Azaya 8 - Bible

Azaya ǹóŋ maa sɔlɔ ƃó mɛni káa a ŋɛi kɛ́-maa ǹûai mɛ̂ni ma

¹ Nya ƃe Yâwɛɛ è mò ḿâ ǹyɛɛi, “Kɔlɔ-pɔ̃yɛ kpôŋ tɔnɔ siɣe í ǹáai ŋí pɔ̃yɛ ma kpɔ́ a gbaya-gbaya: Makɛ-sala-siba.”

² Nya ƃe ŋá táre-ƃela feerɛ marê kɛ̀ a gɛɛ díkɛ a ŋaserê-ŋa. Dáre-ƃela feerɛi ŋí ƃé kɛ̀ a Ɣâla ŋɔlóno kɛ́-nuui zâla láa soŋ-nûui Yuraya da Zɛberekaai ǹóŋ Zɛkɛraya.

³ Nyíŋi pôlu ma, ŋánɛnîi è koo sîɣe é lóŋ-surɔ̂ŋ maa sɔlɔ ƃó. Nya ƃe Yâwɛɛ è mò ḿâ ǹyɛɛi, “Ǹáa sée a Makɛ-sala-siba.

⁴ Ǹôloŋ ŋí é lɛ́ɛ pâi pɔrîi ǹee láa tôlii a ‘Yaai,’ kpaa máŋ é ǹâŋ láa tóli a ‘Datá,’ zãâi Asiria kaloŋ è gùla yêei kɛ̀ Dɛmɛika da Sameria kɔi sui, da pâi gélee kulâi ǹyêei.”

Asiria kaloŋ a pâi

⁵ Yâwɛɛ è ŋɔ́nɔ lòno ḿbɔ ǹyɛɛi,

⁶ “Zuda-ƃelai ŋí da díyee kúla ḿû ńyãai ŋ́gaa yɛ̂ɛ Siloa ya-ɣɛli-ŋai nyii-ŋai da ɣîliŋ a gɔlɔ saa mai. Da gbɛtɛ̂i a gɛɛ dí pá Gâloŋ Lesiŋ da Gâloŋ Peka pɔ́ naa kpɔŋ mâa mɛni ma.

⁷ M̀ɛni ma, ńyãai a Ǹuu-namui, ŋa pâi dílɔ̂i Asiria kaloŋ yêei. A pâi pâi a ŋɔkɔ́ kuluƃa-ŋai. Da pâi tínanîi dîa yɛ̂ɛ Yufeletii Ya-leei a nûa maa tînaŋ.

⁸ Ǹya fɛ̂ɛi a pâi tɛ̂i é kóyɛŋ núu kâraŋ ma, é tɛ́ɛ Zuda é ǹaa sãai kélee mɛi pɛ́lɛ.” Ɣâla káa kúkɔlɛ. A ǹɔii maa kɔ̃̂ɔ yɛ̂ɛ ƃerei tɛ́ɛ kɔ̃ɔ-lee a ǹônii maa kɔ̃̂ɔ la a ŋɔwála-wâlai.

⁹ Ǹɔii-ŋuŋ-ŋai su-ƃela, ka pú kákîe ma ká tɔ́ɔ a gbanaŋɔɔ. Ka káwoli tɔ́ɔ káai ǹɔii-ŋuŋ kôya-koyaa-ŋai sui. Ka kákpîŋ kpɛtɛ kɔ́ kɔ mɛni ma. Kɛ́lɛ yao é kɛ́ kákponôi. Tɔ̃yâ ma yao é kɛ́ kákponôi.

¹⁰ Ka mɛni kpɛtɛɛ-ŋa kɛ́ kɛ́lɛ díŋaa-see fé pâi kɛ̂i. Ka m̀ɛni-ŋai ƃó díkaa kálii sui, kɛ́lɛ gélee a pâi kɛ̂i nɔ́ kpɛ́ni-kpɛni, kpɛ́ni fêi, Ɣâla káa kúkɔlɛ.

Yâwɛɛ è Ɣâla Azaya lia-wôo ƃò

¹¹ Yâwɛɛ è ńia-wôo ƃò a gbanaŋɔɔ a gɛɛ fé ńyee pìli ǹûai tûa-perei da su. È mò ḿâ ǹyɛɛi,

¹² “Ífe íyee pìli ǹûai dí kíri mɛni kpɛtɛɛi da su. Ífe fúlɔi máŋ yào m̀ɛni-ŋai dîa da yâo dîai.

¹³ Kɛ́lɛ ńyãai a Ŋ̀wála-wâla kélee Yâwɛɛi, ḿaa waâi, ńyãa ƃé í yao ḿâ, ḿaa mɛ̂ni ǹyao kɛ́ ƃò íkɔlɔ̂i.

¹⁴ Ŋámaa wâa-laai su kɛ̂tɛi. Ŋ́gaa yɛ̂ɛ kɔni nyíi nûa da kâreŋ la díkɛ tooi. Ŋ́gaa yɛ̂ɛ ƃáre Zuda da Zerusâlɛŋ-ƃelai mɛ̂ni ma.

¹⁵ Ǹyaŋ núu támaa da pâi karênii a gɔnii ŋí dísu é kara. Núu támaa da pâi kɔ̂i a m̀árei ŋí.”

Núu lónoɔ zaa-ƃelai pɔ́ maa lia-woo

¹⁶ Káai a ḿbôlu-ƃelai, fɛ̂ɛ ká ŋ̀orɛ̂-woo-ŋai lâai kɛ́ ká m̀ɛi káa nyii-ŋai Ɣâla è dɛ̀ɛ ḿbɔi.

¹⁷ Yâwɛɛ a gbîŋ loo ŋɔnûai dîa, kɛ́lɛ ŋá kili tɔɔ-maai a pâi kɛ̂i nɔ́ m̀a.

¹⁸ Kwa ǹîa pɛlɛɛi nyii-ŋai Yâwɛɛ a dítɛɛ ḿbɔi, kúkaa a ŋɛi kɛ́-maa Eezuɛ-ƃelai sáma Ŋ̀wála-wâla kélee Yâwɛɛi mɛ̂ni ma nyii ŋɔkɛ-naai káa Zãiyɔŋ Yeei mai.

¹⁹ Nûa da pâi m̀ôi yâ a gɛɛ í lí tɛli kpɛ́-ƃela da m̀ɔ̂leŋ tɛli kpɛ́-ƃelai pɔ́ nyii-ŋai da lôno ninîŋ-woo su da ɣelêi-perei. Da pâi môi dîyɛɛi, “Berei máŋ gáa tí lai, nûa da pɔ̂ri mɔ̂leŋ-ŋa marê kɛ̂i worɛ̂-woo mɛni ma, dí zaa-ƃelai marê kɛ́ vúlu-ƃela mɛni ma.”

²⁰ Kɛ́lɛ díwoo su-too yɛ̂ɛi, “Ka káwoli tɔ́ɔ m̀ɛnii ma Yâwɛɛ a ǹɛ̂i kâai. M̀ɛni-ŋai m̀ɔlêŋ-ŋai da zaa-ƃelai da mò kâai, dífa kákùla mɛnîi.”

Mɛni kpɔ̂lu tãi

²¹ Da pâi siâi-siai ǹɔii gwaa kélee. Da pâi kɛ̂i siâi puru kɛ́ dípaa, dílii toɔɔ pôlu. Puru a kɛ̀ dípaâi, da pâi dílii ŋwânai díkɛ wóo nyɔ́mɔɔ-ŋa ƃò díkâloŋ da Díɣâlai ma. Díŋɛi a pâi kɛ̂i ŋ̀elei su pere.

²² Da pâi díŋɛi pîlanii ǹɔii ma. Dífe pâi sɛŋ da kpɛ́ni kâai naa fɛ̂ɛ nɔ́ mɛni kpɔ̂lu, lii too pôlu, da kpíni su pîlaŋɔɔ nyii díkaa liî zu a diai.