Dutɛrɔnome 23 - Bible

Diai maa fé nɛ̃ɛ ní dí kɛ́ Yâwɛɛ ŋɔnûai sámai

¹ “Surɔ̂ŋ nyii dí gbâŋ-kao wòloi kpaa máŋ dí ŋɔsinâa-sɛŋ su teei va pɔ̂ri kɛ̂i Yâwɛɛ ŋɔkwaa ma waai ma.

² “Wɛ́li loŋ da fa pɔ̂ri kɛ̂i Yâwɛɛ ŋɔkwaa ma waai ma. Da ŋɔsuu fa pɔ̂ri kɛ̂i naa é síɣe ŋɔɣeniɛi kɔ́ɔ-pilanii ma é seri gbɛɛ-ŋái ma.

³ “Amɔŋ-nuu kpaa máŋ Môa-nuu da fa pɔ̂ri kɛ̂i Yâwɛɛ ŋɔkwaa ma waai ma. Dísuu da fé pâi wɔ́lɔ kɛ̂i naa é síɣe díɣeniɛi kɔ́ɔ-pilanii ma é seri gbɛɛ-ŋái ma.

⁴ Kpɛ́ni fêi, tãi ká kùla la ǹuɛ-laai su Ize ká pá dílɔi su dífe yá da mii-sãa da tɛɛ ní kápɔ, dí tela Beɔ ǹóŋ Balaŋ nyii kɛ̀ Pɛtɔ taa-leei su, Mɛsepotamia lɔii sui féla fé a gɛɛ é kánaɣaŋ.

⁵ Kɛ́lɛ Yâwɛɛ fé fáa ní ma a gɛɛ é kɛ́ tí. È naɣaŋ-laai kɛ̀ a lûwa kámɛni ma, kpɛ́ni fêi, è káwɛli ní.

⁶ Ka dîa-ni káfe mɛni kpɛtɛɛ da kɛ̀ kákîe-ni loai, tãi nɔ́ kákaa la ǹɔii ma ƃɛ́i.

⁷ “Káfe káyee kùla Idɔŋ-nuu mu. Gáa a káƃarâŋ-nuu. Káfe káyee kùla Ize-nuu mu, kpɛ́ni fêi, ká kɛ̀ a ŋɔ̃ya-ŋa Ize lɔii su.

⁸ Dílonîi díwɔ̂-lonii lônii da pɔ̂ri kɛ̂i Yâwɛɛ ŋɔkwaa ma waai ma.

Berei ka pɔ̂ri gɔ́kɔ ƃuui kɛ̂i la a maa-waai

⁹ “Ka kɛ̀ gɔ́kɔ ƃûui su, ka káyee kúla mɛni maa liƃiɛɛ-ŋa kélee su.

¹⁰ Surɔ̂ŋ da a lɔ-pɔ̂rɔŋ kɛ̀ a nɛnî seei-pere fɛ̂ɛ é kúla m̀ûui su a ɣele-wala.

¹¹ Ɣele-wûlii a kɛ̀ kɛ̂i a pɔ̂ri ŋ̀waâi é pá pôlu m̀ûui su tãi vóloi-kaoi a tòo lai.

¹² “Ka li-lɔɔ̂i kɛ́ kwaa ma lɛ́ m̀ûui ŋ̀ene ŋá-pere a gɛɛ mɛni kɛ́ɛ ŋí a surɔ̂ŋ da kɛ̀ é lí naa é gbîŋ kpɛtɛ é lɛ́ɛ pâi m̀ûui su.

¹³ Wúru-gbua é kɛ́ kákelee káyêei a kákɔli-sãai da. Tãi ka kɛ pâi lì lɔɔ̂i kɛ̀ lai, ka lóa tée ká nì-lɔɔi pú zu ká mɛi pɛ́lɛ.

¹⁴ Kpɛ́ni fêi, Káɣâlai Yâwɛɛ a kɛ́ siâi m̀ûui su gɛ́ ǹaa maa kpɛ̂ a gɛɛ kákpɔara-ƃelai yée fé tɛ̀ɛ kâa. Mɛni ma, ká-mûui su kɛ́ a maa waa a gɛɛ Káɣâlai Yâwɛɛ fa lâa mɛni maa liƃiɛɛ kaa la m̀ûui su é bôlu tɔɔ kâa.

Tɔ̂ŋ da kpɛ́ni-ŋa

¹⁵ “À kɛ̀ luɛ da a pù ŋɔmɛi-nuui yêei é pá kápɔ káfe dɛ̀ɛ pôlu bɔ́ naa.

¹⁶ Ka ǹɛɛ naa é kɛ́ kásama. Daai nyii kélee a ŋwɛ̂li gɛ́ ƃò zui é kɛ́ naa. Káfe zòŋ a nyɔ́mɔɔ.

¹⁷ “Eezuɛ surɔ̂ŋ kpaa máŋ nɛnî da fé kɛ̀ a wulu-wulu kɛ́-nuu Ɣâla fɛli kwaa ma.

¹⁸ Káfe pà a wulu-wulu kpɛ́ surɔ̂ŋ kpaa nɛnî da ŋɔwulu-wulu kpɛ́ sɛŋ da Káɣâlai Yâwɛɛ ŋɔkwaa ma waai ma a kono-têe sala-sɛŋ, kpɛ́ni fêi, Yâwɛɛ fé wɛ̂li ní a dí ta.

¹⁹ “Ka sɛŋ-kao, mii-sɛ̂ŋ kpaa máŋ sɛŋ da kpɛ́ni pɛ̀lɛ káƃarâŋ Eezuɛ-nuu ma a kpa, káfe da pu ma.

²⁰ Ka pɔ̂ri gɛ̂i tí a ŋɔ̃ya kɛ́lɛ Eezuɛ-nuu fêi, a gɛɛ mɛni-ŋai kélee ka pâi káyee pûi zu ǹɔii su ka liî naai Káɣâlai Yâwɛɛ a pâi lûwa lâai ma é ƃûu ƃó káyêei.

²¹ “Ka kákono tèe Káɣâlai Yâwɛɛ yêei ka m̀aa mɛnii kɛ́ a maa félaa, kpɛ́ni fêi, a pâi wɛ́li tí-ti ƃôi la káyêei. A kɛ̀ ka wàla gɛ́ tí, gɛ̀ ní ka sɔnyɔ̂ŋ kɛ́.

²² Ka wàla kono-tee kɛ́ vé a sɔnyɔ̂ŋ.

²³ Kɛ́lɛ m̀ɛnii kélee ka kákono tèe lai fɛ̂ɛ ká gɛ́ kpɛ́ni fêi è kùla káa kpîŋ ká lá ká gɛ́ Káɣâlai Yâwɛɛ ma.

²⁴ “Ka tɛ̀ káƃarâŋ-nuu da ŋɔkpâlaŋ ŋá puru kɛ́ ká kɛ̀, ka m̀ii-sãai da mii gáa naai, kɛ́lɛ káfe da pù kábɛ̂bɛ-ŋai da su ká lí la.

²⁵ Ka tɛ̀ káƃarâŋ-nuu da ŋɔkpâlaŋ ŋá puru kɛ́ kákɛ̀, mii-sãai kélee ka pɔ̂ri miî ka gula a káyee. Kɛ́lɛ káfe zí-sãai da m̀á tèe a kɔli-sɛŋ.