ƃelai ƃé kɛ̀ a Liiva lonii nyii-ŋai kɛ̀ liî a Yâwɛɛ ŋɔkpana-woo kɛ́ɛ maa gãlai.

¹⁰ Mose è mò dîa ǹyɛɛi, “Kóraŋ lɔ́ɔlu mɛi feerɛ kélee kpɛɛ ŋá, nyii gáa a núu-yée kuláa ŋɔkpa mɛni su tãi, nyii gáa máŋ a m̀ûu tɔɔ maa kûui kɛ́ tãi,

¹¹ Eezuɛ-ŋai kélee da díŋaa tɛ̀ gîe ma Yâwɛɛ ŋɔkwaa maa waai ma ka dɔ̂ŋ-ŋai ŋí lóno, dí mɛ̀ni.

¹² Gbakolo-ŋai, nɛyâai, nîa-pɛlɛɛ da ŋ̀ɔ̃ya-ŋa kélee ŋáa tɛ́ gîe ma a gɛɛ dí díwoli tɔ́ɔ dɔ̂ŋ-ŋai lóno woo ma. Nyíŋi a pâi gɛ̂i dí yao Káɣâlai Yâwɛɛ ma dí ŋɔtɔ̂ŋ-ŋai mɛi káa a ǹɛ́lɛɛ.

¹³ Fɛ̂ɛ dínîa-pɛlɛɛi nyii-ŋai dífe niî dɔ̂ŋ-ŋai ŋí mɛni ní, dí díwoli tɔ́ɔ dîa dí sía a díwoo a gɛɛ dí yao Káɣâlai Yâwɛɛ ma. Ka dɔ̂ŋ-ŋai ŋí lóno tãi nɔ́ ká káa la ɣele ma gono tee lɔii ma Zɔdiŋ Ya-leei pôlui.”

Mɛni-ŋai Yâwɛɛ è mò Mose ma a gbɛɛ-ŋai

¹⁴ Yâwɛɛ è mò Mose ma ǹyɛɛi, “Íɣeniɛi a pá kpɛɛ̂i. Ka Zasua ka pá Ŋákwaa ma Waai ma a gɛɛ ŋá wála-wala-laa tɛɛ bɔ́.” Nya ƃe Mose è Zasua sìɣe da ǹyaa dí pá Yâwɛɛ ŋɛ́i-tuɛ.

¹⁵ Yâwɛɛ è pà ɣele-kɔ̂lɔŋ kole su, ŋ̀ele-kɔlɔŋ é kpiyâŋ m̀ûui láƃelei.

¹⁶ È mò Mose mà ǹyɛɛi, “Yaâ pá liî ínûa pɔlɔ-ŋai pɔ́. Ǹûai ŋí da pâi tínanîi ɣâla da kpɛ́ni-ŋai pɔ́ naa pere. Dia ƃa ŋ̀âla-ŋai nyii-ŋai díkaa ǹɔii su da liî naai. Da pâi díyee kulâi ḿû da gbanaŋ-wooi ŋá gɛ̀ díyêei.

¹⁷ Da gɛ̀ tí ŋa pâi ńii ŋwânai dîa ŋá ńyee kúla dímu, ŋá ŋ́ɛi sée dîa, ŋá mɛni-kpɔ̂lu ŋánaa láa dîa dí su é kàra. Da pâi díkîe-ni marê kɛ̂i dîyɛɛi, ‘Kúɣâlai fé kúkɔlɛ ƃé m̀ɛni-ŋai ŋí da kɛ̂i la a kúai?’

¹⁸ Ŋa pâi ŋ́ɛi loo tí-ti ƃôi dîa kpɛ́ni fêi, da díyee kúla ḿû da tínaŋ ɣâla da kpɛ́ni-ŋa pɔ́ naa pere.

¹⁹ “Mɛni ma, ŋ̀ulei ŋí pɔ̃yɛ í kɛ́ doo-pêre lɛ́ dîa a gɛɛ da kɛ̀ doôi, é kɛ́ a sêre kwa dîa-ni kúloai.

²⁰ Ŋa pâi pâi a dia ǹɔii ma ŋá ŋ́gono tèe la dínâŋ-pɔlɔ-ŋai yêei. Ǹɔii ŋí lɛ̂lɛɛi tíi kɛ́ mɛni ma. Da pâi ƃûu ƃôi naa dí m̀ii-sãai míi da ŋ̀wɛ̂lii. Kɛ́lɛ da pâi tinâni ɣâla da kpɛ́ni-ŋa pɔ́ naa dí tɔ́ɔ ḿâ.

²¹ Tãi m̀ɛni-kpɔ̂lu ŋánaa-ŋai ŋí da làa la dîa dí ŋ̀ulei ŋí mɛnii, dísɔnyɔ̂ŋ kíli a pâi toôi díŋa kpɛ́ni fêi, dílônii dífe pâi wɔ́lɔ nîai ŋ̀ulei ŋí ma. Ŋá lɛ́ɛ pâi pâi a ǹûai ŋí ǹɔii ma ŋa ŋ́gono tèe la díyêei, ŋá gɔ́lɔŋ berei díkaa lai.”

²² Nya ƃe Mose è ŋ̀ulei pɔ̃yɛ é ǹɛ́ Eezuɛ-ŋai dîa.

²³ Yâwɛɛ è mò Nuŋ ǹóŋ Zasua ma ǹyɛɛi, “Ílii kpéle íkɛ yɛ̂ɛ kpakolo. Yá ƃé pâi liî a Eezuɛ-ŋai gono-tee lɔii su. Ŋa pâi kɛ̂i íkɔlɛ.”

²⁴ Mose kpɛɛ dɔ̂ŋ-ŋai kélee pɔ̃yɛɛ ma é síɣe gɔ́ pîlanii é tóo gbɛɛ-ŋái mai,

²⁵ è mɛni-ŋai ŋí ƃò Liiva-ŋai dîa nyii-ŋai kɛ̀ liî a gbanaŋ-woo kɛ́ɛ maa gãlai ǹyɛɛ diai,

²⁶ “Ka Dɔ̂ŋ Kɔlɔi ŋí síɣe ká ǹáa Káɣâlai Yâwɛɛ ŋɔkpanaŋ-woo kɛ́ɛ maa gãlai kɔlɛ. A pâi kɛ̂i naa a sêre ka Ɣâla-ni káloai.

²⁷ Ŋa gɔ́lɔŋ ká káa a tɔɔ maa-ƃela káwolii kpɔ́lɔɔ. Ka tɔɔ̂i Yâwɛɛ ma tãi ŋ́gaa la ɣele ma. Ŋà sàa kásɔnyɔ̂ŋ a pâi tɛɛ̂i nyii ma ka gɛ̂i.

²⁸ Káai a ǹúu-pɔlɔ-ŋai ka ǹûa kpaya-kpayai-ŋai ka káŋaa tɛ́ gîe ma ká káwoli tɔ́ɔ mɛni-ŋai dîa ŋa pâi ǹônoi. Ŋ̀elei da ǹɔii ƃa ŋásêre-ŋa.

²⁹ Ŋá gɔ́lɔŋ ŋà sàa ka pâi kɛ̂i a ká ŋwana lɔ̂ɔ a ŋá ŋánaa ká nia mɛni-ŋai dîa ŋa m̀ôi kâai. Ka gɛ̀ tí mɛni-kpɔ̂lu ŋaa a pâi lâai kâa kpɛ́ni fêi kásɔnyɔ̂ŋ mɛni a pâi ŋwânai Yâwɛɛ ma.”

Mose ŋɔwulei

³⁰ Eezuɛ-ŋai kélee ŋáa tɛ́ɛ gîe mai, Mose è pɛ̀lɛ mɛni-ŋai ŋí ƃóɔɔ mâ wule-wôo su: