Danîa 5 - Bible

Gâloŋ Bɛsaza è kúu kɛ́tɛ kɛ̀

¹ Ɣele tɔ̂nɔ da, Nɛbukina ǹóŋ-surɔŋ Bɛsaza nyii lɛ̀ɛ bɔ́ɔ ŋá a kâloŋ, è kúu kɛ́tɛ kɛ̀ ǹɔii-lonii kpaya-kpayai ŋɔwála tɔnɔ ma. Da dîa-ni dí dílaa mìi dí ŋwã̂ai kpele gîe ma.

² Tãi dí kɛ̀ ŋwã̂ai kpelêi lai, è mò a gɛɛ dí pá a ǹâŋ ŋɔgôo da gáne kpele kɔpu-ŋai nyii è ziɣe ŋ̀âla-pɛrɛ kɛ́tɛi mu Zerusâlɛŋ a gɛɛ ǹyaa, ǹɔii-lonii, ŋɔnɛnîi, da ŋɔnɛyâa pɛlɛ-pɛlɛɛi dí ŋwã̂ai kpéle zu.

³ Dí lì dí pá a gbele kɔ̂pu-ŋai bɔ́. Ǹyaa, ǹɔii-lonii kpaya-kpayai, ŋɔnɛnîi da ŋɔnɛyâa pɛlɛ-pɛlɛɛi, dí díŋwã̂ai kpéle zu.

⁴ Díkɛɛ ŋwã̂ai kpelêi, dí kɛ̀ ŋ̀âla pɔkɔɔ-ŋai fɛlîi nyii-ŋai kɛ̀ a díkpɛtɛɛ a gôo, káne, ƃara, kɔli, wúru da kɔnii.

⁵ È kɛ̀ kpɔ́ nɔ́ tí dí núu yée-gbua-ŋa káa bɛrɛ-kaŋ ma gâloŋ-pɛrɛi mu gɛ́ wóo-ŋa pɔ̃yɛ bɛ́rɛ kâŋ ma, laŋpo wurui tɔɔ̂i kɔlɛ ma. Gâloŋ è kɛ ǹúu yeei maa kpɛɛ̂i nyii kɛ̀ ŋ̀óoi pɔ̃yɛ̂i.

⁶ Ŋ̀ɛ́i maa è fàleŋ, ǹíi kɛ́ sɛ̀lɛŋ. È kɛ̀ kpɛlînii gbêleŋ kɛ́ sɔ̀ɔŋ gîe ma.

⁷ È dɛli kpɛ́-ƃelai, bóniŋ kɛ́-ƃelai da dáre-ƃelai, worɛ̂ tɛ̀ɛ. Tãi ǹûai ŋí dí pà lai, è mò dîa ǹyɛɛi, “Ŋ̀óoi ŋí bɔ̃yɛ̂ɛi bɛrɛ-kaŋ ŋí mai, ǹuui pâi ǹônoi ḿî é zu-kula ḿâi, ŋa pâi ƃaa kɛ́-maa tɛɛ̂i maa nuui pɔ́, ŋá yɛkɛ pɔ̃yɛ mu-kpɔluɔɔ tóo m̀a, ŋá gôo yɔlɛ too gɔŋ ma, ŋá tela gɛ́ a ŋ́gɔlɛ ma-nuui veerɛ ɣelei gâloŋ-laai su.”

⁸ Nya ƃe dáre-ƃelai kélee dí pà. Kɛ́lɛ da fé pɔri ní ŋ̀óoi ŋí lônoi kpaa máŋ é zu-kula gâloŋ ma.

⁹ Gâloŋ líi è tòo pôlu kpɔ́ a ŋ̀ánaa ŋ̀ɛ́i maa é fáleŋ. Ŋ̀óoi ŋí ŋá káa mɛni maa târe da fé kɛ́ ní ǹɔii lônii kpaya-kpayai da yêei.

¹⁰ Gâloŋ da ǹɔii lônii kpaya-kpayai wóo kula-pere gúui su è gɛ̀ gâloŋ ǹee é kúla bɔ́-bɔrɔŋ é pá gúui su ǹyɛɛ gâloŋ mai, “Óo gâloŋ, kɛ́ ɣele ma wɔ́lɔ-wɔlɔ. Ílii ŋá-yeŋ. Ífe íŋɛi maa fâleŋ.

¹¹ Nâloŋ tɔnɔ da káa gâloŋ-pɛrɛi mu ƃɛ́, ŋ̀âla maa waa-ŋai dímɔ̂leŋ káa bôlu. Ínâŋ ŋɔtãi ma, è gàa a gɛɛ mɛni ŋá káa târe támaa káa ǹyêei yɛ̂ɛ ŋ̀âla-ŋai. Ǹyaa ƃe ínâŋ è gɛ̀ a duɛ mɛni ƃó-ƃelai, dɛli kpɛ́-ƃelai, bóniŋ kɛ́-ƃelai, da dáre-ƃelai láa túɛ-nuu.

¹² Mɛni-ŋai ŋí maa târe káa gbonôi. A pɔ̂ri see-woo-ŋa su-kulâi, koleŋ-kêe, da kili ŋa-tɛi mɛni-ŋa. Ŋ̀orɛ̂ tɛɛ. Ǹáa ƃa Danîa. Kɛ́lɛ ínâŋ è ǹáa sèe a Bɛtesaza. A pâi gɔlɔ-wooi su-kulâa yɛ̂.”

Danîa è gɔlɔ-pɔ̃yɛi maa mɛ̂ni ŋáa lɛ̀

¹³ Dí pà a Danîa gâloŋ ŋɛ́i túɛ gâloŋ ǹyɛɛ mai, “Yá ƃa Danîa, gɔ-soŋ dɔnɔ nyii ńâŋ è kula a dia Zudai?

¹⁴ Ŋá mɛ̀ni a gɛɛ ŋ̀âla maa waa-ŋai dímɔ̂leŋ káa ípôlu. Ítarêɛɛi, ƃaa kɛ́-maa da mɛni ŋá káa kɛ́ ƃò íyêei.

¹⁵ Ŋá dáre-ƃelai da dɛli kpɛ́-ƃelai tòli a gɛɛ dí pá dí gɔlɔ-wooi ŋí lóno dí zu-kula ḿî. Kɛ́lɛ dɔnɔ ta kpîŋ fé pɔri ní gɛ̂i.

¹⁶ Ŋá mɛ̀ni a gɛɛ núu-woo su-kula táre káa íyêei í kɛ́ pɔri mɛni kpanaŋ ŋàa-see kɛ̂i núu mi. À kɛ̀ ya gɔlɔ pɔ̃yɛi ŋí lòno í zu kula ḿî, ŋa pâi ƃâa kɛ̂i yâ, ŋá yokpo tɛ̀i mu-kpɔluɔɔ tóo yâ, ŋá gôo yɔlɔ too íkɔŋ ma. Ŋá pâi íkɛ̂i a ŋ́gɔlɛ maa nuui veerɛi ŋákâloŋ-laai su”

¹⁷ Danîa ǹyɛɛ mài, “M̀ɛlɛ sêe sãai íyêei m̀ɛnii ŋí mɛni mai, dí lɛ́ɛ naa. Ya pɔ̂ri dítɛɛ̂i núu da kpɛ́ni pɔ́. Ŋa pâi ŋ̀óoi lônoi ŋá zu-kula yɛ̂.

¹⁸ “Ŋ̀wála-wâla kélee Ɣalai è ínâŋ kɛ̀ a núu kɛ́tɛ, é mù wùyɛ é wála-wala-laa tɛɛ bɔ́.

¹⁹ M̀ɛnii ŋí è gɛ̀ lɔii-ŋuŋ támaa su-ƃela dí kɛ́ ŋumɛ mâa tɛ̀ɛ bɔ́ díkɛ yào m̀a. Diai è kɛ̀ ŋ̀wɛ̂lii é dípaai, è dípâa. Diai è kɛ̀ ŋ̀wɛ̂lii dí lɛ́ɛ a dífului, è dí lɛ̀ɛ a dífulu. Diai è kɛ̀ ŋ̀wɛ̂lii é ƃaa kɛ́-maa tɛ́ɛ dípɔ kpaa máŋ é ƃɛlɛ-too sɛ̂lɛŋ diai, è gɛ̀ tí.

²⁰ Kɛ́lɛ tãi è ǹíi pène la é pɛ́lɛ sɔnyɔ̂ŋ kɛ̂i da ŋɛi-tɛi, gâloŋ-laai è kùla ǹyêei é tóo.

²¹ Dí gbɛ̀ é kúla núu-kpune sáma é lí ǹɔɔi su da fɛnɛ-sãa dí ƃò naa. Ŋɔkili ŋa-siai è nâa kɛ̀ yɛ̂ɛ fɛnɛ-sɛŋ, kala kɛ́ ƃò a gɔ́nɔ̃ŋ. Nɛŋ è lɛ̀ɛ pûi mà é gɔ́lɔŋ a gɛɛ Ŋ̀âlai nyii gáa ŋ̀elei sui ƃé gáa sɛŋ kélee mɛi. Gáa kâloŋ-laa kélee mɛi. Ǹúui a wɛ̂li é da tɛɛ bɔ́i, a pɔri gɛ̂i tí.

²² “Kɛ́lɛ yái ŋí a ǹóŋ-surɔŋ Bɛsaza, ífe tûai a maa yêŋ-pere berei máŋ í m̀ɛni-ŋai ŋí kɔ́lɔŋ lai.

²³ Ya tɔɔ Ŋ̀elei su Ɣalai ma. Í mò a gɛɛ gbele sɛŋ-folo-ŋai ínâŋ è díkùla Ŋ̀âla-pɛrɛ Kɛ́tɛi mu Zerusâlɛŋ é pá a diai, dí pá a dia ípɔ a gɛɛ yá, ǹɔii-lônii kpaya-kpayai, ínɛnîi da ínɛnî pɛlɛ-pɛlɛɛi ka dîa-ni ká ŋwã̂ai kpele zu. Ya ɣâla pɔɔkɔɔŋ-ŋa fɛlîi nyii-ŋai díkpɛtɛ̂i a káne, gôo, ƃara kɔli, wuru da kɔnii. Ŋ̀âla-ŋai ŋí dífa kwaa kâa, dímɛni mɛ̂ni kpaa máŋ dí mɛni da kɔ́lɔŋ. Kɛ́lɛ ífe yao-ni Ɣâla ma nyii a pɔ̂ri gɛ̂i ílɛɛ ɣele ma, kpaa máŋ ísaai, gɛ́ ƃò m̀ɛnii kélee mɛi ya gɛ̀i.

²⁴ Maa mɛ̂ni ƃé Ɣâla è ǹyéei ŋí tɛ̀ɛ la a gɛɛ é ŋ̀óo-ŋai ŋí pɔ̃yɛ.

²⁵ “Ŋ̀óo-ŋai ǹúu yeei è bɔ̃yɛi, dia ká ŋí: ‘Mɛnɛ mɛnɛ tɛkɛ pasiŋ.’

²⁶ Ŋ̀óo-ŋai ŋí su-kulai ká ŋí: Mɛnɛ, Ɣâla aâ íkâloŋ-laai maa ɣêle kuu-ŋai lóno a pá gberâi.

²⁷ Tɛkɛ, zu-kulâi ƃa aâ íkɔ̂ɔŋ a gáa a gɛɛ ífe ŋɔ́nɔ wùyɛ ní.

²⁸ Pasiŋ, zu-kulâi ƃa aâ íkâloŋ-laai ŋáa kɔlɛ. Gbua tɔ̂nɔ káa a Midia-ŋai pɔ́ɔ, gbeli kɛ́ ƃò a Pɛsia-ŋai pɔ́ɔ.”

²⁹ Nya ƃe gâloŋ è mò a gɛɛ dí yokpo pɔ̃yɛɛ mu kpɔluɔɔ tóo Danîa ma dí gôo yɔlɔ too gɔŋ ma. È Danîa kɛ̀ a gɔlɛ maa-nuui veerɛ ɣelei ŋɔkâloŋ-laai su.

³⁰ M̀ɛnii ŋí kɛ́ɛ maa kpînii tí-tí, dí Babelɔŋ-ŋai díkâloŋ Bɛsaza pàa.

³¹ Midia nuui Dairɔ è bɔ́ɔ ŋá sìɣe. È kɛ̀ a kóraŋ buu lɔ́ɔlu mɛi da káo feerɛ a maa tãi tí.