Azaya 66 - Bible

Yâwɛɛ a ǹɔii-ŋûŋ-ŋai dímɛnii ŋá tee

¹ Yâwɛɛ è m̀o ǹyɛɛi, “Ŋ̀elei-su ƃa Ŋákâloŋ see-sɛŋ seêi. Ǹɔii ma ƃé ŋa ŋ́gɔɔ tɔ̀ɔ naa. Pɛ́rɛ sîi lé kɛ́ɛ ƃé ka pɔ̂ri dɔɔ̂i ḿɛni mai? Mí ƃé ka pɔ̂ri gbɛtɛ̂i a gɛɛ ŋ́gɛ ḿvii tɔ̀ɔ naai?

² Ńyãa ƃé ŋ̀éniɛi ŋí kélee kpɛ̀tɛ. Gélee káa a ḿbɔɔ. Diai ŋa pâi dímɛi kâai, dia ƃa diai dímaa yeŋɔ̂ɔi, da dípôlu tɔ̀ɔ dísɔnyɔ̂ŋ mai, díkɛ yào ḿâi, da diai da ŋ́oo mɛnii.”

³ “Ǹûai ŋí da m̀ɛni-ŋai ŋí kàa nɔ́ a mɛni fíi kpɛɛ: Ǹúui a sâla kùla a niŋai, m̀aa-nûui a núu kùla a sâla, ǹúui a ƃála-loŋ kùla a sâlai, m̀aa-nûui a ɣîla kɔŋ ɣále, ǹúui a mii-sã̂a sala kùlai, m̀aa-nûui a sâla kùla a ƃoi ŋãa, ǹúui a kéreŋ sãa kúŋ nɛ̃ɛ sala kùlai, a sãâ da kpɛ́ni-ŋa fɛ̀li. Dílii a nɛ̃̂ɛ ɣâla da kpɛ́ni-ŋa fɛlíɛɛ su nyii m̀ɛlɛ fé ŋ́goi.

⁴ M̀ɛni ma, ŋá pâi mɛni-kpɔ̂lu lâai dîa. M̀ɛnii da yâoi mai, ya ƃé pâi kɛ̂i a dîa. Ŋá gɛ̀ tí, kpɛ́ni fêi, ŋa dítòli, díta fa fâa. Ŋà lòno, dífa ŋ́oo mɛni. M̀ɛnii kélee a lâa dílii mai, ǹya ƃé da gɛ̀. Da kɛ̂ mɛni nyɔ́mɔɔ-ŋa kɛ̂i nyii ŋ̀wɛli fé ḿâi.”

⁵ Káai ka yâo Yâwɛɛ ma, kákɛ ŋ̀óo mɛnii, ka káwoli tɔ́ɔ m̀ɛnii mâ a m̀ôi. Ǹyɛɛi, “Kákpɔɔi-ƃelai da kákpɔara dîɛ ka dia ni káfa mɛni kpɛtɛɛ da kɛ̀ gîe ma, kpɛ́ni fêi, kákaa a teniŋ ƃô-ƃela. Ká ƃɛlɛ fé kákpɔɔi-kpɔɔi ƃelai da-ni koi. Da ɣɛ́lɛ maa kulâi kákponôi ńaai mɛni ma dîyɛɛi, ‘Tɔɔ Yâwɛɛ é ŋɔwála-wâla kɛ́tɛi lɛ́ é díŋuŋ ma ƃó kú ǹaa káa díkɛ koi-nɛ̃̂ɛ kùla.’ Kɛ́lɛ dia ƃé m̀baa kula-maai tí a pâi sɛ̂lɛnii dîa.

⁶ Ka káwoli tɔ́ɔ. Láɣi-woo su kɛ́tɛ a tɛ̂i daa-lêei su. Yâwɛɛ ká tí Ŋɔpɛ́rɛ Maa Waai mu gɛ́ ŋɔkpɔara-ƃelai kula-maa kɛ̀ a ŋ̀óo. Gɛ̀ ŋɔkpɔara ƃelai féla fe m̀ɛnii dí gɛ̀i mɛ́ni ma.

⁷ “Ŋá taa-lêei káa yɛ̂ɛ nɛnî ƃé m̀aa a fúloŋ a m̀aa félaa é lɛ́ɛ pâi kɛ̂i koi-têe su.

⁸ Núu da a tá wɔ́lɔ m̀ɛni-sîi ŋí da káa, kpaa máŋ dùŋ mɛni a bɔlɔɔ? Lɔii-ŋûŋ da a tá kɛ́ a lɔii-ŋûŋ fólo tɔ̂nɔ yée mu? Zãiyɔŋ fé pâi mɔ̃̂lɛi a zu kôyaa é lɛ́ɛ pâi kɛ̂i a lɔii-ŋûŋ.

⁹ Káfe gàa yɛ̂ɛ sɛŋ ƃé ŋa pâi pâi a ŋánûai a gɛ́ɛ dí dímaa fúloŋ, ŋá tée dípôlu, dífa dílôloŋ maa sɔlɔ ƃô.” Yâwɛɛ ƃé m̀o tí.

¹⁰ Ka Zerusâlɛŋ ka lii-nɛ̃ɛ kula káai daa-lêei ŋí wɛ́linii, ka lii-nɛ̃ɛ kula m̀ɛni ma! Ka lii-nɛ̃ɛ kula ka dîa-ni loníi ma, káai kélee kɛ̀ m̀aa malôŋ see-ƃôi!

¹¹ Ka pâi ŋɔtɔɔ-lâai maa koi-nɛ̃ɛ kulâi, yɛ̂ɛ lôloŋ ƃé lâani ǹee ŋíni mu.

¹² Yâwɛɛ ǹyɛɛ, “Ŋa pâi gɛ̂i í ƃûu ƃó a zu kôyaa. Ǹɔii-ŋuŋ-ŋai su tɔɔ-sãai da pâi kɛ̂i pâi ípɔ yɛ̂ɛ yá nyii ɣilîŋ nii, va kpâlai. Ya pâi kɛ̂i yɛ̂ɛ lôloŋ ƃé ǹee è ŋwɛ̂lini, gɛ́ ŋákɔ̂ŋ, gɛ́ ǹaa ńyee tɔ̃ɔ̂i gɛ́ lí la.

¹³ Ŋa pâi ká ŋánɛnɛi Zerusâlɛŋ yɛ̂ɛ berei tí lôloŋ ǹee a ŋanɛnɛ lai.

¹⁴ Tãi ka pâi nyíŋi naa kâai lai, kálii a pâi nɛ̃ɛ̂i. Ǹyaŋ a pâi kákponôi kpananîi é kákɔlɔi pono. Gɛ̀ ní ka pâi gɔ́lɔnîi a gɛ́ɛ ńyãa Yâwɛɛ ŋa kpɔŋ-mâ tɛ̀ɛ diai da ŋ́oo mɛnii dípɔ, kɛ́lɛ ŋ́gɛ ńii ŋwàna ŋ́gbɔara-ƃelai dîa.”

¹⁵ Yâwɛɛ a pâi pâi a ŋɔŋ. A pâi kɛ̂i vãai su gɛ́ pà a gɛ́ɛ diai ńii-ŋwânai diai, é díkula maa kɛ́.

¹⁶ Diai kélee kpɔ́ dísɔŋ káa dîa ŋ̀éniɛi su gwaa kélee mai, a pâi díkula maa kɛ̂i a ŋɔŋ da ƃóa-sɔ̂kpɔ. Ǹyaŋ a pâi núu támaa pâai.

¹⁷ Yâwɛɛ è m̀o ǹyɛɛi, “Diai da dí kpîŋ maa wâa a gɛɛ díkɛ ɣâla da kpɛ́ni-ŋa fɛlii, díkɛ tɔ̀ɔ díɣɛli ma kwaa-ma maa waa mai, da diai da ƃoi-sua mìi da ŋína-ŋai, é pɛ́lɛ m̀ii-sãai nyii-ŋai díƃɛlɛ kpɛɛ̂i ŋ́goi, diai díkɛ-ɣéniɛi kpɛɛ-ŋá a lɛɣɛ.

¹⁸ Ŋá díkili-ŋa-sîai da dítûa-pere-ŋai kɔ́lɔŋ. Ŋa pâi ǹɔii-ŋûŋ-ŋai su-ƃelai kélee ŋá tɛ̂i díkîe ma. Tãi da pâi pâi la díkîe mai, da pâi m̀ɛnii kâai ŋáwala-wâla laai a gɛ̀i.

¹⁹ Ǹyaŋ da pâi gɔ́lɔnîi a gɛɛ ńyãa ƃa díkula maa kɛ̂. “Kɛ́lɛ, ŋa pâi díta-ni tɛɛ̂i lɔii-ŋuŋ su kôyaa ŋa su nyii-ŋai dífe tá ḿaa-tûŋ mɛni níi, kpaa máŋ dí ŋáwala-wâla laa kɛ́tɛi káai. Ǹɔii-ŋûŋ ŋai kpîŋ ƃa: Sipîŋ, Lebia, da Ladia ƃɛ́i tɔ̃a-pili-ƃela lɛ́lɛɛ-ŋa dí káa naai, ŋá díta-ni tɛɛ Tuba da Gurii. Ǹûai ŋa pâi dítɛɛ̂i, da pâi ŋákɛtɛ-laai maa tûŋ toôi ǹɔii-ŋûŋ-ŋai ŋí su.

²⁰ Da pâi kánûai kélee kulâi ǹɔii-ŋûŋ-ŋai su dí ńzama a dîa. Da pâi pâi a dia ŋáyee maa waai ma Zerusâlɛŋ. Da pâi kɛ̂i soo-ŋa, mûu-ŋa, da soo-fáleŋ-ŋa mɛi. Da pâi kɛ̂i kɔ́kɔ keleŋ-ŋa su da géleŋ-ŋai núu a ŋ̀alai. Da pâi kɛi nɔ́ pâi a dîa yɛ̂ɛ berei Eezuɛ-ƃelai da pâ la a m̀ii-sã̂a sama-sãai sɛŋ-fôlo maa-waa-ŋa su Ŋápɛrɛ Kɛ́tɛi mui.

²¹ Ŋa pâi díta-ni kɛ̂i a sâla láa-soŋ ƃela-ŋa da Liiva-ŋa.

²² “Yɛ́ɛ berei ǹɔii nînai da ŋ̀ele-kɔ̂lɔŋ ninai da pâi kɛ̂i la naa ŋáwala-wâla laai sârai wɔ́lɔ-wɔlɔi, bere nɔ́ ƃé kánuu sûu-ŋai da kálaa da pâi kɛ̂i la naa wɔ́lɔ-wɔlɔ.

²³ Ŋ̀áloŋ nîna kuui da Vii-tɔɔ-ɣelei kélee ma, nûa da pâi kɛ̂i kulâi lɔii-ŋuŋ kélee su, díkɛ pá ƃɛ́ Zerusâlɛŋ díkɛ ḿvɛ̀li,” Yâwɛɛ ƃé m̀o tí.

²⁴ “Tãi da pâi kɛ̂i liî lai, da pâi kɛ̂i diai tɔ̀ɔ mai, dípoma-ŋai kâai. Gbêlei pâi dí miî, vé pâi sâai. Ŋɔŋ pâi díkerenîi, vé pâi líiŋ-nîi. Ǹaa a pâi kɛ̂i a ƃɛ́i ǹaa ƃɛlɛ kpɛɛ̂i núu koi.”