Dutɛrɔnome 16 - Bible

Berei ka pɔ̂ri Dɛɛ mɛi kûui kɛ̂i lai

¹ “Ka Dɛɛ-mɛi kûui maa lii-nɛ̃ɛ kúla Abi ɣaloŋ su ká mɛi káa a maa waa, ká ƃaa-kɛ-maa tɛ́ɛ Yâwɛɛ pɔ́ kpɛ́ni fêi, Abi ɣaloŋ su ƃé Káɣâlai Yâwɛɛ è kákùla la Ize lɔii su a kpíni.

² Ka Dɛɛ-mɛi kûui maa sâlai kúla Yâwɛɛ ma a kátaa-tulɛi da ŋɔkwaa maa waai ma ƃɛ́i è nàa lɛ̀i.

³ Káfe Dɛɛ-mɛi kûui maa sâla sãai mìi a kpólo nyii tɛ́-sɛŋ káa zui. Ka gbólo sii ŋí míi a fólo lɔ́ɔlu mɛi feerɛ. Da gbólo sîi ŋí tòli a mɛni sôli káa kpôlo kpɛ́ni fêi, ká kùla Ize a kîrɛ, a gɛɛ gɛ-ɣeniɛ-laai ká kɛ̀ zu Ize da tãi ká kùla la naai maa mɛni kíli é lɛ́ɛ káŋa.

⁴ Tɛ́-sɛŋ da kélee fé kɛ̀ kálɔii su fólo lɔ́ɔlu mɛi feerɛ yée mu. Káfe tela nɛ̀ɛ naa zâla suai da é nyíi, é lɛ́ɛ la zu ɣele é ƃɔ́ ma.

⁵ “Káfe Dɛɛ-mɛi kuui maa sâlai kùla daa-ŋai da su nyii Yâwɛɛ è dɛ̀ɛ kápɔi,

⁶ fɛ̂ɛ ƃɛ́i è nàa lɛ̀ a gɛɛ ká vɛli naai. Ka gùla a ŋ̀ele-wulii, tãi vóloi a kɛ̀ yenîi lai, a tãi ká kɛ̀ kulâi la Izei.

⁷ Ka zâla-sɛŋ ŋɔ́ŋ ká mii ƃɛ́i Yâwɛɛ è nàa lɛ̀i. Ka lí pôlu káƃuu-ŋai mu a bôlu ma ɣele ƃɔ́ɔi.

⁸ Káfe tɛ́-sɛŋ káa zu kpolo mii a fólo lɔ́ɔlu mɛi da. Vóloi mɛi feerɛ ɣelei ká káŋaa tɛ́ gîe ma ká Káɣâlai Yâwɛɛ fɛli. Káfe tíi da kɛ̀ a maa ɣelei tí.

Berei ka pɔ̂ri zí-sãai ƃai kula kûui kɛ̂i lai

⁹ “Ka lɔ́ɔ kûu lɔ́ɔlu mɛi feerɛ lóno é síɣe kási-sãai m̀á-ŋuŋ kula tãi ma.

¹⁰ À kɛ̀ tí ka ǹɔ́ɔ kûu-ŋai maa kuui ǹíi-nɛɛ kula Káɣâlai Yâwɛɛ ma. Ka sama-sãa tɛ̃ɛ bɔ́ é kúla kálii su yɛ̂ɛ berei a lûwa làa la kâai.

¹¹ Ka koi-nɛ̃̂ɛ kula ŋ̀ɛ́i-tuɛ ƃɛ́i è nàa lɛ̀i. Ka kálônii sinaai, ǹɛyâai, ǹuɛ sinaai, ǹɛyâai, Liiva-ŋai, ŋɔ̃ya-ŋai dee-lôŋ-ŋai da bɔɔ-nɛyâai kásamai.

¹² Ka dɔ̂ŋ-ŋai ŋí mɛi káa a ǹɛ́lɛɛ. Ka gɔ́lɔŋ a gɛɛ ká kɛ̀ a luɛ-ŋa Ize lɔii su.

Berei ka pɔ̂ri m̀ûu-ŋai maa-kûui kɛ̂i lai

¹³ “Ka m̀ûu-ŋai maa kûu kɛ́tɛi kɛ́ a fólo lɔ́ɔlu mɛi feerɛ tãi ka kpɛ̂ɛ la a kámii-sãai táŋɔɔ, da ká káwãai kpɛtɛi.

¹⁴ Ka gúui ŋí kɛ́ ka kálônii sinaai, ǹɛyâai, ǹuɛ sinaai, ǹuɛ ǹɛyâai, Liiva-ŋai, ŋɔ̃ya-ŋai, dee-lôŋ-ŋai da bɔɔ-nɛyãai kásamai nyii-ŋai kulai kátaa-ŋai sui ka dîa ni.

¹⁵ Ka gúui ŋí kɛ́ a fólo lɔ́ɔlu mɛi feerɛ Káɣâlai Yâwɛɛ ŋɛ́i-tuɛ ƃɛi a pâi nàa lɛ̂i kâai. Ka gɛ̀ tí, Káɣâlai Yâwɛɛ a pâi lûwa lâai kâa kási-sãai dí kpɛtɛ, m̀ɛnii kélee ka káyee pìli zui é ƃûu ƃó kálii-nɛ̃ɛi su é kɛ́tɛ.

¹⁶ “Fɛ̂ɛ kákpakolo-ŋai dí pá Yâwɛɛ ŋɛ́i-tuɛ gîei saaƃa a kóraŋ kélee. Dí díŋaa tɛ́ ma naa a Dɛ́-sɛŋ féu kpoloi maa kûui ŋ̀ele, zí-sɛŋ ƃai kula kûui da m̀ûu-ŋai maa kûui ŋ̀ele. Núu da fé pà Yâwɛɛ ŋɛ́i-tuɛ a ǹyée folo.

¹⁷ Fɛ̂ɛ núu kélee é pá a sama-sɛŋ Yâwɛɛ mɛni ma yɛ̂ɛ berei Káɣâlai Yâwɛɛ è lûwa làa la mai.

Mɛni-saa ƃóɔɔ a tɔ̃yâ-laa

¹⁸ “Ka núu-pɔlɔ-ŋa lɛ́ kásuui su tɛi-tɛi daa-ŋai su Yâwɛɛ Káɣâlai è dɛ̀ɛ kápɔi. Ka da-ŋa kɛ́ a mɛni-saa ƃó-ƃela, ká da-ŋa kɛ́ a núu kpaya-kpaya nyii-ŋai pâi ǹûai dímɛni-ŋai ŋáa teêi a tɔ̃yâ-laai.

¹⁹ Káfe tɔ̃ya-laa maa lâa kpaa máŋ ká ŋaa-kɔlɛ kɛ́. Káfe yee-pɛlɛ ǹá sɛŋ sòŋ. Yee-pɛlɛ ǹá sɛŋ a dárei ƃelai ŋɛ́i kpìni dífa dɔ̃yâi kâa. A gɛ̀ dáre-ƃelai dí mɛni ŋá tée a gbílaŋɔɔ.

²⁰ Ka tɔ̃yâ-laa mɛni kɛ́ a gɛɛ káfulu-laai su é kôya ǹɔii ma Káɣâlai Yâwɛɛ è dɛ̀ɛ kápɔi.

²¹ “Káfe wúru sàa a ɣâla pɔkɔɔŋ ká dɔɔ Káɣâlai Yâwɛɛ fɛli teƃelei ma.

²² Káfe kɔni tɔ̀ɔ a ɣâla pɔkɔɔŋ vɛ̀li mɛni ma. Yâwɛɛ Káɣâlai fé wɛ́li ní la.