Dutɛrɔnome 22 - Bible

¹ “À kɛ̀ núu da a m̀arâŋ-nuu da ŋɔniŋa kpaa máŋ ƃála kàa a láŋ vé tɛ̀ɛ ma. É zoŋ é pá la ǹâmu pɔ́.

² À kɛ̀ ǹamu kɛ̂i kôyaai kpaa máŋ vé gɔ́lɔŋ é lí la ŋɔpɛ́rɛi lá. Nâmu a lɛ̀ɛ gɔ̂rii a pà naa é dɛɛ bɔ́.

³ Ka gɛ́ nɔ́ a bere sîi tɔnɔi tí. Ka káƃarâŋ-nuu kɔ̃liŋ kàa nyii a láŋ ǹyêei yɛ̂ɛ wɛlɛ-sôo, m̀aa sêɣe kpaa máŋ gɔ̃liŋ da kpɛ́ni. Káfe tɛ̀ɛ ma.

⁴ “À kɛ̀ káta a m̀arâŋ-nuu ŋɔniŋa kpaa wɛlɛ-sôo kàa a too ǹɔii ma perêi vé tɛ̀ɛ ma. E kpɔŋ mà da ǹyaa dí mù siɣe é tɔ́ɔ.

⁵ “Nɛnî da fé surɔ̂ŋ maa ɣiri-sɛŋ tòo ma. Surɔ̂ŋ da fé nɛnî maa ɣiri-sɛŋ too ma. Maa-nuui ƃɛlɛ kpɛɛ̂i Káɣâlai Yâwɛɛ koi a ŋánaa.

⁶ “Káta a ŋɔni-tâa kàa pere kɔlɛ wûrui kpaa lɔii ma, ŋ̀ɔnii à kɛ̀ ǹóŋ kpaa máŋ ŋ̀áloŋ mɛi, vé ŋ̀ɔni-lêei sòŋ.

⁷ A pɔ̂ri ŋ̀ɔni-loŋ kpaa ŋ̀áloŋ siɣêi. É ǹɛɛ naa ǹee é lí. Ka gɛ́ tí a gɛɛ kákɛ mɛni kélee ŋ̀aa-see é kɛ̀ a ǹɛ́lɛɛ káfulu-laai su é kôyaa.

⁸ “Ka pɛ́rɛ tɔ̀ɔ nyii mɛi-pêre káa tɛ̀-tɛi, ka siɣãŋ kpua tínaŋ mɛi-pêre tɛ̀-tɛi wóli lá. À wàla kɛ́ tí núu da a kùla naa a tòo a sàa, ŋãa mɛni a pâi lɛɛ̂i kâa.

⁹ “Káfe sí-sãa da kpɛ́ni sì kákpɔmɔ kpâlaŋ ŋá. Kà gɛ̀ tí káfe gbɔmɔ ƃai da zí-sɛŋ kpîŋ m̀á da mìi.

¹⁰ “Káfe wɛlɛ-sôo da niŋa kpulɔŋ díkîe ma a gɛɛ dí tíi kɛ́.

¹¹ “Káfe seɣe da tòo kâa nyii gbɛtɛɛ̂i a yee sîi feerɛi.

¹² “Ka káseɣe-ŋai sɔ̀lɔ, ka víyâŋ kɛ́ méla ǹáaŋɔɔ ma.

Tûa-laa tɔŋ karaa

¹³ “À kɛ̀ surɔ̂ŋ da a nɛnî kùla naa pôlu ma ǹyɛɛ vé m̀aa nɛnîi wɛ̂lii,

¹⁴ é lɛ́ɛ kɛ́ a ǹáa ǹyɛɛi, ‘Ŋá ǹɛnîi ŋí kùla a nɛnî, kɛ́lɛ è kɛ̀ a surɔ̂ŋ mɛni kɔ́lɔŋɔɔ a bɔlɔ kwa ǹyaa kúlɛɛ pâi toôi kúkîe ma.’

¹⁵ “À kɛ̀ tí, gɛ̀ ní ǹɛnîi ŋí ǹâŋ da ǹee da pâ a zeɣe kôlei kɛ̀ mà zurɔ̂ŋ kɛ́ lɔ̀ la pɔ̂rɔŋ, dí dɛ̀ɛ ǹúu-pɔlɔ-ŋai pɔ́ daa-lêei ŋɔsiɣãŋ lá.

¹⁶ Ǹɛnîi ǹâŋ a pâi m̀ôi ǹúu-pɔlɔ-ŋai dîa ǹyɛɛi, ‘Ŋá ńoŋ-nɛnii tɛ̀ɛ ǹalôŋ ŋí pɔ́ a nɛnî, kɛ́lɛ a ǹyée kúla mu.

¹⁷ A m̀ó a gɛɛ è kɛ̀ a surɔ̂ŋ mɛni kɔ́lɔŋɔɔ da ǹyaa dílɛɛ pâi toôi díkîe ma. Zeɣe kolei ká ŋí kɛ̀ nóŋ ma gɛ́ lɔ̀ la pɔ̂rɔŋ. A pâi zeɣei fúlonîi ǹúu-pɔ̂lɔ-ŋai ŋɛ́i-tuɛ.’

¹⁸ Ǹúu-pɔ̂lɔ-ŋai da pâi ǹalôŋ ŋí sonîi dí ǹókwa,

¹⁹ dí káne kpua-kpua ŋuŋ tɔnɔ (100) kula ma dí dɛɛ ǹɛnîi ǹâŋ pɔ́, kpɛ́ni fêi, a ƃâa kula Eezuɛ nɛni ma. Ǹyaŋ da gɛ̀ da ǹɛnîi ŋí dí tûa tãi nɔ́ gáa la ɣele mai.

²⁰ “Kɛ́lɛ à kɛ̀ m̀ɛnii ǹalôŋ è mò a ǹɛnîi láa gáa a tɔ̃yâ, sêre fé ma nɛnîi ǹâŋ da ǹee díyêei,

²¹ gɛ̀ ní gbakolo-ŋai daai su da zòŋ dí pá la ǹâŋ ŋɔkpôŋ lá dílɛɛ zɔɔ̂i a kɔni é sáa, kpɛ́ni fêi, a ƃaa kula-maa mɛni kɛ́ Eezuɛ lɔii su a nyiɛɛ a surɔ̂ŋ da kpɛ́ni a tãi è kɛ̀ nîi la ǹâŋ ŋɔpɛ́rɛi mu é lɛ́ɛ pâi surɔ̂ŋ kulai. Fɛ̂ɛ ka zɔnyɔ̂ŋ-ƃelai kula kásama.

²² “Ka surɔ̂ŋ da kpakolo da kpɛ́ni ŋɔnɛnî sòŋ pɔ̂rɔŋ ka dífeerɛ dípaa. Fɛ̂ɛ ka mɛni nyɔ́mɔɔ kɛ́-ƃelai kúla kásama.

²³ “Surɔ̂ŋ da a lɔ-pɔ̂rɔŋ kɛ̀ daai sû a nɛnî-kpela da nyii gbɛtɛ̂ɛi a gɛɛ dí dɛ̀ɛ surɔ̂ŋ da pɔ́i,

²⁴ ka dífeerɛŋɔɔ dí sóŋ ká lí a dia daai ŋɔsiɣãŋ lá ká dísɔɔ a kɔni é lɛ́ɛ la zu dí sáa. Ka ǹɛnî-kpelai páa kpɛ́ni fêi, vé láɣi ní a gɛɛ núu da a pɛlɛ mà. Zurɔ̂ŋ ǹyaŋ, kpɛ́ni fêi, a lɔ-pɔ̂rɔŋ kɛ́ a núu da kpɛ́ni ŋɔnɛnî. Berei sîi ŋí su ka pâi zɔnyɔ̂ŋ-ƃelai kulai ǹɔii ma.

²⁵ “Kɛ́lɛ à kɛ̀ gbɛtɛɛ̂i a gɛɛ dí nɛnî-kpela da tɛɛ surɔ̂ŋ da pɔ́, kpakolo da kpɛ́ni a pɛ̀lɛ maa nɛnii ma perei é dée-perei, ka zurɔ̂ŋ kpîŋ paa.

²⁶ Káfe ǹɛnii paâ, kpɛ́ni fêi, vé sɔnyɔ̂ŋ da kɛ́ ní nyii a pɔ̂ri zaa kɛ̂i. Ka mɛni tɔnɔi kɛ́ nɔ́ a ǹúui pâi pɛlɛ̂i m̀arâŋ-nuu ma é baai.

²⁷ Ǹalôŋ è pɛ̀lɛ ǹɛnîi mâ é dée-perei nyii pɔ̂ri maa fé kɛ́ ní mì a gɛɛ é wɔ́lɔ núu da a ŋ̀óo mɛni é pá é kpɔ́ŋ ma.

²⁸ “À kɛ̀ surɔ̂ŋ da a seɣe-ɣilì nɛnî-kpela ma, nyii dífe nîi gbɛ̀tɛ ní a gɛɛ dí m̀aa nɛni-kpelai tɛ́ɛ surɔ̂ŋ da pɔ́,

²⁹ fɛ̂ɛ ka káne kpua-kpua buu lɔ́ɔlu kùla maa surɔ̂ŋ ḿâ ká dɛɛ nɛnî-kpelai kpîŋ ǹâŋ pɔ́, ká tela ǹɛnîi kpîŋ tɛɛ bɔ́, kpɛ́ni fêi, a maa mɛni kɔ́lɔŋ. Vé ǹɛnîi kpîŋ lɛ̀ɛ tãi nɔ́ gáa la ɣele mai.

³⁰ “Núu da fé wɔ́lɔ ǹâŋ ŋɔnɛnî kɛ̀ a ŋɔnɛnî. À gɛ̀ tí, gɛ̀ ní a ƃâa kula ǹâŋ mà.