Dutɛrɔnome 11 - Bible

Yâwɛɛ ŋɔkɛ́tɛ-laai

¹ “Ka Káɣâlai Yâwɛɛ wɛ́li ká ŋɔtɔ̂ŋ-ŋai mɛi káa a tãi kélee.

² Ka gɔ́lɔŋ a gɛɛ kálônii dia tɔnɔ nɔ́ fé Yâwɛɛ a wɔ́lɔ mɛni kula maa kɛ́ a dia. Dia tɔnɔ nɔ́ fé da ŋɔwála-wala mɛni-ŋai naa káa.

³ È ŋɛi-kɛ-maa da mɛni kpaya-kpaya támaa kɛ̀ Ize kaloŋ ŋɛ́i da ŋɔnûai.

⁴ È gɛ̀ Ǹyúo Kpɔ̂lui é sía Ize kɔkûluƃa-ŋai, zoo-ŋai da zoo-sia keleŋ-ŋai mɛi a tãi dí kɛ̀ kákpɛ̂i lai.

⁵ Kálônii dífe mɛni-ŋai ŋí naa káa ní Yâwɛɛ è gɛ̀ kâa vɛ̃ɛ-kpâlaŋ su é lɛ́ɛ la zu ka seri ƃɛ́.

⁶ Kálônii dífe kɛ́ ní naa a tãi ŋ̀ele-kɔlɔŋ lá è ƃò la é Lubiŋ ŋɔsuui su naloŋ Ilia ǹônii sinaa feerɛi Datãŋ da Abira kpele, é pɛlɛ dípɛrɛi mu-ƃelai, dísua kɔlɔ seɣe pɛrɛ-ŋai da díkɔ̃liŋ kélee dia Eezuɛ-ƃelai sámai.

⁷ Kɛ́lɛ káa kpîŋ ƃé mɛni-ŋai ŋí kélee kɛ̂i kàa.

Gono-tee lɔii ma lûwa-ŋai

⁸ “Mɛni ma, ka dɔ̂ŋ-ŋai kélee mɛi káa ŋa sâa dɛɛ̂i kápɔi a gɛɛ wala-wala é kɛ́ káyêei kálɛɛ pâi Zɔdiŋ Ya-leei tíyenii ká seri ǹɔii su,

⁹ Yâwɛɛ è góno tèe la kánâŋ-ni yêei da dísuui. Ǹɔii ŋí lɛ̂lɛɛi sí-sɛŋ kpɛtɛ mɛni ma.

¹⁰ Ǹɔii ka liî mai vé yɛ̂ɛ ƃɛ́i ka kulâi naai. Ka kâa sí-sãa sì ǹɔii mâ fɛ̂ɛ ká kɛ́ yá pù dîa.

¹¹ Kɛ́lɛ ǹɔii ka liî zu ka naa siɣe a kápɔɔi, gáa a yée da tiŋ-tiŋ lɔii. Gbɔ́ɔi ya káa gbonôi.

¹² Káɣâlai Yâwɛɛ kpaaŋɔɔ̂i ǹɔii ŋí mɛni ma. A màa kpɛ̀ɛ a tãi kélee.

¹³ “Mɛni ma ka dɔ̂ŋ-ŋai mɛi kâa tɔ̃yâ-pere su, ka Káɣâlai Yâwɛɛ wɛ́li a kálii kélee da kámɔleŋ kélee, ka tíi kɛ́ mì,

¹⁴ gɛ̀ ní a pâi gɛ̂i tuna kɛ́ pù kási-sãai dîa a sama ya da fólo-laa ƃóɔɔ kélee.

¹⁵ A pâi gɛ̂i kala támaa kɛ́ ƃò naa kátaa-tulɛ-ŋai mɛni ma dí kɛ́ mìi dílii kɛ́ làa.

¹⁶ Ka kámɛi káa. À wàla kɛ́ tí, kálii a pâi penêi ká kɛ́ tíi kɛ̀ Ɣâla da kpɛ́ni-ŋai dîɛ.

¹⁷ Ǹyaŋ kà gɛ̀ tí, Yâwɛɛ a pâi ǹíi ŋwânai é ŋ̀ele-kɔlɔŋ lá tɛ́, tuna fa ŋɔ́nɔ pù, ǹɔii fa ŋɔ́nɔ sí-sãa kpɛ̀tɛ.

¹⁸ “Ŋ̀óo-ŋai ŋí ŋa mòi kâai é lɛ́ɛ kákili-ŋa. Ka dípɔ̃yɛ seɣe-ƃela-ŋa dîa da ŋ̀iri káyee ma ká da pɛlɛ kátɔ̂ŋ lá a gɛɛ é kɛ́ a kili-too-ŋa.

¹⁹ Ka dílɛ kánîa-pɛlɛɛi dîa. Ka kɛ́ lônoi é pîlaŋ dîa a tãi kà kɛ̀ seeni la kápɛrɛ-ŋai lá, tãi ka kɛ̀ siâi lai, tãi kà kɛ̀ laani lai da tãi ka kɛ̀ ká mu-siɣei lai.

²⁰ Ka dípɔ̃yɛ kákpôŋ falaŋ-ŋai dîa da kpôŋ-soŋ wuru-ŋai,

²¹ a gɛɛ ka kálônii ká kɛ́ ƃò ɣele ma yɛ̂ɛ berei ŋ̀elei da ǹɔii díkaa lai.

²² “À kɛ̀ ka dɔ̂ŋ-ŋai ŋí mɛi kàa, ka Káɣâlai wɛ́li, kátûa yɛ̂ɛ beerei a ŋ̀wɛ̂lii lai, káŋɛi kɛ́ ƃò nɔ́ ǹyaa tɔnɔ mà,

²³ a pâi lɔii-ŋuŋ kpaya-kpaya wála-wala támaa su-ƃela kpɛ̂i káperêi é gɛ́ dílɔii ŋuŋ-ŋai dí kɛ́ a kápɔɔ.

²⁴ Ƃɛ́i kélee ka pâi naa sônii a pâi kɛ̂i a kápɔɔ. Kálɔii su a pâi kɛ̂tɛi é kúla vɛ̃ɛ-kpâlaŋ ma é tóo Lɛƃanɔŋ lɔii ma, é síɣe Yufeletii Ya-leei ma é tóo vóloi liî-pere Mɛditɛrenia Yuoi ma.

²⁵ Núu da líi fé pâi kpelêi é kɔ́ pɛ́lɛ kâa. Káɣâlai Yâwɛɛ a pâi kámaa kɔ̃ɔ̂i ƃɛ́i kélee kà lì naai.

²⁶ “Ka gáa, lûwa da naɣaŋ-laa káa naa kámɛni ma.

²⁷ Lûwa a pâi kɛ̂i kâa à kɛ̀ kà dɔ̂ŋ-ŋai mɛi kaa nyii Káɣâlai Yâwɛɛ a sâa dɛɛ̂i kápɔi.

²⁸ Ka pâi náɣaŋ sɔlɔ ƃôi, à kɛ̀ ka káyee sèe ɣâla da kpɛ́ni-ŋa mu ká kɛ́ dífɛ̀li nyii-ŋai káfe kɛ́ ní a díkɔlɔŋɔɔi.

²⁹ Káɣâlai Yâwɛɛ à gɛ̀ kà seri ǹɔii ma a pâi dɛɛ̂i kápɔi, ka pâi ǹûwa-ŋai lɛ̂i ká zɔlɔ ƃô Gɛriziŋ Yeei mai, ká náɣaŋ-ŋai lɛ́ ká zɔlɔ ƃô Ibaa Yeei mai.

³⁰ Ka gɔ́lɔŋ a gɛɛ ǹyée-ŋai ŋí díkaa Zɔdiŋ Ya-leei pôlu-pere vóloi liî-pere Morɛ ŋ̀úru kɔlɛ nyii gáa Geega taai kɔlɛ-perei. Ǹɔii ŋí káa a Keena-ŋai pɔ́ɔ nyii-ŋai díkaa Zɔdiŋ tiŋ-tiŋ sui.

³¹ Ka pá nâa Zɔdiŋ Ya-leei tíyenîi ká lí ǹɔii Káɣâlai Yâwɛɛ a dɛɛ̂i kápɔi su. Ka lí ká kɛ́ ƃò naa.

³² Ka dɔ̂ŋ-ŋai mɛi káa ŋa sâa dɛɛ̂i kápɔi.