Dutɛrɔnome 17 - Bible

¹ “Káfe sâla kùla Káɣâlai Yâwɛɛ ma a niŋa kpaa máŋ ƃála nyii pɔ́ɔ káa mai. M̀aa sâla-sɛŋ maa fé waa ní m̀ɛni ma.

² “A kɛ̀ surɔ̂ŋ kpaa nɛnî da káa kátaa-ŋai da su nyii Káɣâlai Yâwɛɛ a dɛ̀ɛ kápɔ dûa-pere fé a Yâwɛɛ líi láa mɛni,

³ ǹyaŋ a gbanaŋ-wooi kara, ǹyaa ƃa ɣâla da kpɛ́ni-ŋa fɛliɛɛ, vóloi, ŋ̀áloŋ, kpaa máŋ bɛmɛlɛŋ-kao-ŋai, nyii gáa a tɔ̂ŋ kpanaŋɔ̃ɔ a gɛɛ káfe gɛ̀i,

⁴ ǹyaŋ à kɛ̀ kà gɔ̀lɔŋ ká m̀aa kpɛ́ɛ a ǹɛ́lɛɛ ká gáa gɛ́ ƃò a tɔ̃yâ,

⁵ ka maa nuui sóŋ ká lí la daa-leei ŋɔsiɣãŋ lá ká zɔɔ a kɔni é lɛ́ɛ la zu é sáa.

⁶ Mɛnii nyii sêre feerɛ kpaa zaaƃa káa mai ǹyaa ƃé núu a zaa kɛ̂. Kɛ́lɛ káfe núu da pàa mɛni da ma nyii maa sêre káa nɔ́ tɔnɔi.

⁷ Zêre-ŋai ƃé fɛ̂ɛ dí kɛ́ a ǹúui maa-ŋuŋ-ŋai dí pɛ́lɛ zɔnyɔ̂ŋ-nuui sɔɔ̂i. Gɛ̀ ní ǹúui gbéli-ŋai dílɛɛ dípôlu. Berei sîi ŋí su ƃé ka pâi zɔnyɔ̂ŋ-ŋai kulâi la kásama.

⁸ “À kɛ̀ mɛni-sâa da à pà káŋɛi-tuɛ gbanaŋɔɔ yɛ̂ɛ núu paa mɛ̂ni, laa-sâa kpanaŋɔɔ kpaa máŋ núu kɛ́ɛ é pɛ́lɛ m̀arâŋ-nuu ma é ŋwána, ka lí a maa mɛnii ƃɛ́i ma Yâwɛɛ a pâi nàa lɛ̂i.

⁹ Ka maa mɛni-saai kpîŋ tɛ̀ɛ Ɣâla ŋɔsâla láa-soŋ-ƃelai pɔ́ nyii-ŋai díkaa a Liiva-ŋai da mɛni-sâa ƃó-nuui nyii pâi kɛ̂i naa a m̀aa tãi tii. Ka dímarê kɛ́, ǹyaŋ da pâi kpɔŋ mâa tɛɛ̂i kápɔ dí mɛni-sâai ƃó.

¹⁰ Mɛnii da pâi môi kâai, ka káyee sée mu. Berei da pâi káteniŋ tɔɔ̂i lai, ka sia la.

¹¹ Ka tûa yɛ̂ɛ berei da dɔ̂ŋ lɛ̀ la kâai da berei dí m̀ɛnii ŋá tèe lai. M̀ɛnii da mò kâai, ka káyee sée mu. Káfe lì laa-mii-yee mɛi-pere kpaa kɔɔ-yee mɛi-pere.

¹² Ǹúui va ƃaa-kɛ-maa tɛ̀ɛ m̀ɛni-saa ƃó-nuui pɔ́ da zâla láa-soŋ-nuui nyii káloai ka Yâwɛɛ nii fɛ̂ɛ dí m̀aa-nuui páa. Fɛ̂ɛ ka zɔnyɔ̂ŋ-ƃelai kùla Eezuɛ lɔii su.

¹³ Ka gɛ̀ tí, gɛ̀ ní ǹúui kélee da pâi mɛnii dí yao. Da fé pâi ŋɔ́nɔ m̀ɛni-sâa ƃó-ƃelai wóo pîlii.

Berei da pɔ̂ri kâloŋ seêi lai

¹⁴ “Ka sèri ǹɔii su Káɣâlai Yâwɛɛ a dɛ̀ɛ kápɔi, ka naa sîɣe ka sée naa, ka pâi ŋ̀wɛ̂lii a kâloŋ yɛ̂ɛ ǹɔii-ŋuŋ da kpɛ́ni-ŋai díkaa kákɔlɛ mai.

¹⁵ É kɛ́ a ǹúui Káɣâlai Yâwɛɛ a ziɣe zu kásamai. É kɛ́ a ǹúui nyii kùla kásuui sui. Káfe ŋɔ̃ya kɛ̀ a kámɛi nûu.

¹⁶ Vé zoo-ŋai dámaa sìɣe gbîŋ mɛni ma kpaa máŋ é gɛ́ ǹûai dí lí pôlu Ize lɔii su dámaa mɛni ma, kpɛ́ni fêi, Yâwɛɛ è mò a gɛɛ káfe lì naa pôlu.

¹⁷ Vé nɛnî támaa kùla. À gè tí, gɛ̀ ní da pâi gɛ̂i é bôlu tɔɔ Yâwɛɛ ma. Vé gáne da gôoi dámaa sìɣe ǹyaa tɔ̂nɔ mɛni ma.

¹⁸ À tɛ̀ gâloŋ see-sɛŋ ŋá fɛ̂ɛ é dɔ̂ŋ-ŋai ŋí pɔ̃yɛ gbîŋ mɛni ma nyii gáa Liiva sala láa-soŋ-ƃelai yêei.

¹⁹ É kɛ́ ǹyêei a tãi kélee gɛ́ ǹóno tãi nɔ́ gáa la ɣele mai a gɛɛ é berei kɔ́lɔŋ a pɔ̂ri ƃaa-kɛ-maa tɛɛ̂i la Yâwɛɛ pɔ́, gɛ́ ŋɔtɔ̂ŋ-ŋai mɛi kâai.

²⁰ Vé kɛ̀ gíli ŋá a gɛɛ ǹyaa tɔnɔ ƃé maa mɛni kpanaŋɔ̂ɔi é tɛ́ɛ ǹúui gbéli-ŋai dîa. À sìa a dɔ̂ŋ-ŋai ŋí wóo, gɛ̀ ní ǹyaa da ŋɔsuui su-ƃelai da pâi kɛ̂i Eezuɛ lɔii mɛi a tãi su kôyaa.