Azaya 62 - Bible

¹ Zerusâlɛŋ, ŋa pâi kɛ̂i nɔ́ ímaa lôno kɛ̂i. Fé pâi mɛi-saâi é lɛ́ɛ la zu íŋuŋ maa ƃô sɔlɔ ƃó, a gɛɛ íyee mɛi ɣâle-laai kɛ́ fòlo yɛ̂ɛ kpáleŋ ƃé lénîi kpînii.

² Zerusâlɛŋ, ǹɔii-ŋûŋ-ŋai kélee da pâi ítɔ̃yâ-laai kâai, ǹaa kaloŋ-ŋai dí íkɛtɛ-laai kɔ́lɔŋ. Da pâi láa nîna seêi yâ, ǹyaŋ Yâwɛɛ ǹyaa kpîŋ ƃé pâi láa nina seêi yâ.

³ Ya pâi kɛ̂i yɛ̂ɛ kâloŋ-ƃɔrɔ lɛ́lɛɛ Yâwɛɛ mɛni ma, íkɛ ƃò yɛ̂ɛ kpasa lɛ́lɛɛ Ɣâla mɛni ma.

⁴ Núu da fé pâi ŋɔ́nɔ ítôlii a “Ǹúui ńyii Ɣâla a bôlu tɔ̀ɔ m̀ai,” kpaa máŋ dí ílɔii tóli a “Fɛ̃ɛ-kpâlaŋ lɔii” Ílaa ninai ƃé pâi kɛ̂i a, “Ɣâla líi laai ǹyêei.” Da pâi kálɔii tôli a, “Lii-nɛɛ tùa-laa,” kpɛ́ni fêi Yâwɛɛ líi lâai káyêei, ǹyaŋ a pâi kɛ̂i yɛ̂ɛ kálɔii ŋɔsurɔ̂ŋ.

⁵ Berei nyáŋkpa a nɛnî-kpela kùla là a kɛ̂ a ǹíi lá, gɛ́ m̀aa kɔ̃̂ɔi, berei ƃé ílônii-sinaa da pâi ímaa kɔ̃ɔ̂i la. Ɣâla líi a pâi kɛ̂i a nɛ̃ɛ ímɛni ma, yɛ̂ɛ nyáŋkpa da nɛnî-kpela da díkîe-ni kùla a nina.

⁶ Óo Zerusâlɛŋ, ŋa ísiɣãŋ gwaa kélee maa tínaŋ a kpakolo-ŋa wála-wâla-ŋa. Díkaa ǹaa m̀ɛi káai a kpíni da fólo. Díkaa naa, díkɛ wɔ̀lɔ Yâwɛɛ ma, díkɛ ŋɔkono-têe-ŋai maa mɛ̂ni tòo gíli ŋa, dífa ǹɛɛ naa a gɛɛ é nia dîa.

⁷ Dí kɛ́ nɔ́ doôi gíli ŋá é lɛ́ɛ la zu é Zerusâlɛŋ ŋuŋ ma ƃó, é ǹaa kɛ́ a taa-lêe ńyii ǹɔii-ŋûŋ-ŋai kélee su-ƃela da pâi kɛ̂i ńaa maa tɛ̂i.

⁸ Yâwɛɛ a kono-têe kpanaŋ kɛ́ Zerusâlɛŋ mɛni ma. Ǹyaŋ vé pâi ŋ̀óo siɣêi pôlu ŋɔwála-wâla laai mɛ̂ni ma. È m̀o ǹyɛɛi, “Fé pâi ǹɛɛ̂i naa kási-sãai m̀á da é kɛ́ a kákpɔra-ƃelai kɔ́nɔ̃ŋ. Ŋɔ̃́ya-ŋa dífe ŋɔ́nɔ pâi kákpɔmɔ kpâlaŋ-ŋai m̀á ŋ̀aa-nɛ̃ɛ kulâi.

⁹ Kɛ́lɛ ǹúui kélee pâi sí-sɛŋ sîi, a pâi m̀á ŋ̀aa-nɛ̃̂ɛ kulâi. Gɔ́nɔ̃ŋ a pâi kɛ̂i ma, gɛ́ m̀ii gɛ́ Yâwɛɛ láa ma tɛ̂. Diai kélee pâi kpɔmɔ-kpâlaŋ kɛ̂i, da pâi m̀á ŋ̀aa-nɛ̃̂ɛ kulâi Ŋápɛrɛi maa waai ŋɛ́i túɛ.”

¹⁰ Zerusâlɛŋ-ƃela, ka kámu siɣe, ká kúla ziɣãŋ su, ká berei kpɛtɛ diai pâi pôlui dímɛni ma. Kà gɔni-ŋai kúla berei su ká ǹaa kpɛtɛ a ǹɛ́lɛɛ. Ka benâ-ŋa tɔɔ naa a gɛɛ ǹɔii-ŋûŋ-ŋai su-ƃelai da díkàa dí gɔ́lɔŋ,

¹¹ a gɛɛ Yâwɛɛ a môi ŋ̀éniɛi m̀éla kélee ma-ƃela dîa ǹyɛɛi, “Ka m̀ó Zerusâlɛŋ-ƃelai dîa a gɛ́ɛ Yâwɛɛ a pâi a gɛɛ é káŋuŋ ma ƃó. A pâi a diai é díŋuŋ ma ƃoi.”

¹² Da pâi kátôlii a “Ɣâla Ŋɔnûa Maa Waa-ŋai.” “Ǹûai Yâwɛɛ A Díŋuŋ Ma Ƃói.” Da pâi Zerusâlɛŋ taa-leei ŋí láa seêi a “Ɣâla Ŋɔwɛli Kɛ́-maa Taa-leei.” “Daa-lêei Nyii Ɣâla Fé Ǹyée Kula Ní Mui.”