Danîa 8 - Bible

Danîa è ƃála sîrɛ tɔnɔ da ƃoli sîrɛ kàa zĩ̂a su

¹ Ńyãa Danîa ŋá zĩ̂a kàa Gâloŋ Bɛsaza ŋɔkâloŋ-laa koraŋ zaaƃai su zĩ̂ai maa-ŋuŋ káa ḿîi pôlu ma.

² Ǹyii su ŋá ŋ́gbîŋ kàa tɔɔ̂ni Susa taa-lee maa tínaŋɔ̂ɔi su Elaŋ lɔii kpiniŋ su Ulai Ya-leei kɔlɛ.

³ Ŋá ŋɛ́i tɛ̀ nɔ́ ɣelêi ŋá ƃála sîrɛ tɔnɔ káa tɔɔ-ni ǹyá tɛɛ-perei kɔlɛ m̀ĩla kɛ́ ƃò ŋûa feerɛ. M̀ĩla veerɛ è kɛ̀ a gôya-goyaa. Ǹaa kɛ́ɛ tíi, m̀ĩla dɔnɔ è kòya é tɛ́ɛ m̀arâŋ ma.

⁴ Ŋá kɛ̀ nɔ́ maa kpɛɛ̂i gɛ́ tìnaŋ-tìnaŋ gɛ́ vóloi liî-pere, yá-ŋua-pere da séɣai-pere tua-tua a m̀ĩla. Ŋ̀wála-wâlaa suai da fa pɔ̂ri kɔ̂i bɔ́ da fa tela pɔ̀ri gbîŋ ŋuŋ ma ƃôi ǹyêei. È m̀ɛnii kɛ̀ è kɛ̀ ŋ̀wɛ̂lii é gɛ̂i. Ŋ̀uŋ su è fùloŋ kpɔ́ a zu kɛ́tɛ ŋ̀ɛ́i é tɛ́.

⁵ Tãi ŋá kɛ̀ ŋ́gili ŋá siâi la m̀ɛnii ŋí su-kulâi mai, ƃoli sîrɛ tɔnɔ è kùla vóloi liî-pere gɛ́ kîrɛ sìɣɛ gɛ́ pà. È kɛ̀ kîrɛ siɣêi kpɔ́ gɛ́ pà yɛ̂ɛ nya ƃe gɔ́ɔ fé kɛ́ ní lɛɣɛ̂i ǹɔii ma. Mĩla è kɛ̀ tɔnɔɔ gɛ́ ƃò tɔɔ̂ni ŋ̀ɛ́i loai.

⁶ Gɛ́ɛ pâi, è déniŋ tɔ̀ɔ m̀ála sîrɛi ma kɛ̀ tɔɔ̂ni ǹyá tɛɛ-perei ma é dùa a mĩla a ŋ̀ánaa.

⁷ È pɛ̀lɛ mà a wála-wala-laa é mĩla veerɛ ɣále, é ŋwána-ŋwana. M̀álai fé pɔri ní tɔɔɔ̂i ŋ̀ɛ́i. È m̀álai too ǹɔii ma é ƃɔ́rɔŋ ma. Núu da fé pɔri ní tɔɔ̂i m̀olii ŋɛ́i a gɛɛ é m̀álai kúla ǹyêei.

⁸ M̀olii su è kɛ̀ a gbanaŋɔɔ a ŋ̀ánaa. Ǹaa kɛ́ɛ tíi, m̀ĩla è ɣàle. M̀ĩla nina kpaya-kpaya náaŋ è kùla maa-ŋuŋ pɔ́ɔ ŋá, dísãa-sãa kwaa da kpɛ́ni ma a tɛɛ-ŋa.

⁹ M̀ĩla nina tɔnɔ è ŋɔ́nɔ kùla mĩla-ŋai ŋí dɔnɔ su é tɔ́ɔ. È kùla a guro-te kɛ́lɛ nàa kɛ́ɛ tíi, è ƃɔ̀lɔ wála-wala kɛ̀ ƃò ǹyêei. Ŋɔwála-walai è kɛ̀ a zeriɛɛ séɣai-pere, vóloi liî-pere, da Gono Tee Lɔii ma pere.

¹⁰ È kɛ̀tɛ é kôya é seri ŋ̀ele-kɔlɔŋ su. È kɛ̀ a ŋ̀wála-wala é tɛ́ɛ ŋ̀elei su sãai dîa da bɛmɛlɛŋ kao-ŋai. È da-ŋa kùla ŋ̀elei su é dítoo ǹɔii ma é ƃɔ́rɔŋ dîa.

¹¹ È ŋ̀elei su kɔkuluƃa-ŋai kélee Láa Túɛ-nuui maa fôo. È ŋɔɣele kélee sala kula mɛni-ŋai kpèra é Ŋ̀âla-pɛrɛ Kɛ́tɛi maa tĩa kara.

¹² Ǹûai dífe nâa kɛ́ ní sama-sãa tɛɛ̂i yɛ̂ɛ berei maa nɛ̃ɛi kɛ̀ dí gɛ́ lai. Dí kɛ̀ sɔnyɔ̂ŋ tee-tee kɛ̂i. Dífe kɛ́ ní Ɣâla mɛni kpɔ-kpɔɔi kɛ̂i ŋɔ́nɔ. Dí díyee kùla dɔ̃yâ mɛnii mu dí dòo. M̀ɛnii kélee m̀ĩla-loŋ è gɛ̀i, ŋ̀aa sèe è kɛ̀ a ǹɛ́lɛɛ.

¹³ Nya ƃe ŋá Ɣala-taa kela feerɛ kàa. Ŋá dɔnɔ wóo mɛni ǹyɛɛ m̀arâŋ-nuui m̀ai, “Tãi ɣɛɛlu ƃé m̀ɛni-ŋai ŋí kɛ̀ zĩ̂ai su a pâi kɛ̂i lai? Tãi ɣɛɛlu ƃé m̀ɛni nyɔ́mɔɔ maa pɔlɔ-pɔlɔɔ-ŋai ŋí da pâi ŋ̀ele kélee salai pɔ́ɔ-ŋa siɣêi lai? Tãi ɣɛɛlu ƃé ŋ̀âla-taa kɔkuluƃa-ŋai da Ŋ̀âla-pɛrɛ Kɛ́tɛi da pâi kɛ̂i mɔ̃lɛi lai?”

¹⁴ Ŋ̀âla-taa-kelai gbéli è zu-too ǹyɛɛi, “Ɣele-wulii da ɣele-wala wála feerɛ ŋuŋ saaƃa (2,300) tɛ́ɛ pôlu ma, Ŋ̀âla-pɛrɛ Kɛ́tɛi a pâi ŋɔ́nɔ kɛ̂i a maa waa, ǹûa díkɛ Ɣâla fɛli naa.”

Ŋ̀âla taa-kelai Geƃɔlɔ è zĩ̂ai maa mɛ̂ni ŋá lɛ̀

¹⁵ Ŋá kɛ̀ tɔɔ̂ni ŋ́gɛ ǹaa maa kpɛ̂ɛ a gɛɛ ŋá m̀ɛnii ŋá káa kɛ̀ kɛ̂i. È kɛ̀ nɔ́ tí ŋá sɛŋ da káa tɔɔ̂ni ŋɛ́i túɛ yɛ̂ɛ núu.

¹⁶ Nya ƃe ŋá tóli-woo mɛ̀ni gɛ́ kùla Ulai Ya-leei ma pere ǹyɛɛi, “Geƃɔlɔ, zĩ̂ai ŋí mɛni ŋá lɛ́ ǹalôŋ ŋí ma.”

¹⁷ Gɛ́ɛ lɛ̀ɣɛ̂i ŋ́gɔlɛ mai, mĩli-mili ŋánaa è kɛ̀ pûi mâ ŋá tóo ǹɔii ma kpala-ɣala. È mò mâ ǹyɛɛi, “Núu-kpune ǹóŋ, zĩ̂ai ŋí mɛni ŋá káa kpɔ́ ma a ǹɛ́lɛɛ. Gɔ́lɔŋ a gɛɛ ŋ̀éniɛi kpɛɛ-ŋa nɔ́ ká ŋí.”

¹⁸ Gɛ́ɛ lônoi ḿbɔi, nyii è tɛ̀ɛ a ńyãa ŋá ŋuŋ ma pîlaŋ ǹɔii ma. È ńyee sòŋ ŋá ḿu-siɣe ŋá tɔ́ɔ.

¹⁹ È mò ḿâ ǹyɛɛi, “Ŋa m̀ɛnii ƃôi yâ pâi kɛ̂i tãi kpua yée mu Ɣâla ŋɔlii ŋwânai pôlu ma, kpɛ́ni fêi, zĩ̂ai ŋí pîlaŋɔɔi ŋ̀éniɛi kpɛɛ-ŋa ma.

²⁰ “Í ƃála naɣa kàa m̀ĩla kɛ́ ƃò ŋ̀ûa feerɛ. M̀ĩla feerɛi tí ƃa Midia da Pɛsia kaloŋ-laai maa pɔkɔɔŋ.

²¹ M̀oli sîrɛi í gàai ƃa Gurii kaloŋ-lai pɔkɔ̂ɔŋ. M̀ĩlai nyíi kɛ̀ ŋ̀ɛ́i-gao loai ƃa gâloŋ maa-ŋuŋ.

²² M̀ĩla náaŋ kpɔ́ tí kùla dítɔɔ dɔnɔi pɔ́ɔ ŋá ɣalei ƃa gâloŋ-laai ǹáaŋ pâi m̀u-siɣei. Kɛ́lɛ wála-wala-laa támaa fé pâi kɛ̂i maa kâloŋ-ŋai yêei yɛ̂ɛ bɔlɔ-ŋai.

²³ “Da pâi sɔnyɔ̂ŋ kpɛɛ pôlu ma-ŋa kɛ̂i dítãi é lɛ́ɛ pâi kpɛɛ̂i. Ǹyaŋ à kɛ̀ tí, fɛ̂ɛ dí mɛni kula-maa kpânaŋ sɔlɔ ƃó. À kɛ̀ tí, núu da kpɛ́ni a pâi dípɔɔ ŋá siɣêi. Ǹúui ŋí a pâi kɛ̂i a kíri-nuu, loo mɛni támaa kpɛtɛ târe kɛ́ ƃò ǹyêei.

²⁴ Ŋɔwála-walai su a pâi kɛ̂i a gbanaŋɔɔ. Kɛ́lɛ vé pâi kɛ̂i a gbîŋ wala-wala. A pâi mɛni kpɛtɛɛ nyɔ́mɔɔ támaa kɛ̂i. M̀ɛnii kélee a pâi ǹyée seêi m̀ui, ŋ̀aa-see a pâi kâi a ǹɛ́lɛɛ mì. A pâi ŋ̀wála-wala-ƃelai da Ɣâla ŋɔnûai su-karâi.

²⁵ A pâi ǹûai kîrii a ŋɔwôya tare-ŋai. À ǹyée pìli mɛni da kélee su, ŋ̀aa-see a pâi kɛ̂i. A pâi kɛ̂i a su-mɛni kɛ̂tɛ nuu. A pâi ǹûai kîrii da díkili kɛ mà, é dísu-kara. A pâi tɔɔ̂i gâloŋ-ŋai mɛi Kâloŋ ma. Zu a pâi karâi. Kɛ́lɛ núu-kpune kɛ́ mɛni fé pâi kɛ̂i la.

²⁶ Ŋ̀ele-wûlii da ŋ̀ele-wala zĩ̂ai ŋí, dísu kulâ káa a tɔ̃yâ. Dílɛɛ nɔ́ íkili-ŋa ífe mò núu da ma kpɛ́ni fêi, tãi su-kôyaa a pâi tɛɛ̂i m̀ɛni-ŋai ŋí dílɛɛ pâi kɛ̂i.”

²⁷ Kɔlɔ è kpɛ̀ɛ ḿâ ŋ́gɔlɔ é fãa ḿâ ɣele kûu kpɛ́-kpɛɛ yée mu. Nya ƃe ŋá lì pôlu ŋátii kɛ́ɛi su gâloŋ pɛrɛi mu. Ŋá zĩ̂ai ŋí làa a ŋ́gili berei máŋ fé ŋ̀á káa-ni la mai.