Dutɛrɔnome 29 - Bible

Yâwɛɛ è Kpanaŋ-woo kɛ̀ ŋɔ́nɔ Eezuɛ-ŋai yêei Môa lɔii su.

¹ Yâwɛɛ è mò Mose ma a gɛɛ é Kpanaŋ-woo nina kɛ́ Eezuɛ-ŋai yêei Môa lɔii su. Gbanaŋ-wooi ŋí è kɛ̀ a da kpɛ́ni nyii ma è gɛ̀ dîyɛɛi Sana Yeei ma a maa-ŋuŋ. Ŋ̀óo-ŋai ká ŋí gáa Gbanaŋ-wooi ŋí sui.

² Mose è gɛ̀ díkelee dí díŋa tɛ́ ma ǹyɛɛ dîai, “Ka mɛni-ŋai kélee naa kàa Yâwɛɛ è gɛ̀ a Ize kaloŋ da ŋɔtíi-kɛ-ƃela kpaya-kpayai é pɛ́lɛ Ize lɔii mai.

³ Ká zu-kɔ̂ɔŋ kpaya-kpayai naa kàa, zu-gbɛlɛ-gbɛlɛ mɛni-ŋai da mɛni kpaya-kpayai da kpɛ́ni-ŋai.

⁴ Kɛ́lɛ Yâwɛɛ fé niî kákili-ŋa pono ní a gɛɛ ká mɛni ŋá káa. Vé niî káŋɛi lá ƃó ní a gɛɛ ká kwaa káa kpaa máŋ é wóli kɛ́ káŋuŋ ma a gɛɛ ká mɛni mɛ́ni.

⁵ Góraŋ buu náaŋ ká gɛ̀ vɛ̃ɛ-kpâlaŋ sui, seɣe fé sàa nî kâa, kákɔɔ ŋá kɔlɔ fé kpɛɛ ní ma.

⁶ Káfe kpólo mii ní naa, káfe tela ŋwãai kpanaŋ kpele ní kpaa máŋ ŋwãai kpona. Kɛ́lɛ Káɣâlai Yâwɛɛ è kákɔnɔŋ kula a mii-sãai a gɛɛ é nɛ́ kâa ǹyaa ƃa Káɣâlai.

⁷ Tãi ká sèri la gwaai ŋí mai, Ɛsibɔŋ kaloŋ Siɔŋ da Basãŋ kaloŋ Oŋ dí kɔ́ pɛ̀lɛ kâa. Kɛ́lɛ kú díyee mɛi ɣàle.

⁸ Kú dílɔii kùla díyêei kú dɛ̀ɛ Lubiŋ da Gâa dísuui su-ƃelai pɔ́ kú da tɛ̀ɛ Manasɛ nuu suui gbulu tɔnɔ pɔ́.

⁹ Ka sia a Gbanaŋ-wooi ŋí maa tɔ̂ŋ-ŋai a ǹɛ́lɛɛ. Ka gɛ̀ tí, mɛnii kélee ka káyee pìli zui a pâi ƃûu ƃôi.

¹⁰ “Ka kélee ka tɔɔ-ni sâa Káɣâlai Yâwɛɛ ŋɛ́i-tuɛ ka kálaa túɛ-ƃelai, kákâloŋ, gbakolo-ŋai, kánuu pɔlɔ-ŋai da ǹúu kpaya-kpayai.

¹¹ Kánîa-pɛlɛɛi da kánɛyâai da ŋɔ̃ya-ŋai káyêei dí kɛ́ kɔi sîɣe kâa dí kɛ́ yá kɔ̀ɔ kâai.

¹² Ka tɔɔ-ni ƃɛ́ a gɛɛ ka Káɣâlai-ni ká káwoo míi. Ŋ̀óo mîi ŋí a pâi kɛ̂i a ŋiriɛɛ a foo-wôo,

¹³ é nɛ́ a gɛɛ ká káa a ŋɔnûa ǹyaŋ gɛ́ ƃò a Káɣâla yɛ̂ɛ berei è góno-tee la kánâŋ Eberaɣɛ̃ɛ, Aise da Zeeka-ni yêei.

¹⁴ Ŋa ŋ̀óo mîi ŋí kɛ̂i káyêei a foo-woo. Káa tɔnɔ nɔ́ fêi ƃɛ́ sâa Káɣâlai Yâwɛɛ ŋɛi tuɛi,

¹⁵ kɛ́lɛ ŋa gɛ̂i kálônii kélee yêei nyii-ŋai pâi pâi kápôlu mai.

¹⁶ “Ka gɔ́lɔŋ berei kú kɛ̀ la Ize, da ǹɔii-ŋûŋ-ŋai kú tɛ̀ɛ zu kú kɛ̀ seri ƃɛ́i.

¹⁷ Ka gáa berei díɣâla pɔkɔɔŋ-ŋai dí kɛ̀ la a dí ƃɛlɛ kpɛɛ Yâwɛɛ koi a ŋá ŋanaai. Da-ŋa dí kɛ̀ a díkpɛtɛɛ a wúru, kɔni, káni da gôo.

¹⁸ Káfe ǹɛɛ naa kákpakolo-ŋai, ǹɛyaai, kálɔii-kpîniŋ su nuu kpaa máŋ kásîi da é tɔ́ɔ Káɣâlai Yâwɛɛ ma é tínaŋ ǹɔii-ŋûŋ-ŋai su-ƃelai díɣâla-ŋai pɔ́ naa pere dí kɛ́ dífɛ̀li. Ka gɛ̀ tí, a pâi kɛ̂i yɛ̂ɛ wúru ƃa ŋwána kámɛni ma.

¹⁹ Káfe ǹɛɛ naa káta é m̀ó ǹyɛɛ tãi a dɔ̂ŋ-ŋai ŋí mɛni ŋ̀uŋ ma a nâa ƃó berei máŋ a tûai la a gbîŋ nîa-perei. A gɛ̀ tí Yâwɛɛ a pâi maa-nuui su karâi ka dîa-ni.

²⁰ Vé pâi wɔ́lɔ zu-mɛni lɛɛ̂i. A pâi dí su karâi a tólo da lii ŋwâna su kɛ́tɛ. Ǹáɣaŋ kélee bɔ̃yɛ̂ɛi gɔlɔi ŋí sui a pâi lɛɛ̂i ma. Yâwɛɛ a pâi ǹáa kulâi ɣele ma.

²¹ A pâi ǹáa kulâi Eezuɛ-ŋai kélee sáma. Ǹyaŋ voo-wôo-ŋai bɔ̃yɛ̂i Dɔ̂ŋ kɔlɔi ŋí sui, ŋaa see a pâi kɛ̂i la.

²² “Kálônii díwɔ̂-lonii da ŋɔ̃ya-ŋai kásamai da pâi mɛni-kpɔ̂lui kâai Yâwɛɛ a pâi ǹáai ǹɔii ŋí mai da gɔlɔ-fêla nyɔ́mɔɔ-ŋai.

²³ A pâi ǹɔii su-karai a kpolo-lîyeŋ da sɔfɔ. Sí-sɛŋ da fé pâi wɔ́lɔ kpɛtɛi naa. Ǹaa a pâi kɛ̂i yɛ̂ɛ Sodɔŋ, Gomora, Adama da Zeboliŋ lɔii-ŋai nyii è naa kàra a lii-ŋwâna perei.

²⁴ Ǹɔii-ŋuŋ-ŋai kélee da pâi kɛ̂i marê kɛ̂i dîyɛɛi, ‘Lé ƃé Yâwɛɛ a mɛni tare kɛ́ɛ ŋí kɛ̂i la a ǹɔii ŋíi. Lé ƃé pà a ǹíi-ŋwana tarei ŋí?’

²⁵ Ǹyaŋ a pâi díwoo su toôi ǹyɛɛi, ‘Ŋa gêi tí, kpɛ́ni fêi, da díyee kúla ŋákpanaŋ-wôo-ŋai mu, ńyãai a dínâŋ-ni Díɣâlai. Ŋá díkùla Ize ŋá pá a dia ŋá dɔ̂ŋ-ŋai ŋí tɛ́ɛ dípɔ.

²⁶ Kɛ́lɛ da nâa tínaŋ ɣâla da kpɛ́ni-ŋa pɔ́ naa pêre díkɛ dífɛ̀li. Ŋ̀âla-ŋai dífe díkɔlɔŋ da nyii-ŋai ḿve dɛ̀ɛ ní dípɔi.’

²⁷ Mɛni ma, Yâwɛɛ tɔɔ̂i ǹɔii ŋí ma. Ǹaɣaŋ-ŋai kélee bɔ̃yɛɛ̂i gɔlɔi ŋí sui, a pâi géle lɛɛ̂i ma.

²⁸ Yâwɛɛ è ǹíi ŋwàna ǹɔii su-ƃelai dîa a ŋánaa é díkula díkpɔɔi lɔii ma é dípili lɔii da kpɛ́ni su. Ǹyaŋ ǹaa ƃé díkaa sâa naa.

²⁹ “Ǹoo mɛni-ŋai kélee káa Kúɣâlai Yâwɛɛ mɛni ma. Kɛ́lɛ m̀ɛnii nyii kélee a ŋ̀wɛ̂lii kwa kúnîa-pɛlɛɛi kú gɔ́lɔŋ gáa pono ŋá. Mɛni-ŋai ŋí ƃa ŋɔtɔ̂ŋ-ŋai nyii a ŋ̀wɛ̂lii kú dímɛi kâai.