Dutɛrɔnome 20 - Bible

Kɔ́ kɔ́ɔ maa tɔ̂ŋ-ŋa

¹ “Ka kɛ̀ kɔ̂i kákpɔara-ƃelai pɔ́ ka soo-ŋa kàa da kɔ́ kɔ́-keleŋ-ŋa é pɛ́lɛ kɔ-kuluƃa-ŋa dîa, nyii-ŋai díwala-wâlai tɛɛ̂i káwɔ̂i mai, káfe yào dîa, kpɛ́ni fêi, Káɣâlai Yâwɛɛ ká kùla ǹuɛ-laai su Izei, a pâi kɛ̂i kákɔlɛ.

² Kálɛɛ pâi liî kɔ́ ma, zâla láa-soŋ nuui a pâi lônoi gɔ́ gɔ-kuluƃa-ŋai pɔ́.

³ A pâi m̀ôi dîa ǹyɛɛi, ‘Eezuɛ-ƃela, ka káwoli tɔ́ɔ ḿâ. Ka sâa liî kɔ́ pɛlɛ̂i kákpɔara-ƃelai dîa. Káfe yào. Ka kálii ŋáa yéŋ. Káfe kɛ̀ kpɛlînii,

⁴ kpɛ́ni fêi, Káɣâlai Yâwɛɛ a pâi tɔɔ̂i kámɛni ma é gɛ́ ká kákpɔara-ƃelai yée mɛi ɣále.’

⁵ “Gɔ-kuluƃa-ŋai láa túɛ-ƃelai da pâi m̀ôi díyee mu-ƃelai dîa a tɛɛ-ŋa dîɛ diai, ‘Núu da káa kásama nyii a kpɛ̀ɛ ŋɔpɛ́rɛi tɔɔ̂i vé niî dɛ̀ɛ ní Ɣâla pɔ́. À kɛ̀ tí, tɔɔ maa-nuui é lí pôlu é gɛ́ tî. A wàla kɛ́ tí maa-nuui a lɛ̀ɛ gɔ́i su núu da kpɛ́ni ƃé pâi maa-pɛrɛi tɛɛ̂i Ɣâla pɔ́.

⁶ Núu da káa kásama ƃa-kpɔ̂mɔ sì nyii vé niî m̀á kula ní? Tɔɔ maa-nuui é lí pôlu é ŋɔsí-sãai m̀á kúla. À wàla kɛ́ tí, tãi da maa-nuui a lɛ̀ɛ gɔ́i su, núu da kpɛ́ni ƃé pâi zí-sãai kpîŋ m̀á kulâi gɛ́ ŋaa-nɛɛ kula.

⁷ Núu da káa kásama nyii a góno tée nɛnî da yêei a gɛɛ é gula a nɛnî? Tɔɔ maa-nuui é lí pôlu é maa nɛnîi kúla. A wàla kɛ́ tí, tãi da maa nuui a pâi lɛɛ̂i gɔ́i su. Gɛ̀ ní núu da kpɛ́ni a pâi ǹɛnîi kpîŋ kulâi.’

⁸ “Dí mò dîa máŋ dîyɛi, ‘Núu da káa kásama nyii ǹíi fé kpele ní? Tɔɔ maa-nuui é lí pôlu va lâa gɛ́ la ŋɔyao lii é píli núu da kpɛ́ni líi su máŋ.’

⁹ Tãi dílaa túɛ-ƃelai da kpɛ̀ɛ lônoi la dípɔi da pâi díteniŋ tɔɔ-ƃela lɛ̂i.

¹⁰ “Ka lì a gɛɛ ká kɔ́ taa-lêe da pɔ́ ká nàa kula, ka lɛɛ berei su ká mó dîa a gɛɛ da fàa ma, ká dîa-ni ka pɔ̂ri mɛni kpɛtɛɛ kɛ̂i ka dîa-ni káloai.

¹¹ Da díyee sèe kámu dí dísiɣãŋ-ŋai lá ƃó káperei, ka díkɛ a kátii kɛ́-ƃela.

¹² À kɛ̀ da wàla gɛ́, ka kɔ́ dípɔ ká dítaai síɣe.

¹³ Káɣâlai Yâwɛɛ à gɛ̀ káyee a tɛ̀ɛ dîa ka gbakolo-ŋai kélee páa.

¹⁴ À kɛ̀ a ǹɛyâai, ǹîa-pɛlɛɛi, daa-tûlɛ-ŋai é pɛ́lɛ zãai kpéli-ŋai dîa, ka dísiɣe a kápɔɔ. Zãai Káɣâlai Yâwɛɛ a gɛ̀ ka gula kákpɔara-ƃelai yêei kɔ́ sui gáa a kápɔɔ.

¹⁵ Bere ƃé ká gɛ́ la a daa-lêe-ŋai kélee maa koyâai dífe tela a lɔii-ŋuŋ-ŋa da pɔ́ɔ kákɔlɛ mai.

¹⁶ “Daa-lee-ŋai ǹɔii-ŋûŋ-ŋai su Káɣâlai Yâwɛɛ a dɛɛ̂i kápɔi, káfe sɛŋ da kélee lɛ̀ɛ naa nyii vúlu káa zui.

¹⁷ Ka díkelee dísu kara yɛ̂ɛ berei Káɣâlai Yâwɛɛ a mò la kâai. Dia ƃa Ita-ŋai, Amora-ŋai, Keena-ŋai, Pɛriza-ŋai, Iva-ŋai da Zɛbusa-ŋai.

¹⁸ A wàla kɛ́ tí, da pâi díɣâla fɛli-pere sii nyɔ́mɔɔ-ŋai kélee lɛ̂i kâa. À kɛ̀ tí ka pâi sɔnyɔ̂ŋ kɛ̂i a Káɣâlai Yâwɛɛ.

¹⁹ “Ka kɛ̀ kɔ̂i taa-lêe da su-ƃela pɔ́ a tãi su kôyaa a gɛɛ ká ǹaa soŋ, káfe ǹaa wuru-ŋai su kara, kpɛ́ni fêi, díkaa a mii-sãa kámɛni ma. Káfe dísu kara. Wúru fé a núu-kpune nyii ká kɔ́ bɔ́.

²⁰ Ŋ̀úru nyii-ŋai ká gɔ́lɔŋ díƃa fé a mii-sãa kámɛni mai, ka pɔ̂ri díteêi ká kɛ́ tíi kɛ̀ a dîa é lɛ́ɛ la zu daa-leei ka kɔ̂i bɔi ká ǹyée mɛi ɣâle.