Danîa 7 - Bible

Danîa è ŋɔzĩ̂ai su-mɛni-ŋai lɛ̀ (7:1--12:13) Danîa ŋɔzĩ̂ai bîlaŋɔɔi vɛnɛ-sãa náaŋ mai

¹ Babelɔŋ kaloŋ Bɛsaza ŋɔkâloŋ-laa koraŋ maa-ŋuŋ su, ŋá zĩ̂a kàa. M̀ɛni-ŋai ŋá díkàa zĩ̂ai ŋí sui, ŋá dí pɔ̃yɛ.

² Tãi ŋá kɛ̀ nyîi lai, ŋá ŋɛ́i lá ƃò ǹyii su-pere. Fãa kɛ́tɛ è kɛ̀ kulâi ǹɔii m̀éla kélee ma gɛ́ yúo lòkwa a wála-wala.

³ Fɛnɛ-sãa kpaya-kpaya sii náaŋ dí kùla yúo su.

⁴ Maa-ŋuŋ è kɛ̀ yɛ̂ɛ kɔ́li, goôŋ kɛ́ ƃò mà yɛ̂ɛ kuɛ. Ŋá lɛ̀ɛ m̀aa kpɛɛ̂i goôŋ veerɛ é kúla m̀a é tóo. È m̀u-siɣe é tɔ́ɔ yɛ̂ɛ núu. È kɛ̀ tí è pɛ̀lɛ gíli ŋá siâi yɛ̂ɛ núu-kpune.

⁵ Veerɛi è kɛ̀ yɛ̂ɛ ditala. È ǹyée veerɛ tɛ̀ ɣelêi dɔɔ́ gɔ́ɔ veerɛ ŋá. Geŋe-kpãya-kao saaƃa è kɛ̀ ǹá ǹyíŋ loai. Ŋá wóo mɛ̀ni ǹyɛɛ mài, “Zɛŋ gáa ílai, dámaa míi.”

⁶ Nyíŋi pôlu ma, ŋá ŋ́ɛi làa ŋɔ́nɔ ŋá fɛnɛ-sɛŋ da kpɛ́ni káa. È kɛ̀ yɛ̂ɛ kɔ́li. Goôŋ è kɛ̀ ma náaŋ bôlu-pere, ŋuŋ kɛ́ ƃò náaŋ. Dí wála-wala tɛ̀ɛ bɔ́ a gɛɛ é kɛ́ a kâloŋ.

⁷ Tãi ŋá kɛ̀ ŋ́ɛi lâai lai, vɛnɛ-sɛŋ ǹáaŋ ɣelei è kùla ŋ́ɛi. È kɛ̀ a ŋ̀wála-walaa, gɛ́tɛɛ, maa mili-miliɛɛ. Ǹyíŋ è kɛ̀ a kɔli kɛ́tɛ. A kâa gɔ́nɔ̃ŋ sòŋ é mii, gbéli à lɛ̀ɛ, é dáŋ-tâŋ a gɔ́ɔ. Gɛ́-pere è kɛ̀ a dèe gbéli-ŋai dîa. Mĩla è kɛ̀ puu.

⁸ Tãi ŋá kɛ̀ ŋ́gili ŋá-siâi la é pîlaŋ m̀ĩla-ŋai ŋí kɛ́-pere mai, ŋá mĩla da kpɛ́ni kàa. È kɛ̀ a guro-te. È kɛ̀ nɔ́ tí m̀ĩla maa-ŋuŋ kpaya-kpaya saaƃai dí kúla berei é lɛ́ɛ tɔɔni léŋ. Mĩla loŋ ŋí ŋɛ́i-gao è kɛ̀ ma yɛ̂ɛ núu, ǹá kɛ́ ƃò yɛ̂ɛ yoŋka lono kɛ́-nuu.

Zĩai bîlaŋɔɔi ǹúui maa gáa naa wɔ́lɔ-wɔlɔ da wɔ́lɔ-wɔlɔi

⁹ Ŋ́gɛɛ gâai, ŋá kâloŋ-laa see-sɛŋ-ŋa kàa dí sée kâloŋ-laa pɔ́ɔ ŋá. Ŋ̀ɔ́lɔ-wɔlɔ nuu-pɔlɔi dɔnɔ è sèe zɛŋ-sɛŋ dɔnɔ ŋá. Ŋɔseɣei è kɛ̀ fôloi yɛ̂ɛ lúu, ŋuŋ lêɣa kɛ́ kòle yɛ̂ɛ yee fũa. Ŋɔsee-sɛŋ da ŋɔsee-sɛŋ sia-sãai, díkɛ lénîi yɛ̂ɛ ŋɔŋ.

¹⁰ Ŋɔŋ è kɛ̀ súlunîi ŋ̀ɛ́i túɛ yɛ̂ɛ yá a kɛ̀ súlunîi. Núu wála támaa dí kɛ̀ tíi kɛ̂i mì. Núu wála puu seêi puu (100,000) dí tɔ̀ɔ ŋ̀ɛ́i túɛ. Dí mɛni-sâa ƃó mɛnii kɔ́ɔ pìlaŋ dí maa kɔlɔ-ŋai lá ƃó.

¹¹ Ŋá kɛ̀ nɔ́ naa kâai, kpɛ́ni fêi vɛnɛ-sɛŋ ǹáaŋ ɣelei ŋí m̀ĩla-loŋ ŋí è kɛ̀ yoŋka woo-ŋa ƃôi. Ŋá lɛ̀ɛ naa kâai é lɛ́ɛ la zu dí vɛnɛ-sɛŋ páa, dí géreŋ.

¹² Dí vɛnɛ-sãa kpeli-ŋai díwala-walai kùla díyêei. Dí dílɛ̀ɛ ɣele ma tãi kpua yée mu.

¹³ Gbíni tɔnɔi tí, ŋá sɛŋ da kàa gɛ́ɛ yɛ̂ɛ núu-kpune. È kɛ̀ kulâi ŋ̀ele-kɔlɔŋ su gɛ́ yèŋ. È pà ǹúu pɔlɔ-pɔlɔi pɔ́ naa é gbîŋ tɛ̀ɛ bɔ́.

¹⁴ Dí wála-wala-laa, ƃaa kɛ́-maa da lɛɛ-yeei-sɛŋ tɛ̀ɛ bɔ́. Sîi kélee ɣele mai dí pɛ̀lɛ gɔ́ɔ mu dí vɛ̀li. Ŋɔkɛ-naa-laai káa naa wɔ́lɔ-wɔlɔ da wɔ́lɔ-wɔlɔ. Núu da fé pâi wɔ́lɔ ŋɔkâloŋ-laai su-karai.

Zĩa-ŋai su-kulai

¹⁵ Ńyãa Danîa, zĩ̂ai ŋá gàai, è ŋámɔ̃leŋ tumo-tumo a ŋánaa.

¹⁶ Ŋá nûa kàa tɔɔni zĩ̂ai su-pere ŋá dɔnɔ marê kɛ́ a gɛɛ m̀ɛnii kɛ̀ kɛ̂i é maa tɔ̃yâ kpîŋ lɛ́ ḿâ. È dímaa mɛni ŋá lɛ̀ ḿâ ǹyɛɛi,

¹⁷ “Vɛnɛ-sãa kpaya-kpaya náaŋ ƃa gâloŋ-laa náaŋ pâi kɛ̂i ǹɔii mɛi.

¹⁸ Kɛ́lɛ Ŋ̀âla Kɛ́tɛi ŋɔtíi kɛ́-ƃela pɔlɔ maa waa-ŋai ƃé pâi gâloŋ laa-ŋai ŋí sɔlɔ ƃôi gɛ́ ƃò díyêei wɔ́lɔ-wɔlɔ da wɔlɔ-wɔlɔ.”

¹⁹ Gɛ́ɛ tíi ŋá kɛ̀ wɛ̂lii ŋá táre máŋ a ǹɛ́lɛɛ vɛnɛ-sɛŋ ǹáaŋ ɣelei maa mɛ̂ni su. Gɛ́-pere è kɛ̀ a da kpɛ́ni m̀arâai díwɔ̂i ma. Ǹyíŋ è kɛ̀ a kɔli, gɔ́ɔ ɣalêŋ kɛ́ ƃò a ƃara. A kâa gɔ́nɔ̃ŋ sòŋ é míi, gbéli a lɛ̀ɛ é dáŋ-tàŋ a gɔ́ɔ. È kɛ̀ a fɛnɛ-sɛŋ maa mĩli-miliɛɛ.

²⁰ M̀ĩla è kɛ̀ ŋ̀ûa puu. Ŋá lɛ̀ɛ nɔ́ maa kpɛɛ̂i, m̀îla loŋ tɔnɔ é kúla é tɔ́ɔ mĩla puui sâmai. Ǹaa kɛ́ɛ tíi, m̀ĩla puui zaaƃa è kùla ŋ̀ûa é tóo ǹɔii ma. M̀ĩla maa pɔlɔ-pɔlɔi ŋí ŋɛ́i-gao è kɛ̀ ma ǹá kɛ́ ƃò yɛ̂ɛ yoŋka tée-nuu. M̀ĩla-loŋ ŋí è kɛ̀ a maa pɔlɔ-pɔlɔɔ é tɛ́ɛ gbéli-ŋai dîa.

²¹ Tãi ŋá kɛ̀ ǹaa maa kpɛɛ̂i lai, è kɔ́ pɛ̀lɛ Ŋ̀âla-ƃela maa waa-ŋai dîa é díyee mɛi ɣále.

²² Nya ƃe ǹúui gáa ɣele ma wɔ́lɔ-wɔlɔ da wɔ́lɔ-wɔlɔi è m̀ɛnii ŋá tèe Ŋ̀âla Kɛ́tɛi ŋɔnûai mɛni ma. È mò nyɛ̀ɛ tãi a seri a gɛɛ Ɣâla ŋɔnûai dí lɔii loŋ-laa maa wala-wala-sɔlɔ ƃó.

²³ È m̀ɛnii ŋá lɛ̀ ḿâ bere sîi ŋí su ǹyɛɛi, “Vɛnɛ-sɛŋ ǹáaŋ ɣelei ƃa gâloŋ-laai náaŋ pâi kɛ̂i ǹɔii mai. Vé pâi kɛ̂i yɛ̂ɛ gâloŋ-laa kpéli-ŋai. A pâi kɛ̂i ǹɔii maa kaloŋ-laa-ŋai kélee mɛi. A pâi gâloŋ-laa-ŋai kélee su-karâi.

²⁴ Zua-mĩla puui ƃa gâloŋ-ŋai pâi kɛ̂i kâloŋ-laa kɛ̂i ǹɔii ŋí su a tãi tɔnɔi. Dítãi a kpɛ̀ɛ, kâloŋ da kpɛ́ni a pâi pâi ŋɔtûa-perei kɛ́ ƃò a da kpɛ́ni maa-ŋuŋ-ŋai díwɔ̂i ma. A pâi gâloŋ puui ŋí zaaƃa yée mɛi ɣâlei.

²⁵ A pâi lônoi a nyɔ́mɔɔ é pîlaŋ Ŋ̀âla Kɛ́tɛi ma. A pâi Ɣâla ŋɔnûai lûani. A pâi kɔ̂i é díɣâla fɛli-pere-ŋai da dítɔ̂ŋ-ŋai maa fáleŋ. Ɣâla Ŋɔnûai da pâi kɛ̂i Ŋɔwála-walai mu a kóraŋ saaƃa da gbûra.

²⁶ À kɛ̀ tí, ŋ̀elei su mɛni-saa ƃó-pɛrɛi a pâi ŋɔmɛnii ŋá têei. Da pâi gâloŋ-laai kulâi ǹyêei dí zu-kara.

²⁷ Nyíŋi pôlu ma da pâi ŋ̀wála-wala-laai, gɛ́tɛ-laai da gâloŋ-laai kélee tɛɛ̂i Ŋ̀âla Kɛ́tɛi ŋɔnûai pɔ́ ǹɔii ma. Núu da fé pâi dílɔii-loŋ wála-wala-laai kulâi díyêei. Ǹúu láa túɛ-ƃelai kélee ǹɔii mai da pâi tíi kɛ̂i díyêei dí kɛ́ ƃaa kɛ́-maa tɛɛ dípɔ.”

²⁸ M̀ɛnii ŋá ǹaa kàai ǹyaa ká ŋí. M̀ɛnii ŋí è ŋámɔ̂leŋ kpɛ̃liŋ ŋ́gbonôi, ŋɛ́i é tɛi ḿâ. Kɛ́lɛ ŋá gélee lɛ̀ɛ nɔ́ ŋ́gili ŋá.