Danîa 3 - Bible

Nɛbukinaza è mò a gɛɛ núu kélee é bɔkɔ̂ɔŋ fɛ́li nyii è gbɛ̀tɛ a gôoi

¹ Ɣele tɔ̂nɔ da, Gâloŋ Nɛbukinaza è pɔɔkɔ̂ɔŋ da kpɛ̀tɛ a gôo. Ŋɔkôya è kɛ̀ a kɔ́ɔ pîlani buu lɔ́ɔlu mɛi náaŋ. Ŋɔŋa kɛ̂tɛ kɛ́ ƃò a kɔ́ɔ pîlani lɔ́ɔlu m̀ɛi náaŋ. È zèe Dura ditiŋ su Babelɔŋ kpiniŋ su.

² Nya ƃe gâloŋ è m̀ɛni láa túɛ-ƃela kpaya-kpayai kélee tòli a gɛɛ dí díŋa tɛ́ gîe ma: Gâloŋ loŋ-sinaa maa-ŋuŋ-ŋai, ǹɔii kpiniŋ tɛi-tɛi mɛi-ƃelai, ǹɔii kpiniŋ mɛi-ƃelai kɔlɛ ma-ƃelai, gâloŋ lia-woo ƃó-ƃelai, zɛŋ-kao lâai kɛ́-ƃelai, mɛni-saa ƃó-ƃela kpaya-kpayai da bɛlɛ-pɛlɛi, da ǹɔii ŋɔtíi kɛ́-ƃela kpaya-kpaya kpéli-ŋai kélee. E dí tòli a gɛɛ dí dígôo ɣala pɔkɔɔŋ tɛ́ɛ ɣâla pɔ́ ǹûai díkɛ vɛ̀li.

³ Tãi díkelee dí tɔ̀ɔ la bɔkɔ̂ɔŋ ŋí ŋɛ́i túɛi,

⁴ ǹolo too-nuui è m̀ɛnii ŋí maa lôlo tòo a ŋ̀óo tɛ́ɛ ɣelêi ǹyɛɛi, “Ŋánûa, káai kélee kùla ǹɔii ŋuŋ-ŋai sui da sîi kélee, káwoli tɔ́ɔ óo! M̀ɛnii ŋí ƃé ka pâi gɛ̂i!

⁵ Tãi nɔ́ ka dúrii wóo mɛ̀ni la da ƃɔɔ, kɔnîŋ da ŋ̀ali-sãai kpéli-ŋai kéleei, ka too ǹɔii ma ká Nɛbukinaza ŋɔɣâla pɔɔ-kɔɔŋ fɛ́li.

⁶ Ǹúui à wàla gɛ́ tíi, dí m̀aa nûui píli ŋ̀ɔŋ kpɔ̂lui su ŋ̀á ma.”

⁷ Ǹyaŋ tãi kpɔ́ nɔ́ dí dúrii wóo mɛ̀ni lai, m̀ɔɔi, gɔnîŋ da ŋ̀ali-sãai kpéli-ŋai kéleei, ǹûai, ǹɔii-ŋûŋ-ŋai da zîi-ŋai kélee dí tòo ǹɔii ma dí gôo ɣala pɔɔ-kɔ̂ɔŋ féli nyii Gâloŋ Nɛbukinaza è gbɛ̀tɛi.

Danîa da m̀arâa saaƃai Dí Gâloŋ wóo pìli

⁸ Ǹaa kɛ́ɛ tíi, Babelɔŋ tare-ƃelai da-ŋa dí pà gâloŋ pɔ́ naa a gɛɛ dí mɛni pɛ́lɛ Zûu-ŋai dîa.

⁹ Dí mò ma dîyɛɛi, “Óo Gâloŋ, ífulu-laai su é koyaa!

¹⁰ Í tɔ̂ŋ tɛ̀ɛ óo Gâloŋ, a gɛɛ tãi kpɔ́ nɔ́ núu kélee da dúrii wóo mɛ̀ni, m̀ɔɔi, gɔnîŋ da ŋ̀ali-sãai kpéli-ŋai kélee, ǹûai, ǹɔii-ŋûŋ-ŋai da zîi-ŋai kélee dí tòo ǹɔii ma dí ígôo ɣala pɔɔ-kɔ̂ɔŋ féli.

¹¹ Ǹúui à wàla gɛ́ tíi, dí m̀aa nûui píli ŋ̀ɔŋ kpɔ̂lui su.

¹² Kɛ́lɛ Zûu ǹyaŋkpa saaƃai ŋí, Sadura, Misãŋ da Abɛnigo nyii-ŋai í díkɛ̀ a Babelɔŋ lɔii kpiniŋ mɛi-ƃelai dífe díyee seêi ítɔ̂ŋ mu. Díkaa nɔ́ ƃɛ́ dífa íɣâla-ŋai fɛ̂li da ígôo ɣala pɔɔ-kɔɔŋ nyii í gbɛ̀tɛi.”

¹³ M̀ɛnii ŋí è ŋ̀wana kpɔ́ gâloŋ ma a ŋánaa, é nûa tɛɛ ǹyaŋkpa-ŋai ŋí kanai. Dí pà a dia Gâloŋ ŋɛ́i túɛ.

¹⁴ È mò dîa ǹyɛɛi, “Tɔ̃yâ ƃe ŋí ŋa m̀ɛnii a kálaai? Káfa ŋáɣâla-ŋai fɛ̂li kpaa máŋ ká ŋágôo ɣala pɔɔ-kɔɔŋ nyii ŋá gbɛ̀tɛi, káa Sadura, Misãŋ é pɛ́lɛ Abɛnigo ma?

¹⁵ Da pâi dúrui fɛ̂ɛi, m̀ɔɔi, gɔnîŋ da ŋ̀ali-sãai kpéli-ŋai kélee. Kà maa wôo-ŋai ŋí mɛni, kà tòo ŋáɣâlai ŋá gbɛtɛi kɔ́ɔ mu ká vɛ̀li. Kɛ́lɛ kà wàla gɛ́ tí, da pâi kápilîi ŋ̀ɔŋ kpɔ̂lui su kpɔ́ nɔ́ ŋ̀á ma. A gɛ̀ tí, lé ɣâla nênɛ ƃé pâi káŋuŋ ma ƃôi ńyêei.”

¹⁶ Nya ƃe Sadura, Misãŋ da Abɛnigo dí gâloŋ wóo su tòo dîyɛɛ m̀ai, “Óo Gâloŋ Nɛbukinaza, kúfa pɔ̂ri kúkpîŋ ŋuŋ ma ƃôi íyêei m̀ɛnii ŋí su.

¹⁷ À kɛ̀ Ŋ̀âlai kwa tíi kɛ̂i mii a pâi kúkulâi ŋ̀ɔŋ kpɔ̂lui su, a pâi kúlâi íyêei, óo Gâloŋ!

¹⁸ A nɛ̃ɛ ma kpîŋ vé gɛ̀, kúfe pâi wɔ́lɔ tíi kɛ̂i íɣâla-ŋai da mì kpaa máŋ kú pɛ́lɛ ígôo ɣala pɔɔ-kɔɔŋ í gbɛtɛi gɔ́ɔ mu kú vɛli a dɔnɔ kpîŋ.”

Dí mò a gɛɛ dí Danîa da m̀arâai páa

¹⁹ Nya ƃe Gâloŋ è ǹíi ŋwàna kpɔ́ Sadura, Misãŋ da Abɛnigo ni dîa a ŋ̀ánaa núu kɛ́ gàa ŋ̀ɛ́i ma. È mò a gɛɛ dí ŋ̀ɔŋ ŋí ŋá tɛ́ ǹaa é fãa gîei lɔ́ɔlu mɛi feerɛ é tɛ́ɛ bɔlɔi ma.

²⁰ È mò gɔ́kɔ-ƃela wála-walai da-ŋa dîa a gɛɛ dí Sadura, Misãŋ da Abɛnigo ɣiri dí dípili ŋ̀ɔŋ su.

²¹ Dí dílɛ̀ɛ a dímaa ɣiriɛɛ dí díɣíri dí dípili ŋ̀ɔŋ su.

²² Gâloŋ wóo è kɛ̀ a ŋ̀uyɛɛ. M̀ɛni ma dí ŋuŋ ŋáa tɛ̀ a ŋ̀ánaa. Gɔkuluƃa-ŋai kɛ̀ liî a ǹyaŋkpa-ŋai ŋí a gɛɛ dí dípili ŋɔŋ kpɔ̂lui sui, ŋ̀ɔŋ wuleŋ è dípaa, kpɛ́ni fêi ǹaa è kɛ̀ a vãa é tɛ́ɛ bɔlɔi ma.

²³ Nya ƃe Sadura, Misãŋ da Abɛnigo dílɛ̀ɛ kpɔ́ a díɣiriɛɛ kpíŋ-kpíŋ dí dí tóo ŋ̀ɔŋ sâmai.

²⁴ Gâloŋ è mu sìɣe é tɔ́ɔ a maa félaa a kili ŋa tɛ̂i pere. È ŋɔlia-woo ƃó-ƃelai marê kɛ̀ ǹyɛɛ dîai, “Kɛrɛ̂ɛ núu saaƃa ƃé kú díɣìri ku dípili ŋ̀ɔŋ sui?” Dí ŋ̀óo su tòo dîyɛɛ mài, “Gâloŋ, bere ƃé è kɛ̀ la.”

²⁵ Ǹyɛɛ dîai, “Ka gáa! Ŋa kpalolo náaŋ kâai siâi ŋ̀ɔŋ su, ɣɛli fé da ma. Ŋ̀ɔŋ fé tela da kerenîi. Ǹúui ǹáaŋ ɣelei káa yɛ̂ɛ ǹúui kùla Ɣâla-taai.”

Dí Ǹyaŋkpa saaƃai ŋuŋ ma ƃo dí dítii maa tɛ́

²⁶ Gâloŋ Nɛbukinaza è mù sìɣe é lí ŋɔŋ kɔlɛ. È làɣi a ŋ̀óo su-kɛ́tɛ ǹyɛɛi, “Sadura, Misãŋ, Abɛnigo, Ŋ̀âla Kɛ́tɛi yée mu-ƃelai, ká kúla ká pá ƃɛ́.” Nya ƃe Sadura, Misãŋ da Abɛnigo dí kùla ŋɔŋ su.

²⁷ Gâloŋ loŋ-sinaa maa-ŋuŋ-ŋai, ǹɔii kpiniŋ tɛi-tɛi mɛi-ƃelai, ǹɔii kpîniŋ mɛi-ƃelai kɔlɛ ma-ƃelai, gâloŋ lia-woo ƃó-ƃelai, kélee dí pà dítinaŋ a dia. Dí gàa a gɛɛ ŋ̀ɔŋ fé mɛni da kɛ́ ní a dia. Díŋuŋ-leɣa da maa ɣiri-sãai kɛ̀ diai da fé kéreŋ-ni. Ŋɔŋ kûŋ fé tela kɛ́ ní dîa.

²⁸ Gâloŋ è mò dîa nyɛ̀ɛi, “Laa maa-tɛ é tɛ́ɛ Káɣâlai pɔ́ ka kula ŋ̀ɔŋ kpɔ̂lui sui. È ŋɔkélai tɛ̀ɛ é káŋuŋ ma ƃó ká kúla ŋ̀ɔŋ kpɔ̂lui su. Ká làa la. Ká ŋ́oo pìli. Káfe fáa ní a gɛɛ ka ŋáɣâlai fɛ́li. Ká fàa ma a gɛɛ ká sáa é tɛ́ɛ la ɣâla da kpɛ́ni fɛliɛɛ ma fɛ̂ɛ nɔ́ Káɣâlai.

²⁹ “Nya ƃe gâloŋ è dɛ̀ɛ a tɔ̂ŋ a gɛɛ núu da kélee a lóno nyɔ́mɔɔ kɛ̀ é pîlaŋ Sadura, Misãŋ da Abɛnigo-ni Díɣâlai ma dí maa nuui su tée-tee a gbua-kpua, dí ŋɔpɛ́rɛi wólo. Ɣâla da fé ǹaa é núu ŋuŋ ma ƃó bere sîi ŋí su yɛ̂ɛ Ǹyaa.”

³⁰ Gâloŋ Nɛbukinaza è Sadura, Misãŋ da Abɛnigo ni dítii maa tɛ̂ Babelɔŋ Lɔii-kpiniŋ su.