Dutɛrɔnome 18 - Bible

Zɛŋ maa-nɛ̃ɛi dí dɛɛ Zâla láa-soŋ-ƃelai pɔ́ Liiva-ŋai

¹ “Eezuɛ-ƃelai dílɔii da fé a zâla láa-soŋ-ƃelai da Liiva sii su-ƃelai kélee da pɔ́ɔ. Díkɔ̃liŋ ƃé pâi kɛ̂i a zâla sãai ǹûai da pa la Yâwɛɛ pɔi.

² Lɔii fé pâi kɛ̂i díyêei díƃarâai sáma. Yâwɛɛ ƃa díkɔ̃liŋ yɛ̂ɛ berei è góno tèe la díyêei.

³ “Zâla láa-soŋ-ƃelai díwɔ̂ mii ká ŋí niŋa kpaa máŋ ƃála sâla-sɛŋ nyii-ŋai ǹûai da pâ lai dîa, gâraŋ, ǹɛ̂ɣɛŋ da goi-pêre sãa.

⁴ Fɛ̂ɛ ka kási-sãai m̀á maa-ŋuŋ-ŋai, káŋwãai da ɔle wúlɔi maa-ŋuŋ-ŋai tɛ́ɛ dípɔ da m̀ála leɣai maa-ŋuŋ ka deei,

⁵ kpɛ́ni fêi, Káɣâlai Yâwɛɛ a dísiɣe zu ǹúu-suu-ŋai sáma Eezuɛ lɔii su a gɛɛ dí tíi kɛ́ mì wɔlɔ-wɔlɔ da wɔlɔ-wɔlɔ.

⁶ “À kɛ̀ Liiva-nuui da a ŋ̀wɛ̂li é kúla Eezuɛ lɔii m̀ɛ́i zeɛ́ɛ káa naai, é pá ƃɛ́i Yâwɛɛ a pâi nàa lɛ̂ɛi a gɛɛ dí kɛ́ vɛli naa é kɛ́ naa, a pɔ̂ri gɛ̂i tí.

⁷ A pɔ̂ri kɛ̂i naa gɛ́ tíi kɛ̀ Ŋɔɣâlai Yâwɛɛ mì yɛ̂ɛ berei m̀arâa Liiva-ŋai da gɛ̂i lai.

⁸ Da dîa-ni da pɔ̂ri dílaa miî naa a bɔriɛɛ. Ŋɔsuui su ƃelai da díkɔ̃liŋ da kɔlɛ, zɛŋ-kaoi nyii da dɛ̀ɛ bɔi káa a bɔ̀ɔ.

M̀ɛni-ŋai Ɣâla fé ŋ̀wɛli-nii maa lia-wooi

⁹ “Ka seri ǹɔii su Káɣâlai Yâwɛɛ a dɛɛ̂i kápɔi káfe naa lɔii-ŋuŋ-ŋai su-ƃelai dítûa-pere nyɔ́mɔɔ-ŋai da maa kɔ̂ri.

¹⁰ Núu da fé ǹóŋ surɔ̂ŋ kpaa máŋ nɛnî kùla a sâla. Núu da fé tɛli kpɛ́, é mɛni ƃó naa túɛ, kpaa máŋ mɛni siɣeɛɛ a kpolo mɛ̂ni, é wulu mɛni maa kɔ̂ri,

¹¹ kpaa máŋ í lí sále nyɔ́mɔɔ kɛ́-ƃelai pɔ́ sále kɛ́-mɛni ma, núu lónoɔɔ mɔ̂leŋ pɔ́, póniŋ kɛ́ɛ, kpaa máŋ núu lónoɔɔ saa nûu pɔ́.

¹² Ǹúui nyii kélee pâi m̀ɛni-ŋai ŋí kɛ̂i, maa-nuui aâ sɔnyɔ̂ŋ maa pɔlɔ-pɔlɔɔ kɛ́ nyii Yâwɛɛ fé ŋ̀wɛ̂lii é gaai, kpɛ́ni fêi, mɛnii-ŋai ŋí kɛ́ mɛni ƃé Yâwɛɛ a pâi ǹɔii-ŋûŋ-ŋai ŋí su-ƃelai kpɛ̂i la káperêi nyii-ŋai díyee káa zui.

¹³ Fɛ̂ɛ ká kɛ́ a kámaa waa m̀ɛni-ŋai ŋí su Káɣâlai Yâwɛɛ ŋɛ́i-tuɛ.

Ɣâla ŋɔlóno kɛ́-nuui tɛɛ mɛni

¹⁴ “Ǹɔii-ŋuŋ-ŋai ka liî zui naa-ƃelai da díwoli tɔ̀ɔ dɛli-kpɛ-ƃelai da duɛ-mɛni ƃó-ƃelai dîa. Kɛ́lɛ Káɣâlai Yâwɛɛ fé ŋ̀wɛ̂lii ka káyee píli mɛni-ŋai ŋí da su.

¹⁵ A pâi kátɔnɔ da siɣêi zu kásama é kɛ́ a ŋɔlóno kɛ́-nuu yɛ̂ɛ ńyãa. Fɛ̂ɛ ká káwoli tɔ́ɔ mà.

¹⁶ “Kpɛ́ni fêi tãi ká káŋa tɛ̀ la ma Olɛ yeei ma ka mò Káɣâlai Yâwɛɛ ma kâai, ‘Kúfe ŋwɛ̂li kú íwoo mɛni ŋɔ́nɔ kpaa máŋ kú ŋɔŋ sôŋ kɛ́tɛi ŋí káa. Kwa gɛ̀ tí kwa pâi saâi.’

¹⁷ Nya ƃe Yâwɛɛ è mò ḿâ ǹyɛɛi, ‘M̀ɛnii dí mòi, ǹɛ̂lɛɛi.

¹⁸ Ŋa pâi dítɔnɔ siɣêi zu ŋá gɛ́ a ŋálono kɛ́-nuu yɛ̂ɛ yá. Ŋa pâi ŋ́oo pûi ǹá. M̀ɛnii kélee ŋa pâi bûi ǹái a pâi môi dîa.

¹⁹ Ǹúui vé pâi ŋ̀óli tɔɔ̂i m̀ai, ŋa pâi maa nuui kula-maa kɛ̂i.

²⁰ Kɛ́lɛ Ɣâla ŋɔlóno kɛ́-nuu da nyii a tùa yɛ̂ɛ ǹyaa ƃé a tíi kɛ̂i náai su, gɛ́ m̀ɛnii ƃò nyii mvé m̀ó ní mai kpaa máŋ nyii a tíi kɛ̀ ɣâla da kpɛ́ni-ŋa dîɛi fɛ̂ɛ dí maa nuui tí páa.’

²¹ “Tãi da ka pâi m̀ôi kâai, ‘Kwa gɔ̀lɔŋ léŋ a gɛɛ ŋ̀orɛ̂-wooi ŋí fé kulâi Yâwɛɛ yêei?

²² À kɛ̀ m̀ɛnii Ɣâla ŋɔlóno kɛ́-nuui kpîŋ a môi vé kɛ́ ní, gɛ̀ ní maa ŋ̀orɛ̂-wooi fé kula ní Yâwɛɛ yêei. Maa nuui kpîŋ a lônoi nɔ́ gbɔ́ɔi yee ma. Káfe yào mà.’